![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F87%2F05%2F8705fd1967d223f9a01fefe27a5353ba245d16db%2F8705fd1967d223f9a01fefe27a5353ba245d16db.jpeg/full/!250,/0/default)
მარადიული ჭეშმარიტება
ჭეშმარიტების ამოცნობის საჭიროება არასოდეს ყოფილა ასე მნიშვნელოვანი ჩვენთვის!
დებო და ძმებო, მადლობას გიხდით მამა ღმერთისა და მისი ძის, იესო ქრისტესადმი ერთგულებისთვის, აგრეთვე ერთმანეთის სიყვარულისა და მსახურებისთვის. თქვენ მართლაც გამორჩეულები ხართ!
შესავალი
მას შემდეგ, რაც მე და ჩემმა მეუღლემ, ანემ, მივიღეთ მოწოდება, გვემსახურა სრული დროის მისიის ხელმძღვანელებად, ჩვენმა ოჯახმა გადაწყვიტა, მისიის ველში ჩასვლამდე თითოეული მისიონერის სახელი გაგვეგო. ჩვენ მოვიპოვეთ ფოტოები, შევქმენით ბარათები და დავიწყეთ სახელებისა და სახეების შესწავლა.
ჩამოსვლისთანავე ჩვენ მისიონერებთან გაცნობითი ხასიათის კონფერენციები ჩავატარეთ. ერთ-ერთი კონფერენციის დასრულების შემდეგ გავიგონე ჩვენი ცხრა წლის ვაჟის საუბარი:
„სასიამოვნოა, სემ“!
„რეიჩელ, საიდან ხარ“?
„ვა, დევიდ, რა მაღალი ხარ“!
აღელვებული მივედი ჩვენს შვილთან და ჩავჩურჩულე: „მოდი ნუ დავივიწყებთ, რომ მისიონერებს უნდა მიმართო როგორც უხუცესი ან და“.
მან გაკვირვებულად შემომხედა და თქვა: „მამა, მეგონა, რომ ჩვენ მათი სახელებიუნდა დაგვემახსოვრებინა“. ჩვენმა ვაჟმა გააკეთა ის, რაც მისი გაგებით სწორი იყო.
როგორ გვესმის ჭეშმარიტება დღევანდელ სამყაროში? ჩვენ გამუდმებით გვბომბავენ ძლიერი მოსაზრებებით, მიკერძოებული მოხსენებებითა და არასრული მონაცემებით. ამავდროულად, ამ ინფორმაციის მოცულობა და წყარო მატულობს. ჭეშმარიტების ამოცნობის საჭიროება არასოდეს ყოფილა ასე მნიშვნელოვანი ჩვენთვის!
ჭეშმარიტება ჩვენთვის მნიშვნელოვანია ღმერთთან ურთიერთობის დასამყარებლად და გასაძლიერებლად, სიმშვიდისა და სიხარულის მოსაპოვებლად და ჩვენი ღვთიური პოტენციალის მისაღწევად. მოდით დღეს განვიხილოთ შემდეგი შეკითხვები:
-
რა არის ჭეშმარიტება და რატომ არის იგი მნიშვნელოვანი?
-
როგორ ვპოულობთ ჭეშმარიტებას?
-
როგორ ვაზიარებთ ჭეშმარიტებას მას შემდეგ, რაც ვიპოვით მას?
ჭეშმარიტება მარადიულია!
