Impreshonnan di e Spiritu

Pa Elder Gary E. Stevenson

Di e Quorum di e Diesdos Apòstelnan

E kompania konstante di e Spiritu Santu ta un di e donnan spiritual grandi ku Santunan di e Delaster Dianan ta gosa di dje.

Introdukshon

Resientemente, e wowonan di e mundu deportivo a enfoká riba e Kopa Mundial di Hende Muhé di FIFA 2023 tené na Oustralia i Nueva Zelandia. Atletanan di nivel mundial selekshoná for di mas di 200 tim nashonal di rònt mundu a demostrá nan brio, dedikashon, talento, i atletismo ora nan a kompetí pa e honor di mas haltu den mundu di futbòl.

Nos ta asombrá di e aktuashon di e numeroso deporte i otro disiplinanan ku a logra e nivel mas haltu di nan arte. Nos ta papia di nan talentonan duná di Dios òf donnan. Esaki ta inkluí esnan ku talento di baile, gimnasio, músika, arte, drama, matemátika, siensia, i mas. Kada persona ta demostrá donnan duná di Dios i despues ta ser refiná i perfekshoná dor di un bida di trabou duru, estudio, i práktika. Donnan duna di Dios ta hasi hende talentoso.

Ehersé Donnan Spiritual

Mira dor di un lèns di evangelio, Dios ta investí Su yunan ku hopi donnan spiritual, hasiendo nan hendenan ku donnan spiritual. Miembronan di Iglesia ku ta warda kombenio ta investí ku donnan di e Spiritu, ku ta inkluí e don di un testimonio di JesuCristo komo nos Salbador, e don di e Spiritu Santu, e don di fe pa sana i pa wòrdu saná, e don di komprendementu, e don di risibí milagernan, i e don di sabiduria i konosementu.¹ Señor ta invitá nos pa sinseramente buska e mihó donnan, asta esnan spiritual. E ta duna donnan spiritual pa bendishoná nos i pa usa pa bendishoná otronan.²

Regresando na nos analogia di artistanan talentoso, ta importante pa kòrda ku un don so no ta hasi ku un maestro ta hasi algu. Apesar di talento natural ekstraordinario, ta dor di práktika i esfuerso duru artistanan ta refiná i perfekshoná nan arte pa alkansá e nivel mas haltu di arte. Asta e donnan ei risibí i habrí hopi biaha ta kompañá pa e lenguahe tímido “mester hink‘é den otro.”

Meskos, mi a ripará un kurva di siñamentu asosiá ku donnan spiritual. Ehersé donnan spiritual ta rekerí ehersisio spiritual. “Tener la guía del Espíritu Santo en su vida requiere trabajo espiritual. Esta obra incluye la oración ferviente y el estudio constante de las Escrituras. También incluye guardar sus convenios y los mandamientos de Dios. … Incluye participar dignamente de la Santa Cena cada semana.”³

Kua ta e frutanan di ehersé donnan spiritual? Nan ta inkluí impreshonnan di e Spiritu ku ta yuda nos enfrentá nesesidatnan diario i ta mustra nos kiko pa hasi i bisa di bendishonnan di pas i konsuelo. Ora nos skucha i aktua na e inspirashonnan spiritual, e Spiritu Santu ta magnifiká nos abilidatnan i kapasidatnan pa logra mas ku nos por hasi riba nos mes. E donnan spiritual presioso aki lo yuda nos den tur aspekto di nos bida.⁴

E kompania konstante di e Spiritu Santu ta un di e donnan spiritual grandi ku Santunan di e Delaster Dianan ta gosa di dje.

Kon importante e don aki ta? Presidente Russell M. Nelson a kontestá e pregunta aki kategórikamente ora el a deklará ku “den e dianan benidero, lo no ta posibel pa sobrebibí spiritualmente sin e guia, direkshon, konsuelo, i influensia konstante di e Spiritu Santu.”⁵

Kon pa Invitá i Rekonosé e Impreshonnan di e Spiritu?

Durante mi ministerio, mi a haña un anhelá universal pa tur hende pa sa kon pa invitá i konosé e impreshonnan di e Spiritu Santo. Impreshonnan di e Spiritu ta masha personal i ta bini na diferente manera. Nos ta, sinembargo, bendishoná pa por tin palabranan di e profetanan, tantu antiguo komo moderno, pa duna nos informashon balioso tokante kon pa risibí direkshon di e Spiritu.

Laga mi ofresé kuater prinsipio di guia ku lo por yuda boso invitá i rekonosé e impreshonnan di e Spiritu.

Para den Lugánan Santu

E promé ta pa para den lugánan santu.⁶ Resientemente mi a partisipá den e casa abierta di e Tèmpel di Tokyo Hapon. E reakshon na invitashonnan formal mandá tantu na media i invitadonan VIP a surpasá espektativanan. Hopi hende a partisipá na e bishitanan guiá aki. Invitadonan tabata profundamente konmoví pa e bunita tèmpel, inkluso patronchinan i motivonan di konekshonnan tradishonal hapones profundo. Mas konmovedor ainda tabata e reakshon di reverensia i rèspèt ku a surgi di invitadonan ora ordenansanan pa antepasadonan tabata wòrdu deskribí den salanan unda nan lo a tuma lugá. Pero e kos di mas kaluroso tabata e impulsonan di e Spiritu.

