Bo Ke ta Felis?
Keda riba e kaminda di kombenio. Bo bida lo ta mas fásil, felis, i yená ku goso.
Bo Ke ta Felis? Kiko ta hasi bo infelis? Presidente Russell M. Nelson Nelson a bisa: “Si bo ke ta miserabel, kibra ku e mandamentunan—i nunka arepentí. Si bo ke goso, keda riba e kaminda di kombenio.“1 No ta simpel pa ta felis? Djis hasi kombenio i warda nan den bo bida. Laga nos revisá algun kos ku por yuda nos keda riba e kaminda di kombenio i hasi nos felis.
1. Kiko ta e Kaminda di Kombenio?
Di akuerdo ku Elder Dale G. Renlund, “E tèrmino kaminda di kombenio ta referí na un serie di kombenionan pa medio di kua nos ta bini na Cristo i konektá na djE. Pa medio di e laso di kombenio aki, nos tin akseso na Su poder eterno. E kaminda ta kuminsá ku fe den JesuCristo i arepentimentu, siguí pa boutismo i di risibí e Spiritu Santu.“2 Nos ta renobá e kombenionan aki kada bia ku nos partisipá di e Santa Sena.
Kuminsando ku e kombenio boutismal, nos ta hasi kombenio henter nos bida. Atrobe, Elder Renlund ta bisa: “E kaminda di kombenio ta hiba na e ordenansanan di tèmpel, manera e investidura di tèmpel. E investidura ta Dios Su regalo di kombenionan sagrado ku ta konektá nos mas kompletamente na djE.“3
2. Bo ta riba e Kaminda di Kombenio?
Tin bia nos ta hasi kombenio, i nos ta faya na kumpli ku nan. Ora esaki sosodé, kon nos por bai bèk na e kaminda di kombenio? Laga mi kompartí ku bo algun ehèmpel di regresá na e kaminda di kombenio.
Un tiki mas ku un luna pasá, mi a risibí un mensahe di un mishonero regresá ku a sirbi ku nos. El a bisa: “E lastu tempunan tabata difísil. Luchando kontra ansiedat i depreshon kada dia a bin ta pisa hopi riba mi, i e ta hopi difísil. Mi ta sinti mi so i miserabel. Mi a hasi orashon pa e guia di nos Tata Selestial pa pas i konsuelo den loke mi por hasi pa lucha kontra di e difikultat. … Miéntras mi tabata hasi orashon, mi a sinti e impreshon di e Spiritu bisando mi ku mi mester paga mi diesmo íntegro. … Mi a sinti e Spiritu ei asina fuerte i mi inmediatamente mi a sinti e deseo pa hasi esaki. Ku e deseo pa hasi esaki, mi a sinti e impulso ku ‘si mi paga mi diesmo tur kos lo ta oké.’ Ainda mi ta lucha pa haña pas, pero mi tin un testimonio di e Salbador i ku pa medio di mi obedensha, mi por sinti i haña e pas ku mi ta buskando den mi kurason i mente. Resientemente mi a disidí di bin bèk na Iglesia i buska e Spiritu den tur loke mi ta hasi“
Awor kosnan ta bai bo ku ne, Bo por puntra tambe na Tata Selestial pa pas, pero e kontesta lo ta diferente for di loke bo ta antisipá lo e ta. Miéntras ku bo ta buskando pa konosé e Salbador i hasi orashon na Tata Selestial, E lo duna bo un kontesta personalisá p’abo.
Presidente Thomas S. Monson a splika:
“E lès mas grandi ku nos por siña den mortalidat ta ku ora Dios papia i nos obedesé, semper nos lo ta korekto.“4
“Ora nos warda e mandamentunan, nos bida lo ta mas felis, mas yen, i ménos kompliká. Nos desafionan i problemanan lo ta mas fásil pa karga, i nos lo risibí Su bendishonnan prometé.“5
Dia ku mi a wòrdu yamá komo obispu, tabata durante e tempu mas difísil di mi bida. Mi tabata un tata hóben den komienso di mi añanan 30, pero mi tabata den problema finansiero pa motibu di desafionan familiar. Mi no por a haña ningun solushon, i mi a pensa ku e desafionan nunka lo kaba. Finansieramente i emoshonalmente mi tabata kansá. Mi a kuminsá na duda mi fortalesa spiritual tambe. Tabata den e tempu difísil ei ku mi presidente di estaka a ekstendé e yamamentu ei na mi. Mi a akseptá e yamamentu tòg, maske e tabata difísil.
