Rumannan den Cristo
Ku nos por disfrutá di e laso spiritual ku ta eksistí entre nos i balorá e atributonan diferente i donnan variá ku nos tur tin.
Mi kerido rumannan, nos tabatin un seshon di konferensia maravioso awe. Nos tur a sinti e Spiritu di Señor i Su amor pa medio di e mensahenan maravioso kompartí dor di nos lidernan. Mi ta sinti privilegiá pa dirigí mi mes na boso e atardi aki komo e lastu diskursante di e seshon aki. Ta mi orashon ku e Spiritu di Señor por kontinuá ku nos ora nos ta regosihá huntu komo berdadero rumannan den Cristo.
Nos kerido profeta, Russell M. Nelson, a deklará: “Mi ta hasi un yamada na nos miembronan tur kaminda pa kana dianti den bandonando e aktitutnan i akshonnan di prehuisio. Mi ta roga na boso pa promové rèspèt pa tur Dios Su.”1 Komo un Iglesia global i semper kresiendo, sigui e invitashon di nos profeta ta un pre rekisito vital pa konstruí e reino di e Salbador den kada nashon di mundu.
E evangelio di JesuCristo ta siña nos ku nos tur ta yunan spiritual prokrea di tata i mama selestial ku berdaderamente stima nos2 i ku nos a biba komo un famia den presensia di Dios promé ku nos a bin na e mundu aki. E evangelio tambe ta siña ku nos tur a wòrdu kreá den e imágen i semehansa di Dios.3 P’esei, nos ta igual dilanti di djE,4 pasobra E “a krea for di un sanger tur nashonnan di hòmber [i muhé].”5 P’esei, nos tur tin naturalesa, herensia, i potensial divino, pasobra tin un Dios i Tata di tur, ku ta mas altu ku tur, i mas ku tur, e ta den [nos] tur.”6
Komo disípulonan di Cristo, nos ta invitá pa oumentá nos fe den, i amor pa, nos rumannan spiritual dor di genuinamente uni nos kurasonnan den union i amor, sin importá nos diferensianan, di e manera aki oumentá nos abilidat pa promové rèspèt pa e dignidat di tur e yunan di Dios.7
Esei no tabata eksaktamente e kondishon ku e pueblo di Nefi a eksperensiá pa kaso dos siglo despues ku Cristo a ministrá na nan?
“I sigur no tabatin hendenan mas kontentu bou di tur hende ku a wòrdu kreá dor di e mannan di Dios. …
“No tabatin ladronnan, ni matadónan, ni tampoko tabatin Lamanítanan, ni ningun sorto di –itanan; pero nan tabata den unu, e yunan di Cristo, i herederonan na e reino di Dios.
“I kon bendishoná nan tabata!”8
Presidente Nelson a sigui enfatisá e importansia di ekstendé dignidat i rèspèt pa nos próhimo ora el a deklará: “E Kreadó di nos tur ta yama kada un di nos pa bandoná aktitutnan di prehuisio kontra kualke grupo di Dios Su yunan. Kualke un di nos ku tin prehuisio kontra un otro rasa tin nesesidat di arepentí! … E ta korespondé na kada un di nos pa hasi tur loke nos por den nos esfera di influensia pa preservá e dignidat i rèspèt kada yu di Dios ta meresé.”9 Den realidat, dignidat humano ta impliká rèspèt pa nos diferensianan.10
Konsiderando e union sagrado ku ta uni nos ku Dios komo Su Yunan, e direkshon profétiko duná dor di Presidente Nelson ta sin duda e paso fundamental na konstruí brùgnan di entendimentu en bes di krea murayanan di prehuisio i segregashon entre nos.11 Sinembargo, manera Pablo a atvertí e Efesionan, nos mester rekonosé ku pa nos logra e propósito aki, lo ta rekerí pa hasi un esfuerso individual i kolektivo pa aktua ku humildat, mansedumbre, i pasenshi pa ku un i otro.12
Tin un relato di sierto di un rabi Hudiu ku tabata disfrutá e salida di solo ku dos amigunan. El a puntra nan, “Kon boso por sa ki ora e anochi a yega su final i un dia nobo a kuminsá?”
Un di nan a kontesta, “Ora bo por wak den ost i por distinguí e karné for di e kabritu.”
E otro a respondé e ora ei, “Ora bo por mira na e horizonte i distinguí e palu di oleifi for di e palu di figo.”
