Mas Ku un Héroe

Pa Obispu W. Christopher Waddell

Promé Konsehero den e Obispado Presidente

JesuCristo no ta solamente nos héroe, E ta nos Señor i Rei, e Salbador i Redentor di humanidat.

Di 1856 pa 1860, míles di pioneronan Santunan di e Delaster Dianan a hala nan pertenensianan den garoshi di man pa mas ku 1.000 mis (1600 km) ora nan tabata biahando pa e Vaye di Salt Lake. Shentisesentishete aña pasa, e siman aki riba 4 di òktober 1856, Presidente Brigham Young a keda sorprendí di sa ku dos kompania di garoshi di man, enkabesá pa Edward i James Willie, ainda tabata sentenar di mianan for di Salt Lake City, siendo ku invierno tabata yegando lihé.¹ E dia siguiente, no muchu leu for di kaminda nos ta reuní awe, Presidente Young a para dilanti e Santunan i a deklará: “Hopi di nos rumannan ta na e sabananan ku garoshinan di man i nan mester trese aki . … Bai i trese e personanan ei awor riba e sabana.”²

Djis dos dia despues e promé ekipo di reskate a sali en buska di e pioneronan ku garoshi man aki.

Un miembro di e kompania Willie a deskribí e situashon di desesperashon promé ku e yegada di e tim di reskate prinsipal. El a kompartí: “[Nèt] ora tabata parse ku tur kos lo a bai pèrd, … i tabata parse ku tabata keda poko pa biba kuné, manera un rayo ku a kai for di shelu, Dios a respondé nan orashonnan. Un grupo di reskate, tresiendo kuminda i suministro … , a aparesé na bista. … Kuantu nos un gradisí Dios pa nos reskate.”

E salbadónan aki tabata héroenan pa e pioneronan, poniendo nan propio bida den peliger den kondishonnan di wer ekstremo pa hiba mas tantu posibel seif kas. Un di e héroenan aki tabata Ephraim Hanks.

Na mitar di òktober i inkonsiente di e situashon ku e garoshinan di man, Hanks tabata regresá su kas na Salt Lake City despues di un biahe ora, ku durante anochi un bos a lant’e bisando, “E hendenan di e garoshi di man ta den problema i tin mester di bo, lo bo bai i yuda nan?”

Ku e pregunta ei zonando den su mete, el a pura bai Salt Lake City. Ira ku el a skucha Presidente Heber C. Kimball pidi boluntarionan adishonal, Hank a sali e dia siguiente mes, riba su mes pa e reskate. Moviendo lihé el a topa e otro salbadónan na kaminda i ora ku nan a yega na e kompania Martin, Hanks a kòrda: “E bista ku mi a kontra ora ku mi a drenta nan kampamentu nunka lo por wòrdu kita for di mi memoria. … [i] tabata sufisiente pa toka e kurason mas balente.”⁴

Ephraim Hanks a pasa dianan moviendo di tènt pa tènt bendishonando e enfermonan. El a relatá ku, “den hopi kaso nan tabata atendé ku e enfermonan i reprendé enfermedatnan den e nòmber di Señor JesuCristo, esnan ku tabata sufri tabata rekuperá inmediatamente; nan tabata wòrdu sana kasi insesantemente.”⁵ Ephraim Hanks pa semper e lo ta un héroe pa e pioneronan di garoshi man.

Similar na reskate remarkabel ei, susesonan ku a impaktá nos bidanan i asta e kurso di historia ta frekuentemente e resultado di desishonnan i logronan di h1mber- i muhénan individual—gan artistanan, sientífikonan, lidernan di negoshi, i polítikonan. E individuonan ekstraordinario aki hopi bes ta wòrdu honrá komo héroenan, ku monumentonan konmemorativo traha pa konmemorá nan hazañanan.

Tempu mi tabata mucha, mi promé héroenan tabata atletanan. Mi promé rekuerdonan ta di kolekshoná karchinan di beisbòl ku potrètnan i statistiknan di hungadónan di Beisbòl di Liga Grandi. “Adorashon di héroenan” komo mucha por ta dushi i inosente, manera ora muchanan bisti na nan super héroe faborito pa Haloween. Ounke nos ta atmirá i respetá hopi hende hòmber- i muhénan talentoso i remarkabel pa nan abilidatnan i kontribushonnan, e grado den kual nan ta wòrdu honra, si nan wòrdu hasi den ekstremo por ta ekivalente na e yunan di Israel ku tabata adorá un bisé di oro den desierto di Sinai.

Komo adulto, loke un dia tabata un dibershon inosente di infansia por kombertí den un opstákulo ora ku “adorashon komo héroe” di polítikonan, personanan ku ta “blog”, personanan ku tin influensia riba otro, atletanan òf músikonan ta laga nos wak “mas leu di loke ta normal”⁶ i pèrdè for di bista loke di bèrdat ta esensial.

Pa e yunan di Israel, e reto no tabata e oro ku nan a trese ku nan na nan biahe na e tera primintí pero loke nan a permití e oro bira: un ídolo, ku despues a bira e opheto di nan adorashon, desviando nan atenshon for di Yehova ku a parti e Laman Kòrá i a libra nan for di sklabitut. Nan enfoke riba e bisé a impaktá nan abilidat pa adorá e Dios berdadero.⁷

E héroe—nos héroe, awor i semper—ta JesuCristo i kualkier kos o kalke hende ku ta distraí nos for di Su enseñansanan, manera por haña den skrituranan i den e palabranan di e profetanan bibu por impaktá nos progreso negativamente riba e kaminda di kombenio. Promé ku e Kreashon di e mundu aki, nos a mira JesuCristo ora a bira kla ku e plan proponé dor di Tata Selestial, kual tabata inkluí nos oportunidat pa progresá i bira manera E, tabata na prueba.

