Humilde pa Aseptá i Sigui

Pa Elder Joni L. Koch

Di e Setenta

Humildat ta un rekisito obligatorio pa nos por ta kla pa regresá den e presensia di Dios.

Den e di sinku kapítulo di Alma, un pregunta pa eksaminá bo mes a keda hasi: “Lo bo por bisa, si nos wòrdu yama pa muri na e momentu aki, den bo mes, ku bo tabata sufisiente humilde?”¹ E pregunta ei ta impliká ku humildat ta un rekisito obligatorio pa nos por ta kla pa regresá den e presensia di Dios.

Nos tur gusta pensa ku nos ta sufisientemente humilde, pero algun eksperensia den bida ta laga nos realisá ku e hòmber natural orguyoso hopi bes ta bibu bibu den nos.

Algun aña pasá, ora ku nos dos yu muhénan tabata biba na kas ainda, mi a disidí na mustra nan i mi kasá e unidat ku mi tabata enkargá ku né den e kompania ku mi tabata traha pe.

Mi propósito real tabata pa mustra nan un lugá kaminda, no manera na kas, tur hende lo hasi eksaktamente loke mi bisa nan sin kuestioná mi. Ora ku nos a yega na e porta dilanti, kual usualmente ta habri outomátikamente ora mi outo a yega, mi tabata sorprendí ku e no a habri e biaha aki. En bes di esei un bewaker ku mi no a mira nunka promé den mi bida a bin na e outo i a puntra mi pa mi identifikashon di kompania.

Mi a bis’é ku nunka mi tabata tin mester di un identifikashon pa kore drenta den e propiedat ku mi outo i a hasié e pregunta orguyoso klásiko: “Bo sa ku ken bo ta papiando?”

Riba kual el a reakshoná, “Awèl, ya komo bo no tin bo identifikashon di kompania, mi no por sa ken bo ta, i miéntras ku ami ta na e porta aki bo no ta wòrdu permití pa drenta e propiedat sin un identifikashon adekuá.”

Mi a pensa pa wak den spil patras pa wak mi yunan su reakshon riba tur esaki, pero mi tabata sa ku nan tabata saboriando kada sekònde di e momentu ei! Mi kasá sintá den mi banda tabata sakudí su kabes desaprobando mi komportashon. Mi delaster rekurso e ora ei tabata pa pidi diskulpa na e bewaker i bisa ku mi ta lamentá di a trat’e asina malu. “Bo ta pordoná,” el a bisa, “pero sin bo identifikashon di kompania bo no ta drenta awe!”

Despues mi a kore bai kas poko poko bèk pa kue mi identifikashon, siñando e lès balioso aki: ora nos skohe pa no ta humilde, nos ta terminá siendo humiá.

Den Proverbionan nos ta haña, “E orguyo di un hòmber lo humiá e, pero prestigio lo halsa esun humilde den spiritu.”² Pa desaroyá humildat, nos mester komprondé kiko e ta nifiká realmente den e konteksto di e evangelio.

Algun persona ta konfundí ser humilde ku otro kosnan manera por ehèmpel, ser pober. Pero den realidat tin hopi ku ta pober i orguyoso i tambe hopi ku ta riku i sinembargo humilde. Otronan ku ta hopi tímido òf tin balor propio abou por tin un aparensia eksterior di humildat pero den profundidat ta yen di orguyo tin bes.

E ora ei kiko ta humildat? Di akuerdo ku Predicad Mi Evangelio, e ta un “disponibilidat pa someté na e boluntat di Señor. … E ta ser habri pa siña. [E] ta un katalisadó vital pa kresementu spiritual.”³

Seguramente tin hopi oportunidatnan pa nos tur por drecha e atributo manera Cristo aki. Promé lo mi ke eksplorá kon humilde nos, tabata òf nos mester ta den sigui e konseho di nos profeta. Un lista di pregunta pa nos individualmente por ta:

Nos ta menshoná e nòmber kompletu di Iglesia den tur nos interakshonnan? Presidente Russell M. Nelson a bisa, “Kita e nòmber di Señor for di e Iglesia di Señor ta un gran viktoria pa Satanas.”⁴
Nos ta lagando Dios prevalesé den nos bida dor di aseptá e profeta su invitashon spesífiko? “Awe mi ta hasi un yamada na nos miembronan tur kaminda pa tuma e inisiativa pa bandoná aktitutnan i akshonnan di prehuisio.”⁵
Nos ta vensiendo e mundu, konfiando den e doktrina di Cristo mas ku e filosofianan di hende, manera nos profeta a siña?⁶
Nos a kombertí den hasidónan di pas ku ta bisa kosnan positivo na i di otronan? Presidente Nelson a siña nos lo siguiente den e delaster konferensia general: “Si tin algu virtuoso, bunita òf di bon reputashon o digno di alabansa ku nos por bisa di un otro persona—sea den su kara o tras di su lomba—esei mester ta nos nos standard di komunikashon.”⁷