Un di e momentunan aki tabata ku un funshonario di gobièrnu prominente ku ta sigui grabá den mi mente. Despues di un momento di silensio pa meditá den e sala selestial, emoshoná i profundamente konmoví el a bisa mi den mi orea, “Inkluso e aire ku mi ta respirá den e sala aki ta sinti diferente”. Mi a rekonosé ku e tabata trata di deskribí e presensia di Spiritu Santu, ku, di bèrdat, ta biba den lugánan santu. Si bo ta spera di sinti e Spiritu, [sòru di] ta den un lugá kaminda e Spiritu por mora fásilmente.

Nos tèmpelnan i hogarnan ta e mas sagrado di e lugánan dediká aki. Den nan nos ta invitá mas fásil i rekonosé e Spiritu. Otro lugánan santu ta edifisionan di seminario i instituto, i sitionan di historia di Iglesia i sentronan pa bishitantenan. Para den lugánan santu.

Para ku Hende Santu

Di dos, para ku hende santu. Mi ta bai deskribí e di dos prinsipio ku ta guia ku un otro rekuerdo.

Mi lo no lubidá nunka ku mi a partisipá na un enkuentro ku a tuma lugá den un arena deportivo popular. Normalmente, e arena aki tabata yená ku fanátikonan hasiendo bochincha ku tabata animá nan tim di kas i kisas asta tabata hasi chèrchè di nan oponente. Pero e anochi ei e ambiente tabata diferente. E arena tabata yen ku míles di hóben reuní pa honra i konmemorá e bida di e Profeta José Smith. Nan tono respetuoso i trankil; nan gratitut, i nan kurason yen di orashon a yena e arena ku e presensia di Spiritu Santu. Mi por a wak esaki den nan kara. Tabata e don di Spiritu Santu den akshon, konfirmando e testimonionan ku José Smith a duna i e Restorashon di e evangelio.

No por kontené Spiritu Santu di asistí na un enkuentro di pueblo santu. Si bo ta spera di sinti e Spiritu, ta serka hende kaminda e Spiritu por biba fásilmente. E Salbador a bis’é di e siguiente manera: “Pasobra kaminda dos òf tres ta reuní den mi nòmber, mi ta ei meimei di nan.”⁷ Pa hóbennan, konsiderá boso enkuentronan di hende santu, quorumnan i klasnan, FSY [pa e fortalesa di hubentut] i seminario, aktividatnan di bario i estaka—koronan di bario. Skohe pa ta huntu ku hende i bai na lugánan unda tin hustisia. Buska bo fortalesa den number. Buska bon amigu. Ta [un] bon amigu. Sostené otro unda ku bo por ta. Para ku hende hustu.

Tèstifiká di Bèrdatnan Sagrado

Di tres, tèstifiká tokante e bèrdatnan sagrado mes tantu biaha ku bo por. E Konsoladó semper ta kompartí Su bos ora nos ta tèstifiká ku nos bos. E Spiritu ta duna testimonio na e diskursante i tambe na e skuchadó.

Mi ta kòrda ku un biaha mi a tuma un taksi pa un kareda di 45 minüt na e Siudat di New York. Despues di a tene un kombersashon ameno ku e shofùr di taksi durante mi biahe pa aeropuerto, mi a pag’é i a prepará pa baha for di e taksi. Despues mi a realisá ku mi no a duna un testimonio di loke mi a kompartí. Pousando, mi a kompartí un testimonio simpel i kòrtiku, invitando e Spiritu, tresiendo lágrima na nos tur dos su wowonan.

Ora bo ta buska i tuma oportunidat pa kompartí bo testimonio ku otronan, lo bo krea momentunan pa rekonosé e Spiritu pa bo mes.

Skucha e Spiritu Santu

E delaster prinsipio ta pa skucha e Spiritu Santu. E por ta nos kompañero konstante, pero E ta papia den un tono sutil i trankil. Profeta Elias a haña ku e stèm di Señor no tabata den bientu, teremoto òf kandela sino tabata un “stèm trankil.”⁸ E “no [ta] un stèm di tormenta” sino mas bien “un stèm trankil di un suavidat perfekto, manera si fuera tabata un susuro,” i sinembargo e por “perforá asta e alma mes.”⁹

Presidente Boyd K. Packer a bisa: “E Spiritu no ta atraé nos atenshon dor di grita òf akudí nos ku un man fuerte. Mas bien e ta susurá. E ta karisiá asina suavemente ku si nos ta preokupá por ta nos no sintié mes.”¹⁰ Mi a tuma nota ku tin biaha Su stèm ta asina sutil, òf mi ta asina preokupá, ku un ser kerí ta kapta e [stèm] pa mi. Hopi tabata e biahanan ku e inspirashonnan di e Spiritu Santu a bini na mi pa medio di mi kasá, Lesa. Mayornan hustu òf lidernan tambe por risibí guia inspirá pa bo.

