Cava Ena Kauta Mai Vei Au?

Peresitedi James E. Faust

iKarua ni Daunivakasala ni Mataveiliutaki Taumada

Ni dua e taura cake na nona kauveilatai ka muria na iVakabula e kena ibalebale mo vakamalumalumutaka na dau nanumi koya ga vakaikoya; sa ikoya na nomu yalayala mo dauveiqaravi vei ira na tani.

Au masuta na yalo vata ga ka sa vukei ira na vosa e liu ena mataka nikua me na tiko talega ena noqu vosa oqo vei kemuni.

Ena vica vata na yabaki sa oti au a lewena voli kina e dua na ilawalawa vakacakacaka kei na rua na turaga ka rau sa qase, ka levu sara na ka erau kila. Keitou sa veitokani voli mai ena vica vata na yabaki kau sa vakila na vinaka ni neitou dau veivukei. Ena dua na siga e dua vei keitou sa qai kerea na neirau veivuke baleta e dua na ka dredre sara. Ena gauna ga e vakamacalataki oti kina na ka e gadrevi, na imatai ni ka e taroga e dua vei keirau, “Cava ena kauta mai vei au?” Ena gauna e vaka kina o ya na isau ni vakatataro, au raica sara ga ena mata ikoya e a kerekere na mosi kei na yaloveilecayaki. Na nodrau veitokani na ilawalawa oqo sa mai sega ni qai vinaka tale me tekivu mai na siga o ya. Ko neirau itokani ka nanumi koya ga vaka ikoya e sega tale ni qai rawa ka vakalevu, ka ni sa latia na isolisoli, taledi, kei na veika e tu vua. E seva, ni dua na leqa sa tu e vuravura nikua ka vakamacalataki ena yalokocokoco me isau ni taro o ya, “Cava ena kauta mai vei au?”

Ena noqu bula vakacakacaka, au a vukea na kena veiwaseitaki na iyau ni dua na veiwatini bula dodonu. E sega soti ni levu sara na iyau, ia o ya na vua ni cakacaka vagumatua kei na soli bula ena vica vata na yabaki. O ira na luvedrau, era gone dauqaravi Kalou ni ra vakavulici me ra bulataka na nona ivakauvuli na Turaga. Ia ni sa mai veiwaseitaki na iyau sa qai basika na duidui se ocei me nona na cava. E dina ni sega na ka e sau levu me veiletitaki, ia, na dui nanumi koya ga kei na yalo kocokoco e sa mai vakavuna na duidui ena so na lewe ni matavuvale ka sega ni wali rawa me yacova sara mai na tabatamata ka tarava. Sa vakaloloma sara ni iyau erau biuta tu mai na veiwatini vinaka oqo e sa mai vakavuna na karusa ni nodratou bula veilomani na luvedrau. Au vulica mai ena ka oqo ni dui nanumi koya ga kei na yalokocokoco ena kauta mai na veisevaki kei na tikoveileti; ia ena dua tale na yasana na yalo solisoli kei na yalo ni solia na ka ena kauta mai na vakacegu kei na marau.

Ena matabose levu mai lomalagi, ni a soli na yavu ni veivakabulai baleti ira na luve ni Kalou, e a kaya vaka oqo ko Jisu, “Ko i au oqo, mo ni talai au,”¹ kei na “Tamaqu me yaco ga na lomamuni, ka me nomuni tikoga na vakarokoroko ka sega ni mudu.”² Sa qai mai yaco me noda iVakabula. Ni vakatauvatani kei Setani, o koya ka a kilai me “kalokalo i vola siga”³ e a kaya ni na lako mai ka “na vakabulai ira kece mai na tamata me sega ni dua me yali.”⁴ E a rua na vakatutu nei Setani: imatai na kena sega ni soli na galala, ikarua me nona ga na kena lagilagi. E dua tale na kena itukutukuni, me dua na ka e tiko kina me nona okoya. Sa ikoya o ya sa mai vu ni ka lasu kecega kei na dau nanumi koya ga vakaikoya.

