Testifiká di JesuCristo den Palabra i Akshonnan
Si nos lucha pa biba nos bida den harmonia ku e evangelio di JesuCristo, nos kondukta lo ta un testimonio bibu di nos Redentor.
Ora di boutismo, un di e promesanan ku nos ta hasi ta ku nos ta dispuesto pa tuma riba nos e nòmber di JesuCristo. Mi propósito awe ta pa rekordá nos ku nos por mustra Dios ku nos ta tuma riba nos mes E nòmber di Su Yu dor di duna testimonio den palabra i echo, mas tantu ku nos por, ku Jesus ta e Cristo.
Ora di ministrá i siña e pueblo na Merka despues di Su Resurekshon, e Salbador a deklará:
“Nan no a lesa e skrituranan, ku ta bisa boso tin ku tuma riba boso e nòmber di Cristo, ku ta mi nòmber? Pasobra pa medio di e nòmber aki boso lo wòrdu yamá den e delaster dia;
“I Kualke ku tuma mi nòmber riba dje, i perseverá te na fin, esei lo wòrdu salbá na e delaster dia.”1
Presidente Russell M. Nelson a siña nos ku “tuma riba nos e nòmber di e Salbador ta inkluí deklará i duna testimonio na otronan—pa medio di nos akshonnan i nos palabranan—ku Jesus ta e Cristo.”2
Komo miembronan di E Iglesia di JesuCristo di e Santunan di e Delaster Dianan, nos tin e bendishon i privilegio di ta testigu di Señor i Su nòmber tur kaminda ku nos ta.3 Si nos lucha pa biba nos bida den harmonia ku e evangelio di JesuCristo, nos kondukta lo ta un testimonio bibu di nos Redentor i Su nòmber. Ademas, nos ta duna testimonio di Cristo den palabra dor di kompartí ku otronan kiko nos ta kere, sinti òf sa di Cristo.
Ora ku humildemente nos kompartí nos testimonio di Señor pa medio di nos palabranan i akshonnan, e Spiritu Santu ta konfirmá4 na esnan ku intenshon real, kurasonnan habrí i mentenan dispuesto ku Jesus di bèrdat ta e Cristo.5
Lo mi tin gana di kompartí dos eksperensia resien i ku ta inspirá, di miembronan ku ta mustra Dios ku nan ta tuma riba nan e nòmber di JesuCristo dor di papia di djE i duna testimonio puru di Señor den reunionnan di Iglesia.
Promé ehèmpel: Ora ku mi kasa, Elaine, i ami a bai Spaña na 2022, nos a asistí na e reunionnan di djadumingu den un unidat chikí di Iglesia ei nan. Ora mi tabata sinta riba podio i mi kasá den e kongregashon, mi a nota ku e tabata sinta banda di un hende muhé di edat. Ora ku e reunion sakramental a kaba, mi a kana bai serka Elaine i a puntr’e pa introdusí mi na su amiga nobo. El a hasié i a indiká ku e muhé aki, kende no tabata un miembro di e Iglesia, tabata bishitando Iglesia pa mas o ménos dos aña. Ora mi a skucha esei, mi a puntra e muhé ku temor di Dios aki kiko tabata pone bin bek i asistí na nos reunionnan pa asina tantu tempu. E muhé a kontestá yen di amor, “mi gusta bini aki pasó boso ta papia di JesuCristo den boso reunionnan.”
Klaramente, miembronan di e Iglesia den e unidat na Spaña ei tabata papia, siña i duna testimonio di Cristo den nan reunionnan.
Di dos ehèmpel: Despues di sirbi den e Área di Brasil, mi a haña un asignashon nobo pa sirbi nan e ofisina sentral di Iglesia. Ora nos a muda pa Salt Lake City, na final di yüli di e aña aki, nos a asistí na reunionnan di djadumingu na nos bario nobo i maravioso. Un di e reunionnan aki tabata di ayuno i testimonio. Despues di a partisipá na un manera reverente di e santa sena, miembronan a lanta para i duna testimonionan sinsero di e Salbador un tras di otro. E reunion tabata sentrá riba JesuCristo i nos por a sinti e Spiritu Santu di un manera palpabel. Nos a wòrdu edifiká i nos fe a wòrdu fortalesé. Si amigunan di Iglesia, buskando e bèrdat honestamente tabata na e reunion ei, nan lo a rekonosé ku esaki ta e Iglesia di JesuCristo.
