Ta, O Yadra Tiko?
Era dau taroga beka na luvemu tagane se o moce tiko se sega ena gauna e yaco kina e so na veika bibi vei ira?
Ena dua na gauna lekaleka sa oti, o au, Eder Pace, kei Elder Condie, keitou a sota kina kei iratou na Mataveiliutaki Taumada. Ni keitou curu yani e vakaraici keitou mai vakamalua o Peresitedi Hinckley ka qai kaya ena matadredredre, “E rawa vakacava me ratou Mataveiliutaki ni Cauravou ni Lotu oqo e tolu na turaga ulu sika?” Na vosa ga keitou sauma yani kina na taro o ya, “Baleta ni o ni kacivi keitou kina, Peresitedi.”
Kemuni na cauravou, keitou nuitaka ni o ni taleitaka na “Parokaramu ni Matabete i Eroni, Qarava Vinaka Noda iTavi Vua na Kalou.” Sa vakaveikilaitaki vei ira kece na Matabete i Eroni e vuravura raraba. E caka me vakalougatataki kemuni vakayalo, vakayago, vakaveimaliwai, ka vakakina vakavakasama. E vakaibalebale na veika e gadrevi kina ka na yavalati kemuni mo ni voleka ni yacova yani na iyalayala ni nomuni kaukauwa. Ena rawa kina vei kemuni mo ni tauyavutaka na nomuni dui takete yadua ka qai rawata ena nodra veivuke na nomuni itubutubu kei ira na nomuni iliuliu vinaka. E salavata kei na parokaramu oqo ena Lotu raraba e dua na yalo ni vakanuinui uasivi. Keimami gadrevi kemuni vakayadua mo ni rawata vakavinaka ka ciqoma na “iCocovi ni iTavi Vua na Kalou.”
Ena vica vata na yabaki sa oti au a kauta kina na luvei keirau tagane e duabau ga ki na imatai ni nona ilakolako ni keba kei na siwa. E a se gonetagane lailai ga. E dodonu na barinivatu ka dredre sara na sirova sobu. Ia sa totoka na siwa. Ena veigauna kece au corita rawa kina e dua na ika au na solia yani na kau ni siwa vua na gonetagane ka sa mamarau rawa tiko me qai yavia mai na ika totoka o ya. Ena rugurugua kei na batabata ni yakavi, keirau sa qai tekivu cabe cake tale kina ki na dela ni qakilo e cake. E cabe vakatotolo sara yani ki liu vei au ka qai bolei au mai, “Totolo mai Ta, daru veitau ki cake.” E rogoci na nona bolebole, ia a vagalui ena lewa matau. E vaka me vuka baleta, dara e rukuna, ka cici wavokita na veika kece ga e tu e matana na yagona lailai ia ni sa vaka me iotioti ni kalawa na noqu ikalawa kecega au taura, sa yaco ki delana o koya ka qai kailavaki au mai me’u totolo yani. Ni keirau vakayakavi oti keirau tekiduru ena masu. E tabalaka cake ki lomalagi na domona lailai me vakacavara kina na neirau siga. Keirau sa qai curu ki na neirau taga ni moce vakataurua, ni oti na neirau veibili ka veidre vakalailai au sa qai vakila ni sa qai ciqimaki mai vakavinaka ki yagoqu na yagona lailai me vakatakatai ka taqomaki mai na bogi. Niu raica yani na luvequ tagane e yasaqu, au qai vakila vakasauri na drodro vakayauyau ni loloma mai yagoqu ka biliga yani ki mataqu na wainimata. Ena gauna vata oqori e mokoti au kina ka kaya.
“Ta.”
“Io, luvequ.”
“O yadra tiko?”
“Io, na luvequ, au yadra tu.”
“Ta, au lomani iko vakadua na milioni, vakatolu na milioni!”
Sega ni dede sa moce. Ia, au a yadra tu ena lomaloma ni bogi ka vakaraitaka tiko na noqu vakavinavinaka cecekia me baleta na veivakalougatataki talei e vakasulumi tu kina na yagona e dua na gonetagane lailai.
