Lèsnan Divino Pa Mayornan

Pa Elder Valeri V. Cordón

Di e Setenta

Mayornan ta drenta un asosiashon ku nan Tata Selestial pa guia nan presioso yunan pa bai bek na shelu.

Bo a yega di tene un resien nasí den bo brasanan? Tin un lus ku ta sali for di kada resien nasí, tresiendo un vínkulo speshal di amor ku por yena nan mayornan su kurason ku alegria.¹ Un eskritor Mèksikano a skibi, “mi a siña ku ora un resien nasí primi su tata su dede pa promé bes na su dede pikiña, el a gar’’é pa semper.”²

Paternidat ta un di e eksperensianan di mas ekstraordinario di bida. Mayornan ta drenta un asosiashon ku nan Tata Selestial pa guia nan presioso yunan pa bai bek na shelu.³ Awe lo mi tin gana di kompartí algun lèsnan di paternidat ku por haña den skrituranan i ku profetanan bibu a siña pa yuda nos laga nos legado paterno.

Subi na e piso mas haltu di Kultura Evangéliko

Nos mester subi e piso mas haltu di kultura evangéliko ku nos famia. Presidente Russell M. Nelson a deklará: “Famianan meresé guia di shelu. Mayornan no por konsehá nan yunan na un manera adekuá basá riba eksperensia personal, miedu òf simpatia.”⁴

Ounke nos pasado kultural, estilonan di kriansa i eksperensianan personal por ta di balor pa paternidat, e abilidatnan aki ta insufisiente pa yuda nos yunan regresá na shelu. Nos mester di akseso na un “seri di balornan i …práktikanan mas elevá,”⁵ un kultura di tantu amor i espektativanan, kaminda nos ta interaktuá ku nos yunan “den un manera mas elevá i santu.”⁶ Presidente Dallin H. Oaks a deskribí 161 kultura evangéliko komo “un estilo di bida distintivo, un seri di balornan i espektativanan i práktikanan. … E kultura evangelio aki ta bini for di e plan di salbashon, e mandamentunan di Dios, i e siñansanan di e … profetanan bibu. E ta guia nos den e kaminda ku nos ta lanta nos famia i biba nos bida individual.”⁷

JesuCristo ta e sentro di e kultura evangéliko aki. Adoptá e kultura evangéliko den nos famia ta krusial pa krea un ambiente fértil kaminda e simia di fe por floria. Pa subi e piso mas haltu, Presidente Oaks a invitá nos pa “renunsiá kualkier tradishon òf práktika personal òf familiar ku ta kontrali na e siñansanan di e Iglesia di JesuCristo.”⁸ Mayornan, timides di nos parti pa establesé kultura evangéliko por permití e atversario establesé un base firme den nos hogarnan, asta pió, den nos kurasonnan òf di nos yunan.

Si nos skohe pa hasi e kultura evangéliko e kultura pre dominante den nos famia, e ora ei dor di e influensia poderoso di e Spiritu Santu⁹ nos estilo aktual di paternidat, tradishonnan i práktikanan lo wòrdu seftá, aliniá, refiná i halsá.

Hasi Hogar e Sentro pa Siña Evangelio

Presidente Russell M. Nelson a siña ku e hogar mester ta e “sentro pa siña e evangelio.”¹⁰ E propósito di siña evangelio ta pa “profundisá nos kombershon na Tata Selestial i JesuCristo i yuda nos bira mas manera Nan.”¹¹ Laga nos konsiderá tres responsabilidat paternal krusial deskribí pa e profetanan i apòstelnan ku por yuda nos establesé un kultura evangéliko mas elevá den nos hogarnan.

Promé: Siña Libremente

Nos Tata Selestial a instruí Adam konserniente JesuCristo i Su doktrina. El a siñ’é “pa siña e kosnan aki libremente na [su] yunan.”¹² Den otro palabranan, Tata Selestial a siña Adam pa siña e kosnan aki libremente, generósamente i sin restrikshon.¹³ E skrituranan ta konta nos ku “Adam i Eva a bendishoná e nòmber di Dios i pone tur kos na konosementu di nan yu hòmber i muhénan.”¹⁴

Nos ta siña nos yunan generósamente ora ku nos pasa tempu signifikante ku nan. Nos ta siña nan sin restrikshon ora ta diskutí tópikonan delikado manera tempu dilanti pantaya, usando rekursonan ku Iglesia a pone disponibel.¹⁵ Nos ta siña libremente ora ku nos studia e skrituranan ku nos yunan usando Ven, Sigueme i permití e Spiritu pa ta e maestro.

