Lako mai ki Saioni! Lako mai ki Saioni!
Na ivakavuvuli ni loloma, cakacaka, rawati koya vakaikoya, kei na vakabauta, e soli mai vua na Kalou. O ira ka ra rokova, ka lewai ira vakavinaka, sa yaco me ra yalosavasava.
Ni da sota kei ira na lewe ni Lotu ena veiyasa ivuravura, e dua na bolebole e vaka me ka raraba; na veirauti ni gauna me rawa ni vakayacori kina na veika e gadrevi me caka. Ena kedra maliwa o ira na lewe vica ka tu na nodra ivurevure ni yau, na gagadre e tiko sa ikoya me levu cake na gauna me rawati na ka ni bula. Ena kedra maliwa o ira ka sa rauta na ka e tu vei ira, na gagadre e tiko sa ikoya me so tale na gauna me na marautaka kina na veika vinaka se na veika e kauta mai na levu ni ilavo. Na bolebole e veivakayalolailaitaki baleta ni gauna e vakaiyalayala; e sega ni rawa vua na tamata me vakabalavutaka na siga se tosoya na yabaki.
Na dau veivakacalai o vuravura. Ena nona sasagataka tiko ko vuravura me so na veigaunisala vinaka ni vakayagataki gauna, e dreti keda ki na vuqa vakavuqa na veika vakavuravura. Ia na bula e sega ni dua na sasaga vata kei na gauna, e sasaga ga ni kedrau maliwa na vinaka kei na ca.
Na cava me caka baleta na veika kece oqo e rawa me dua na lewa dredre ena bula. Ena 1872, e a vakadreti ira na Yalododonu na Parofita o Brigham Young ena veika sara ga oqo. Na ka e a tukuna ena gauna ko ya e sa yaco me bibi sara ka duavata ena veiyabaki sa muri yani. E a tukuna: “Tu vakadua! Wawa! Ni ko sa duri cake ena mataka, ni bera ni ko kania e dua na ka, … cuva sobu e mata ni Turaga, ka kerei Koya me vosota na nomu ivalavala ca, ka taqomaki iko ena siga taucoko, me maroroi iko mai na veitemaki kei na ca kece, ka tuberi iko ena nomu ilakolako me dodonu, me rawa ni ko kitaka e dua na ka ena siga ko ya me na yaga ki na matanitu ni Kalou e vuravura. E tu vei iko na gauna mo cakava kina na ka oqo? … Oqo na noqu ivakasala vei ira na Yalododonu Edaidai. Tu vakadua mada, kua ni dau wariri… . O sa rui dau vakusakusa; ka sega ni dau lako vakavuqa ki na soqo ni Lotu, ko sega ni dau masu vakavuqa, ko sega ni dau wilika vakavuqa na iVolanikalou, o sega ni dau vakasama vakatitobu, ko dau tu ga ena veigauna kece ena saula, ka wariri tikoga ka sega kina ni kila na cava me caka taumada… . Meu cavuta mada ena kena ivakamacala rawarawa duadua—na kena ka rawarawa duadua sara ka matau talega vei keda—Dau vukica cake na nomu veleti, me rawa ni tawa kina na nomu ivotavota, ni vakatauci mai lagi na veivakalougatataki me baleti iko.”1
Vakayagataka na yavu ni kosipeli me vakarautaki kina na ka me liu. E vakavulica na Turaga, “Dou vakasaqara taumada na matanitu ni Kalou [se Saioni], kei na Nona yalododonu, ena soli me kena ikuri vei kemudou na ka kecega oqo.”2
Ena noqu gauna ni tubucake vagone ena Ceva kei Utah, na veika baleti Saioni e a sega soti sara ni matata me vaka au sa qai kila edaidai. Keitou a bula ena dua na koro lailai ka sega ni yawa mai na Zion National Park. E valenilotu, keimami dau lagata wasoma na qaqa ni sere kilai:
“Isireli, Bau Rogoca,
Kaci ni noda Kalou.
Papiloni e na rusa;
Na kaukauwa ni Kalou.
