Jolomil ch’utub’aj-ib’
Kawil ch’oolej re xjultikankil li yaal
Jolomil ch’utub’aj-ib’ re octubre 2022
11:26

Kawil ch’oolej re xjultikankil li yaal

Xb’aan li Elder Denelson Silva

Re li Setenta

Naq naqatzol li yaal, li Qaawa’ naxk’e li qahoonal chixb’aanunkil li tixb’aanu raj a’an wi ta wan arin anajwan.

Sa’ 1982, yookin chaq chixchoyb’al lin licenciatura jo’ aj topografo sa’ jun li tzoleb’aal.

Sa’ xraqik li chihab’, jun li wech aj tzolonel kiraj aatinak wik’in. Nanaq sa’ inch’ool naq koonajto’ rik’ineb’ li qakomon ut kookana chixk’atq jun li b’atz’unleb’aal. Naq koowulak aran, kixwotz wik’in li naxnaw chirix lix paab’aal, ut ink’a’ ka’ajwi’ kixk’ut chiwu jun li hu, kixsi b’an we. Chi yaal tz’aqal, ink’a’ nanaq sa’ inch’ool chixjunil li kixye we, a’b’anan nanaq sa’ inch’ool li hoonal a’an ut k’a’ru kiweek’a naq kixye, “Nawaj xwotzb’al lix nawom inch’ool aawik’in naq li hu a’in tz’aqal yaal ut naq lix evangelio li Jesukristo k’ojob’anb’il wi’chik.”

Chirix li qaatin, kinsutq’i sa’ ochoch, kinte li hu ut kiwil b’ayaq xsa’ ut chirix a’an kinkanab’ sa’ xna’ajeb’ li hu. Xb’aan naq ak wanko sa’ roso’jik li chihab’, ut chiru li chihab’ a’an tinchoy lin tzolb’al chirix li topografia, chi yaal naq ink’a’ jwal xink’e sa’ inch’ool li hu chi moko li wech aj tzolonel li kik’ehok we. Lix k’ab’a’ li hu nink’oxla naq naru nekeq’ehi. Hehe’, a’an lix Hu laj Mormon.

Oob’ po chirix a’an, eb’ li misioneer ke’wulak sa’ li wochoch; ak xik yookeb’ naq kinsutq’i chaq chi k’anjelak. Kinb’oqeb’ wi’chik chi kanaak. Koochunla chire li wochoch ut kine’xtzol.

Sa’ xsik’b’al li yaal, kinpatz’ reheb’ b’ar wan li iglees tz’aqal yaal ut chan ru naru tintaw a’an. Eb’ li misioneer ke’xk’ut chiwu naq naru tintaw lix sumenkil lin patz’om injunes wib’. Rik’in xnimal wajom, kinsumela rilb’al naab’al ch’ol sa’ lix Hu laj Mormon. Kintijok chi anchal inch’ool ut chi tiik li wajom (chi’ilmanq Moroni 10:4–5). Lix sumenkil inpatz’om tz’aqal saqenk ru, ut naab’al kutan chirix a’an—tz’aqal sa’ li 1 re mayo re 1983—kikub’e inha’ ut kink’ojob’aak jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Anajwan, naq nink’oxla lix tusulal ru li kik’ulman, nink’e reetal naq aajel ru lix kawilal xch’ool li wech aj tzolonelil naq kixwotz lix nawom xch’ool wik’in chirix li yaal li k’ojob’anb’il wi’chik ut kixk’e we jun ruuchinihom lix k’ojob’ankil wi’chik lix evangelio li Jesukristo, a’ ajwi’ lix Hu laj Mormon. Ch’ina b’ab’ay li k’anjel a’an, a’b’an jwal nim choq’ we; kixyiib’ jun li junajink rik’ineb’ li misioneer ut wik’in naq kinnaweb’ ru.

Kik’ute’ chiwu li yaal, ut chirix lin kub’iha’, kinwulak jo’ xtzolom li Jesukristo. Chiruheb’ lix numik li chihab’, ut rik’ineb’ xtenq’ li chaab’il kristiaan jo’ eb’ laj k’anjel, laj k’utunel, ut amiiw, ut rik’in li tzolok injunes wib’, kintzol naq sa’ li kutan naq kinsumela ok choq’ xmoos li Jesukristo, kinsumela li k’anjel ink’a’ ka’ajwi’ re xkolb’al rix li yaal, re b’an ajwi’ xjultikankil.

