Ko Ni Sa Talai Kece Mai Lomalagi

Peresitedi James E. Faust

iKarua ni Daunivakasala ena Mataveiliutaki Taumada

Na nomuni itavi vakamarama e ka uasivi ka duatani mai vei ira na cakacaka kece ni Turaga. O kemuni na dauniveisusu ka dauloloma.

Kemuni na ganequ lomani, sa taleitaki dina na nomuni mai tiko rawa, ka’u sa luvuci dina vakalevu. Eda vakavinavinakataka talega ni rau mai tiko rawa o Peresitedi Hinckley kei Peresitedi Monson. Sa veivakatataki cake dina na domo ni matasere. Na masu nei Sister Sainz e veisureti Vakalou me tiko ena keda maliwa. E veivakasakiti talega na itukutuku veivakauqeti nei Sister Bonnie Parkin, Sister Kathleen Hughes, kei Sister Annie Pingree. Keitou a vakaitavi o Peresitedi Hinckley, Peresitedi Monson, kei au ena nodratou a vakatikori ka vakalougatataki na tolu na marama oqo me ratou Mataveiliutaki Raraba ni iSoqosoqo ni Veivukei. Sa nodratou ilesilesi me ratou liutaka na isoqosoqo levu oqo ni marama ena ruku ni veiliutaki ni matabete. E rabailevu sara na veivakalougatataki e sa cavuti vei iratou na marama lewe tolu oqo. Ena nona a tabaki Sister Parkin o Peresitedi Hinckley, e a vakalesuya na vakanananu vei iratou na marama, “Ni a virikotora na Parofita o Josefa Simici na nodra itavi na iSoqosoqo ni Veivukei me ra dodoliga yani, me ra qarava na veika era gadreva na dravudravua, o ira na vakaloloma, o ira na leqa kei ira na yalo rarawa, ka me ratou vakalougatataki ira na marama.”

Na noda vakasama ena bogi nikua na “Turaga … koi au oqo; ni talai au.” Na iyatuvosa rawarawa ka titobu oqo e ganiti keda sara ga ena noqu vosa oqo ena bogi nikua baleta ni vuqa sara vei kemuni e sa vakaraitaka tiko mai vakavinaka na lomasoli oqo mo ni solia nomuni gauna ka mo ni veiqaravi. Ko ni sa talai kece mai lomalagi. Ko ni sa ibulibuli uasivi ni matatamata. Na nomuni itavi vakamarama e ka uasivi ka duatani mai vei ira na cakacaka kece ni Turaga. O kemuni na dauniveisusu ka dauloloma, me vaka e a kaya na Parofita o Josefa Simici, “na yalo ni loloma ka yalovinaka.”¹

Au sega ni kila rawa na vosa me vakamacalataka na noqu vakarokoroko, vakavinavinaka, ka vakacerecerei kemuni na ganequ uasivi. Oi kemuni na marama lewe ni Lotu oqo ko ni sa vakataubeni tu ena veitabayabaki kece ena iyaragi vakalou, kei na yalo ni dauveinanumi vakamarama. Keitou sa luvuci ena cakacaka ni nomuni vakabauta, gugumatua, talairawarawa, ka dauveiqaravi ena yalo loloma, kei na nomuni ivakaraitaki ni buladodonu. Ena sega ni rawata na Lotu na veika e sasagataka kevaka e sega na nomuni gugumatua, kei na yalo dina ni buladodonu, ka sa mai vakaukauwataki kina na Lotu. Ena veiyabaki sa oti era a sotava kina na marama ena Lotu na veibolebole lelevu me vaka ga o ni sotava tiko edaidai. Na veika o ni bolei kina e duidui mai na veika era bolei kina na tinamuni, o ira na bumuni, kei ira na bumuni-vakarua, ka ra ka dina sara.

