A iTukutuku ni Marau Vei Ira na Luveda

Coleen K. Menlove

Peresitedi Raraba ni iSoqosoqo ni Lalai

Sa ikoya oqo na noda ilesilesi, sa kena gaunadonu vei keda oqo, me da gumatuataka na veivakavulici ka vakadinadinataka vei ira na luveda na dina ni kosipeli i Jisu Karisito.

Au dau taleitaka na yalo ni gugumatua! Au dau vola e so na itukutuku leleka ni gugumatua me baleti au se vei ira na tani. Oqo e dua na sala e vakaraitaki kina na noda gugumatua se solibula. E dua na noqu tiki ni ivolanikalou taleitaki e vakamacalataki kina na gugumatua. Era wiliki vakatikina:

“Ia oqo na cava eda sa rogoca ena kosipeli eda sa mai ciqoma? Na itukutuku ni marau!” E tinikava tale na icegu e tiko ena vo ni tikina kei na va na tikina ka tarava mai.

“Na itukutuku ni loloma levu mai lomalagi; kei na itukutuku dina mai na loma ni qele … na itukutuku vinaka … mo dou reki vakalevu kina… .

“… Sa ka lagilagi vakaidina na domo sa rogo mai lomalagi, ia sa tukuna vei keda na lagilagi, kei na veivakabulai … !”¹—ka makataki ena icegu.

Eda sa rawa ni rogoca na domo ni reki ka kauta mai na vakanuinui kei na reki ki na noda bula. Na rekitaki ni noda vakadinadinataka na iVakabula ena rawa ni basika ena tiki ni noda bula kece ni da vakasaqara tiko me da lako mai vei Karisito.

Vakacava li ko ira na luveda? Era sa rogoca beka na domo ni reki kei na vakanuinui ki na kosipeli? Ni oti e dua na lesoni me baleta na iMatai ni Raivotu nei Josefa Simici, era sa qai kerei na lewe ni kalasi me ra droinitaka e so na droini me ra kauta yani ki vale ka laki wasea vata kei ira na lewe ni nodra dui matavuvale. E a vakavulici vei ira na gone na butobuto e a sota kaya o Josefa ni bera ni rau rairai mai na Tamada kei na Luvena. E dua na goneyalewa yabaki ono e a taura cake e dua na peni roka dravu ka tekivu me droini. E a boroya me loaloa vakadua mai ra ki cake na yasa ni dua na draunipepa. Ni sa tarogi koya ko qasenivuli me baleta na nona droini, e qai tukuna o koya ni a droinitaki Josefa Simici ni sa tu ena butobuto.

E a vakatarogi koya o qasenivuli, “O sa kila tiko ni gauna erau a basika kina na Tamada Vakalomalagi kei Jisu, era sa seyavu kece na butobuto? Erau na kaukauwa tikoga vei Setani ena veigauna kece na Tamada Vakalomalagi kei Jisu, ka rau na dau taqomaki iko.” Sa qai vuki tale na gone ko ya ki na nona tiki ni pepa. Ena dua na tutuna e cake, sa qai droinitaka kina na irairai ni rua na tamata, ka boroya tale yani ena roka dromodromoa na nona iboro loaloa, ka vakalewena na draunipepa taucoko ena rarama.

Sa ikoya sara ga na rarama oqo, na rarama ni kosipeli ka sa vakalesuya mai “na itukutuku ni marau” ka rawa ni ra vukei kina na gone mai vei kemuni na itubutubu me ra kila. E ka dina na veivakacacani, ia era na rawa ni vakila na gone na vakacegu kei na reki ni ra na cakacakataka na nodra vakabauti Jisu Karisito. Era na sega ni sotava na luveda na rarama oqo kevaka eda sega ni vakavulici ira ena kosipeli.

Sa dusimaki ira na itubutubu na Turaga me ra “tuberi ira na luvedra ena rarama kei na dina.”² Sa vakasalataki keda talega me da tuberi ira na luveda “me ra dau masu ka caka dodonu ena mata ni Turaga,”³ kei “na ivakavuvuli ni veivutuni, na vakabauti Jisu Karisito, … na papitaiso kei na isolisoli ni Yalo Tabu.”⁴ Me da vukei ira me vagolei nodra vakarorogo, nodra vakasama kei na yalodra me ra kila na “itukutuku ni marau” ka me ra gadreva na bula kilikili me ra na rawata na marau tawamudu ni da na vakatavulica na dina ni kosipeli.