E bochincha, gritamentu i pleitu ku ta reina den mundu por dominá e impreshonnan trankil di e Spiritu Santu. Haña un lugá trankil, un lugá santu kaminda bo por buska pa risibí guia di Spiritu Santu.

Algun Palabra di Prekoushon

Miéntras bo ta konsiderá e prinsipionan aki pa invitá i rekonosé e Spiritu, konsiderá e siguiente palabranan di prekoushon i guia.¹¹

Konfirmá bo impreshonnan spiritual. Por ehèmpel, impreshonnan di Spiritu lo ta di akuerdo ku e skrituranan i e enseñansanan di e profetanan bibu.

Tin sigur ku e sintimentunan ku bo ta haña ta di akuerdo ku bo asignashon. Si bo no ta yamá dor di e outoridat korekto, bo no ta risibí e impreshonnan di e Spiritu pa konsehá òf koregí otronan.

Asuntunan spiritual no por wòrdu fòrsá. Bo por kultivá un aktitut i un ambiente ku ta invitá e Spiritu, i bo por prepará bo mes, pero bo no por dikta kon òf ki ora inspirashon ta bini. Tene pasenshi i konfia ku lo bo risibí loke bo tin mester na e momentu korekto.

Usa bo mes bon huisio. Tin biaha nos ke pa Spiritu guia nos den tur kos. Sinembargo, hopi biaha Señor ta deseá pa nos usa nos inteligensia ku Dios a duna nos i aktua di un manera ku ta konforme nos mihó komprondementu. Presidente Dallin H. Oaks a siña:

“Un deseo pa Señor guia nos ta un forsa, pero mester ta akompañá pa un komprondementu ku nos Tata Selestial ta laga hopi desishon pa nos eskoho personal. … Esnan ku ta trata di laga tur desishon na Señor i pidi pa Dios revelá nan mes na kada desishon, pronto lo haña nan mes den sirkunstansianan ku nan ta pidi pa guia i no ta risibí esei. …

“Nos mester studia e kosnan den nos mente. … E ora ei nos mester hasi orashon pidi guia i aktua riba dje. … Si nos no risibí guia, nos mester aktua di akuerdo ku nos mihó kriterio.”¹²

Konklushon ku un Invitashon

Na konklushon, e Santunan di e Delaster Dianan ta un pueblo ku tin e don di kumpli ku kombenio. Sinembargo, ta keda na kada un di nos pa buska pa ehersé nos donnan spiritual i despues invitá i siña rekonosé e inspirashonnan di Spiritu. Kuater prinsipio di guia pa asistí nos den e enkargo spritual krusial aki ta:

Para den lugánan santu.
Para ku hende santu.
Tèstifiká di bèrdatnan sagrado.
Skucha e Spiritu Santu.

Bo abilidat pa invitá i rekonosé e inspirashonnan di e Spiritu lo desaroyá un paso kada biaha. “Si bo bira mas sintonisá ku e idioma di e Spiritu, ta manera si bo tabata siña un otro idioma. E ta un proseso gradual ku ta rekerí esfuerso diligente i pasenshi.”¹³

Pa nos bolbe na unda nos a kuminsá, por fabor kòrda ku komo Santunan di e Delaster Dianan boso ta donnan. Imaginá bo mes e senario familiar di e djadumingu di ayuno, ku a ser deskribí na mi resientemente. Un mucha chikitu, pará riba un banki, ku apénas tabata visibel riba e púlpito. Su tata a para banda di dje, i a anim’é i a asistí ku susuronan suave den su orea ora ku e tabata konta ku orguyo: “Ami ta un yu di Dios.”

E siguiente testimonio ku a sigui a bini di un hóben adulto soltero ku a kuminsá ku un chiste nèrvioso: “Mi tabata deseá ku mi tabatin un hende ku ta susurá asina den mi orea.” E ora ei el a haña un flash di inspirashon i a tèstifiká: “Mi tin un hende ku ta susurá mi den mi orea asina—e Spiritu Santu!”

Mi ta finalisá ku un invitashon spesial pa tur hóben! Hopi di boso ta kuminsá bo dia parando dilanti un spil. Mañan, e siman aki, e aña aki, semper, pousa ora bo ta mira bo mes den spil. Pensa den bo mes, òf bisa na bos haltu si bo ke: “Wow, mira mi aki! Mi ta tremendo! Mi ta un yu di Dios! E konosé mi! E stima mi! Mi tin e donnan—dotá ku e Spiritu Santu komo mi kompañero konstante.

Mi ta agregá mi testimonio na boso, Santunan di e Delaster Dianan dotá, di Dios e Tata, JesuCristo, i e Spiritu Santu, ku ta duna testimonio di Nan. Den e nòmber di JesuCristo, amèn.