E Poder di JesuCristo den Nos Bida Tur Dia
E fuente di nos forsa ta fe den JesuCristo ora nos ta purba intenshonalmente di bin serka djE kada i tur dia.
Kerido rumannan, esaki ta E Iglesia di JesuCristo di e Santunan di e Delaster Dianan. Ki alegria di ta reuní komo Su Iglesia. Mi ta gradesido ku Presidente Russell M. Nelson a kòrda nos pa usa e nòmber korekto di Señor Su Iglesia frekuentemente, asina nos ta kòrda di ken e Iglesia aki ta i di ken su enseñansanan nos ta sigui.
Presidente Nelson a deklará: “Den e dianan benidero, nos lo mira e manifestashonnan mas grandi di e poder di e Salbador ku mundu a yega di mira hamas. … E lo aprobá privilegionan, bendishonnan, i milagernan innumerabel riba e fielnan.”1
Un di e privilegionan di mas grandi pa ami i mi kasa, Renee, ta konosé e Santunan kaminda nos ta sirbi. Nos ta tende nan historianan, nos ta testigu di nan pèrdidanan, nos ta kompartí nan duelo, i nos ta regosihá ku nan éksito. Nos tabata testigunan di hopi di e bendishonnan i milagernan ku e Salbador a drama riba e fielnan. Nos a konosé personanan ku a pasa dor di imposibel, ku a sufrí e inimaginabel.
Nos a wak e manifestashon di e poder di e Salbador den un viuda ku a pèrdè su kasa turesten nan tabata sirbi un mishon di Señor na Bolivia.2 Nos a mir’é den un muhé hóben na Argentina ku a wòrdu pushá bou di un trein i a pèrdè su pia, djis paso algun hende kier a hòrta su telefòn.3 I den un tata soltero, ku awor mester piki e pidanan i fortalesé su yu muhé despues di e akto ineksplikabel di krueldat ei. Nos a wak den e famianan ku a pèrdè nan hogarnan i tur poseshon den e kandela na Chile dos dia promé ku Pasku 2022.4Nos a wak e den esnan ku ta sufri despues di un divorsio troumátiko i den esnan ku ta víktimanan inosente di abuso.
Kiko ta duna nan e poder pa pasa dor di kosnan duru? Kiko ta duna un kapa èkstra di forsa pa sigui ora tur kos ta mustra pèrdí?
Mi a haña ku e fuente di e forsa ei ta fe den JesuCristo ora nos ta purba intenshonalmente di bin serka djE kada i tur dia.
E profeta Jakob a siña, “I E ta bin na mundu pa E por redimí tur hende si nan skucha Su stèm; pasó at’aki, E ta sufri e dolónan di tur hende, si, e dolónan di tur kriatura bibiente, tantu hòmber komo muhé, i muchanan, kendenan ta pertenesé na e famia di Adam.”5
Tin biaha, tin fe den JesuCristo por parse manera algu imposibel, kasi inalkansabel. Nos lo pensa ku bini na Cristo ta rekerí un forsa, poder, i perfekshon ku nos no tin, i nos no ta haña e energia pa hasi tur kos. Pero lo kual ku mi a siña for di tur e hendenan aki ta ku fe den JesuCristo ta lo kual ku ta duna nos e energia pa kuminsá e biahe. Tin biaha nos por pensa, “mi tin ku drecha mi bida promé ku mi bini na Jesus,” pero e bèrdat ta ku nos ta bini na Jesus pa drecha nos bida dor di djE.
Nos no ta bini na Jesus pasobra nos ta perfekto. Nos ta bini na djE pasobra nos ta imperfekto i den Dje nos por “wòrdu perfekshoná.”6
Kon nos por kuminsá ehersé un tiki fe tur dia? Pa ami e ta kuminsá mainta: ora mi lanta, na lugá di wak mi telefón, mi ta hasi orashon. Asta un orashon simpel. Despues mi ta lesa un eskritura. Esaki ta yuda mi kombenio tur siman ku mi ta hasi ora mi partisipá di e sakramento pa “semper kòrd’É.”7 Ora mi kuminsá mi dia ku un orashon i un eskritura, mi por “kòrd’É” ora mi wak mi telefòn. Mi por “kòrd’É” ora mi ta enfrentá problemanan i konfliktonan, i mi ta purba di enfrentanan manera Jesus lo hasi’é.
Ora mi “kòrd’É,” mi ta sinti e deseo di kambia, di repentí. Mi a haña e fuente di energia pa warda mi kombenionan, i mi ta sinti e influensia di e Spiritu Santu den mi bida “i warda Su mandamentunan ku El a duna[mi]; pa [mi] semper tin Su Spiritu.”8 E ta yuda mi pa perseverá te na fin.9 Òf mínimo te na final di e dia! I den e dianan ku mi ta faya di kòrd’É hinter dia, E ta akinan ainda, stimando mi i bisando mi “e ta bon; bo por purba un biaha mas mañan.”
Ounke nos ta imperfekto pa kòrd’É, nos Tata Selestial stimá nunka ta faya di kòrda riba nos.