Ena noqu vakasama vagone, au a raica na bari ni vatu vakaitamera kei na ucu ni vatu cecere ena national park. Veicuruyaki wavoki na loma ni buca e kea e drodro kina e dua na wai ka maravu ena so na gauna kaukauwa ka cudrucudru. E sa na rawa beka mo raica na veilecayaki e sotava na gone tagane lailai oqo ena nona via biuta vata na qaqa ni sere kei na ituvaki ni national park rairai totoka ko ya. E dina ga ni sega ni sota vinaka, e ciqi toka ena noqu vakasama na vakanananu ni ko Saioni e dua na ka totoka ka vakalou. Ni sivi yani na veiyabaki, e dua na kila ka totoka levu e sa qai votu mai. Ena ivolanikalou eda wilika, “Raica, sa kaya vakaidina na Turaga, me reki ko Saioni, raica oqo ko Saioni—ko ira na yalosavasava.”4
Na tauyavutaki nei Saioni e dodonu me nodra inaki na lewe ni Lotu kece. E rawa me tukuni vakadodonu kina: Ni da segata ena yaloda taucoko me da kauta mai ka tauyavutaki Saioni, na leqa e yaco ni vakasamataki ni sa lailai na gauna ena yali. E tu na marau kei na kalougata ni da curu ena itavi dokai vakaoqo. Na nona bula e dua sa na veisau. Na vuvale sa na sega tale ni otela ia na vanua ni vakacegu, veitaqomaki kei na loloma. Na bula veicurumaki e veisau. E Saioni, na veileti kei na veiba e seyavu, na veivakuwai kei na veicati e yali, e sega ni dua e dravudravua—vakayalo se vakayago, na tiko yavavala, qaravi matakau, kei na veika ca kece sa sega sara. Me vaka e levu era vakadinadinataka, “e dina ga ni sa sega ni dua tale na tamata mamarau ena kedra maliwa na tamata kecega … buli mai na liga ni Kalou.”5
Na parofita makawa, ko Inoke, e a cakacaka vakaukauwa ena vuqa na yabaki me kauti ira mai na nona tamata ki na ituvaki ni bula ni yalododonu vakaoqo. Me vaka na noda gauna, era a bula talega ena gauna ni veicati, valavala ca, ivalu kei na vakadave dra. Ia ko ira na tamata yalododonu era a rogoca: “A sa vakatokai ira na Nona tamata na Turaga me ra lewe iSAIONI, ni ra sa yalovata ka duavata ka ra kitaka na ivalavala dodonu; a sa sega vei ira sa dravudravua.”6
Qarauna vinaka na vosa baleta ena ivolanikalou. E tauyavutaki ka tete ko Saioni baleta na veiuqeti ni Kalou ki na nodra bula kei na qaravi itavi ni lewe ni vanua. E sega ni lako ko Saioni vaka isolisoli, ia e baleta ni ko ira na tamata bula dodonu, ka Nona tamata ni veiyalayalati era a lako vata mai ka tara vata. Ko Peresitedi Spencer W. Kimball e a kaya: “Ni da lagata vata ‘Lako mai ki Saioni,’ eda tukuna tiko … lako mai ki na tabanlevu, na tabana lailai, tabana ni kaulotu, na iteki ka veivuke ena taraicake kei Saioni.”7 O koya gona era soqoni ena Nona gaunisala na Turaga, ko ira na Yalododnu Edaidai ena qarauna na nodra gu me ra kauti Saioni mai na Nona “matanitu na noda Kalou kei na Nona Karisito,”8 vakavakarau ki na iKarua ni Lesu Mai ni Turaga.9
E tukuna tale vei keda ko Peresitedi Hinckley … na ka oqo eda sa vakaitavi tiko kina e sega ni ka walega. Oqo na veika Vakarisito. Sa ikoya na matanitu ni Kalou na Tamada Tawamudu. Sa ikoya na tarai kei Saioni e vuravura.”10
“Kevaka me tarai cake na Saioni ko ya ka ra a tukuna na parofita ka a solia talega kina na Turaga na Nona yalayala levu, e dodonu me da biuta vakatikitiki na noda nanumi keda vakaikeda ka dau taura na noda gauna kei na kaukauwa. E dodonu me da vorata na noda vinakata na tu vinaka kei na vakacegu, ka da vakarautaki keda ena noda sasaga, ena gauna eda sa yacova kina na iyalayala ni noda kaukauwa kei na rawata mo vosota, eda sa na qai veikilai vinaka kei na noda Kalou.”11
Ena veivunau ka vu mai na itutu cecere oqo ni matabete sa ikoya na loloma, itavi, cakacaka, rawati koya vakaikoya, vakatabui kei na nomu veiqaravi.12 Me da kila vinaka na kena rawa ni tarai ko Saioni ena yavu ni dina oqo, me da vakasamataka e va vei ira.
Na imatai na loloma.
“Sa kaya ko Jisu … Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.
“A imatai ni vunau oqo ka levu.
