E Tarai Cake na Veiwekani ni Kilaka ena Veiqaravi ni Lotu

Mai vei Naomi Frandsen

Ena gauna erau a sotava kina e dua na italatala ni lotu Vakarisito mai na loma ni vanua ena yasayasa vaka ra kei Amerika, o Norman D. kei Luana Shumway, oi rau na dairekita ni tabana ni veiqaravi ni Lotu mai Salt Lake City, e a tukuna vei rau ni sega ni kila rawa na vuna e gole mai kina me mai veisiko. Erau sa qai nanuma o Brother kei Sister Shumway me rau kauti koya me laki sarasara mada ena iTikotiko Liu ni Qaravi ni Bula Raraba ka vakakina ena Welfare Square de na rawa ni na vukei koya me kila rawa kina na vuna.

“Ena loma ni rua na auwa vakacaca keitou a gade vata tiko kina,” e a vakananuma lesu tiko o Brother Shumway, “na vosa ga e cavuta ka se baci cavuta o ya na ‘sa totoka,’ ‘au sega sara ga ni vosa rawa,’ ‘au sa qoroya dina.’ Ka vuki tukuna tikoga na ‘Isa, e vuqa sara na ka eda rawa ni vulica ena sala me da muri Jisu kina.’”

Mai vei ira na italatala ni lotu vaka-Buda kivei ira na vakailesilesi ni mataivalu kivei ira na vakailesilesi ni matanitu, e drau vakadrau na iliuliu vakabisinisi, daunipolitiki, kei na vakailesilesi ni matalotu era dau sikova tiko yani na valenivolavola liu ni Lotu, mai Salt Lake City ena veiyabaki. Era dau kidavaki mai vei ira na dairekita ni tabana ni veiqaravi ni Lotu ka ra tuberi ena veika me baleta na itukutuku makawa ni Lotu kei na ivakavuvuli ena veivanua bibi e so me vaka na Temple Square, na Vale ni iTukutuku Makawa ni Vuvale, Tabana ni Qaravi ni Bula Raraba, Welfare Square, Vale ni Maroroi iTukutuku Makawa ni Lotu kei na Cakacaka ni Liga, kei na Vale ni Koniferedi.

“Keimami vakabauta ni rawa me da vakaraitaka vei ira na vulagi oqo na veika e vakayacora tiko na Lotu, ka sega ni gadrevi me da na vakamacala sara vakalevu,” e a tukuna o Brother Shumway. Eratou a solia talega na Mataveiliutaki Taumada vei Lowell kei Tamara Snow, oi rau na dairekita e liu ni tabana ni veiqaravi ni Lotu, na ivakasala vata ga vakaoqo: “Kakua ni vosa vakalevu. Laiva me qai tukuni koya ga na Lotu.”

“E sa bau tukuni koya dina sara ga. Mai na Welfare Square, era mai raica na vulagi na kena bulataki na veiyavu matailalai ni Lotu ena nodra mai gade ka sarava na veiyaya ni welefea. “Me vaka ni da sa lewe ni Lotu eda sa veiyalayalati tu me da na qaravi ira na dravudravua kei na vakaloloma,” e a vakamacalataka o Mel Gardner, na manidia ni lololo nei bisopi ka tiko ena Welfare Square. “Ia na veika kece eda cakava e navuci me tokoni kina na bula rawati koya. Ia o ira era ciqoma na veivuke era na rawa ni laveti ira tale e so mai na nodra veiqaravi.”

E a liutaki ira yani na vulagi o Brother Gardner ki na loma ni sitoa ka sega tu ni dua na kena misini ni ilavo ni veivoli, era mai tauri kakana kina o ira na vakaloloma ka ra sa dusimaki oti mai vei bisopi. “Keitou rawa ni tukuna ni ra tu eke na kakana vinaka kece ka rawa ni voli ena ilavo,” e a tukuna mai ena matadredredre.

Ena veigauna era dau kurabui na vulagi na levu ni lewe ni lotu era bole mai na veiiteki me ra mai vakaitavi ena lololo, ena vale ni vavi madrai, ena vanua ni tawaikavataki ni kakana, ena vale ni qaqi sucu, kei na sitoa ni Deseret Industries. Ena dua na itaba ka volai tiko kina na veika e tukuna na Parofita o Josefa Simici me baleta na yalo ni bole me ra solibula ka sinai tu ena loma ni Lotu: “E dua na tamata e vakasinaiti tu ena loloma ni Kalou, e sega ni na vakacegu na yalona me vakalougatataka walega na nona matavuvale, ia ena tara yani na vuravura raraba, ena guta na yalona me vakalougatataka na itabatamata taucoko” (iTukutuku ni Lotu, 4:227).