Au marau ni sa tosocake tikoga na vei gaunadonu vei ira na marama ena Lotu ka vakakina ena vuravura raraba. Keitou nuitaka ni ko ni na tokona na kena sa tosocake na veigaunadonu vakaoqori ena nomuni kauta yani kivei ira na itovo vakalou ni marama. Na veigaunadonu vakaoqori e sega ni vakaiyalayala. Ena gauna a tauyavutaka kina na isoqosoqo oqo na Parofita o Josefa Simici, “e sa dolava kina na nodra vakagalalataki na marama,” ka sa vakatalega kina ena vuravura raraba.”² Ena gauna a dolavi kina na galala oqori ena 1842, e vuqa sara na kilaka e a yaco mai kina e vuravura kivei ira na marama ni vakatauvatani kei na veitukutuku makawa kece kei vuravura.

Ena veiyabaki sa oti yani, e sa veisau vakalevu sara kina na veivakauqeti ni isoqosoqo levu oqo ni marama, ia na vei itavi lalai ni iSoqosoqo ni Veivukei e sega ni se veisau. E sa tukuna sara ga vakadodonu na Parofita o Josefa ni nomuni cakacaka e “sega ni vukei ira walega na dravudravua, ia e vakabula talega na yalo.”³

Au vakabauta na va na vakasama lelevu ni isoqosoqo oqo na:

iMatai, sai koya na kena tauyavu na veitacini vakalou.

iKarua, sai koya ni vanua ni vuli.

iKatolu, ni sa inaki taumada ni isoqosoqo na nodra qaravi na tani. Na kena ibole na “Loloma e sega ni dauveivakadirideini.”

iKava, ni sa vanua era bula veimaliwai kina na marama ka tauyavu kina na nodra veitokani tawamudu.⁴

Au marautaki kemuni vakalevu na ganequ itabagone ko ni sa mai vakaitavi tiko ena iSoqosoqo ni Veivukei ni ko ni se qai yabaki tinikawalu. Ko ni na mai rawa ka vakalevu sara ena nomuni mai lewena na isoqosoqoso yaga oqo. Ena vakalougatataki na nomuni bula me vaka ni ko ni sa lomasoli mai mo ni mai vakaitavi vata kei ira na tuakamuni ena veiqaravi ni yalololoma ka mo ni qaravi ira na vakaloloma tu. Na lewenivuli ni iSoqosoqo ni Veivukei e sa vakanamata tu ki na yavu matailalai ni ivunau ka na solia vei iko na gaunadonu mo vulica na kosipeli ka toroya cake na nomuni bula vakayalo. Na lewenivuli e ganiti ira na tamata kecega, ka sega walega ni baleti ira na marama vakawati kei ira na tina. O ira kece na marama, oka kina o kemuni na gone yalewa e sa na “volai na yacamuni; mo ni sa dausikovi; ka vakavulici ena ivakavuvuli ni Kalou.”⁵ Ena vakaukauwataki kemuni na ivunau ka vukei kemuni me toroya cake na bula vakayalo ka gadrevi me vorata na veibolebole e so ni bula oqo.

Oqo na nona rai e dua na noqu itokani gone marama: “Au se qai yabaki 18 ka’u gone duadua vei ira na lewe ni iSoqosoqo ni Veivukei ena noqu tabanalevu. Au dau taleitaka na lako vata kei tinaqu kei buqu ki na iSoqosoqo ni Veivukei baleta ni rui talei meu veimaliwai vakaitokani vata kei ira. Au taleitaka na vakarorogo vei tinaqu ni dau veitalanoa kei ira nona itokani baleta ni solia kivei au e dua na gaunadonu me’u veikilai kina kei ira na marama era itaba vata. E levu sara na marama era dau taleitaka me ra mokoti au ka taroga se’u cakacaka tiko e vei kei na cava au dau vakayacora ena vula ikatakata. Era dau vakavuna meu dau vakila na noqu taleitaki ena kedra maliwa. Me vaka ni’u dau veimaliwai tiko kei ira na buqu, kei na buqu vakarua ena noqu tabanalevu, au sa mai tara cake kina na veitokani vou ka duatani sara ka sa vakavutuniyautaka ka vakalougatataka talega na noqu bula. Au dau taleitaka talega na lesoni era dau veivakavulici kina na marama itabaqase. Era vakaitikotiko ena veivanua duidui e so kei na veika era dui sotava e sa vakavuna meu raica kina na iwali me’u na sotava kina na veibolebole kei na veileqa eso ni bula oqo. E talei vei au na italanoa era dau wasea mai na nodra dui bula ka vukei au me’u semata vakayalo ki na lesoni. Au sa mai kila ni iSoqosoqo ni Veivukei e sa baleti ira kece sara na marama ka veitalia ga na nodra dui yabaki.”⁶