Ki bendishon pa mira ku nos reunionnan di Iglesia ta oportunidatnan di eskoho pa nos pa duna testimonio di Cristo i señal na Dios ku nos ta regosihá den tuma nòmber di Su Yu riba nos.
Awor, laga mi menshoná un ehèmpel poderoso di tuma riba nos e nòmber di JesuCristo dor di duna testimonio di dj‘E pa medio di akshonnan.
Ougùstùs último, mi a kompaña Elder Johnattan S. Schmitt na e kas habri di e Tèmpel di Feather River na California na Siudat di Yuba. Ei nan mi tabatin e bendishon di guia gruponan ku tabata hasi un tur di e tèmpel. Un di e gruponan aki tabata inkluí un miembro di Iglesia, Virgil Atkinson i shete amigunan di otro kerensia. Mas na final di e bishita, den un kamber di seyamentu den tèmpel, Hermano Atkinson tabata emoshonal ora ku el a ekspresá su amor pa su amigunan ku a bini na e tèmpel e dia ei. Djis despues ku el a hasi asina, un muhé den e grupo a lanta para i bisa, “Nos tur ta stima Virgil. Nunka el a imponé su fe riba nos. Pero e no tin bèrgwensa di dje tampoko. E ta djis biba loke ku e ta kere.”
Durante añanan, Hermano Atkinson su manera di biba manera Cristo a sirbi komo un testimonio poderoso pa su amigunan. Su ehèmpel ta evidensia fuerte ku el a tuma riba su mes e nòmber di Cristo.
Pa konkluí, laga mi kompartí e lès ku mi a siña tokante kon pa tuma riba nos e nòmber di Cristo i duna testimonio di dj‘E dor di usa e nòmber korekto di e Iglesia.
Presidente Nelson, e profeta bibu di Dios, den un diskurso di konferensia general na 2018 titulá “E nòmber korekto di e Iglesia,” a bisa: “E ta un korekshon. E ta e mandamentu di Señor. José Smith no a menshoná ku e Iglesia a wòrdu restorá pa medio di dje, Mormon tampoko a hasié. Tabata E Salbador mes ku a bisa, ‘Pasó asina mi iglesia lo wòrdu yama den e último dianan, esta E Iglesia di JesuCristo di e Santunan di e Delaster Dianan’ (Doctrina y Convenios 115:4].”6
Nos tur a sali for di konferensia general e dia ei komprometí i determiná pa sigui e profeta i pa usa e nòmber revelá di e Igleisa for di e momentu ei. Di bèrdat mi a wak mi mes pa sigurá ku mi ta usa e nòmber korekto di Iglesia. E promé biahanan mi mester tabata hopi konsiente di no permití mi mes di bai bek na e formanan bieu. Despues di e promé intentonan, mi a sinti mas konfortabel tokante usamentu di e nòmber revelá di e Iglesia. Mi ta atmití ku vários biaha, mi tabata pronunsiá e nòmber di Iglesia hopi lihé. Mi tabata sinti preokupá ku hende lo no pone atenshon na e nòmber kompletu di Iglesia i ku nan lo pensa ku e tabata un poko largu.
Sinembargo, despues mi a realisá ku bisa e nòmber kompletu di Iglesia intenshonalmente tabata duna mi oportunidatnan balioso pa bisa e nòmber di JesuCristo i defakto duna testimonio di e Salbador dor di deklará Su nòmber den e nòmber di Su Iglesia. Mi a nota tambe ku ora mi bisa e nòmber korekto di e Iglesia ku otronan, mi ta kòrda JesuCristo mas frekuentemente i sinti Su influensia den mi bida.
Dor di sigui e profeta, nos por siña pa duna testimonio mas tantu di JesuCristo dor di usa e nòmber korekto di e Iglesia, i asina tuma riba nos mas kompletu e nòmber di Señor.
E mainta di Sabat aki, mi ta duna testimonio ku Presidente Nelson ta Dios su profeta bibu i ku E Iglesia di JesuCristo di e Santunan di e Delaster Dianan ta Cristo su iglesia restorá. Humildemente mi ta duna testimonio di e Yu di Dios i Su divinidat. E ta Dios Su Primogénito i Úniko Yu, nos Salbador i Rendentor, e Emanuel.7 Den e nòmber di JesuCristo, amèn.