უფალმა გვასწავლა წმინდა წერილში, რომ „ჭეშმარიტება არის ცოდნა არსისა, როგორიც ის არის და როგორიც იყო და როგორიც იქნება“ (მოძღვრება და აღთქმები 93:24). ის „არ იყო არც შექმნილი და არც გაკეთებული“ (მოძღვრება და აღთქმები 93:29) და „არ აქვს დასასრული“ (მოძღვრება და აღთქმები 88:66).1 ჭეშმარიტება აბსოლუტური, უცვლელი და ურყევია. სხვაგვარად რომ ვთქვათ, ჭეშმარიტება მარადიულია.2
ჭეშმარიტება გვეხმარება, არ გავებათ ტყუილის მახეში,3 განვასხვაოთ კეთილი და ბოროტი,4 მივიღოთ დაცვა,5 და ვიპოვოთ ნუგეში და განკურნება.6 ჭეშმარიტებას შეუძლია წინ წარუძღვეს ჩვენს მოქმედებებს,7 გაგვანთავისუფლოს,8 განგვწმინდოს,9 და მარადისობისკენ წაგვიყვანოს.10
ღმერთი გვიმხელს მარადიულ ჭეშმარიტებას
ღმერთი გვიმხელს მარადიულ ჭეშმარიტებას გამოცხადებასთან დაკავშირებული ურთიერთობების ქსელის მეშვეობით, რომელიც მოიცავს მას, იესო ქრისტეს, სულიწმინდას, წინასწარმეტყველებსა და ჩვენ. მოდით განვიხილოთ ცალკეული, მაგრამ ურთიერთდაკავშირებული როლები, რომლებსაც თითოეული მონაწილე ასრულებს ამ პროცესში.
პირველი: ღმერთი არის მარადიული ჭეშმარიტების წყარო.11 მას და მის ძეს, იესო ქრისტეს,12 აქვთ ჭეშმარიტების სრულყოფილი წვდომა და ისინი ყოველთვის მოქმედებენ ჭეშმარიტ პრინციპებთან და კანონებთან ჰარმონიაში.13 ეს ძალა აძლევს მათ სამყაროების შექმნისა და მართვის საშუალებას,14 ასევე, თითოეული ჩვენგანისადმი სრულყოფილი სიყვარულის, ხელმძღვანელობისა და აღზრდის საშუალებას.15 მათ სურთ, რომ ჩვენ გვესმოდეს ეს ჭეშმარიტება და ვიყენებდეთ მას, რათა დავტკბეთ დალოცვებით, რითაც ისინი ტკბებიან.16 მათ შეუძლიათ პირადად გადმოსცენ ჭეშმარიტება ან, უფრო ხშირად, მაცნეების მეშვეობით, როგორიცაა სულიწმინდა, ანგელოზები ან ცოცხალი წინასწარმეტყველები.
მეორე: სულიწმინდა მოწმობს ყოველივე ჭეშმარიტების შესახებ.17 ის პირდაპირ გვამცნობს ჭეშმარიტებას და მოწმობს სხვების მიერ ნასწავლი ჭეშმარიტების შესახებ. სულიწმინდის კარნახი, როგორც წესი, მოდის ჩვენს გონებაში აზრების, გულში კი - გრძნობების ფორმით.18
მესამე: წინასწარმეტყველები ჭეშმარიტებას ღმერთისგან იღებენ და ჩვენ გვიზიარებენ.19 ჩვენ ვსწავლობთ ჭეშმარიტებას ძველი დროის წინასწარმეტყველებისგან წმინდა წერილებში20 და ცოცხალი წინასწარმეტყველებისგან გენერალურ კონფერენციაზე და სხვა ოფიციალური არხებიდან.
და ბოლოს, მე და თქვენ ამ პროცესში მნიშვნელოვანი როლი გვიკავია. ღმერთი ელის ჩვენგან, რომ ვეძიებთ ჭეშმარიტებას, ამოვიცნობთ მას და ვიმოქმედებთ ამ ჭეშმარიტების საფუძველზე. ჭეშმარიტების მიღებისა და გამოყენების უნარი დამოკიდებულია მამასთან და ძესთან ჩვენი ურთიერთობის სიძლიერეზე, სულიწმინდის გავლენისადმი ჩვენს რეაგირებაზე და უკანასკნელ დღეთა წინასწარმეტყველებზე ჩვენს სწორებაზე.