Veitalia ga na ituvaki ni veika era dui sotava na marama, na nomuni veimaliwai ena rawa ni rabailevu sara na vanua ena tara yani. Au vakabauta ni so vei kemuni e dau beca na rabailevu ni veika ko ni na rawa ni vakalougatataka kina na nodra bula na tani. Ena vuqa sara na gauna e sega ni dau laurai levu mai, ia mai na ivakaraitaki ga ni nomuni buladodonu, kei na nomuni ivalavala ni loloma ka tawa wili rawa, ka vakayacori tu ena lomasoli, vakawasoma ena veitalanoa vakayadudua.

Na nona kauwai vakabibi na Turaga vei ira na marama dawai e mai laurai sara vakalevu ena ivolanikalou. Io na kauwai oqo era oka talega kina na tina dawai. E vuqa sara na ka ena gadrevi mai vei ira. Era na vakarautaka na kakana kei na isulu kei na veika tale eso e gadrevi ena matavuvale. Ena gadrevi talega me na levu cake na nodra loloma kei na veimaroroi ena nodra veisusu vei ira na luvedra.

E dua na ivola au se qai ciqoma walega mai vua e dua na gonetagane na luvena e dua na marama, au via cavuta ga mai kina e vica na kena malanivosa: “E a rawa vei tinaqu me solia taucoko e vale na nona gauna ni keitou se lalai na lewe ni matavuvale. Oqo na vanua e vinakata me tiko kina, ia ena 28 na yabaki sa oti, kei na va na luvena mai na yabaki 5 ki na 14, e a vosota me taura kina e dua na cakacaka ka kauti koya tani mai na vuvale me rawa ni solia vei keitou na ka keitou gadreva me vaka ni tina dawai. Me vaka ni keitou sa kila tu ni oqo e sega ni sala dina ni kena susugi cake e dua na matavuvale, e a cakacaka sara vakagumatua o tinaqu me susugi keitou ena kosipeli ka kitaka kece na itavi ni matavuvale dina ni a cakacaka tiko ena gauna kece me vukei keitou vakailavo. Ena gauna oqo niu sa mai itubutubu tu oqo, au kalougata ni tiko voli na watiqu mai vale me qarauni iratou na luvei keirau, au sa kila rawa kina na bibi ni itavi kei na veivakatovolei a sotava o tinaqu me susugi keitou mai ena gauna ko ya. E sa bau dredre dina ka veivakatovolei kau a diva me’u a cakacaka vakalevu cake me vakarawarawataka vua na itavi. Ena tawamudu na noqu vakavinavinakataka na nona solibula me biuta e dua na ivakaraitaki me tuberi keitou me keitou dau cakacaka kei na sala me keitou bula kina. Na vakasama yalomatua ni ivakaro ki na matavuvale e a yaco me dina sara vei au ena gauna oqo ena vuku ni veika keitou a sota kaya mai vakamatavuvale.”⁷

E vuqa sara na marama yalodina, ka buladodonu era calata na gaunadonu me ra vakamau kina, ia era yaco talega me ra dua na tiki talei ni cakacaka tabu oqo. O ira na marama talei vakaoqo e tiko na nodra itavi uasivi me vaka na agilosi dauloloma vei ira na itubutubu, vei ira na marama tacidra, ganedra, vugodra tagane, vugodra yalewa, ka vakakina vei ira na lewe ni matavuvale tale eso kei na itokani. Ena loma ni Lotu e sega kina ni vakaiyalayala na gaunadonu meda dauloloma ka veisusu. O ira na marama dawai, ka na rawa ni levu cake sara na nodra gauna galala, ena uasivi sara na nodra veiqaravi.