Di dos: Ser un modèl di Disípulado

Den buki di Juan nos ta lesa ku ora vários hudiunan a kuestioná e Salbador tokante Su kondukta, Jesus a dirigí su atenshon riba Su modèl, Su Tata. El a siña, “E Yu no por hasi nada di su mes, pero loke e mira e Tata hasi: p’esei loke sea ku E hasi, esaki tambe e Yu lo hasi meskos.”¹⁶ Mayornan, kiko nos mester pa ta modèl pa nos yunan? Disípulado

Komo mayornan, nos por siña e importansia di pone Dios promé ora ku nos diskutí e promé mandamentu, pero nos ta hasié un modèl ora ku nos pone un banda distraishonnan di mundu i warda e dia di Shabat Santu tur siman. Nos por siña e importansia di kombenionan di tèmpel ora nos papia tokante e doktrina di matrimonio selestial, pero nos ta hasié modèl ora ku nos honra nos kombenionan, trata nos kasá ku dignidat.

Tres: Invitá pa Aktua

Fe den JesuCristo mester ta e núkleo di e testimonio di nos yunan i e testimonio nan aki mester yega na kada yu pa medio di revelashon individual.¹⁷ Pa asistí nos yunan ku e desaroyo di nan testimonio nos ta enkurashá nan pa usa nan albedrio pa skohe loke ta bon ¹⁸ i prepará nan pa un bida kompletu riba Dios su kaminda di kombenio.¹⁹

Lo ta sabio pa enkurashá kada un di nos yunan pa akseptá Presidente Nelson su invitashon pa tuma responsabilidat di nan propio testimonio di JesuCristo i Su evangelio—pa traha pe, pa nutrié pa e por krese, pa aliment’é ku bèrdat i no kontamin’é ku filosofianan falsu di hòmbernan i muhénan no kreyente.²⁰

Rektitut, Paternidat Intenshonal

Nos Tata Selestial su intenshonnan dibino komo un mayor a bira konosí den un revelashon duná na Moises: “Pasó mira aki, esaki ta mi obra i—mi gloria: realisá inmortalidat i e bida eterno di hende.”²¹ Presidente Nelson a agregá, “Dios lo hasi tur loke ku E por, ku eksepshon di violá bo albedrio, pa yuda bo no pèrdè e bendishonnan mas grandi den tur eternidat.”²²

Komo mayornan, nos ta Dios su agentenan den e kuido di nos yunan.²³ Nos mester hasi tur loke nos por pa krea un ambiente kaminda nos yunan por sinti Su influensia divino.

Nunka tabata Tata Selestial su intenshon pa nos komo mayornan sinta na banda komo miron, ta wak e bida spiritual di nos yunan desaroyá. Laga mi ilustrá e idea aki di paternidat intenshonal ku un eksperensia personal. Ora mi tabata den Primaria den un rama chikí na Guatemala mi mayornan a kuminsá siña mi tokante e balornan di bendishonnan patriarkal. Mi mama a tuma e tempu pa kompartí su eksperensia di a risibí su presioso bendishon patriarkal. El a siña mi e doktrina relashoná ku bendishonnan patriarkal, i el a tèstifiká di bendishonnan primintí. Su paternidat intenshonal a inspirá mi pa tin e deseo di risibí mi bendishon patriarkal.

Ora mi tabata tin 12 [aña], mi mayornan a yuda ku e búskeda pa un patriarka. Esaki tabata nesesario paso no tabata tin patriarka den e distrito kaminda nos tabata biba. Mi a biaha bai na un patriarka ku tabata den un estaka 156 kilometer (97 mia) leu. Mi ta kòrda hopi kla ora e patriarka a pone su man riba mi kabes pa bendishoná mi. Mi tabata sa dor di konfirmashon spiritual, sin ningun duda, ku mi Tata Selestial konosé mi.

Pa un mucha hòmber di 12 aña di un pueblo chikitu, esei tabata nifiká tur kos p’ami. Mi kurason a bira pa mi Tata Selestial e dia ei dor di mi mama i mi tata su paternidat intenshonal i lo mi ta agradesido na nan pa semper.

Hermana Joy D. Jones, eks Presidente General di Primaria a siña: “Nos no por warda pa kombershon simplemente sosodé ku nos yunan. Kombershon aksidental no ta un prinsipio di e evangelio di JesuCristo.”²⁴ Nos amor i inspirashon por hasi un diferensia den kon nos yunan ta usa nan albedrio. Presidente Nelson a enfatisá, “Ningun otro trabou ta surpasá esun di rektitut, paternidat intenshonal!”²⁵

Konklushon

Mayornan, e mundu aki ta yen di filosofianan, kulturanan, i ideanan kompitiendo pa nos yunan su atenshon. E edifisio grandi i espasioso ta merkadiá su miembresia diariamente usando e kanalnan di media mas aktual. “Pero den e don di su Yu,” e profeta Moroni a siña, “Dios a prepará un kaminda mas ekselente.”²⁶

Ora ku asosiá ku Dios pa medio di kombenionan i bira Su agentenan den kuido di nos yunan, El lo santifiká nos intenshonnan, inspirá nos siñansanan i moderá nos invitashonnan pa “nos yunan por sa tambe kua rekursonan nan por buska pa remishon di nan pikanan.”²⁷ Den e nòmber di JesuCristo, amèn.