Naq wanko re xpaab’ankil li yaal ut xtaaqenkil, ut naq naqayal qaq’e chi wulak jo’ tz’aqal xtzolom li Jesukristo, ink’a’ naqak’ul jun li certificado b’ar wi naxye naq ink’a’ chik toopaalto’q, naq ink’a’ chik taayale’q qix re toonajto’q rik’in li yaal, naq ink’a’ chik te’aatinaq chiqix, malaj naq ink’a’ chik taqanumsi li rahilal. A’b’anan lix nawb’al li yaal naxk’ut naq rik’in li ok chiru li bʼe laatzʼ ut kaʼchʼin ru li tooxk’am rik’in li qaChoxahil Yuwa’, rajlal wanq junaq li eleb’aal chiruheb’ li ch’a’ajkilal a’an (chi’ilmanq 1 Korintios 10:13); junelik taawanq xkab’ rix qach’ool chirix li qapatz’om chiru li qapaab’aal (chi’ilmanq Dieter F. Uchtdorf, “Vengan, únanse a nosotros,” Liahona, noviembre 2013, 21); ut sa’ xraqik, wan li qoyb’enihom naq maajun wa wanqo qajunes chixnumsinkil li rahilal, xb’aan naq li Dios narula’aniheb’ lix tenamit sa’eb’ lix majelal (chi’ilmanq Mosiah 24:14).

Naq naqatzol li yaal, li Qaawa’ naxk’e li qahoonal chixb’aanunkil li tixb’aanu raj a’an wi ta wan arin anajwan. Relik chi yaal, a’an xk’utuk li tento taaqab’aanu rik’ineb’ lix k’utum: “Ut laaʼex texxik saʼ lix wankilal lin Musiqʼ, ut teejultika lin evangelio, saʼ kaʼkabʼil, saʼ lin kʼabʼaʼ, ut teetaqsi xyaabʼ eekux joʼ rikʼin xyaabʼ jun trompeet, ut teechʼolobʼ li waatin chanchanebʼ lix anjel li Dios” (Tzol’leb’ ut Sumwank 42:6). Li hoonal re k’anjelak jo’ misioneer choq’ reheb’ li saaj a’an jun ajwi’!

B’aanuhomaq usilal, ex saaj winq, meeb’ay eerib’ chixkawresinkil eerib’ re k’anjelak chiru li Qaawa’ jo’ misioneer. Naq nekenumsi li k’a’ru texxk’e chixpatz’b’al ma texxik sa’ mision malaj ink’a’—maare xkanab’ankil lee tzolb’al, xkanab’ankil li saaj ixq nekera chi maak’a’ jun lee royb’enihom naq texsutq’iiq rik’in wi’chik, malaj xkanab’ankil lee trab’aaj—chijultiko’q eere li kixb’aanu li Kolonel. Sa’ lix k’anjel, a’an ajwi’ kixk’ul li ch’a’ajkilal, jo’ li eetz’uuk, li rahob’tesiik, ut li k’ahil sek’ re lix mayej aj tojol-ix. A’b’an sa’ chixjunil kixsik’ ru xb’aanunkil li rajom lix Yuwa’ ut xk’eeb’al xloq’al. (Chi’ilmanq Jwan 5:30; 6:38–39; 3 Nefi 11:11; Tzol’leb’ ut Sumwank 19:18–19.)

Ex saaj ixq, chaab’il k’ulunik choq’ eere, wi teeraj, sa’ lix k’anjel li Qaawa’, ut naq teekawresi eerib’ chi k’anjelak chiru a’an jo’ misioneer, moko ach’ab’anb’ilaqex ta chiruheb’ ajwi’ li ch’a’ajkilal a’an.

Chejunilex li nekeraj k’anjelak chiru, ninyeechi’ eere naq 24 malaj 18 po re k’anjelak sa’ mision taanume’q chanchan raj naq texkanaaq sa’ ochoch, a’b’an li k’anjelak sa’ mision li na’oyb’enink reheb’ li tiikil saaj winq ut saaj ixq k’ulub’ejeb’ re li Iglees a’in, a’an jun ajwi’. Moko naru ta naqak’e chi nume’k xb’aanunkil ruuchil li Kolonel Jesukristo ut lix Iglees. Tz’aqonk naab’al sut sa’ li tijok, xk’anjelankil ut xwotzb’al lee nawom naab’al sut sa’ li kutan, xtzolb’al li loq’laj hu chiru naab’al hoor, xnawb’aleb’ ru naab’al li kristiaan li ink’a’ raj teenaweb’ ru wi ta texkanaaq sa’ ochoch, a’aneb’ li na’leb’ jwal loq’. A’an ajwi’ lix k’ihal li na’leb’ k’uulanb’il choq’ reheb’ li saaj li b’oqb’ileb’ chi k’anjelak sa’ mision. K’ulb’ilex ut aajel eeru. B’aanuhomaq usilal, meekub’si xwankil li xik chi k’anjelak sa’ mision, xb’aan naq k’a’jo’ xchaq’alil ru li teek’ul sa’ mision. “Nim xloq’aleb’ li aamej sa’ rilob’aal li Dios” (Tzol’leb’ ut Sumwank 18:10), jo’ ajwi’ lix loq’al lee raam.