Ena gauna oqo sa tamata bula na luvequ, ka sa dua na luvena tagane vakataki koya. Ena so na gauna keitou dau lako na lewetolu oqo ki siwa. Au dau raica ga na makubuqu lailai uludamu oqo e tiki tamana, kau nanuma lesu sara na gauna talei sa oti yani o ya. Na taro ka a tarogi ena yalosavasava o ya, “Ta, o yadra tiko?” e se rogo tiko ga e yaloqu.
Kivei kemuni yadua na tama, au taroga vei kemuni na taro laulau vata o ya, “Ta, o yadra tiko?” Era dau vakataroga beka na luvemu tagane se o moce tiko se sega ena gauna e yaco kina e so na veika bibi vei ira? Au na vakatura mada e vica na vanua ka na vakaraitaka se da “yadra” tiko se da “moce” e matadra na luveda.
iMatai: Na noda lomana na Kalou kei na noda ciqoma na ilesilesi vakailiuliu ni matavuvale ena noda muria na Nona ivunau. Ena vica na yabaki sa oti ni oti e dua na koniferedi ni iteki, au a vakauqeti meu laki sikova e dua na tacida ka sa lutu tani mai na Lotu. Keitou a raici koya ni cakacaka tiko ena nona iteitei. Au lako yani vua ka kaya, “Baraca, sa talai au mai na Turaga ko Jisu Karisito meu mai raici iko. Koi au ko Elder Hammond, e dua na Nona italai.”
Keirau a veimokomoko vaka-Amerika vaka-Latina ka curu sara yani ki na nona vale totoka lailai. E kaciva sara na watina kei iratou na luvedrau e lewetolu me ratou lako mai. Eratou mai dabe toka e yasadrau na tamadratou kei na tinadratou e rua na cauravou musudonu kei na dua na goneyalewa totoka. Au taroga vei iratou na gone se cava eratou na vinakata vakalevu duadua e vuravura, ena gauna oqo. E vosa mai na cauravou qase duadua, ka kaya “Kevaka walega me rawa ni keitou lesu kece tale ki Lotu vakamatavuvale, keitou sa na marautaka sara vakalevu—keitou na vakavinavinaka kina.” Keitou tukuna vei iratou na levu ni Nona gadrevi iratou na iVakabula ka vakakina na Nona lomani iratou. Keitou wasea vei iratou na neitou ivakadinadina ka tekiduru ena masu. A masu na tamadratou. E tagi na tinadratou. Ena gauna oqo eratou sa lesu taucoko tale yani ki Lotu. Eratou dau cibitaki tamadratou na gone ka ratou mamarau.
Na tama taucoko sara ena Lotu e dodonu me ra cakacaka tiko vakapeteriaki ni nodra vuvale. Sa dodonu me na dau liu ena veika vakayalo ka dau dusimaka na nona matavuvale. E sega ni dodonu me vakatautaka vua na tina na nona itavi. Sa dodonu me dau kaciva na masumasu vakavuvale, na lotu vakavuvale, wili ivolanikalou vakavuvale, kei na veivakatarogi vakatama. Me dau taqomaka, maroroya ka ivurevure yalomalua ni bula vakaivakarau. Sa ikoya na tama e dodonu me liutaka, vakaduavatataka ka vaqaqacotaka na matavuvale ena nona ciqoma na matabete ni Kalou ka ciqoma na veikacivi kei na gauna ni veiqaravi e salavata kei na kaukauwa vakabete. Na nona veiwekani kei na Kalou ka vakakina na Luvena o Jisu Karisito ena dusimaki ira na luvena ena gauna ni veivakatovolei kei na bula dredre.
Kevaka e tisaipeli dina i Jisu Karisito o Ta, era na muri koya vakaidina na luvena tagane me vaka ga na nodrau veimuri na siga kei na bogi. “Ta, o yadra tiko?”
iKarua: Na noda veiwekani kei ira na watida- tinadra na gone. Niu vakasamataka tiko na veika kece sara eda dau cakava, na noda ivakarau vei ira na watida ena kilai vakalevu duadua ena nodra ivakarau ni bula na luveda tagane. Kevaka e dau veivakalolomataki na nona ivosavosa se na nona ivalavala e dua na tama vua na watina, se ena kena ivakatagedegede cava ga, era na saqati koya kina na luvena tagane, se era na beci koya sara kina. Ia ena viavia lasa toka, ni ena gauna era sa qase cake mai kina ka vakamau, e rawa ni ra na vakamuria na ivalavala vata ni veivakalolomataki oqo vei ira na watidra. Sa gadrevi vakalevu sara ena noda veitikotiko o ira na tama ka dau rokova na watidra ka dau ivalavala ni loloma kamica, ka uasivi vei ira.
