Vakarorogo ki na Domo ni Yalo Tabu

Elder Kenneth Johnson

Mai na Vitusagavulu

Na veivakauqeti e loma oqo e vu mai na ivurevure vakalou, ni da muria, ena vukei keda me da muria tikoga, na dina, ka na taqomaki keda mai na veinaki ca kei na ilesu vakarerevaki.

Au a susugi mai vei rau na noqu itubutubu dauveikauwaitaki ena dua na vuvale e vakavulici ka vakayacori kina na yavu ni lewa meu kidavaki kina ki na Lotu ka ciqoma na ivakavuvuli ni kosipeli. Au a papitaiso ena vula ko Okosita 1959, ni oti ga na ika 19 ni noqu siganisucu. Niu vakasamataka na veika e a yaco ni bera na noqu saumaki, au nanuma sara e dua na ka au a sotava niu a se gone.

Voleka ki na vale au a bula kina niu se gone e duri tu kina e dua na vale levu. E rawa me kunei ni tara tu ena dua na qele rairai totoka ka wavokita ena ka au raica e dua na bai cecere caka ena tiki ni kau tolo lalai babalavu, rauta beka ni ono na fute na kena balavu. Au nanuma niu dau vakairoiro ena qara ena tiki ni kau ena vanua era sa lutu kina na uto ni kau. E tautauvata ni da rai ena dua na vakadodo irairai ki na dua tale na vuravura. Na loma ni bai totoka ka koti vinaka tu na kena co, na loga ni senikau qarauni vinaka, kei na dua na loga ni apolo e solia na rairai ni itikotiko cecere. E kena ca ga, ni dau lekaleka wale na saravi ni iyaloyalo oqo baleta na koli levu wakakau ni Bolatagane ka yadrava tu na iteitei ka dau totolo sara na nona kila ni dua e tu volekata yani na daku ni bai. E dina ga ni dau tikoga ena iteitei na koli, ia na totolo ga ni nona vakaboboi ni sa volekata mai na bai e vakavuna meu dau vakasuka ena rere niu sa vakasamataka na veika e rawa ni vakayacora vei au.

Ko Mr kei Mrs Lyons, ka rau tawana na vale, erau qasenivuli. Erau veiwatini vakarokoroko ka vaka me rau taleitaka na vakanomodi kei na veika e tu ena nodrau itikotiko. Me kuria na noda via kila na veika baleti rau, e sega tu na liga imatau nei Mr Lyons, ka vakayagataka e dua na iqaso sitila ka dara mai ena ruku ni liga ni nona jakete. Ena noqu vakasama vagone, au rawa ni raitayaloyalotaki Mr Lyons ni cemuri au tiko, toboki au ena noqu kola ni sote ena nona iqaso, ka kauti au vakavesu.

Au nanuma sara e dua na mataka ni Okosita niu a se qai yabaki tini se tinikadua, ni oti e dua na bogi ni cagica kaukauwa, ni ra a kidavaki au mai na noqu itokani niu sa biuta yani na neitou vale. E laurai ni dua na ka e vakavuna na nodra marau ka ra mani taroga, “Ko rogoca na cagi e na bogi?”

Niu tukuna niu a rogoca, era a tekivu tukuna sara na ka era sa kunea—e a vakadavora e ra na cagi e dua na yasa ni bai ka wavokita na nodrau vale na Lyons. E sega niu vakasamataka rawa se cava na vuna era sa rui mamarau kina kau mani taroga me ra vakamacalataka na vuna. Era sauma ena marau levu. “E sa rawa me da lako ki na vuni apolo!”

Au se qaqarauni ga ka taroga, “Ia e vakacava ko Mr Lyons?”

“Ko Mr kei Mrs Lyons erau sega ni tiko e vale, erau gade tu vei iratou na wekadrau.”

“Evei na koli?” au taroga

“E sa biu tiko ena vanua ni maroroi manumanu,” e a saumi mai.

Sa dua na vakadidike vinaka eratou a kitaka na noqu itokani. Ia,sa vakacegui au na nodratou vosa, keitou sa lakova sara yani vakatotolo na neitou takete. Keitou curuma yani na lomanibai kabata na vunikau ka beti vuanikau sara vakatotolo, vakavakasinai na neitou taga kei na loma ni neitou sote. E a tavatukituki na utoqu ka totolo na noqu icegucegu niu taqayalaka tiko ni na dua ga na gauna o ya ena basika mai na koli se ko Mr Lyons, se ko rau ruarua ka keitou na tobo. Keitou cici mai na vanua ni neitou lako butako ki na dua na vanua vuni ena dua na veikau voleka me keitou tauri keitou vinaka, keitou sa qai tekivu kania na apolo.