E vakaraitaki tiko na ka oqo ena iVola i Momani. E a vakavulici Inosi o tamana ena “vunau kei na ivakavuvuli ni Turaga.” Na veivakalougatataki levu oqo e a vakavuna me kacivaka kina o Inosi, “me vakavinavinakataki ga kina na yaca ni noqu Kalou.”⁵ E a qai vakamacalataka o Inosi, “sa votu sara mai vei au na ivakavuvuli ni bula tawamudu kei na nodra reki na yalododonu kau a dau rogoca vei tamaqu.”⁶

E dua noqu itokani e a wasea na ka e a sotava ni se gonelailai voli ena dua na taba ni Lotu ni o koya duadua ga e tiko ena yabaki ni Lalai. Ena veimacawa kece e sa dau vakayacora ga e vale o tinana na kalasi ni Lalai. Ena siga kei na gauna vata ga. Sa dau gumatua sara o koya me dau dabe vata kei tinana ka vulica na kosipeli i Jisu Karisito kei na sala me na bulataka kina. E dau vola sara vakavinaka o tinana na kena itukutuku ena dua na ivola lailai ka laurai kina ni okati kece ena soqoni ni Lalai e vale, na masu, lagasere, kei na lesoni.

Na gagadre ni lomai tinana ko ya me tara cake na luvena yalewa lailai e dua na ivakadinadina kei Jisu Karisito ka me vakila nona reki ena vuku ni kosipeli. E a vakarautaka vua na luvena yalewa na ka bibi duadua vua me vaka ni se gonelailai. Na gone yalewa lailai oqori, e sa dua edaidai na marama vakabauta na veiyalayalati, e raicalesu na nona gauna ni gone ena vakavinavinaka titobu ena gugumatua kei na solibula nei tinana me vakavulici koya me baleta na iVakabula. Na gugumatua ni tina oqori, e a yaco kina me dua na gauna marautaki vua na luvena yalewa—o ya na ka au vakabibitaka tiko edaidai.

E matata vinaka sara na nodra ivakaro na noda parofita bula me baleta na noda itavi bibi me ra tuberi na luveda.⁷ E dua na ivola eratou solia mai na Mataveiliutaki Taumada e a vakaroti keda “me da solia noda igu taucoko me vakayacori na masu ni vuvale, lotu ni matavuvale, vulici ni kosipeli kei na ivakaro, kei na qaravi ni itavi vakamatavuvale. Se mani vakaevei na levu ni veika eda gadrevi mai kina, me ra kua ni vakalaivi me ra taura na gauna me qaravi kina na vei ilesilesi vakalou oqori ka ra na rawa walega ni qarava vakavinaka na itubutubu kei na lewe ni matavuvale.”⁸

Io, ena rawa ni yaco me totolo wale sara na bula vei ira na itubutubu ka vakatalega kina vei ira na isolisoli. Ena rawarawa beka me tukuni ni sega ni veirauti na gauna me vakayacori kece na ka. Ni da raica lesu na totolo ni gauna, au sa rawa ni raica ni sa vakasinaiti na veisiga yadua ena veigauna talei me ra vukei kina na gone me ra rogoca “na itukutuku ni marau” ena kosipeli. Era vuli sara tikoga mai vei keda o ira na gone. Era vulica na ka e bibi mai na noda digitaka na ka me caka kei na ka eda digitaka me kua ni caka. Na cakacaka vakaveitalia, ni sega ni vakadeitaka e dua na gauna ni masumasu vakamatavuvale, na vulici ni ivolanikalou, kei na lotu ni matavuvale, e na sega ni rauta me ra vakaukauwataki kina vakayalo na luveda. Evei tale na vanua era na laki vulica kina na gone na kosipeli kei na vei ivakatagedegede ni bula savasava, na dina, kei na yalodina, ke sega ni na vakayacori mai vale? Na vei itovo e so oqo ena rawa ga ni vakaukauwataki ena lotu, ia o ira duadua ga na itubutubu era na rawata vakavinaka me ra tuberi ira kina na luvedra.

Ni da kilai ira vinaka na gone oqo kei na ka era rawa ni rawata ki na matanitu ni Kalou ena rawa ni vukei keda me toroya cake na noda gagadre me da sotava na veibolebole ena yalo ni vosota kei na yalololoma. Ena vukei keda na Turaga me da vakavulici ira ka tuberi ira na luveda kevaka eda vakayacora ena noda igu na ka kece sara eda rawata. E ka tawamudu na vuvale, ka vinakata na iVakabula me da rawata. Ni da vakasaqara na Yalo Tabu, eda na rawa ni rawata na yalovakacegu, na veituberi, kei na veivakadeitaki eda gadreva me rawati kina na itavi ka da ciqoma na veivakalougatataki vakaitubutubu.

Ena rawa ni vukei keda na vei porokaramu vakalou ka veivakauqeti ni Lotu kei ira era sa kacivi me ra qaravi ira na luveda. Keirau vakavinavinaka vakalevu kei na watiqu vei ira na bisopi, ira na iliuliu ni matabete kei na vei mataisoqosoqo, dauniveisiko kei na dauniveituberi ni vuvale, era a veivuke ena vakaukauwataki ni neirau matavuvale. Ke tiko na gone ena noda matavuvale se sega, me da kila ni tiko ga na noda itavi yadua ena nodra vukei na itubutubu.