“Sa ikoya oqori na noda inaki”—veiqaravi ka veivakalougatataki, e a tukuna o Brother Gardner ni oti mai e dua na ilakolako ni sarasara, ni ra sa sureti mai na vulagi me ra mai gunu sucu vakajokiliti ka kania na jisi e buli ena vale ni qaqi sucu na Deseret Dairy.

Na iTikotiko Liu ni Qaravi ni Bula Raraba ka tiko voleka e kea, e vakaraitaki toka kina vakamatata na rabailevu ni veiqaravi ni welefea ni Lotu. “Eda sa tisaipeli nei Jisu, ia na veika kece eda vakayacora, eda na tovolea me muria ga na veika e a mai vakatavuvulitaka o Koya,” e vakamacalataka oqori o Jerry Brown, e dua na daukaulotu tudei ka sa qase sara, ni a liutaki ira yani na vulagi ena veirumu yadua ka ra tuva vinaka tu kina mai ra ki cake ena ilobi isulu, na ivava, iyaya ni valenibula, kei na iyaya ni vuli ka ra waraka tu na kena vakauti yani. Ena so na gauna era dau sotava na vulagi e so vei ira na mai vuli tiko ena iTikotiko Liu ni Qaravi ni Bula Raraba vakakina mai na Welfare Square, e dua na parokaramu ka okati kina na vulici ni cakacaka kei na vulici ni vosa.

“E sa bau ka lagilagi dina ni da raica ni sa vakau yani e veimacawa na iusausa isulu, na iyaya ni valenibula, kei na veika tale e so ki na veimatanitu ena vuravura ka ra vakaloloma tu,” e a tukuna o William D. Reynolds, na manidia ni iTikotiko Liu ni Qaravi ni Bula Raraba. “Ia e vakatalega kina na kena lagilagi ni da raica na marau ena matadra na vuli cakacaka ni ra sa yalodei cake mai ena bula rwati koya mai na nodra vulica ka vakayagataka na nodra kilaka vakacakacaka.”

Mai na Temple Square era wasea tiko kina na marama daukaulotu na itukutuku matailalai ni kosipeli. Era rawa ni vukei na vulagi ni Lotu me ra vakasarasarataki mai vei ira na marama daukaulotu ka ra vosataka sara tikoga na nodra vosa, oqori e ivakaraitaki ni veivakauqeti ni Turaga na kena digitaki o koya me veivakasarasarataki. E a vakasamataka lesu o Sister Shumway ena dua na gauna e a taroga kina e dua na vulagi se vaka tu beka evei na nodra rai na iTaukei kei Amerika me baleta na iVola i Momani. E a sauma na marama daukaulotu ka liutaka tiko na veivakasarasarataki ni a kaya, “oi au sara ga na kawa ni Blackfoot kei na Shoshone.” E a qai wasea na nona taleitaka na iVola i Momani.

Ni ratou a tadu mai na timi ni Monaco ki na Qito ni Winter Olympic ni 2002 mai Salt Lake City, eratou a vakaraitaka sara e dua nodratou kerekere—eratou via sikova na Vale ni iTukutuku Makawa ni Matavuvale. Era a laki vulica mai kina na vulagi na ibalebale ni kena “rawa ni tawamudu na vuvale.” “Eda vakabauta ni rawa ni da laki bula tawamudu vata kei na noda vuvale, ia e tiki ni veika oqori na noda kilai ira na tamata me da na laki bula vata mai kea,” e a vakamacalataka ko Elaine Hastleton, na supavaisa ni valeni-ivola ni veika raraba.

Era dau vakila na vulagi na talei ni cakacaka ni itukutuku makawa ni matavuvale ni ra dau saravi ira e drau vakadrau na petereni ni ra vakasaqaqara tiko ena va na itabavale ko ya ni ivola ni kawa. Ena dua na veisiko guiguilecavi dredre, e a mai raica kina e dua na vulagi mai na Tokalau kei Iurope na ivolatukutuku ni waqa kei na itukutuku ni nodra biuvanua mai na tubuna. “Ena rua veimama tale na auwa ki muri,” e a nanuma lesu tale o Sisita Shumway, “sa tukuni yani vua me keimami sa lako sara yani, ka qai mani kaya lesu mai, ‘Dou lako ga yani. Au sa tu mada ga eke.’”

Era dau gole lesu yani na vulagi ka ra kauta vata tu yani kei ira na na veika lagilagi era mai raica. E veigauna ni ra dau biuti Salt Lake City yani na vulagi era dau tukuna, ‘Au a lako mai niu a se sega ni kila tu na Lotu, ia au mai vakila ni katakata na noqu bula, na veitokani, na loloma, kei na veikauwaitaki,’” e a tukuna o Brother Snow. Ia oqori, e a kuria o Brother Shumway, “na imatai ni ka bibi me da cakava—me da tara cake na veiwekani kei na veikilai ena maliwa ni vuravura kei na Lotu.”