Ko ya na vula ko Okosita, ka ra se bera ni dreu vinaka na apolo me ra laukana. Era se sega ni kamikamica, ia na duatani ni kedra ikanakana na apolo drokadroka oqo e sega ni tarovi keitou ena neitou kania ena marau na neitou iyau, keitou vakayacora ena dua na sala au sega ni vakamacalataka rawa oqo. Ni oti na noqu kania vakatotolo e vuqa sara, au sa qai nanuma meu taura e ya dua na ikati vei ira na vo ni apolo ka viritaki ira yani ki na veikau voleka ki kea. E a oti na kena lasa ni sa tekivu me vakila na yago ikeitou na levu ni apolo e sa kania. Na nodrau sota na ketequ kei na viavia lua. Ena noqu dabe ka veivutunitaka toka na ka au a cakava, au vakila ni dua na ka au sa vakila mai e lomaqu ka levu cake na kena sega ni vinaka mai na apolo vou.

Na lomaloma ca oqo e vu mai na noqu kila niu sa vakayacora e dua na ka e sega ni dodonu.

Ena nodratou vakatura na noqu itokani me keitou kabata na iteitei, au a lomaleqataka ia e sega vei au na kaukauwa meu kaya sega kau vakanadakuya na noqu gagadre. Oqo, ni sa vakayacori oti na veika, au sa vakasinaiti ena rarawa. Ena noqu lecaika, au a sega ni via rogoca na veivakauqeti ka vakasalataki au ena cala ni ka au cakava.

Na bai vakayago kei na kaukauwa e tuba e rawa me tarovi keda ena noda sasagataka na gaunisala cala; ia e tiko talega vei keda yadudua na noda dau vakila e loma, so na gauna e vakamacalataki ni domo lailai ka vinaka, ia ena kena kilai ka rogoci ena vukei keda me da kakua ni temaki.

Ena vica na yabaki e muri, e a tarai au vakabibi na vosa nei Peresitedi Boyd K. Packer ena nona veivakavulici ni a kaya, “E sega ni rawa ni da lakova e dua na ilakolako cala ni sega mada ni da biuta vakatikitiki taumada e dua na ivakasala.”¹ Au a vakasamataka na gauna ko ya, kei na so tale ka tautauvata… . na vakasama kei na rai e lako mai ena noda vakasamataka na isau ni noda ivalavala.

E a vakalevutaka na Parofita o Momani na noda raica na ivurevure ni veivakasama o ya ena nona kaya, “… na Yalo iKarisito e sa soli ki na veitamata yadua, me ra kila kina na vinaka mai na ca.”²

Na vakasama ni tiko kece vei keda na isolisoli oqo ni veidusimaki e tokoni ena Kosipeli nei Joni ka volai me baleta na iVakabula, “Ni o [Koya] ga oqo na Rarama dina, sa lako mai ki vuravura ka vakararamataki ira na tamata kecega.”³

Na veivakauqeti e loma oqo e vu mai na dua na ivurevure vakalou ni da muria ena vukei keda me da muria tikoga na dina, ka na taqomaki keda mai na veinaki ca kei na ilesu vakarerevaki.

Ni oti e vica na macawa mai na veika e a yaco baleta na apolo au a gole yani meu tomani iratou na noqu itokani ena veikau voleka ki vale, ena noqu nuitaka ni keitou na navuca e so na qito se soqoni me keitou qitotaka. Niu volekati iratou yani, eratou a kumuni vata toka. Au a raica na kubou ni buka ni tubu cake ki macawa e deladratou ka boica sara na iboi ni tavako ni kama tiko. E dua vei iratou e a kauta mai e dua na pakete tavako, ka ratou sa vakatavako tiko. Eratou sureti au meu tomani iratou ia au a sega ni vakadonuya. Eratou cikevi au, ka tukuna ni noqu bese e ivakaraitaki ni malumalumu. Na nodratou veisagai sa vuki me veivakalialiai, ka soqoni vata kei na vosa lolovira. E sega ni dua na ka me ratou kaya se kitaka me na veisautaka na noqu lewa. Au a sega ni susu ena kila me baleta na kosipeli ka sega ni kila e dua na ka me baleta na Vosa ni Vuku. Ia au a tarovi mai na dua na ka au vakila e loma meu kua ni vakaitavi vata kei iratou.

Ena noqu taubale ki vale ka vakasamataka na lewa au a cakava, au vakila na kena vinaka vei au. E dina ga ni a sega ni yaco na veika au a nanuma kau na vaqara e dua na sala me vakatawana na noqu gauna ni na sega ko iratou na noqu itokani, au a kunea e dua na ka me baleti au—me baleta na ivurevure ni marau dina kei na kaukauwa dina e lako mai ena nomu kitaka na lewa dodonu, veitalia na cava ena yaco.

