Elder Craig C. Christensen
mai na Vitusagavulu

Na neitou matavuvale e tiko e dua na kena ivakalekaleka ka tauri mai na Alama 32:28—VYEV—Vakaukauwa Yalo E Veisiga,” e kaya o Elder Craig C. Christensen, ka a tokoni ena dua na gauna lekaleka sa oti me lewe ni iKarua ni Kuoramu ni Vitusagavulu.

E tiki levu ni bula nei Elder Christensen na vakaukauwa yago. Me vaka ni ratou matavuvale dau yavavala, ni ratou dau nunu vata vakamatavuvale ena veigauna ni vakacagicagi, eratou dau vakaukauwa yalo o Elder Christensen, na watina o Deborah, kei iratou na luvedrau e va mai na nodratou dau lotu vakavuvale kei na vuli ivolanikalou. Me kena ikuri, sa dau tu ga na nona ivalavala ni vakatorocaketaka na nona bula vakayalo o Elder Christensen. “Ena veiyabaki sa sivi,” e kaya o Elder Christensen, “sa vaqaqacotaki au ka tara cake na noqu ivakadinadina na ivalavala oqori ni kena vakananumi ka vakasaqarai na ivolanikalou.”

E a sucu o Elder Christensen ena i ka 18 ni Maji 1956 e Salt Lake City, Utah, kivei rau o Sheron Glen kei Colleen Cloward Christensen. Eratou a toki na nona matavuvale ki Concord, California, ni se bera ni yacova yani na ikarua ni tabavuli. E a qai lesu tale ki Utah ni vuli tiko ena vulitorocake me laki qito veicaqe e Brigham Young University.

“Au dau vakaliuca tu ga na veicaqe ni se bera niu kaulotu ki Chile,” e kaya o Elder Christensen. “E veisautaka na veika kece oqori ena noqu sa yaco meu daukaulotu. E kauta mai vei au na loloma dina me baleti ira na tamata kei na gagadre dina ni veiqaravi.”

E a vakamau ena valetabu mai Salt Lake ena i ka 28 ni Maji 1978 vei Debora Jones—“na noqu ivakaraitaki ni kena bulataki na kosipeli”—e a vulica na cakacaka vakafika kei na veika vakabisinisi. Me vaka ni taukena na kabani ni volitaki motoka, sa dau yalodina ena nona “bulataka na ivakavuvuli ni buladodonu ka vakatavuvulitaka vei ira na tani.”

E vulica na veivakavuvuli oqo mai vei ira na nona dauveituberi ena nona bula taucoko, e okati kina na tamana, o koya ka nona bisopi talega kei na nona peresitedi ni iteki; na tacina; kei na nona peresitedi ni daukaulotu.

O ira talega na nona dauveituberi oqo era a vukei koya ena nona vakarautaki ki na veiqaravi vakabisopi, peresitedi ni daukaulotu, kei na Vitusagavulu ni iWasewase. Mai na vei ivakaraitaki oqo kei na veika sotavi, e kaya o Elder Christensen, “Au sa vulica ni Yalotabu e vakavulici keda kei ira talega eda vakatavulica. Ena veilesilesi kecega, eda na gadreva me da vakasaqara na veika e vinakata na Turaga me da cakava.”