Diesmo: Habriendo e Bentananan di Shelu

Dor di Elder Neil L. Andersen

Di e Quorum di e Diesdos Apòstelnan

E bentananan di shelu ta habri den diferente maneranan. Konfia den Señor su tempu; e bendishonnan semper ta bin.

Miéntras mi tabata na Sur Amérika resientemente, Hermano Roger Parra di Venezuela a kompartí e siguiente eksperiensia ku mi:

“Na 2019 Venezuela a wòrdu sakudí dor di problemanan ku a kousa un “blackout” pa sinku dia.

“Káos i anarkia a reina den e kayanan, i hopi hende desesperá no ta tin sufisiente kuminda.

“Algun hende a kuminsá hòrta for di negoshinan, destruyendo tur kos den nan kaminda.

“Komo e doño di un panaderia chikitu, mi tabata hopi preokupá ku mi negoshi. Komo famia, nos a disidí di entregá tur kuminda den nos panaderia na hendenan den nesesidat.

“De un anochi hopi skur ta tin wèlga tur kaminda. Mi úniko preokupashon tabata e siguridat di mi kerido kasá i yunan.

“Na amanesé mi a bai na nos panaderia. Lástimamente, kada negoshi di kuminda den serkania a wòrdu destruí dor di ladronnan, pero pa mi gran sorpresa, nos panaderia tabata intakto. Nada no a wòrdu destruí. Humildemente mi a duna mi Tata Selestial danki.

“Yegando kas, mi a konta mi famia di Dios Su bendishon i protekshon.

“Nan tabata asina agradesido.

“Mi yu mas grandi, Rogelio, di solamente 12 aña, a bisa, ‘Papa! Mi sa dikon nos tienda a wòrdu protehé. Abo i Mama semper ta paga boso diesmo’”

Hermano Parra a konkluí: “E palabranan di Malakias a bin na mi mente. ‘Lo mi reprendé e dekoradó pa boso, pa e no distruí e frutanan di tera.’ [Malakias 3:11]. Nos a bai na rudia i ku gratitut nos a duna nos Tata Selestial danki pa Su milager.”¹

Imagen

Famia Parra

Proba mi Awó ku Esaki.

Tur loke nos tin i tur loke nos ta ta bin for di Dios. Komo disípulonan di Cristo, boluntariamente nos ta kompartí ku esnan rònt di nos.

Ku tur loke Señor ta duna nos, E ta pidi pa nos duna bèk na djE i Su reino na tera 10 porshento di nos entrada. El a primintí nos ku si nos ta honesto den nos diesmo, E lo “habri … e bentananan di shelu, i dramá … bendishonnan, ku lo no tin lugá sufisiente pa risibí esaki.”² El a primintí nos ku E lo protehé nos for di maldat.³ E promesanan aki ta asina sigur,⁴Señor ta deklará, “Proba mi awó ku esaki,”⁵un frase ku no ta aparesé den ningun otro skritura.

E bentananan di shelu ta habri den diferente maneranan. Algun ta temporal, pero hopi ta spiritual. Algun ta sutil i fásil pa pasa sin atenshon. Konfia den Señor su tempu; e bendishonnan semper ta bin.

Nos ta pena ku esnan ku ta lucha pa por tin e nesesidatnan di bida. E Iglesia resientemente a hasi donashon di 54 mion dòler merikano pa proveé alivio na e muchanan i mamanan vulnerabel rònt mundu.⁶ I ku e ofrendanan di boso ayuno di luna pasá, nos bon obispunan ta yuda míles kada siman ku temporalmente mester di kuminda riba nan mesa, paña na nan kurpa, i un dak riba nan kabes. E úniko solushon permanente na pobresa den e mundu aki ta e evangelio di JesuCristo.⁷

Un Asuntu di Fe

E Apòstel Pablo a atvertí ku e sabiduria di hende ta komprondé e kosnan di hende pero tin difikultat pa komprondé e kosnan di Dios.⁸ E mundu ta papia di diesmo den término di sèn, pero e lei sagrado di diesmo ta prinsipalmente un asuntu di nos fe. Siendo honesto den nos diesmo ta un manera ku nos ta demostrá nos boluntat pa pone Señor na promé lugá, riba nos propio nesesidatnan i interes. Mi ta primintí bo ku or abo ta konfia den señor, e bendishonnan di shelu lo bini.