Sa tu vei ira na luveda na igu me ra vulica kina na veika lagilagi ni matanitu. Ni da dau vakarorogo vei ira ena rawa ni da na kila vinaka na sala era na tovolea me ra bulataka kina na veika era sa vulica ena kosipeli. E a vakamacala tiko e dua na tama vua na luvena yalewa lailai yabaki va ni ratou a qarava vakamatavuvale ena siga taucoko oya na vakasavasavataki ni vale ka ra sa savasava na veirumu kece ka qai vakavo ga e dua.

“O kila beka na rumu e se sega tiko ni savasava?” e a tarogi koya.

“Na noqu rumu,” a sauma o luvedrau.

“O kila beka e dua ena rawa ni veivuke me vakasavasavataki nomu rumu?” e a tarogi koya yani, ka namaka me na sauma mai ni na rawata ga vakai koya.

Ia e a qai sauma, “Io Ta, au kila ni veigauna kece eda rere kina, taqaya, se da gadreva na veivuke, eda na dau tekiduru ga ka kerea na veivuke ni Tamada Vakalomalagi.”

E talei dina meda kila ni rawa talega me ra vakavulici keda na luveda kevaka eda dau vakarorogo vei ira. E dua na tama e a wasea na ka e sotava vua e dua na luvena yalewa yabaki walu. E a kaya; “Niu a vakasamataka tiko na noqu vosa ena soqoni ni sakaramede ena ulutaga ‘Mo vaka na Gone Lailai,’ au a qai tarogi luvequ yalewa se cava na vuna meda na vakataki ira kina na gone lalai. E a sauma mai, ‘Baleta ni o keda kece sara eda sa gone lalai ni da vakatautauvatataki kei Jisu, ka ni o ira na gone lalai era dau vakasama vinaka.’”

E a kidacala ena itinitini ni isau ni taro o ya ka mani taroga tale yani se cava na vuna eda gadreva kina na vakasama vinaka. E a sauma mai, “Me rawa ni da vakasamataki Jisu kina vakavinaka ena were mai Kecisemani vakakina ena kauveilatai, ka meda na dau vakananumi Koya ni da dau taura na sakaramede.”

Me vaka ena veika kecega, sa laiva tu mai vei keda na iVakabula e dua na ivakaraitaki ena sala meda lomani ira ka tuberi ira kina na luveda. Ena nona a rairai vei ira na Nifaiti ena vanua oqo, e tukuna vei keda na ivolanikalou ni gauna e a vosa tiko kina vei ira na tamata, “sa tagi … a sa keveti ira yadua na gonelalai, ka vakalougatataki ira ka masulaki ira vei Tamana.”⁹

E a tukuna o Peresitedi Hinckley, me baleta na veika oqo, “E sega tale ni dua na iyaloyalo rairai vinaka ena vei italanoa taucoko me sivita na italanoa rawarawa oqo ni a vakamacalataki kina na loloma ni iVakabula vei ira na gone lalai.”¹⁰

Na idola ni kena rawati me vakatavuvulitaki vakavinaka na kosipeli, ko ya me sureti na Yalo Tabu ni Turaga me tiko vata kei keda. E so na vei ivakasala uasivi duadua keirau a ciqoma kei na watiqu ena veigauna dredre ni nodra susugi cake na luvei keirau ko ya me keirau cakava na ka kece keirau rawata me sureti mai kina ka karoni tiko na Yalo Tabu ena neitou matavuvale. Ena sega ni rawa ni ra vulica na gone na veika vakayalo se ra vakila na veika vakayalo ke sega na veidusimaki ni Yalo Tabu.

Me vaka ni da sa itubutubu e rawa ni da wasea wasoma vei ira na luveda na noda ivakadinadina me baleti Jisu Karisito. Na cavuti ni ivakadinadina, ena gauna ni lotu vakamatavuvale, se ena dua na gauna ni veivakavulici, ena sureti mai kina na Yalo Tabu. E a vakaroti keda talega o Peresitedi Boyd K. Packer me da, “Vakavulici ira na luveda me ra dau cavuta nodra ivakadinadina—mera vakadinadinataka ni sa i Jisu na Karisito, ni o Josefa Simici e parofita ni Kalou, ka ni dina na iVola i Momani.”¹¹

E vakadeitaka tale vei keda o Peresitedi Gordon B. Hinckley, “Ena veika marautaki kece ni bula oqo, e sega ni dua me tautauvata kei na gauna marautaki vakaitubutubu. Ena vei itavi kece eda colata voli, e sega tale ni dua me bibi cake. Me ra susugi cake na luveda ena draki ni bula ni loloma, veitaqomaki, kei na vakabauta ka sai koya na bolebole uasivi duadua meda rawata.”¹²

Au vakadinadinataka—ena yalo gugumatua—ni rawa ni na ciqoma na gone na ivakadinadina mai vua na Yalo Tabu ka na kauta mai na igu ni solibula ki lomadra! Au cavuta noqu ivakadinadina ni sai koya oqo na noda ilesilesi, sa kena gaunadonu vei keda oqo, me da gumatua ena veivakavulici ka vakadinadinataka vei ira na luveda na dina ni kosipeli i Jisu Karisito ka me ra na rogoca talega “na itukutuku ni marau” ena yaca i Jisu Karisito, emeni.