E Vakaraitaka nona Vakavinavinaka na Peresitedi mai Ghana ena Qaravi ni Tabana ni Bula Raraba

Ena dua na veivosaki kei iratou na Mataveiliutaki Taumada, e a vakaraitaka mai kina na peresitedi ni vanua o Ghana, o John A. Kufuor, na nona vakavinavinakataka na veivuke ni Lotu ki na nona vanua ena tabana ni bula raraba kei na veika vakalotu. “Keitou sa okati kemudou mo dou tiki ni vanua o Ghana,” e a tukuna vei Peresitedi Gordon B. Hinckley; Peresitedi Thomas S. Monson, iMatai ni Daunivakasala ena Mataveiliutaki Taumada; kei Peresitedi James E. Faust, iKarua ni Daunivakasala ena Mataveiliutaki Taumada, ena dua na veisiko ki Salt Lake City ena vula ko Sepiteba.

E a veisiko voli ko Peresitedi Kufuor e Amerika me laki tiko ena Matabose kei Vuravura, ka mani gole sara yani kei na dua na ilawalawa vakailesilesi ki Utah me laki veivosakitaki kina na veivakatorocaketaki vata kei ira na iliuliu ni veitabana tale e so. Mai kea, e a sikovi ira sara na iliuliu ni Lotu ka sarava wavoki talega na veivanua e so ni Lotu, okati kina na Welfare Square, Temple Square, kei na Vale ni Koniferedi.

E a vakavinavinakataka kina na Lotu o Peresitedi Kufuor ena sasaga ni veivuke raraba kei na veivuke ni veivakacakacakataki ena nona vanua. E a qarava na Lotu na kena vakailavotaki e sivia e 140 na tabana ni veiqaravi ni bula raraba mai Ghana ena loma ni 15 na yabaki sa oti.

E a sauma o Peresitedi Hinckley ena nona sureti Peresitedi Kufuor ki na soqo ni kena dolavi raraba na Valetabu mai Accra, Ghana, ka nanumi tiko ni sa na tara oti ena vula ikatakata ni 2003. E vakavinavinakataki Peresitedi Kufuor tale tikoga ena nona dau cakacaka vata voli kei na Lotu.

“Sa dua na veisiko yaga vakaidina, ka ni sa gaunadonu sara ga me vakaraitaki yani kina na vakavinavinaka kei na veivakacerecerei,” e a kaya o H. Bruce Stucki mai na Vitusagavulu, ka Peresitedi talega e liu ena iWasewase ni Ra kei Aferika.

E lima tiko na iteki ni Lotu ka rauta ni 20,000 na lewenilotu mai Ghana. Era se qai tara tiko ena gauna oqo e dua na valetabu, bure ni vulagi, kei na valenivolavola liu ni iteki, kei na dua na valenivolavola ni iwasewase.