Despues nan a bira wak e rabi i hasié e mesun pregunta. Despues di un reflekshon, el a kontestá, “Ora bo por wak den ost i mira e kara di un hende muhé i e kara di un hòmber i bisa, ‘E ta mi ruman muhé,;i e ta mi ruman hòmber’”13
Mi kerido amigunan, mi por sigurá boso ku e lus di un dia nobo ta bria mas den nos bida ora nos mira i trata nos próhimo ku rèspèt i dignidat komo rumannan den Cristo.
Durante Su ministerio terenal, Jesus asina perfekto a personifiká e prinsipio aki miéntras E “tabata bai i hasi bon”14 na tur hende, invitando nan pa bin na djE i partisipá di Su bondat, sin importá nan orígen, estado sosial, òf karakterístikanan kultural. El a ministrá, sana, i tabata semper atento na tur hende su nesesidatnan, espesialmente esnan ku e tempu ei tabata wòrdu konsiderá diferente, ofendé, òf ekskluí. E no a nenga ningun pero a trata nan igual i amor, pasobra El a mira nan komo Su rumannan, yunan di e mesun Tata. 15
Un di e okashonnan mas notabel a sosodé ora e Salbador a biaha pa Galileo, tumando a propósito e ruta dor di Samaria.16 Jesus e ora ei a disidí pa sinta na e pos di Jakob pa deskansá. Miéntras einan, e muhé Samaritano a yega serka pa yena su kanika ku awa. Den Su omnisensia, Jesus a papia kune, bisando, “Duna mi di bebe.”17
E muhé aki tabata maravia ku un Hudiu a pidi un muhé Samaritano pa yudansa i a ekspresá su sorpresa, bisando, “Kon por ta ku abo, siendo un Hudiu, ta pidi mi di bebe, ku ta un muhé di Samaria? pasobra e hudiunan no ta atendé ku e Samaritanonan.”18
Pero Jesus, bandonando e tradishon di antaño di enemistat entre e Samaritanonan i Hudiunan, ku amor a ministrá e muhé, yudando e pa komprondé ken E tabata berdaderamente—esta,e Mesias, ku lo konta tur kos i di kua su benida e tabata sperando.19 E impakto di e ministerio sensibel aki a kousa e muhé pa kore bai den e siudat pa anunsiá na e hendenan loke a pasa, bisando, “No ta esaki ta e Cristo?”20
Mi tin kompashon profundo pa esnan ku a wòrdu maltratá, menospresiá, òf persiguí dor di hendenan insensibel i sin sentimentu, pasobra, den kurso di mi bida, mi a mira personalmente e doló ku bon hende ta sufri dor di wòrdu husgá òf poné un banda dor di e manera ku nan ta papia, mira, òf biba diferente. Mi tambe ta sinti tristesa genuino den mi kurason pa esnan ku nan mente ta keda den skuridat, kende nan vishon ta limitá, i kende nan kurason ta keda duru dor di e kreensia den e inferioridat di esnan ku ta diferente for di nan. Nan bista limitá di otronan realmente ta opstruí nan abilidat pa mira ken nan ta komo un yu di Dios.
Manera predisí dor di e profetanan, nos ta bibando den tempunan peligroso hibando nos na e Segundo Benida di e Salbador.21 E palabra en general ta wòrdu polarisá dor di divishon fuerte, asentuá pa liñanan rasial, polítiko, i sosio ekonómiko. E tipo di divishonnan aki tin biaha ta yega na influensiá e hendenan su manera di pensa i aktua den relashon ku nan próhimo. Pa e motibu aki, no ta straño mira hende karakterisando e manera di pensa, aktuá, i papia di otro kulturanan, rasanan, i etnisidat komo inferior, hasiendo uso di ideanan di prehuisio, i eróneo, i hopi biaha sarkástiko, generando aktitut di menospresio, indiferensia, falta di rèspèt, i te hasta prehuisio kontra nan. E tipo di aktitutnan aki tin nan rais den orguyo, arogansia, envidia, i yalurs, karakterístikanan di un naturalesa karnal,22 ku ta totalmente kontrali na atributonan Kristian. E komportashon aki no ta apropiá pa esnan ku ta luchando pa bira Su disípulonan berdadero.23 Defakto, mi kerido rumannan, no tin lugá pa prehuisio den pensamentu òf akshonnan den e komunidat di Santunan.