ჩვენ უნდა გვახსოვდეს, რომ სატანა ძლიერ ცდილობს, აგვარიდოს ჭეშმარიტება. მან იცის, რომ ჭეშმარიტების გარეშე ჩვენ ვერ მივიღებთ მარადიულ სიცოცხლეს. მან ჭეშმარიტების ძაფები ამქვეყნიურ ფილოსოფიებში ჩააქსოვა, რათა დაგვაბნიოს და არ მივაქციოთ ყურადღება იმას, რასაც ღმერთი გვეუბნება.21
მარადიული ჭეშმარიტების ძიება, ამოცნობა და გამოყენება
მარადიული ჭეშმარიტების ძიებისას22 ეს ორი შეკითხვა დაგვეხმარება იმის ამოცნობაში, ღმერთის არის ესა თუ ის კონცეფცია თუ სხვა წყაროდან მოდის:
-
ისწავლება ეს კონცეფცია თანმიმდევრულად წმინდა წერილში ან ცოცხალი წინასწარმეტყველების მიერ?
-
დაგიდასტურათ სულიწმინდამ ეს კონცეფცია?
ღმერთი გვიცხადებს მოძღვრების ჭეშმარიტებას წინასწარმეტყველების მეშვეობით და სულიწმინდა გვიდასტურებს ამ ჭეშმარიტებას და გვეხმარება მის გამოყენებაში.23 ჩვენ უნდა ვეძიოთ ეს სულიერი კარნახები და ვიყოთ მზად მათ მისაღებად.24 ჩვენ ყველაზე კარგად ვგრძნობთ სულიწმინდას როდესაც თავს ვიმდაბლებთ,25 გულწრფელად ვლოცულობთ, ვსწავლობთ ღვთის სიტყვას,26 და ვიცავთ მის მცნებებს.27
მას შემდეგ რაც სულიწმინდა დაგვიდასტურებს კონკრეტულ ჭეშმარიტებას, ჩვენი წვდომა გაღრმავდება, როცა ამ პრინციპს პრაქტიკაში გამოვიყენებთ. დროთა განმავლობაში, თუ თანმიმდევრულად გამოვიყენებთ ცხოვრებაში ამ პრინციპს, ჩვენ მივიღებთ ამ ჭეშმარიტების აშკარა დასტურს.28
მაგალითად, დავუშვი შეცდომები და ვნანობ ცუდი არჩევნის გამო. მაგრამ ლოცვის, სწავლისა და იესო ქრისტეში რწმენის მეშვეობით მე მივიღე დასტური მონანიების პრინციპის შესახებ.29 რაც უფრო მეტს ვინანიებდი მით უფრო მიღრმავდებოდა მონანიების წვდომა. მე უფრო ახლოს მივედი ღმერთთან და მის ძესთან. ახლა ვიცი რომ ცოდვის მიტევება შესაძლებელია იესო ქრისტეს მეშვეობით, რადგან ყოველდღე ვიღებ მონანიების დალოცვებს.30
ენდო ღმერთს, როცა ჭეშმარიტება ჯერ არ გაგიმხილეს
რა უნდა ვქნათ, როცა გულწრფელად ვეძიებთ ჭეშმარიტებას, რომელიც ჯერ არ გამხილულა? თანავუგრძნობ ყველას, ვისაც სწყურია პასუხების მიღება, მაგრამ ისინი არ მოდის.
უფალმა ურჩია ჯოზეფ სმითს: „იყავი ჩუმად, სანამ არ ჩავთვლი საჭიროდ, რომ … ვაცნობო ყოველივე ის, რაც ამ საკითხს ეხება“.მოძღვრება და აღთქმები 10:37).
და მან აუხსნა ემა სმითს: „ნუ ბუზღუნებ იმაზე, რაც არ გინახავს, ვინაიდან ეს დაფარულია შენგან და ამაქვეყნისგან ჩემი სიბრძნით, ჟამისთვის, რომელიც მოვა“ (მოძღვრება და აღთქმები 25:4).