Ni dua e taura cake na nona kauveilatai ka muria na iVakabula e kena ibalebale mo vakamalumalumutaka na dau nanumi koya ga vaka ikoya; sa ikoya na nomu yalayala mo dauveiqaravi vei ira na tani. Na dau nanumi koya ga vaka ikoya, sa dua na leqa ni kawa tamata ka sa dodonu me vakamaluamalumutaki ka vakarusai. Eda na vakararawataka na yaloda ni da vakanamata kina ka me da rawata mai na ka me da solia. Levu sara na gauna na imatai ni vosa era dau tukuna na gonelalai na noqu. Me ra vakavulici me ra dauveiwasei. E dina sara ni dua na qasenivuli levu ni kena vakamalumalumutaki na nanumi koya vaka ikoya sa ikoya na bula vakaitubutubu. Na tina ena lakova na buca ni yaloyalo ni mate me kauti ira mai na gone. O ira na itubutubu era cakacaka vakaukauwa ka solia e levu sara na ka me ra vakavale, vakani, vakaisulu, taqomaki, ka vakavulici kina na luvedra.

Au sa mai vulica ni nanumi koya vakaikoya e tara vakalevu na kena vakananumi na noda iyau mai na veika sara ga e noda. Na daunivola serekali o Wordsworth e a tukuna, “Sa rui levu vei keda na vakavuravura, ena veigauna kece, Ni da rawata mai na ka, ka vakayagataki ilavo eda sa vakamaumautaka tiko na kaukauwa e tiko vei keda.”⁵ E dua na tamata dravudravua sa rawa ni nanumi koya vakaikoya, kei na vutuniyau me yalosolisoli,⁶ ia na tamata e sa nanuma ga na ka me rawata ena sega ni kunea na vakacegu ena bula oqo.

E a tukuna vaka oqo ko Elder William R. Bradford: “Mai na veika kece ka dau vakavuna me digidigi cala kina na tamata, na nanumi koya vakaikoya sa kena ka kaukauwa duadua. Na vanua e tiko kina na nanumi koya vakaikoya, ena yali mai kina na Yalo ni Turaga. Sega ni dau wasei na taledi, sega ni vakavatukana nodra vukei na dravudravua, sega ni ra vakaukauwataki na malumalumu, sega ni ra vakavulici na tawavuli, ka ra sega ni kunei mai o ira era sa yali.”⁷

Keirau se qai veitalanoa walega oqo kei na dua vei ira na turaga dau yalosolisoli kau se qai bau kila. Au tarogi koya me vakamacalataka na veika e dau vakila baleta tiko na nona dau yalosolisoli. E tukuna na nona vakila na vakacegu ni yalo kei na marau vua e dua ena nona dau vukei ira era vakaloloma tu. E tukuna ni sega ni dua na ka e nona—e lako kece mai vua na Turaga—eda sa ivakatawa walega ni veika e sa solia mai vei keda o Koya. Me vaka ga e tukuna na Turaga vua na Parofita o Josefa Simici, “Raica au sa lewa na ka kecega, ka dou sa noqu tamata.”⁸

Ena so na gauna e dau rawarawa na noda guilecava ni “sa nei Jiova ko vuravura kei na veika kece sa sinai kina.”⁹ Na Turaga e sa vakaroti keda, me vaka e volai tu ena iVola nei Luke: “Dou raici kemudou vinaka, ka tarovi kemudou mai na daukocokoco: ni sa sega ni kalougata na tamata ena vuku ni sa levu na ka sa tu vua .

“A sa tukuna ko koya e dua na vosa vakatautauvata vei ira, ka kaya, Sa dua na tamata vutuniyau sa vakalewe vinaka sara na nona vanua:

“A sa qai vakananuma e lomana, ka kaya, a cava meu kitaka, ni sa sega na noqu lololo meu binia kina na lewe ni noqu veiwere?

“Sa qai kaya, Oqo ga ka’u na kitaka: au na basuka na noqu lololo, ka tara tale e so e lelevu; ka’u na qai binia kece ga kina na noqu lewe ni veiwere kei na noqu iyau.