E dua na ivakaraitaki vinaka ni marama dawai, o Sister Margaret Anderson mai Centerville, Utah, ka a bulataka e dua na bula ni ivakaraitaki vinaka ni veiqaravi vei ira na tani. Ena vica vata na yabaki e a veiqaravi voli kina ena yalo loloma vua na tinana ni sa qase sara, na nona nei, kei na tacina yalewa lokiloki. E a veituberi ka dauveivakauqeti sara vei ira e drau vakadrau na gone ena koronivuli e a qasenivuli voli kina. E sa vakacegu mai ena gauna oqo, ia e tomana tikoga me dau bole tu me veiqaravi ena veimacawa, me vukei ira na gone me ra vulica na wilivola. Na nona itovo ni veiqaravi e sa bau veivakalougatataki sara ga vakalevu vei ira na lewe ni nona tabanalevu. E dua na goneyalewa e a tukuna, “Ni’u a se gonelailai, e dau cakava mai o Margaret ena veiyabaki kece na noqu keke ni siganisucu. E dau ukutaka na kena uca cevata ka cakava na soqo e a caka ena yabaki sa oti, me vaka na danisi se qito veicaqe.” E sega ni dua na daukaulotu me mai lesu ena nona tabanalevu me na sega ni dua na nona bausi leca mai vei Margaret. E dua o koya na ivurevure ni dauveituberi ena kosipeli, vakabibi ena iSoqosoqo ni Veivukei. Vei ira na tiko tikivi koya kei ira na itokani, e dau lomasoli me cakava e so na nodra itavi lalai, ka vakavodoki ira yani ki na valetabu. E dua o Margaret na dauveiqaravi lagilagi. E dau cakava e so na ka kamikamica “candies” kana vinaka ka dau droinitaka eso na iyaloyalo rairai vinaka sara, ka dau taleitaka me wasea vata kei ira na tani. Sa veivakalougatataki dina vei ira e vuqa sara na tamata.

Sa yalataka vakavuqa na parofita ni Turaga ni na sega ni tarovi na veivakalougatataki vei ira na marama dawai buladodonu ena Lotu kevaka, e sega ni nodra cala, me ra sega ni vakamau ena bula oqo ka vauci vua e dua na matabete bula kilikili. Ena rawa vei ira me ra laki marautaka na veivakalougatataki vata ga koya ena bula ka tarava. “Ena so na gauna ni o na gadreva na veiciqomi kei na veivolekati ka okati ena bula ni matavuvale e vuravura, yalovinaka mo nanuma ni sa kila tiko na Tamada Vakalomalagi na nomu gagadre, ka na dua na siga ena vakalougatataki iko ka mo na sega tale ni taqea rawa.”⁸

Ni oti na kena vakatabui na valetabu vou mai Nauvoo, keitou a vodo lesu ki vale ena waqavuka vata kei Sister Parkin, Sister Hughes, Sister Pingree, kei iratou na dui watidratou. Au a tarogi iratou na marama de ratou sa lesu mai na Sitoa ni Red Brick, mai Nauvoo na vanua ka tauyavutaka kina na iSoqosoqo ni Veivukei na Parofita o Josefa, ena i ka 17 ni siga ni vula o Maji, 1842, ka ratou lewe ruasagavulu walega na lewena eratou tiko rawa. E a sauma yani o Sister Parkin ni ratou sa lesu mai kina.