Naq texsutq’iiq chaq sa’ lee k’anjel, maare li saaj ixq malaj winq ink’a’ chik yooq cheroyb’eninkil, a’b’an xetzol chaq chi us chan ru xtikib’ankil aatinak rik’ineb’ jalan. Wanq chik xyaalal lee tzolb’al rik’in li saqen xek’ul chirix lix kawresinkil eerib’ re jun chaab’il k’anjel, ut chi k’ojk’ooq eech’ool teereek’a naq xejultika chi anchal eech’ool li evangelio re tuqtuukilal, xjultikankil chirix lix k’ojlajik wi’chik li yaal.

Laa’ex li ak sumsuukex ut chejunilex chik, jwal aajel eeru sa’ lix k’anjel li Qaawa’. Kawresihomaq eerib’. Chexwanq chi saq eeru, sik’omaq rilb’al eerib’ eejunes sa’ tib’elej ut sa’ musiq’ej, xb’aan naq li hoonal re xb’aanunkil li tixb’aanu raj li Qaawa’ choq’ reheb’ li ralal xk’ajol a’an moko ka’aj ta wi’ choq’ re jun li ch’uut. Lix chaq’al ru na’leb’ qak’ulum li wixaqil ut laa’in xe’k’ulman ink’a’ naab’al chihab’ chaq anajwan naq yooko chi k’anjelak qochb’eeneb’ li sik’b’il ruhil sumsu, sa’ li sik’b’il ruhil na’ajej, ut rik’ineb’ li sik’b’il ruhil kristiaan.

Eb’ li na’leb’ kink’ul sa’ xraqik lin tzolb’al re topografia kixk’ut chiwu naq junelik naqakol rix li yaal naq naqajultika, ut naq li xkolb’al rix li yaal wan rajb’al. Lix kolb’al rix li yaal maajun wa taab’aanumanq sa’ josq’il, rik’in b’an li ajom re rahok, wotzok, ut xb’oqb’aleb’ li kristiaan li naqawotz wi’ li yaal, ka’ajwi’ rik’in xk’oxlankil lix wanjikeb’ sa’ li yu’am a’in jo’ ajwi’ sa’ musiq’ej eb’ li ralal xk’ajol jun li raarookil Choxahil Yuwa’b’ej (chi’ilmanq Mosiah 2:41).

Sa’ li jolomil ch’utub’aj-ib’ re octubre 2021, li Awab’ej Russell M. Nelson, li qaraarookil profeet, kixk’ut naq us ta li neke’xye junjunq, chi yaal tz’aqal naq natawman li us ut li ink’a’ us. Chi yaal naq wan jun li tz’aqal yaal—jun li junelikil yaal. (Chi’ilmanq “Saq ruhil yaal, saq ruhil tzol’leb’ ut saq ruhil k’utb’esinb’il na’leb’,” Jolomil ch’utub’aj-ib’ re octubre 2021.)

Eb’ li loq’laj hu neke’xk’ut chiqu, “Li yaal aʼan xnawbʼal li kʼaʼaq re ru joʼ chan ru wan, joʼ kiwan, ut joʼ toj taawanq” (Tzol’leb’ ut Sumwank 93:24).

Lix nawb’al Ii yaal moko nokoxchaab’ilob’resi ta wi’chik chiruheb’ li qech kristiaanil, naxk’ut b’an chiqu li tento taqab’aanu re toosutq’iiq rik’in li Dios.

Naq nekexxik chi uub’ej rik’in li Kristo chi anchal eech’ool, moko ka’aj ta wi’ re xjultikankil li yaal, re b’an ajwi’ xyu’aminkil li yaal, teetaw xkawil eech’ool ut eetuqtuukilal chiru li toch’e’k li teenumsiheb’ sa’eb’ li kutan chal re.

Eb’ li yalb’a-ix re li yu’am naru nokohe’xt’an, a’b’an chiqanaw naq wi naqak’anjela li qapaab’aal chirix li Kristo, “li qatawasinkil yal chiru jun chʼina kʼamok taawanq” (Tzol’leb’ ut Sumwank 121:7) wi naqakʼoxla li junelik qʼe kutan. B’aanuhomaq usilal, meek’e junaq xkutankil lix raqik li yale’k ut ch’a’ajkilal. Chepaab’ li qaChoxahil Yuwa’ ut mich’inan eech’ool, xb’aan naq wi nach’inan qach’ool, maajun wa taqanaw k’a’ raj ru taak’ulmanq sa’ xraqik li qab’e sa’ li rawa’b’ejihom li Dios.

Chapomaq eerib’ chi kaw rik’in li yaal, rik’in tzolok sa’ tz’aqal xyo’leb’aal li yaal:

  • Eb’ li loq’laj hu (chi’ilmanq 2 Nefi 32:3).

  • Li raatineb’ li profeet (chi’ilmanq Amos 3:7).

  • Li Santil Musiq’ej (chi’ilmanq Jwan 16:13).

Ninwotz lin nawom chirix li Jesukristo ut naq a’an a’in lix Iglees. Wan jun li qayo’yookil profeet, ut junelik taqeek’a naq ach’ab’anb’ilo naq naqajultika li yaal chi anchal qach’ool. Sa’ xk’ab’a’ li Jesukristo, amen.