“Au na qai kaya kina yaloqu, Yaloqu, sa levu na nomu iyau sa bini tu ena rauta na yabaki e vuqa; mo vakacegu mada, mo kana, mo gunu, mo marau tiko.

“Ia sa kaya vei koya na Kalou, Ko iko na lialia, ena bogi ga oqo ena tarogi tale vei iko na yalomu: ena qai nei cei na veika, ko sa vakarautaka?

“Sa vakakina ko koya sa dau binia na iyau me nona, a sa sega ni vutuniyau ena ka ni Kalou.”¹⁰

Ena vica na yabaki sa oti, e a talanoataka kina o Elder Elray L. Christiansen e dua na wekana mai Scandinavia ka a curu ena Lotu. E a vutuniyau toka o koya ka volitaka na nona yau kece mai Denmark ka lako mai ki Utah kei na nona matavuvale. E mai toso vinaka sara na nona rawa ka vakailavo kei na qaravi Lotu. Ia, e a qai vesuki ena vakasamataki ni nona iyau ka guilecavi na inaki dina ni lako mai ki Amerika. E a sikovi koya o Bisopi ka uqeti koya me lesu tale mai ki lotu me vakataka ena veigauna sa oti. Sivi tale e vica na yabaki era qai sikovi koya na matabete ka tukuna vua,” Lars, na Turaga e a vinaka vei iko ena nomu tu mai Denmark. E se mai vinaka tikoga vei iko ena nomu sa mai tu oqo eke… . Keitou nanuma ni oqo, ni o sa qase tiko mai ena vinaka sara vei iko mo mai vakayagataka mada e so na nomu gauna ena qaravi itavi ena Lotu. Ni sa na oti eke, ko na sega ni kauta e dua na ka oqo ni ko sa na lako.”

Ni a vakidacalataki ena vosa o ya, e a qai kaya vakaoqo, “Sega sega, au na sega ni lako. “Ia e a qai lako.”¹¹ E vaka talega o keda kece sara.

Ena rawarawa sara vei ira e so me ra vakaliuca na veika e nodra ka guilecava na veika e tawamudu. Ni a biuti Ijipita ko Eparaama, e a lako vata kei koya ko Loti ki Peceli. O rau ruarua, Eparaama kei Loti erau vakaqele ni manumanu kei na valelaca, “a sa sega ni rauti rau na vanua me rau tiko vata kina: ni sa levu vei rau na ka, sa dredre kina me rau tiko vata.”¹² Ena gauna e basika kina na duidui vei ira na nodrau tamata cakacaka, sa qai solia o Eparaama vei Loti e dua na vakatutu, “Me kakua mada na veileti vei kedaru se vei ira na noqu ivakatawa ni manumanu kei ira na nomu ivakatawa ni manumanu; ni daru sa veiwekani.

… “Kevaka ko lako ki na imawi kau na qai lako ki na imatau; se ko lako ki na imatau kau na qai lako ki na imawi.”¹³

E a raica o Loti, “na cava ena kauta mai vei koya” ni vakasarava toka yani na loma ni buca bulabula ni Joritani ka sa mani digitaka me sa nona na vanua ka voleka kina vanua vakaivalavala ko Sotoma.¹⁴ E a yalovakacegu ko Eparaama me kauta na nona qele ni manumanu kina vanua dravuisiga ki Kenani, ia e la’ki levu ga kina na nona iyau.

Ia, ko Eparaama, e dau nanumi ga vakalevu ni okoya na peteriaki levu duadua ni tamata ni veiyalayalati kei na Turaga. E dua na imatai ni kena ivakaraitaki na kena saumi na ikatini, sa ikoya na nona a saumi ikatini ko Eparaama vei Melikiseteki.¹⁵ E a nuidei vei Eparaama na Turaga, ni vakarautaka vua na ivakaraitaki ni bula taumada, na digitaki ni Dauveivueti, kei na Veibuli.¹⁶ E a kilai talega o Eparaama ni a tu vakarau me cabori Aisake na luvena. Na ivakaraitaki momona oqo ni vakabauta e sa ivakatakilakila ni vakacacabo levu duadua e kilai e vuravura, ni a solia na Nona bula na iVakabula me mate me baleta na noda ivalavala ca.