Ena gauna au a vosa tiko kina vei iratou, e a kaukauwa sara na noqu nanuma ni o ira kece na marama ena veiyasa ivuravura era na rawa ni taukena ka kune kalougata mai vua na Turaga ena vukudratou na marama o ya. E a tukuna na Parofita o Josefa Simici, “Ena yaca ni Kalou, au sa dolava oqo na kena sala vei kemuni … ka na drodro mai na vuku kei na yalomatua ena gauna oqo.”⁹ Na veivakalougatataki oqo ni vuku kei na yalomatua era na rawata na marama yalododonu kece sara ena Lotu veitalia ga se ra kawa tamata cava se itaukei ni vanua cava, ka veitalia ga se era se qai lewe ni Lotu vou se ra sa kawa mai vei iratou na imatai ni ruasagavulu na lewe ni isoqosoqo mai Nauvoo ena 1842. Na veivakalougatataki oqo ena drodrovi ira yani na marama era lomasoli me ra qarava na itavi vaka-agilosi.

Ena dua na gauna walega oqo au a rogoci Elder Dieter Uchtdorf ni a cavuta e dua na malanivosa veivakauqeti: “E sega ni dua na kawa ena noqu matavuvale e lako mai Nauvoo. Au sega ni raica rawa e dua na isema ni veiwekani mai vei ira na tubuqu kivei ira na painia. Ia me vakataki ira e vuqa na lewe ni Lotu e vuravura, e rawa ga vei au me’u semata na yaloqu taucoko kivei ira na Yalododonu mai Nauvoo ka vakakina na nodra ilakolako ki Saioni. Na kena tomani na igu ni sasaga ni noqu ilakolako vakalotu “ki na dua na Saioni ni yalosavasava” e vakavurea vei au me’u vakila e yaloqu niu sa voleka sara vei ira na painia ena i ka tinikaciwa ni senitiuri. Era sa tubuqu vakayalo, me vaka ga vei ira yadua na lewe ni Lotu kece sara, veitalia ga na vanua era dui cavutu mai kina, na nodra ivosavosa, se nodra itovo. Era sa mai tauyavutaka e dua na vanua sega walega ni vanua vinaka, ia e vanua ka sa mai tauyavutaki kina vakayalo na kena tarai cake na matanitu ena veivanua kece sara e vuravura.”

Ia oqo e dua noqu vosa vei kemuni na marama vakawati. Ena dua na sala uasivi sara, o ni sa vakarautaka kina na noda vuvale me vanua ni vakacegu kei na marau ena vuravura ni leqa oqo. Na watimuni buladodonu e taura tu na matabete, na matabete ka tu vua na lewa ni vuvale. Ia o koya e sega ni matabete; o koya e taura tiko ga na matabete.¹⁰ E wasea vata kei koya na marama watina na veivakalougatataki ni matabete e taura tiko. E sega ni bibi cake o koya mai na itutu ni bula vakalou nei marama watina. A tukuna o Peresitedi Gordon B. Hinckley ena Soqoni Raraba ni Matabete ena vula ko Epereli sa oti: “Ena veitokani ni bula vakamau e sega ni dua e lailai se dua e levu. E sega ni liu tiko na marama vua na turaga; ka sega talega ni liu na turaga vua na marama. Erau na salavata tikoga me vaka ni rau sa luve tagane ka luve yalewa ni Kalou ena ilakolako tawamudu.”

E a tomana ka kaya; “Au sa nuidei ni da na la’ki tu ena mataveilewai ni Kalou, ni na sega ni kacivaki mai na levu ni noda iyau eda rawata ena bula oqo se na koroi ni veidokai eda sa mai rawata. Ia ena tiko na lomatarotaro ena vuku ni noda veimaliwai vakavuvale. Ia au yalovakacegu meu tukuna ni o ira ga era a lakova na bula oqo ena veilomani kei na veidokai kei na yalo ni vakavinavinaka vei ira nodra itokani kei ira na isolisoli era na rawata na vosa oqo mai vua na noda turaga ni lewa tawamudu: ‘A tamata vinaka ka dina: … curu ki na marau ni nomu Turaga.’”¹¹

Sa dua na veivakalougatataki levu ki na Lotu o ira na marama era tokona na dui watidra e na matabisopi, mataveiliutaki ni iteki, kei na veikacivi tale eso ni matabete. E sega ni laurai na nodra veiqaravi ena yalomalumalumu, ia era uasivi sara na nodra sasaga me ra tokona na matavuvale ena gauna era veiqaravi tiko kina na turaga vei ira na Yalododonu. Au tukuna “ena yalomalumalumu.” Au dau rogoca ni tukuni ni so na marama era taleitaka na turaga kaukauwa yalomalua ni ra nanuma ni dauvakarorogo!