Komo yunan di e kombenio, nos por yuda eliminá e tipo di komportashon aki dor di wak e diferensia aparente ku ta eksistí entre nos ku e wowonan di e Salbador24 i basá riba loke nos tin en komun—nos identidat i laso divino. Mas ainda, nos por purba na wak nos mes den e soño, speransa, pena, i doló di nos próhimo. Nos tur ta kompañero di biahe komo yunan di Dios, igual den nos estado imperfekto i den nos abilidat pa krese. Nos ta wòrdu invitá pa kana huntu, den pas, ku nos kurason yená ku amor pa Dios i tur hende—òf, manera Abraham Lincoln a nota, “ku malisia pa ningun i karidat pa tur.”25
Bo a yega di meditá riba kon e prinsipio di rèspèt pa dignidat i igualdat humano ta demostrá pa medio di e manera simpel ku nos ta bisti den e kas di Señor? Nos tur ta bin den e tèmpel uní den un propósito i yená ku e deseo di ta puru i santu den Su presensia santu. Bistí na blanku, nos tur ta wòrdu risibí dor di Señor Su mes i Su yunan kerí, hòmber i muhé di Dios, posteridat di Cristo.26 Nos ta privilegiá di por hasi e mesun ordenansanan, hasi e mesun kombenionan, komprometé nos mes na biba bidanan mas alsá i santu, i risibí e mesun promesanan eterno. Uní den propósito, nos ta wak otro ku e wowonan nobo, i den nos union, nos ta selebrá nos diferensianan komo yunan divino di Dios.
Resientemente mi a yuda guia dignatarionan i ofisialnan gubernamental dor di e kas habrí di e tèmpel di Brasília Brasil. Mi a wanta un ratu den e área di kambia paña ku e vise presidente di Brasil, i nos a diskutí e paña blanku ku tur hende ta bisti den e tèmpel. Mi a splik’é ku e uso universal di e paña blanku ta simbolisá ku nos tur ta mesun kos pa Dios i ku den tèmpel, nos identidat no tabata vise presidente di un pais ni lider di iglesia pero nos identidat eterno komo yunan di un Tata Selestial amoroso.
E riu Iguacú ta flui dor di e parti sur di Brasil i ta basha den un plachi ku ta forma un sistema di kaida di awa konosí mundialmente komo Kaida Iguacú—un di e kreashonnan di mas bunita i mas impreshonante di Dios na tera, konsiderá un di e shete maravianan di mundu. Un kantidat grandi di awa ta flui den un riu so i despues ta separá, formando sentenáres di kaida di awa ku no tin komparashon. Papiando den forma di metáfora, e sistema fenomenal di kaida di awa ta reflehá Dios Su famia na tera, pasobra nos ta kompartí e mesun orígen i supstansia spiritual, saká for di e herensia i laso divino. Sinembargo, kada un di nos ta flui den diferente kultura, etnisidat, i nashonalidat, ku diferente opinion, eksperensia, i sentimentu. Apesar di esaki, nos ta sigui pa dilanti manera Dios Su yunan i komo rumannan den Cristo, sin pèrdè nos konekshon divino, kual ta hasi nos un pueblo úniko i un komunidat stimá.27
Mi kerido rumannan, Ku nos por alimá nos kurason i mente ku e konosementu i testimonio ku nos ta igual dilanti di Dios, ku nos ta investí kompletu ku e mesun potensial i herensia eterno. Ku nos por disfrutá di e laso spiritual ku ta eksistí entre nos i balorá e atributonan diferente i donnan variá ku nos tur tin. Si nos hasi esei, mi ta primintí boso ku nos lo flui den nos propio manera, meskos ku e awanan di e Kaida di Iguacú, sin pèrdè e konekshon divino ku ta identifiká nos komo un pueblo pekuliar, e yunan di Cristo, i herederonan di e reino di Dios.”28
Mi ta tèstifiká na boso ku si nos sigui flui e manera aki den nos bida mortal, un dia nobo lo kuminsá ku un lus nobo ku lo iluminá nos bidanan i lo habri oportunidatnan maravioso pa balorá mas, i ta mas bendishoná dor di e diversidat kreá for di Dios bou di su yunan.29 Sigur nos lo bira instrumentonan di Su mannan pa promové rèspèt i dignidat bou di tur Su yunan. Dios ta biba. Jesus ta e Salbador di mundu. Presidente Nelson ta e profeta di Dios den nos dia. Mi ta kompartí mi testimonio di e bèrdatnan aki den e nòmber sagrado di JesuCristo, amèn.