Jesus a bisa pa duna “na Cesar e kosnan ku ta di Cesar; i duna Dios e kosnan ku ta di Dios.”¹⁰E Señor resusitá a pidi e Nefitanan pa skirbi den nan registro Su promesanan hañá den Malakias.¹⁰ Den nos tempu, Señor ta rekonfirmá e lei divino di diesmo, deklarando: “Esaki lo ta e komienso di e diesmo di mi pueblo. I [nan] lo paga un diesmo parti di tur nan entrada anualmente; i esaki lo ta e lei vigente na nan pa semper.”¹¹

Señor klaramente a dirigí kon diesmo mester wòrdu distribuí, bisando, “Trese tur diesmo na mi mangasina,”¹³ ku ta nifiká trese tur diesmo na Su reino restorá, E Iglesia di JesuCristo di e Santunan di e Delaster Dianan.¹³ El a dirigí ku e uso di e diesmo sagrado aki lo wòrdu konsiderá bou di orashon pa e konseho di e Promé Presidensia, e Quorum di Diesdos Apòstelnan, E Obispado Presidente, “i pa su propio bos na nan, asina Señor ta bisa.”¹⁴

E Fondonan Sagrado di Señor

E fondonan sagrado aki no ta pertenesé na e lidernan di e Iglesia. Nan ta pertenesé na Señor. Su siervonan ta minusiosamente konsiente di e naturalesa sagrado di nan mayordomia.

Presidente Gordon B. Hinckley a konta e eksperensia di su niñes aki: “Ora mi tabata un mucha, mi a plantia un pregunta na mi tata … tokante gastunan di e fondonan di Iglesia.” El a rekordá mi ku di mi ta e obligashon duná dor di Dios pa paga mi diesmo i ofrenda. Ora mi hasi esei, [mi tata a bisa,] e loke mi a duna ya no ta di mi mas. E ta pertenesé na Señor na ken mi a konsagrá esaki. Su tata a agregá: “Loke e outoridatnan di Iglesia hasi kuné no mester ta di preokupashon pa [abo, Gordon]. Nan ta responsabel dilanti di Dios, ken lo rekerí un relato for di nan mannan.”¹⁵

Nos ta sinti profundamente e peso di ta “responsabel dilanti di Dios.”

Bo Diesmo i Ofrenda Generoso

For di e diesmo i ofrendanan generoso ku boso a konsagrá na Señor, aña pasá mas ku mil mion di dòler Merikano a wòrdu usá pa bendishoná esnan den nesesidat.¹⁶

Den nos responsabilidat trasendental pa hiba e evangelio restorá rònt mundu, nos tin mas ku 71,000 mishonero sirbiendo den 414 mishon.¹⁷ Dor di bo diesmo i ofrendanan, mishoneronan, sin importá e situashon finansiero di nan famianan, por tin e oportunidat pa sirbi.

Tèmpelnan ta wòrdu konstruí rònt mundu den kantidatnan sin presedente. Aktualmente, 177 tèmpel ta den operashon, 59 ta aktualmente den konstrukshon i renobashon, i 79 mas ta den planifikashon i diseño.¹⁸ Boso diesmo ta pèrmit e bendishonnan di e tèmpel di ta na lugánan ku solamente Señor por a premirá.

Tin mas ku 30.000 kongregashon ubiká den míles di kapia i otro fasilidatnan den 195 pais i teritorio.¹⁹ Pa motibu di boso diesmo fiel, e Iglesia ta wòrdu establesé na lugánan leu ku kisas nunka lo bo bishita bou di e Santunan hustu ku kisas nunka lo bo konosé.

Iglesia aktualmente ta spònsòr sinku instituto di estudio akadémiko.²⁰ Nan ta sirbi mas ku 145.000 studiante. Shen i dies mil klas ta wòrdu siñá kada siman den nos seminario i institutonan.²¹

E bendishonnan aki i hopi mas ta bin den gran parti for di e yòn i grandi di kada sirkunstansia ekonómiko ku ta paga un diesmo honesto.