მეც ვეძებდი გულწრფელ კითხვებზე პასუხებს. მრავალი პასუხი მივიღე; ზოგი ჯერ არა.31 როდესაც ჩვენ, მიუხედავად ყველაფრისა, ვენდობით ღვთის სიბრძნეს და სიყვარულს, ვიცავთ მის მცნებებს და ვეყრდნობით იმას, რაც კარგად ვიცით - ის გვეხმარება, ვიპოვოთ სიმშვიდე, სანამ გაგვიმხელს ჭეშმარიტებას ყოველივეს შესახებ.32
მოძღვრებისა და პოლიტიკის წვდომა
ჭეშმარიტების ძიებისას კარგია გვესმოდეს განსხვავება მოძღვრებასა და პოლიტიკას შორის. მოძღვრება უკავშირდება მარადიულ ჭეშმარიტებას, როგორიცაა ღვთაების ბუნება, ხსნის გეგმა და იესო ქრისტეს გამომსყიდველი მსხვერპლი. პოლიტიკა არის ამჟამინდელ ვითარებასთან დაკავშირებით მოძღვრების გამოყენება. პოლიტიკა გვეხმარება ეკელესიის მოწესრიგებულად მართვაში.
მოძღვრება არასოდეს არ იცვლება, პოლიტიკა კი დროდადრო ცვლილებებს ექვემდებარება. უფალი მუშაობს თავისი წინასწარმეტყველების მეშვეობით, რათა დაიცვას თავისი დოქტრინა და შეცვალოს ეკლესიის პოლიტიკა თავისი შვილების საჭიროებების შესაბამისად.
სამწუხაროდ ჩვენ ზოგჯერ მოძღვრება და პოლიტიკა ერთმანეთში გვერევა. თუ ჩვენ არ გვესმის განსხვავება, პოლიტიკის შეცვლისას შეიძლება იმედგაცრუება ვიგრძნოთ და ეჭვქვეშ დავაყენოთ ღვთის სიბრძნე ან წინასწარმეტყველთა გამოცხადების როლი.33
მარადიული ჭეშმარიტების სწავლება
როცა ღმერთისგან ჭეშმარიტებას ვიღებთ, ის გვაგულიანებს, სხვებსაც გავუზიაროთ იგი.34 ჩვენ ამას ვაკეთებთ, როცა გაკვეთილს ვატარებთ, ბავშვს ვაძლევთ მიმართულებას ან სახარების ჭეშმარიტებაზე ვსაუბრობთ მეგობართან.
ჩვენი მიზანია, ვასწავლოთ ჭეშმარიტება ისე, რომ მოვიწვიოთ სულიწმინდის რწმენაზე მოსაქცევი ძალა.36 თქვენი ნებართვით გაგიზიარებთ რამდენიმე უბრალო მოწვევას უფლისგან და მისი წინასწარმეტყველებისგან, რაც შეიძლება დაგეხმაროთ.36
-
მოახდინეთ კონცენტრაცია მამაზეციერზე, იესო ქრისტეზე და სულიწმინდაზე და მათ ფუნდამენტურ მოძღვრებაზე.37
-
მყარად დამკვიდრდით წმინდა წერილში და უკანასკნელ დღეთა წინასწარმეტყველთა ქადაგებებში.38
-
დაეყრდენით მრავალი ავტორიტეტული მოწმის მეშვეობით დამკვიდრებულ დოქტრინას.39
-
აარიდეთ თავი ვარაუდს, პირად მოსაზრებებს ან ამქვეყნიურ იდეებს.40
-
ასწავლეთ მოძღვრების რომელიმე საკითხი სახარების ჭეშმარიტების კონტექსტში.41
-
გამოიყენეთ სწავლების ისეთი მეთოდები, რომლებიც სულიწმინდის გავლენას იწვევს.42
-
ისაუბრეთ გასაგებად, რათა გაუგებრობას არ ჰქონდეს ადგილი.43
სიყვარულით ისაუბრეთ ჭეშმარიტების შესახებ
დიდი მნიშვნელობა აქვს იმას, როგორ ვასწავლით ჭეშმარიტებას. პავლე მოციქული გვამხნევებდა, ვიყოთ „ჭეშმარიტების მეტყველნი სიყვარულით“ (იხ. ეფესელთა 4:14-15). ჭეშმარიტებას აქვს სხვისი დალოცვის საუკეთესო შანსი, როცა ის ქრისტესმიერი სიყვარულით არის გადმოცემული.44
სიყვარულის გარეშე ჭეშმარიტების სწავლებამ შეიძლება გამოიწვიოს განსჯის, იმედგაცრუებისა და მარტოობის გრძნობა. ეს ხშირად იწვევს წყენასა და განხეთქილებას - კონფლიქტსაც კი. მეორე მხრივ, სიყვარული ჭეშმარიტების გარეშე ცარიელი და ზრდის პერსპექტივის გარეშეა.