Ena vica na yabaki sa oti, e a kauta kina “e dua na gone ni Korea na nona ilavo ni loma ni macawa ka volia kina e so na niusipepa. Oti eratou sa qai volitaka kei na so na nona itokani ena veigaunisala mai Seoul, Korea, me ratou rawa ilavo kina me vukea e dua na nodratou itokani me tomana tiko na nona vuli. Na cauravou vata ga oqo e dau wasea na kena ivakasigalevu vua na gone o ya me rawa ni kua ni viakana kina. Na cava e cakava kina na ka oqo? Baleta ni sa vulica tiko mai na italanoa ni kai Samaria Dauloloma,¹⁷ ka sega walega ni via vulica na kai Samaria Dauloloma, ia e via vakila sara ga se vaka sara mada evei na bula ni dua e cakava sara ga na ka e a cakava na kai Samaria Dauloloma … E qai tukuna walega na ka dina e yaco ni oti na nona a vakatarogi koya sara vakamatua o tamana¹⁸ “Kila ga Ta, na veigauna au vukea kina na noqu itokani, au vakila niu sa vaka sara tikoga na kai Samaria Dauloloma. Sega ni okoya walega o ya, au via vukei ira talega na noqu icaba ka ra sega ni tu vinaka vakataki au. E sega ni ka levu sara na ka au cakava tiko. Au a wilika ena noqu ivola ni seminari ka vakila ni dodonu meu cakava kina e dua na ka.”¹⁹ Na cauravou oqo e a sega ni taroga, “Na cava ena kauta mai vei au” ni se bera ni qarava na cakacaka ni loloma o ya. Na kena dina ni a cakava ena sega ni vakasamataka me saumi se me kilai kina.

Ena ika 11 ni Sepiteba, 2001, e rau a vakarusai kina na Vale ni Veivoli ni Vuravura taba rua ka tiko mai New York, ena kena a vakacabotetaki mai na rua na waqavuka ka ra vukataka yani na batikadi dauvakacaca. E udolu vakaudolu na tamata era mate. Mai na italanoa vakatubu rarawa oqo, e basika mai kina edrau na italanoa ni yaloqaqa kei na sega ni nanumi koya vakaikoya. E dua vei ira e tabaka na Washington Post, na italanoa kei Kanala Vakacegu Cyril Rick Rescorla, ka cakacaka tiko vakaivukevuke ni peresitedi ni tabana ni yadra ena Morgan Stanley Dean Witter.

O Rick, e sa qaseta sara me liutaka e dua na mata veiraravui. Ea tiko ena nona valenivolavola ena gauna, “e coqa kina na imatai ni waqavuka na tawa ena vualiku ena 8:48 am… . E taura e dua na qiri mai na i ka 71 ni taba vale me tukuni mai kina ni sa kacabote na Vale ni Veivoli ni Vuravura, ka sa tekivu vakarota sara ga e ke ya o koya na ituvatuva ni nodra na maroroi na lewe 2,700 na tamata cakacaka ena iKarua ni Vale,” ka vaka talega na 1,000 ena iKalima ni Vale. E a vakayagataka voli na nona gusu ni vosavosa ena nona cabeta cake tiko na veitaba vale e cake, me vakamuria na veivanua osooso mai na i ka 44 kina i ka 72 ni taba vale, me vukei ira na tamata cakacaka mai na veitaba vale oqori. E dua na nona itokani e a raici Rick ena ika 10 ni taba vale e qai kaya vua, “ Rick o iko mo sa lako talega i tuba.”

“Ena gauna au sa vakadeitaka kina ni sa tiko taucoko na tamata e tuba,” e a tukuna yani. “E a sega vakadua ni taqaya. E a vakaliuca na bibi na nodra bula na wekana mai na nona o koya” E a talevoni ki na valenivolavola liu me tukuna kina ni sa na lesu tale mada ki cake me la’ki vukei ira na sa lutu bera tiko.