E sega ni dua e kila vakalevu cake vei au na kaukauwa e rawa ni solia nona veitokoni e dua na marama vakawati. Tekivu ni keirau se qai vakamau, sa dau tokoni au ka vakaukauwataki au o noqu Ruci ena vuqa na veikacivi au a vakaitavi tu mai kina me voleka ni onosagavulu na yabaki. E a sega ni dua na siga me’u la’ki veiqaravi kina me sega na nona veitokoni ena yalololoma. Au vakavinavinaka vakalevu vei koya kau lomani koya talega vakalevu.

Na nona marama yada e dua noqu itokani daukaulotu, o Sister Effie Dean Bowman Rich, e sa rui osooso sara ena nona matavuvale kei na rua na nona bisinisi. Kena ikuri ni, o koya e tina, e budra, ka budra vakarua na lewe ni dua na matavuvale levu. Ena dua na gauna sa oti, ni a sasaga sara tiko o koya me sotava na veika e gadrevi ki na vei itavi kece oqori, e a tukuna kina, “Na ka au gadreva sa ikoya me dua na watiqu marama!” Na ibalebale ni ka e tukuna o ya ni gadreva na veitokoni mai vua e dua ka na rawa ni qarava na itavi matailalai, ka ra dau qarava vakavinaka na marama vakawati buladodonu.

Kemuni na marama, se na ituvaki ni bula cava ga o sota kaya tiko, ena gadrevi vei kemuni me tawa tiko na waiwai ni nomuni cina. Kena ibalebale oqo mo ni vakavakarau. Eda nanuma kece tiko na italanoa vakaibalebale ni Tini na Goneyalewa era a sureti ki na dua na kanavata ni vakamau. E lewe lima eratou yalomatua ka vakavakarau, me tawa tiko na waiwai ni nodratou cina me ratou waraka na Tagane sa qai vakawati; e lima tale eratou a sega ni vakarau. Eratou a vakarautaka kece na lewe tini na nodratou cina, ia eratou lewe lima eratou a sega ni kauta vakalevu na waiwai ka mani yaco me maca kina. Eda gadreva kece na rarama ena noda cina me kauti keda yani mai na butobuto. Eda vinakata kece me da sotava na tagane sa qai vakawati ka tiko ena soqo ni kana magiti.

Ena vica na yabaki sa oti, e a vakamacalataka kina o Peresitedi Spencer W. Kimball na kena ca na sega ni vakarau. E a tukuna o koya ni o iratou na lima na yalewa lialia ena italanoa vakatautauvata “eratou a vakavulici. Eratou sa vakasalataki tiko ena nodratou bula taucoko.” Ena siga e tautauvata ga na kedrau irairai na vuku kei na lialia, “ia ena gauna ni butobuto, era a sega ni nanamaki kina, sa qai yaco mai na tagane vakawati.” O iratou na lewe lima sa boko koso na nodratou cina, eratou a cici yani me laki kau mai na waiwai, ia ena gauna me ratou qai lesu mai kina sa sogo tu na katuba. Eratou sa bera.

E a vakamacalataka o Peresitedi Kimball ni “eratou a kerekere na lialia vei iratou na kena vo me ratou wasea nodratou waiwai, ia na vakavakarau vakayalo e sega ni rawa ni wasei vakasauri ena dua walega na gauna lekaleka. Eratou sa na lako ga yani na vuku, de qai yaco mai na tagane sa qai vakawati ka sega ni dua e tavaki koya. Eratou na gadreva taucoko sara na nodratou waiwai; sa sega ni rawa ni ratou na vukei iratou na lialia.”

