E Dua na Marama Vakabauta
Marama vakabauta ka vakadinata na Kalou… . E kila na ka e taleitaka na Kalou ena nona bula. E kila ni kilai koya na Kalou. E taleitaka na Nona vosa ka dau gunu vakalevu mai na wai ni bula ko ya.
Au lomana na Turaga ko Jisu Karisito kei na Nona Lotu ka sa vakalesui tale mai ki vuravura ena noda gauna. Au maroroya na ivakavuvuli ni Nona bula tabu mai na gauna a sucu kina me yacova na Nona tucake tale, na Luve ni Kalou.
Niu vakawilika na veidrau ni iVolatabu, ena irairai ni noqu vakasama, ka vulica na veika baleti Koya ena Nona a tubu cake ena vuku kei na yagona talega, a sa vinakati Koya vakalevu cake tikoga na Kalou kei ira talega na tamata.1 Ena noqu wiliwili, au a tiko e kea ena Nona vakatura na mate. E a vakabula na tauvimate, vakania na 5000, kauta mai na vakacegu kei na inuinui kei na cakacakataki ni veisaututaki ena vuravura e a bulia. E a vosoti ira ka veivakalialiai, veivakararawataki, ka vakoti Koya ni ra sa sega ni kila na ka era sa kitaka. Au a raica na loloma vakalou kei na veikauwaitaki e tu Vua me baleti tinana ena gauna mada ga ni Nona vutugu vakaitamera. E a vakamalumalumutaki mate me da rawata talega vakakina ko ikeda. E sa vakarautaka vei keda e dua na vanua mai lomalagi vata kei na Tamada Tawamudu. E sa vakavulica oti vei keda na yavu ni tiko marau ka sa solia na kila me baleta na yavu oqo kei na inuinui ni na vakamuri. Na Nona bula sa ivakaraitaki uasivi duadua ni ibalebale dina ni solibula kei na bula ni veiqaravi me vakayacori kina na yavu ni Kalou na Tamana.
E dua na marama Yalododonu Edaidai ka vakamuria na ivakaraitaki i Karisito ena nona bula e veisiga e sa tekivu me vakayacora na lalawa ni Kalou na Tamada vua. Ena nona kitaka oqo sa rawa kina me dua ko koya na ivakaraitaki kaukauwa ni vinaka ena vuravura edaidai, ena sotava na veibolebole ni tamata. Au sa kila e so na marama vakaoqo ka ra sa ivakaraitaki vei au ena gaunisala ka dodonu meu muria. Na marama Yalododonu Edaidai e muri Karisito, e ivakaraitaki vinaka ni dua e lotu dina Vakarisito. Sa ikoya na marama vakabauta ka vakadinata na Kalou, e yalodei ka sega ni taqaya.
Na marama vakabauta ka vakadinata na Kalou ena tu nona inuinui ni sotava na rarawa. E kila na Nona kauwaitaka na nona bula. E kila ni kilai koya. E taleitaka na Nona vosa ka dau gunu vakalevu mai na wai ni bula ko ya. E vakavinavinakataka na parofita e a talai mai ena gauna oqo ka vakadinata na nona ivakasala ka muria, ni kila kevaka ena kitaka vakakina ena kunea na tiko vinaka kei na vakacegu. Ni masu ena qara na veituberi loloma, yalodei kei na veivuke ni Tamada Vakalomalagi ni sa dau vakarorogo. Ni masu tiko e vakarorogo—ka vakatara na veivosaki mai na yasana ruarua. E vakabauta ni Nona sala malumu ka vakanomodi, ena tubera na ligana ka solia vua na isau ni nona masu.2
Na marama vakabauta e yalodei, baleta ni kila na lalawa vakalou nona na Tamada Vakalomalagi kei na nona itavi me vakalougatataka na bula. E yalodei ni solibula me vaka ni yaga tawamudu. E vulica na ivakarau ni solibula ena nona kila na iVakabula. E kila ni nona solibula ena ka bibi sara ke vakatauvatani, ia e kila ni Tamada Vakalomalagi e kila ka vakamareqeta na veika e vakayacora me vakaukauwataka kina na nona vuvale. E tubu na nona yalodei baleta ni ivalavala savasava ka totoka ka matau, ka vinaka cake sara mai na rairai vinaka. E vakasama savasava. E dau loloma, yalomalua ka yalovinaka. Eratou solia vua na nodratou veivakabauti na watina kei iratou na luvena.3 E vakakina ko ira na gone se itabagone, se ko ira na marama e lesi me vakatavulici ira, liutaki ira, qaravi ira, me lomani ira—era sa toso voleka kece vua baleta na yalona vinaka e dau vakaraitaka. Sa ikoya na iyaloyalo ni Kalou ka laurai vua ni totoka, rairai vinaka ka dokai.4 E yalodei ni sa vakarautaka tiko e dua na itovo ni bula e vinaka ka vakayacora tiko na itavi kilikili ka na vakatarai koya me tucake e mata ni Tamada Vakalomalagi. Ena rawa me kitaka oqo ni kila ni itaukei e kea, ni kilai mai Vua, ni lomani ka dau vakamareqeti tawamudu ena veigauna.