E a sarava tu mai o watina na kena sa curuma na nona tawa na United Airlines. “Ni oti vakalailai e a taqiri na talevoni. O ya sa i Rick, “‘Au sega ni vinakati iko mo tagi,’ e a kaya. ‘Ni’u se tei vukei ira mada na noqu tamata cakacaka.’”

“E tagi voli ga o watina.

“’Kevaka me dua na ka me na yaco vei au, au vinakati iko mo kila ni ko sa solia kivei au e dua na gauna ni bula marau.’

“Sa mai mate e kea na talevoni.” E a sega ni curu bula rawa mai o Rick.

“Na Morgan Stanley e a vakayalia walega e ono mai na 2,700 na kena tamata cakacaka mai na tawa ena ceva ena ika 11 ni Sepiteba, e dua na ka mana mai na veivakarusai levu o ya. O ira na vakailesilesi ni kabani era kaya ni ko Rescorla e dodonu me soli kece vua na ka ni veivakacaucautaki E a vakarautaka na ituvatuva ni idrodro. E a vakariritaki ira na nona ilawalawa me ra dro bula. Oti sa qai lesu tale kina vanua kama me laki vakaraici ira na lutu bera tiko mai. E a iotioti ni tamata me curu mai ki tuba ena gauna e a bololaki kina na Vale ni Veivoli ni Vuravura ena 1993, ka sega sara ni dua me vakabekataka ni na iotioti talega ni tamata me curu mai tuba ena vula sa oti, kevaka me a sega ni baleti koya vakailiu na vale balavu o ya.”

Ena loma ni vakacaca levu kei na kama ni 11 ni Sepiteba 2001, o Rick e a sega ni vaqara na cava ena kauta mai vei koya, ia e a nanumi ira na tani kei na ka rerevaki era sa sotava tiko. Ko Rick Rescorla na “tamata e dodonu me tiko ena vanua e dodonu me tiko kina ena kena gauna dodonu.” Ko Rick na turaga vakaitamera yabaki 62, e a solia na nona bula baleti ira na tani.”²⁰ Me vaka ga e a tukuna na Turaga, “Sa sega na nona loloma e dua na tamata me uasivi cake ena ka oqo me solia na nona bula ena vukudra na wekana.”²¹

E levu sara vei keda ena sega ni vakaraitaka na nona sega ni nanumi koya vakaikoya me vaka ko ya, ia vei keda yadua na sega ni nanumi koya vaka ikoya e rawa ni kena ibalebale me da tamata e dodonu me tiko ena vanua e dodonu me tiko kina ena kena gauna dodonu mo solia kina na nomu veiqaravi. Voleka ni veisiga ena kauta mai na gauna donu me qaravi kina na itavi ni sega ni nanumi koya vaka ikoya. Na veiitavi vakaoqori e sega ni vakaiyalayala ka rawa ni ka rawarawa sara me vaka na vosa e vinaka, dodoki na liga ni veivukei, kei na nomu matadredredre.

Na iVakabula e tukuna vei keda, “O koya sa maroroya na nona bula ena vakayalia: ia ko koya sa vakayalia na nona bula ena vukuqu ena maroroya.”²² E dua na ka matalia ena bula oqo sa ikoya na tamata e vakanamata kina veika ena yaco kei na vakanananu ni “cava ena- kauta-mai-vei-au” ena rawa me rawata na ilavo, iyau, kei na qele, ia e muri sara ena vakayalia na kena vakavatukana kei na marau sega ni vakataki koya e wasea na nona taledi kei na nona dausoli ka vei ira na tani.

Au gadreva me’u vakadinadinataka ni qaravi itavi levu duadua e rawa ni vakayacora e dua vei keda, sa ikoya na qaravi itavi vua na iVakavuvuli. Ena veika au a dau qarava ena noqu bula, e sega ni dua me kauta mai vei au na vakacegu me vaka niu dau kacivi meu vakaitavi ena Lotu. Na itavi era duidui. Era kauta mai na kedra dui veivakalougatataki. Na vakacegu levu duadua ena bula oqo ni rawa ni da veiqaravi vei ira na tani, ka me kakua ni “cava ena kauta mai vei au.” Ena ka oqo au sa vakadinadinataka ena yaca i Jisu Karisito, emeni.