ჭეშმარიტებაც და სიყვარულიც აუცილებელია ჩვენი სულიერი განვითარებისთვის.45 ჭეშმარიტება უზრუნველყოფს დოქტრინას, პრინციპებსა და კანონებს, რომლებიც აუცილებელია მარადიული სიცოცხლის მოსაპოვებლად, ხოლო სიყვარული წარმოშობს მოტივაციას, რომელიც საჭიროა იმისთვის, რომ მივიღოთ ჭეშმარიტება და ვიმოქმედოთ მის საფუძველზე.
მე მარად მადლიერი ვარ მათი, ვინც მოთმინებით, სიყვარულით მასწავლა მარადიული ჭეშმარიტება.
დასასრული
და ბოლოს, თქვენი ნებართვით გაგიზიარებთ მარადიულ ჭეშმარიტებას რომელიც ჩემი სულისთვის ღუზად იქცა. მე ეს ჭეშმარიტება ვისწავლე დღეს განხილული პრინციპების მიხედვით ცხოვრებით.
მე ვიცი, რომ ღმერთი ჩვენი ზეციური მამაა.46 ის ყოვლისმცოდნე,47 ყოვლისშემძლე,48 და სრულყოფილად მოსიყვარულეა.49 მან შექმნა ჩვენთვის გეგმა, რათა მოვიპოვოთ მარადიული სიცოცხლე და დავემსგავსოთ უფალს.50
ამ გეგმის ნაწილი იყო ჩვენს დასახმარებლად მისი ძის, იესო ქრისტეს, გამოგზავნა.51 იესომ გვასწავლა მამის ნების შესრულება52 და ერთმანეთის სიყვარული.53 მან გამოისყიდა ჩვენი ცოდვები54 და ჯვარზე აღესრულა.56 სამი დღის შემდეგ კი აღსდგა.56 ქრისტეს მეშვეობითა და მისი მადლით ჩვენც აღვდებით,57 მოგვეტევება58 და ტანჯვაში შევძლებთ ძალის პოვნას.59
მიწიერი მსახურებისას იესომ თავისი ეკლესია დააარსა.60 დროთა განმავლობაში ის ეკლესია შეიცვალა და ჭეშმარიტება დაიკარგა.61 იესო ქრისტემ აღადგინა თავისი ეკლესია და სახარების ჭეშმარიტება წინასწარმეტყველ ჯოზეფ სმითის მეშვეობით.62 ქრისტე დღესაც, წინასწარმეტყველებისა და მოციქულების მეშვეობით, ხელმძღვანელობს თავის ეკლესიას.63
მე ვიცი, რომ ქრისტეს კვალზე სიარულით ჩვენ საბოლოო ჯამში შევძლებთ „[გავხდეთ] მასში სრულყოფილნი“ (მორონი 10:32), მივიღოთ „სიხარულის [სისავსე]“ (მოძღვრება და აღთქმები 93:33) და „ყველაფერი, რაც აქვს [ჩვენს] მამას“ (მოძღვრება და აღთქმები 84:38). ვმოწმობ ამ მარადიულ ჭეშმარიტებაზე იესო ქრისტეს წმინდა სახელით, ამინ.