E poder spiritual di e lei divino di diesmo no ta wòrdu midí pa e kantidat di sèn kontribuí, pero tantu esun próspero i esun ménos prudente ta wòrdu mandá dor di Señor pa kontribuí ku 10 porsiento di nan entrada.²² E poder ta bin for di pone nos konfiansa den Señor.²³

E abundansia di Señor agregá transmití pa medio di e diesmo generoso a fortalesé e reservanan di e Iglesia, proveyendo asina ei oportunidatnan pa avansá e obra di Señor mas ayá ku kualke kos ku nos por a eksperensiá ainda. Tur kos ta konosí pa Señor, i ku tempu, nos lo mira Su propósitonan sagrado kumplí.²⁴

Bendishonnan ta Bin na Diferente Manera

E bendishonnan di diesmo ta bin den diferente manera. Na 1998, mi a kompaña e tempu ei Elder Henry B. Eyring na un reunion grandi di Iglesia na Utah den e área konosí awó komo Silicon Slopes, un komunidat di gran inovashon den teknologia. Tabata un tempu di prosperidat kresiente, i Elder Eyring a atvertí e Santunan tokante kompará loke nan tin ku otronan i ke mas. Semper mi ta kòrda su promesa ku si nan paga un diesmo honesto, nan deseo pa mas poseshon material lo disminuí. Den dos aña, e bòbel teknológiko a kai den otro. Hopi a pèrdè nan trabou, i kompanianan a sufri durante e tempu di ahuste finansiero. Esnan ku a sigui e konseho di Elder Eyring a wòrdu bendishoná.

Su promesa a kòrda mi di un otro eksperensiá. Mi a topa ku Charlotte Hlimi di 12 aña serka di Carcassonne, Fransia, na 1990 miéntras mi tabata sirbiendo komo un presidente di mishon. Famia Hilmi tabata un famia fiel bibando den un apartamento modesto ku ocho yu. Nan tabata tin un portrèt di e Salbador i e profeta na e muraya. Den e entrevista pa su bendishon patriarkal, mi a puntra Charlotte si e tabata paga un diesmo honesto. El a respondé, “Si, Presidente Andersen. Mi mama a siña mi ku tin bendishonnan temporal i bendishonnan spiritual ku ta bin dor di paga nos diesmo. Mi mama a siña mi ku si mi paga nos diesmo semper, nos lo no tin falta di nada. I Presidente Andersen, nos no ke nada.”

Imagen

Famia Hilmi

Dunando e pèrmit pa kompartí su historia, Charlotte, awe 45, i seyá den tèmpel, a komentá: “Mi testimonio di diesmo tabata jopi real e tempu ei, i e ta ainda mas fuerte awe. Mi ta profundamente gradisí pa e mandamentu aki. Miéntras mi a bib’é ,i a sigui di wòrdu kontinuamente bendishoná.”²⁵

Un dia kada un di nos lo terminá nos hornada terenal. Binti sinku aña pasá, djis algun dia promé ku mi madrastra, Martha Williams, a muri di kanser, el a risibí un check chikitu den pòst. El pa pidi m kasa, Kathy, inmediatamente pa su buki di check pa e por paga su diesmo. Dor ku su mama tabata asina debil kasi e no por a skibi, Kathy a puntr’e si e por skibi e check p’e. Su mama a kontest’é, “No, Kathy. Mi ke hasié mi mes.” I despues el a agregá silensiosamente, “mi ke ta bon dilanti di Dios.” Un di e lastu kosnan ku Kathy a hasi pa su mama ta entregá su ènvelòp di diesmo na e obispu.

Dios su Obra Importante

Mi rumannan, E Iglesia di JesuCristo di e Santunan di Delaster dianan ta “for di e skuridat,”²⁶tresiendo e bendishonnan remarkabel rònt mundu. Lo bai tin esnan ku lo aploudí nos pa bai dilanti i esnan ku lo no hasi esaki. Mi a pensa riba e palabranan di e Gamaliel sabio, ken, skuchando di e milagernan di e Apòstel Pedro i Juan, a atvertí e konsilio na Yerusalèm:

“Laga [e hòmbernan aki] trankil: pasó si … esaki ta obra di hende, e lo no bira nada:

“Pero si e ta di Dios, bo no por kaba kuné; pa bo no haña bo ta hasta bringa ku Dios.”²⁷

Abo i ami ta parti di Dios su obra importante aki na tera. E lo no kaba na nada pero lo kontinuá ta move rònt mundu, preparando e kaminda pa e regreso di e Salbador. Mi ta tèstifiká di e palabranan di Presidente Russell M. Nelson: “Den e dianan benidero, nos lo mira e manifestashonnan di mas grandidi e poder di e Salbador ku mundu a yega di mira hamas Entre awó i e tempu di Su yegada … , E lo dramá hopi privilegio, bendishonnan, i milagernan riba e fielnan.”²⁸

Esaki ta mi testimonio Jesus ta e Cristo. Esaki ta Su obra santu. E lo bin atrobe. Den e nòmber di JesuCristo, amèn.