JesuCristo no tabata solamente e lider den defendé nos Tata su plan, pero E lo a hunga e ròl di mas krusial tambe den e implementashon di esaki. El a respondé na e Tata i ofresé boluntariamente pa pone Su Mes “ den reskate pa nos tur,”⁸ pa paga un debe ku kada un di nos lo haña pa dor di pika pero no por a wòrdu paga riba nos mes.

Presidente Dallin H. Oaks a siña, “[JesuCristo] a hasi tur loke ku ta esensial pa nos biahe dor di e bida mortal pa e destino deliniá den e plan di nos Tata Selestial.”⁹

Den e Hardin di Getsemani, entrenando un tarea asina abrumador, e Salbador balentemente a deklará, “No hasi mi boluntat, pero esun di bo” i a sigui pa tuma riba djE dolónan kombiná, e enfermedatnan i e sufrimentunan pa e pikanan di tur ku algun dia lo biba.¹⁰ Den un akto perfekto di obedensha i kompromiso, JesuCristo a kompletá e akto supremo, heroiko, den tur e kreashon, ku a kulminá den Su glorioso Resurekshon.

Den nos konferensia general di mas resien, Presidente Russell M. Nelson a rekordá nos: Kualkier pregunta o problemanan ku boso tin, e kontesta ta semper den e bida i siñansanan di JesuCristo. Siña mas tokante di Su Ekspiashon, Su amor, Su miserikòrdia, i Su evangelio Restorá di sanashon i, progreso. Bira na djE! SiguiÉ!”¹¹ I mi lo agregá, “Skohe E.”

Den nos mundu kompliká, e por ta un tentashon pa akudí na e “héroenan “ di e sosiedat den un akshon pa duna klaridat na e bida ora ku e ta parse konfuso òf abrumador. Nos ta kumpra e pañanan ku nan ta spònser, brasa e politikanan ku nan ta defendé i nos ta sigui nan sugerensianan kompartí riba medionan sosial. Esaki por ta bon komo un distraishon temporal, pero nos mester paga tinu pa e forma di adorashon di héroe aki no kombertí den no bisé di oro. Skohé e héroe korekto tin konsekuensianan eterno.

Ora nos famia a yega Spaña pa kuminsá nos servisio komo lidernan di mishon, nos a haña un sita den un leshi kompartí dor di di Elder Neal A. Maxwell ku tin relevansia pa e héroenan ku nos ta skohe pa sigui. El a sita “Si bo no a skohe e Reino di Dios promé el lo terminá siendo sin niun diferensia e loke bo a skohe a kambio.”¹² Rumannan, ta dor di skohe JesuCristo, e Rei di reinan ku nos ta skohe e reino Dios. Kualkier otro eskoho ta ekivalente na skohe e brasa di karni òf un bisé di oro i lo laga nos finalmente na kaya.

Den e buki di Tèstamènt Bieu di Daniel, nos ta lesa e relato di Shadrach, Meshach i Abednego, kende klaramente tabata sa kua Héroe nan skohe— e no tabata kualkier un di e dios di Rei Nebuchadnezar. Ku konfiansa nan a deklará:

“Nos Dios kual nos ta sirbi por liberá nos for di e fòrnu di kandela kimando …

“Pero si no, bosa, O rei, ku nos lo no sirbi bo diosnan ni adorá e imágen di oro.”¹³

Manera e Apòstel Pablo a siña, “Tin hopi diosnan,”¹⁴ i, mi por agregá, héroenan, na kual na kual nos ta wòrdu yama pa dobla dilanti nan, pa adorá i brasa. Pero meskos ku Daniel su tres amigunan tabata sa, ta solamente Unu tin e garantia di por liberá—paso El a hasié kaba i semper E lo hasié.

Pa nos, den e biahe di regreso bek na e presensia di Dios, na nos tera primintí, e problema no ta e polítiko, e músiko, e atleta òf e “blogger”, pero mas bien skohe pa permití nan pa bira e opheto prinsipal di nos atenshon i enfoke, na lugá di nos Salbador i Redentor.

Nos ta skohe E, JesuCristo, ora nos skohe pa honra Su dia sea nos ta na kas òf biahando pa vakashon. Nos ta skohe ora nos skohe Su palabranan pa medio di skrituranan i siñansanan di profetanan bibu. Nos ta skohe E ora nos skohe pa tin un rekomendashon di tèmpel i biba digno di su uso. Nos ta skohe E ora ku nos ta hasidónan di pas i ta niega pa ta kontroversial, “spesialmente ora ku nos tin diferensianan di opinion.”¹⁵

Niun lider a mustra mas kurashi, ningun humanitario a mustra mas bondat, niun dòkter a kura mas enfermedat i niun artista a yega na ta mas kreativo ku JesuCristo.

Den un mundu di héroenan, ku monumentonan i museonan dediká na e hazañanan di hende hòmber- i muhénan mortal, tin Un ku ta para riba tur e otronan. Mi ta testifiká ku JesuCristo no ta solamente nos héroe; E ta nos Señor i Rei, e Salbador i Redentor di humanidat. Den e nòmber di JesuCristo, amèn.