Ena dua na gauna lekaleka sa oti au a rogoca kina e dua na tama ka kaciva vakasakasaka tu na watina totoka, ka vuku ena “lialia” kei na “bavulu” ena dua na kena itautau lolovira ka veivakamaduataki me baleta e dua na cala lailai wale sara ka a sega ni nakita na nona vakayacora. Era a vakarorogo tu na gone, ena madua kei na rere ena vukui tinadra. E a vosabeci e matadra o ira ka dau lomani ira vakalevu duadua. E dina ni a qai yaco na kere veivosoti kei na veivosovosoti, a tu ga na mosi kei na madua me baleta na gauna ni vosa sega ni vakasamataki.
Ena sega ni rawa ni namaki me vakalougatataka na noda bula na Yalo Tabu kevaka eda na dau cudrudru tikoga, sega ni veikauwaitaki ka ivakarau ca vei ira na noda itokani. Ena sega ni rawa ni da namaka vei ira na luveda tagane me ra dau vakarokoroko ka ivalavala malua vei ira na tinadra kevaka eda sega ni dau vakaraitaka vei ira na kena ivakarau dodonu. E kaya kina o Peresitedi David O. Mckay, “Na ka bibi duadua e rawa ni vakayacora e dua na tama me baleti ira na luvena sa i koya me lomana na tinadra.” (Tauri mai ena Theodore Hesburg, Reader’s Digest, Jan. 1963, 25; ena Richard Evan’s Quote Book [1971], 11). “Ta, O yadra Tiko?”
iKatolu: Me vakarautaki na bula vakaivakarau e dodonu ka vakayacori ena loloma. Ena vuqa na gauna ena vuku ni noda cudru kei na noda malumalumu eda dau laveta kina na ligada me da mokuti ira na luveda, e vakavuqa ni dau yaco me da vakadonuya tiko ga kina na dokadoka qaciqacia ni lomada. Era gadreva kece sara na gone na veivakadodonutaki. E sega walega ni ra gadreva, era dau namaka, era vinakata. Na veivakadodonutaki e dau veidusimaki ka veivakavulici me da dui lewai keda vakamatau, ia ena veivakadodonutaki kece sara e dodonu me na basika tiko kina na vakatulewa dodonu kei na loloma savasava.
Ni’u se gonetagane lailai e dau solia vei au na marama tinaqu dawai na veivakadodonutaki kaukauwa duadua e rawata. E kaya kina ni tonawanawa tu na wainimatana. “Na luvequ au sa rarawa vakalevu sara ena vukumu.” Na mosi ni yaloqu e sa dredre sara ga meu taura rawa. Ena sega beka ni tautauvata kei na mosi ni dua na udolu na ikuita na mosi ni vosa oqori. Au kila ni veivosataki vaqori e tau duadua ga mai na levu ni nona lomani au dina, baleta ni kevaka e tiko e dua na ka au rawa ni vakadeitaka, sa i koya ni lomani au na tinaqu. Au sa mani yalataka kina meu kakua tale ni vakila vakadua na cudru nei tinaqu ka vakakina na mosi ni yalona e dua na tina vaka na agilosi. Au vakabauta niu sa rawata vakavinaka na yalayala oqori.
Ni yaco na gauna mo vakadodonutaki ira kina na luvemu, “Ta, o yadra tiko?”
Kemuni na Tama, sa bibi sara me tiki ni noda bula na bolebole au sa cavuta kevaka me ra na tamata matua vakayalo ka vakakina na lomadra na luveda tagane. Kevaka sa vakakina, era na sega ni madualaki keda, ka ra na sega talega ni madualaki ira. Era na yaco me tamata dau veidokai, vakarokoroko, sinai ena loloma, lomasoli me ra qarava na iVakabula ka dau golevi Koya na yalodra. Eda sa na qai reki ni ra sa noda ka tawamudu. Era na kaya, Ta, o yadra tiko?
Ka da na sauma yani, “Io, na luvequ, au yadra tiko.”
Ena yaca i Jisu Karisito, emeni.