E a tomana tale, ena italanoa vakaibalebale oqo, “E rawa ni voli mai na makete na waiwai. Ena noda bula na waiwai ni vakavakarau ena kumuni tiko yani vakalalai ena buladodonu. Na noda tiko ena soqoni ni sakaramede e kuri kina na waiwai ni noda cina, me vakalalai tiko ena veiyabaki. Na lolo, na masu vakamatavuvale, na veituberi ni vuvale, na lewai vinaka ni gagadre vakayago, na vunautaki ni kosipeli, na vulici ni ivolanikalou—na ivalavala kece ni soli igu kei na talairawarawa e sa okati me dua na turu lailai ka me kumuni tiko yani ki na sitoa. Na caka vinaka, na saumi ni isolisoli kei na ikatini, na vakanananu savasava kei na ivalavala savasava, na vakamau tawamudu ena veiyalayalati—oqo talega era vakaitavi vakalevu ki na waiwai ka na rawa ni da na laki vakayagataka ena bogilevu me tawa kina na noda cina ni sa lala.”¹²

Kemuni na ganequ, e ka bibi me tawa tiko na waiwai ni nomuni cina baleta ni gauna mo ni na tukuna kina vua na Turaga, “Koi au oqo; mo ni talai au,” o ni sa na vakarau rawa tu ka sa kilikili mo ni talai yani. Eda sa talai kece mai lomalagi, ia na veika eda na rawata ena cakacaka ni Turaga ena vakatau vakalevu mai na noda lomasoli kei na noda igu.

Na noqu ivakadinadina, ka yavutaki mai na 59 na yabaki ni bula vakamatavuvale, o ya ni nona vakaitavi o noqu Ruci ena iSoqosoqo ni Veivukei e kauta mai na vutuniyau vakayalo kei na veilomani ki na neitou vuvale. E sega ni vakalougatataka walega na nona bula na veivakauqeti ni isoqosoqo vakalou oqo, ia na bula kece sara ni lewe ni neitou matavuvale. Ena rawa ni vukei iko na vakaitavi ena iSoqosoqo ni Veivukei mo tara cake ka tubu vakayalo. Ena rawa ni solia vei iko e vuqa na kaukauwa ko na gadreva ni ko sotava na veitemaki kei na dredre ni bula kei na ilakolako vakayago oqo.

Ena imatai ni soqo ni kaburaki itukutuku raraba ni oti na nona tabaki o Peresitedi Hinckley me Peresitedi ni Lotu, e a tarogi koya e dua na marama me tukuna e dua na ka me baleta na bolebole era sotava na tina era cakacaka tiko ka ra tovolea tale tikoga me ra sotava na veigagadre kece ni matavuvale. E a sauma o Peresitedi Hinckley, “Solia na nomu igu taucoko, ka nanuma ni iyau levu taudua o taukena ena vuravura oqo sai ira na luvemuni, ko ira ko ni a kauti ira mai ki vuravura, ka sa nomuni itavi na nodra susugi ka karoni.”¹³ Au a tukuna tale yani ena bogi nikua. Mo ni solia na nomuni igu taucoko mo ni vukei keimami me keimami yacova na veika cecere ka toso cake sara. Mo ni vakayagataka na nomuni isolisoli vakayalo soliwale me vakalougatataki. Mo ni vukei keimami me keimami kauta tani na veivakayarayarataki ni veikarusai ni vuravura ena neimami bula, neimami vuvale, kei na Lotu.

Me vakayacori na yalayala nei Nifai ena vuku ni nomuni soli igu: “Ia era sa vakaiyaragi ena yalododonu kei na lagilagi ni nona kaukauwa na Kalou.”¹⁴ Au via cavuta na ivakadinadina ka sa tara na noqu bula ena vuku ni nona loloma na watiqu, o Ruci, na tinaqu va-Karisito, na buqu yalododonu, o ira na luvei keirau yalewa kei na makubui keirau yalewa kei na vuqa tale na marama yalosavsava. Au cavuta oqo ena yaca i Jisu Karisito, emeni.