Eseinan ta instrukshonnan simpel pero poderoso. Kòrda, tur loke hinter e pueblo di Moises mester a hasi pa wòrdu saná tabata wak e kolebra di bròns ku el a lanta.⁸ Pero “dor di e simplesa di e manera òf e fasilidat di esaki, hopi a bai pèrdí.”⁹

Durante e konferensia aki nos a skucha i lo sigui skucha e konsehonan ku no ta fayal di nos profetanan i apòstelnan. E ta un okashon perfekto pa desaroyá humildat i laga nos opinionnan fuerte wòrdu guli pa un konvikshon mas fuerte di loke ku Señor ta papia pa medio di e lidernan skohé aki.

Riba tur kos, ora ta desaroyá humildat nos mester komprondé i aseptá tambe ku nos no ta kapas pa superá nos retonan òf tampoko logra nos potensial máksimo únikamente di nos propio esfuersonan so. Oradónan nan ku ta motivá, eskritornan, treindónan i hendenan ku ta influensia rònt mundu, spesialmente riba plataformanan digital lo bisa ku tur kos ta dependé únikamente di nos i nos akshonnan. E mundu ta kere den e brasa di e karni.

Pero pa medio di e evangelio restorá nos a siña ku pa gran parti nos ta dependé riba Tata Selestial su akto di kariño i di e Ekspiashon di nos Salbador JesuCristo, “paso nos sa ku ta pa grasia ku nos ta salba, despues di tur lokual nos por hasi.”¹⁰ Ta p’esei ta asina importante pa hasi i mantené kombenionan ku Dios. Dor di hasi esei nos lo haña akseso kompletu na e poder sanadó, fasilitadó i perfekto di JesuCristo Su Ekspiashon.

Asistí na reunion sakramental tur siman i adorá den tèmpel ku regularidat pa partisipá den e ordenansanan i risibí i renobá kombenionan ta un señal ku nos ta rekonosé nos dependensia di Tata Selestial i nos Salbador, JesuCristo. Esei lo invitá Nan poder den nos bida pa yuda nos superá tur nos problemanan i finalmente kumpli e norma di nos kreashon.

No hopi tempu pasa e nivel di mi humildat i komprondementu di mi dependensia riba Señor a wòrdu di tèst atrobe. Mi tabata den un taksi bayendo aeropuerto pa hasi un biahe kòrtiku pa un lugá kaminda tabata tin un situashon difísil pa resolvé. E shofùr di taksi, kende no tabata un miembro di Iglesia a wak mi den spil i a bisa, “Mi ta mira ku bo no ta bon awe!”

“Bo por a bisa?” Mi a puntra.

“Sigur,” el a bisa. E ora ei el a bisa algu manera, “Bo tin un aura hopi negativo fondo di bo!”

Mi a splik’e ku mi tabata tin un situashon hopi difísil pa atendé kuné, i el a puntra mi, “Bo a hasi tur loke ta den bo poder pa solushoná esaki?”

Mi a respondé ku mi a hasi tur loke ku mi tabata por.

El e bisa e ora ei algu ku nunka mi a lubidá, “Awèl laga esaki den man di Dios i tur kos lo sali bon.”

Mi ta konfesá ku mi a kai den e tentashon pa puntr’e, “Bo sa ku ken bo ta papiando?” Pero mi no a hasié! Loke mi a hasi tabata humiá mi mes dilanti Señor durante e un ora di buelo ei, pidiendo pa yudansa dibino. Ora ku mi a baha for di avion mi a sa ku e situashon difísil pa wòrdu solushoná tabata na òrdu kaba i ku mi presensia no tabata nesesario mas.

Rumannan, e mandato, invitashon i promesa di Señor ta kla i ta brinda konsuelo: “Sea humilde; i Señor Dios lo tene bo man i duna e kontestanan na bo orashonnan.”¹¹

Ku nos por ta humilde pa sigui e konseho di nos profetanan i aseptá ku solamente Dios i JesuCristo por transformá nos—pa medio di ordenansanan i kombenionan risibí den Su Iglesia—den e mihó vershon di nos mes den e bida aki i un dia hasi nos perfekto den Cristo. Den e nòmber di JesuCristo, amèn.