Na marama vakabauta e sega ni rere. E sega ni rerevaka na ca ni tikovata kei koya na Kalou.5 E sega na veilecayaki, e sega na tatamosamosa ena nona bula. E rawa ni bulataka na ivakavuvuli ni bula baleta ni dau vulica na vunau kei na ivakavuvuli ni qasenivuli vinaka duadua, na iVakavuvuli. E dua na ivakaraitaki dokai vei ira kece era kilai koya. E sega ni vinaka sara vakaoti, ia oqo e sega ni baleta ni sega vua na ivakavuvuli vinaka duadua se na ivakaraitaki vinaka duadua nei Karisito, e baleta ga ni tamata. E lako tani mai na veidreti ni ca kei na ka tawa savasava, ia kevaka e dua na ka tawa kilikili me na tiko kina, e sa na vaka na tina ni laione ko koya me taqomaka na luvena. Na marama vakabauta sega ni rere e tu vua na yalodei me vosa vei ira na luvena me baleta e so na ka e yaco tiko ka na rawa ni vakacacani ira. E sega walega ni ra rogoca na nona veivosakitaka na nona solibula, ia era raica vua ena veisiga na nona solibula—ena nona isulusulu, na ka e wilika ka sarava, na nona vakayagataka nona gauna galala, na ka e taleitaka kei na ka e dau dredrevaka, o cei e dreta na yalona, kei na nona ivukivuki ena veigauna, ena veika kece, kei na veivanua kece. E tu ga na nona ivukivuki taudua ka veidreti, ka malumu ka marautaka ka serau ka vinaka. O ira na noda gonelalai kei na goneyalewa era vakabauti koya ena nona ivakaraitaki. Keitou masulaka ni ra na sega ni rere ni ra vaqara ka kacivaka na veika e veivueti, veika dina, kei na veika marautaki baleta ni ra sa noda inuinui ni mataka.
Na vakavinavinaka levu vei ira na marama vakabauta vakaoqo ena noda bula. Na marama vakabauta e lomana na Turaga. E gadrevi koya me kila ni na ivakarau ni bula e bulataka, ena vosa e vosataka, ena veiqaravi e solia vei ira na Luvena, mai na nona ivakarau kece. E kila ni lomani mai Vua, e dina ga ni sega ni vinaka sara ia e tovolea tikoga. E kila ni gauna me vakayacora kina na nona vinaka taucoko, e sa rauta o ya me vaka e tukuna vei keda o Peresitedi Hinckley.6
Na marama vakabauta e vakalougatataki na nona bula mai vei ira na turaga yalodina, era lewe ni matabete ni Kalou ka ra doka na dodonu oqo: o tamana, o bisopi, o watina, o ganena, o luvena tagane. Era vakamareqeti koya kei na isolisoli vakalou e solia vua na Luvena yalewa na Kalou. Era tokona ka vakauqeta ka kila na ilesilesi levu ni nona bula me vaka e dua na marama. Era lomani koya, ka ra vosa vakalougatataki koya. Era na qai vakalougatataki talega mai vua na marama vakabauta oqo, ena nodra lako vata ena gaunisala ni bula. Era kila, me vaka e vakavulica na ivolanikalou, “ni sa vinaka ni lewe rua ka ca ni le dua bauga … Baleta kevaka era bale, e dua ena tubera cake na kena i sa.”7
Au vakaraitaka na noqu vakavinavinaka vei ira na marama yalodina ena vakabauta, ko ira na turaga dokai kei na noqu matavuvale lomani, ka ra dau veivakauqeti ena noqu bula taucoko. Era dau ni veivakalougatataki levu ena noqu a saga meu vakayacora na noqu itavi cecere mai Vua na Turaga sai koya na Peresitedi Raraba ni Gone Yalewa.
Kemuni na taciqu kei na ganequ, ni yalovinaka ka kila niu lomani kemuni, ka’u lomana talega na Tamada Vakalomalagi kei na Luvena lomani, na gone Turaga o Jisu Karisito. Au na dokai rau ka qaravi Rau mai na vu ni yaloqu taucoko ka sega ni mudu, kau vakavinavinakataka na kaukauwa e soli vei au. Ena yaca i Jisu Karisito, emeni.