Na ivakatakila ka taura ko Josefa Simici na Parofita e vakamacalataka na veika ena noda ni da talairawarawa ki na veidusimaki ka tiko e loma vei keda ena veitiki ni ivolanikalou oqo: “Ia na Yalo ni Turaga sa vakavukui ira na tamata kecega e vuravura; ia ko ira sa muria na Nona ivakasala na Yalo ni Turaga.”⁴

E sega walega ni solia na tikina oqo e dua tale na ivakadinadina ni rawa kece vei keda me da rawata na ivurevure ni vakasala vakalou oqo, e vakadreta talega na gagadre me da vakatudaliga se rogoca ka muria na veivakauqeti eda taura. Na yalayala ka muria oqo e vakaibalebale sara vakalevu vei au: “Ia ko ira sa muria na Nona ivakasala na Yalo ni Turaga, era sa kila na Kalou ko Tamada.”⁵

Na veiuqeti oqo, ena so na gauna e vakaibalebaletaki me yaloda ia me vakadodonutaka sara na Rarama iKarisito, e sega walega ni vukei keda me da digitaka na ka e dodonu kei na ka e sega ni dodonu, kevaka e muri, era na kauti keda ki na ivurevure ni rarama ka lako mai ena tiko ni Tamada kei na Luvena.⁶

E a yalataka na iVakabula vei ira na Nona tisaipeli, “Kevaka dou sa lomani au, dou talairawarawa ki na noqu ivunau. Ia kau na masuti Tamaqu, ena qai solia vei kemudou e dua tale na Dauveivakacegui, me tikoga kei kemudou ka sega ni mudu; Na Yalo Tabu sa vu ni ka dina.”⁷ E vakamacalataka tale na isolisoli oqo me “na Dauveivakacegui, sa ikoya na Yalo Tabu.”⁸ E rawa me na vakila e dua na isolisoli ni Yalo Tabu, ia na isolisoli oqo e rawa ni ciqomi walega mai na veitabaki ni liga ni oti na papitaiso.⁹

Au sa qai vulica meu taleitaka sara vakalevu na vuna e volai kina baleti iratou na Nona tisaipeli mai na Ra kei Vuravura, “Eratou sa kerea na ka eratou sa rui gadreva sara vakalevu; me soli vei iratou na Yalo Tabu.”¹⁰

Sa ikoya na dau vakauitukutuku vinaka duadua ni dina.

Niu rai lesuva tale na noqu bula, e makare sara tu ga vei au ni levu na digidigi—e so e vaka me lailai ena gauna ko ya, ka so e a dredre vei au baleta na kedra bibi—e vakavuna na noqu rawata e dua na ivakatagedegede e cake ni bula vakayalo keu a sega ni soli au ki na veisureti ni Yalo Tabu.¹¹

Ni sega na isolisoli lagilagi oqo eda na sega ni rawa ni kila na inaki ni bula se na ituvatuva ni lewa levu ni Tamada Tawamudu.¹² Ni “sa sega na tamata me kunea rawa na nona veigaunisala ka sega ni dua na tamata me kila nona gaunisala vakavo walega me vakaraitaki vua.”¹³

Ke vakatau ena lawa se vakayagataki na vuku ena sega ni rauta, “Raica sa sega talega ni rawa vua na tamata me vakamacalataka, ia sa rawa walega me raici ka kilai ena kaukauwa ni Yalo Tabu, sa solia na Kalou vei ira era sa lomani Koya ka ra sa savasava e matana.”¹⁴

Au sega ni kunea rawa na vosa me vakamacalataka vakavinaka na ka au vakila me baleta na Rarama iKarisito kei na isolisoli ni Yalo Tabu. Erau sa, “cina ki na yavaqu kei na rarama ki na noqu salatu.”¹⁵

Nanuma na Nona kerekere na iVakabula vua na Tamada me baleti iratou na Lewe Tinikarua mai Bountiful, ka tukuni ena vosa oqo:

“Tamaqu, au sa vakavinavinaka vei kemuni ni ko ni sa solia na Yalo Tabu vei iratou kau sa digitaka. Au sa digitaki iratou ena vuku ni nodratou vakabauti au o koya au sa digitaki iratou tani kina mai vuravura.

“Tamaqu, au sa kerei kemuni mo ni solia talega na Yalo Tabu vei ira kece sa vakabauta na nodratou ivunau.”¹⁶

Ena vuravura dredre ka leqaleqa oqo e rawa ni da kunea na veivakadinati ka marautaka na vakacegu ni yalo ni da vakabauta na nodra vosa na Parofita kei na veitokani ni Dauveivakacegui. Eda na kila kina ni ko Jisu Karisito e Luve ni Kalou, na iVakabula kei vuravura.¹⁷

Au vakaraitaka na noqu vakadinadinataka na veidina oqo ena yaca i Jisu Karisito, emeni.