Un di e fayonan ku nos ta hasi hopi biaha ta di pensa ku wardando e kombenionan, òf e promesanan ku nos ta hasi ku Dios, e ta di un manera un transakshon ku nos ta hasi ku nE: mi ta obedesé, i E lo protehá mi pa nada malu pasa ku mi. Mi ta paga diesmo, i ami nunka lo no pèrdè mi trabou òf e kandela lo no kima mi kas. Pero ora e kosnan no bai manera nos a espera, nos ta yora na Señor, “No ta importá bo ku nos ta peresé?”10
Nos kombenionan no ta djis un transakshon; nan ta un transformashon.11 Pa medio di mi kombenionan mi ta risibí e poder santu i ku ta fortalesé di JesuCristo, kual ta permití mi bira un persona nobo, pa pordoná lo kual ku tabata mustra imperdonabel, pa soportá e imposibel. Kòrdando JesuCristo intenshonalmente semper ta poderoso; ta duna mi un forsa adishonal pa “warda Su mandamentunan ku El a duna[mi].”12E ta yuda mi pa mi ta mas bon, pa hari pa niun motibu, pa ta un pasifikadó, 13pa evitá konflikto, pa laga Dios prevalesé den mi bida.14
Ora nos doló òf e doló di un hende ku nos stima ta asina hopi ku nos no por want’e, kòrdando JesuCristo i biniendo na djE e karga por bira lihé, suavisá e kurason, i aliviá e doló. Esaki ta e poder ku ta abilitá un tata mas leu di su kapasidat natural pa sostené su yu muhé traves di e doló físiko i emoshonal di perde su pia.
Ora Elder Soares a bishita Argentina lastu yüni i a puntra Flavia tokante su aksidente trágiko, e a kontesta ku fe, “Mi a eksperensiá konfushon, amargura, rabia i odio ora [esaki a sosodé]. Algu ku a yuda mi ta no puntra, ‘dikon ami?’ pero ‘pa kiko?’ … Esaki ta algu ku a hiba mi mas serka di otronan i di Señor’… Na lugá di distansiá mi mes di Dje, mi mester a pega na djE.” 15
Presidente Nelson a siña: “E premio pa warda e kombenionan ku Dios ta un poder selestial—poder ku ta fortalesé nos pa wanta tur tribulashon, tentashonnan, i angustia mihó. … Sinembargo, esnan ku warda e kombenionan tin derechi na un tipo espesial di sosiegu.”16 Esaki ta e tipo di pas i sosiegu ku mi a mira den e wowonan di e viuda, apesar di e doló di sinti su kasa su falta tur dia.
E Tèstamènt Nobo ta bisa nos di un tempu ora Jesus i Su disípulonan tabata riba un barku:
“I a lanta un tempestat di bientu fuerte, i e olanan tabata dal den e boto. …
“I E tabata … na soño riba e kusinchi: i nan a lant’é i a bis’é: Maestro, no ta importá Bo ku nos ta peresé?”
“I ora ku El a lanta, El a reprendé e bientu i a bisa e laman: Silensio, keda ketu. …
“I El a puntra, “Pakiko boso tin tantu miedu asina? ainda boso no tin fe?”17
Ami semper tabata tin kuriosidat pa e historia aki. Señor a spera pa nan usa nan fe pa kalma e tormenta? Pa reprendé e bientunan? Fe den JesuCristo ta e sintimentu di pas pa soportá e tormenta, sabiendo ku nos lo no peresé pasobra E ta den e boto ku nos.
Esaki ta e tipo di fe ku nos a wak ora nos a bishitá e famianan despues di e kandelanan na Chile. Nan kas a kima te na e fundeshi; nan a pèrdè tur kos. Ora nos tabata kanando kaminda nan hogarnan tabata, nan a konta nos tokante nan eksperensianan, nos a sinti ku nos tabata pará riba suela santu. Un hermana a bisa mi kasa, “Ora mi a wak ku e kasnan serka di nos tabata kimando, mi tabata tin e impreshon ku nos kas lo kima, ku nos lo bai pèrdè tur kos. Na lugá di desesperashon, mi a eksperensiá un sinti di pas indeskriptibel. Di algun manera, mi a sinti ku tur kos lo bai BON.” Kere Dios i wardando nos kombenionan kan’é ta trese poder na nos debilidatnan i konsuelo na nos doló.
Mi ta gradesido pa e oportunidat ku Renee i ami tabatin di konosé algun di e Santunan ekstraordinario aki, pa nan ehèmpelnan di fe, forsa, i perseveransia. Pa historianan di kurason kibrá i desapuntá ku nunka lo sali riba un portada di un korant òf nunka lo bira viral. Pa e potrètnan ku no a wòrdu saká di lágrimanan dramá i orashonnan ofresé despues di un pèrdida òf un divorsio troumátiko; pa e publikashonnan ku nunka a wòrdu hasí di e miedu, e tristesa, i e doló ku ta bira soportabel danki na nan fe den JesuCristo i Su Ekspiashon. E personanan aki a fortalesé mi propio fe, i pa esaki mi ta profundamente gradesido.
Mi sa ku esaki ta e Iglesia di JesuCristo. Mi sa ku e ta kla pa investí nos ku Su poder si nos bini na Dje un i tur dia. Den e nòmber di JesuCristo, amèn.