“A sa tautauvata na kena ikarua, Mo lomana na kai nomu me vaka ko sa lomani iko. Sa vu ni vunau taucoko kei ira na parofita na vunau e rua oqo.”13
Me da lomana na kalou vakalevu cake mai na veika kecega e uqeti keda me da qarauna na veika e liu vei keda, me da tuvana na noda bula me rawa kina ni da duavata kei Koya. Eda sa na lomana na Nona ibulibuli kecega, ka vakakina ko ira na tamata kecega. Ni da biuta na Kalou e liu mai na veika kece e vakacaudreva na loloma levu kei na veikauwaitaki ena kedrau maliwa e dua na veiwatini, tubutubu kei ira na gone. E Saioni, eda na raica “na tamata yadua me vukea na wekana; ia me caka na ka kecega me vakarokorokotaki kina na Kalou.”14
Tarava na cakacaka. Na cakacaka e ka vakayago, vakasama se sasaga vakayalo. E vakarota na Kalou me: “Ia ko na kania na kemu kakana ena buno ni matamu.”15 Na cakacaka sa ivurevure ni marau, marau e loma, kei na vutuniyau. Ena ituvatuva ni Kalou, e sega na rumu ni lawaki ca kei na kocokoco. Na cakacaka me ka dina ka vauca na inaki vakalou: “Ia ko ira na tamata cakacaka e Saioni me ra cakacaka ena vuku i saioni; ia kevaka era na cakacaka ena vuku ni ilavo era na rusa.”16
Rawati koya vakaikoya e tarava. O koya oqo me sa tiko rawa ni bera na galala yadua kei na veitaqomaki. Na Lotu kei ira na lewena era sa vakaroti mai Vua na Turaga me ra vakarautaki ira, rawati ira vakaiira ka sega ni vakararavi.17 Na gauna ni levu na ka sa gauna ni vakayagataki ilavo vakalalai kei na mamaroroi ena gauna ni leqa. Na gauna ni lailai na ka sa gauna ni bula mamaqi ka vakayagataki ni ka e a maroroi tu.
“E sega ni dua na Yalododonu dina Edaidai, me rawata tu na bula vakayago se vakayalo me na solia na nona icolacola se na tiko vinaka ni nona vuvale vua e dua tale. Me rawata, mai na veiuqeti ni Turaga kei na nona cakacaka sara ga, me na solia vua kei na nona vuvale na bula vakayalo kei na vakayago e gadrevi ena bula oqo.”18
Eda luvena tagane kei na luvena yalewa na Kalou ka vakararavi vakaidina vua ena veika kece e tu vei keda. Kevaka eda muria na Nona ivakaro, ena sega ni laivi keda ko Koya. Ia na Tamada Vakalomalagi e sega ni cakava vei keda na ka eda rawa ni kitaka vakaikeda. E gadreva me da vakayagataka na veika eda rawata mai vei koya me da qaravi keda kina kei na noda matavuvale. Ni da kitaka oqo, eda sa rawati keda vakaikeda.19
Kena iotioti, vakatabui. Na veiyalayalati ni vakatabui e kovuta na solibula; e dua na tiki ni kena ibalebale na loloma, cakacaka kei na rawati koya vakaikoya; ka yavu ki na tauyavutaki ni matanitu ni Kalou. “Ena sega ni rawa ni tara cake ko Saioni,” e kaya na Turaga, “vakavo ga ena ivakarau kei na lawa ni matanitu vakalomalagi.20 Na veiyalayalati ni vakatabui e loma ni lawa. E sega ni vakadaroi se biu vakatikitiki. Sa ikoya na nona “solia e dua na nona gauna, taledi, kei na sala me maroroi kina o ira era gadreva—vakayalo se vakayago—kei na kena tarai na matanitu vakalomalagi.21
Na ivakavuvuli ni loloma, cakacaka, rawati koya vakaikoya kei na vakatabui e soli mai vua na Kalou. O ira ka ra rokova, ka lewai ira vakavinaka, sa yaco me ra yalosavasava. Na duavata yalododonu sa ikoya na ivalavala ni nodra vakacegu kei na duavata sa yaco me dua na drotini ki na matanitu. E a tukuna na Parofita o Josefa Simici:
“Na taraicake kei SAIONI sa ikoya e dua na ka era taleitaka vakalevu na tamata ni Kalou e na veitabagauna kece; sa ikoya na ulutaga era dau veivosakitaka vakalevu ena marau na parofita, bete kei na tui;… e biu vei keda me da raica, vakaitavi kina ka vukea na kena qiqi ki liu na lagilagi [kei Saioni] … e dua na cakacaka ka sa lewai tu ni na kauta mai na vakarusai ni kaukauwa ni butobuto, na vakavinakataki ni vuravura, na lagilagi ni Kalou, kei na vakabulai ni vuvale vakatamata.”22
Au vakadinadinataka ni dina na veika oqo. Ko Gordon B. Hinckley e Nona parofita na Kalou e vuravura me vakataki Josefa Simici Jr. Na matanitu ni Kalou sa ikoya na Lotu i Jisu Karisito ni Yalododonu Edaidai ka na yaco me Saioni ena kena totoka taucoko. Na Karisito sa ikoya na iVakabula kei vuravura, na Luvena Lomani na Kalou bula, na Yalosavasava. Ena yaca i Jisu Karisito, emeni.