Mi kasá tambe tabata tin un entrevista ku e presidente di estaka, pero e no por a bisa si, i tampoko el bisa no pero a sigui yora. El a yora henter e siman, puntrando Tata Selestial, “Dikon awó?“ i “Di bèrdat bo konosé kada individuo?“ E no a haña un kontesta, pero mi a wòrdu sostené komo obispu e siguiente djadumingu. E no a puntra Tata Selestial e pregunta nan ei mas pero a apoyá mi den mi yamamentu durante seis aña.
Riba e djadumingu ku mi a wòrdu relevá, mi kasá a skucha un bos miéntras e tabata tumando e Santa Sena. E bos a susurá na dje, “Pasobra e tabata muchu difísil pa bo kana, mi a yam’é komo obispu pa por tene bo i kana pa bo.“ Mirando atras e lastu seis añanan, el a realisá ku hopi di e desafionan ku tabata parse sin final a wòrdu resolvé durante e kaminda.
Nos ta siña ku ora nos ta pensa ku no ta un bon tempu pa risibí un yamamentu, kisas ta e tempu ku nos mester di e yamamentu mas. Kada bia ku Señor pidi nos pa sirbi den kualke yamamentu, sea e ta un yamamentu fasil òf pisá, E ta mira nos nesesidatnan. E ta proveé e fortalesa ku nos mester i tin e bendishonnan kla pa drama riba nos ora nos ta sirbi fielmente.
Tin hopi otro kosnan ku ta distraí pa nos di keda riba e kaminda di kombenio. No ta importá kiko e ta, nunka ta lat pa bira nos kurasonnan na Tata Selestial pa yudansa. Elder Paul V. Johnson a siña nos: “Ora nos sigui Satanas, nos ta dun’é poder. Ora ku nos sigui Dios, E ta duna nos poder.”6
Rei Benjamin den e Buki di Mormon a tèstifiká: “Mi ta deseá ku boso lo por kontemplá, riba e estado bendishoná i felis di esnan ku ta mantené e mandamentunan di Dios. Pasó at’aki, nan ta wòrdu bendishoná den tur kos, tantu temporal komo spiritual; si nan keda fiel ta na fin nan ta wòrdu risibí na shelu, pa di e manera aki nan por biba ku Dios den un estado di felisidat sin fin.“7
3. Kon Warda e Mandamentunan ku Dios por Hasi Bo Felis?
Mi kasá ta bisa ku nos matrimonio ta mara nos huntu, i pa e motibu aki e por hasi kosnan ku nunka e por a hasi promé. Por ehèmpel, for di tempu e tabata hóben, e ta tin difikultat di sali den skuridat, pero e no ta difísil mas p’e pasobra mi ta bai kuné. E ta kòrtiku i no por yega na e kashinan haltu si e no usa un stul òf trapi, pero ami si por yega na e kashinan haltu p’e pasobra mi ta mas haltu ku ne. Tumando Señor su yugo riba nos ta mesun kos. Ora nos konektá nos mes na djE, nos por hasi kosnan ku nos no por hasi riba nos mes pasobra E por hasi kosnan ku nos no por hasi pa nos mes.
Elder David A. Bednar a bisa: “Hasi i warda kombenionan sagrado ta pone yugo riba nos pa i huntu ku Señor JesuCristo. En esensia, e Salbador ta pidi nos pa konfia den dje i trèk huntu ku ne, ounke nos mihó esfuersonan no ta igual i no por wòrdu kompará ku esun di djE. Ora nos ta konfia den i ta trèk huntu ku ne durante di nos biahe di mortalidat, di bèrdat Su yugo ta suave i su karga ta lihé.”8
Presidente Nelson a siña tambe:
“Pero marando bo mes na e Salbador ta nifikí tin akseso na Sufortalesa i poder redentor.“9
“E premio pa warda e kombenionan ku Dios ta un poder selestial—poder ku ta fortalesé nos pa wanta tur tribulashonnan, tentashonnan, i angustia mihó. E poder ta suavisá nos kaminda. Esnan ku ta biba e lei mas haltu di JesuCristo tin akseso na su poder mas haltu.“10
“Wardando kombenionan ta hasi bida mas fásil! Kada persona ku hasi kombenionan den pilanan boutismal i den tèmpel—i warda nan—tin mas akseso na e poder di JesuCristo.“11
Mi kerido rumannan, bo ke ta felis? Keda riba e kaminda di kombenio. Bo bida lo ta mas fásil, felis, i yená ku goso. Jesus ta invitando nos, “Bini serka mi, tur ku ta kansá i kargá, i ami lo duna boso sosiegu.“12 E ta e Cristo bibiente. E ta karga nos pesonan i hasi nos bida mas fasil. Den e nòmber di JesuCristo, amèn.