E Sega Li ni Le Tini Eratou a Vakasavasavataki?

Elder David B. Haight

Mai na Kuoramu ni Apositolo Le Tinikarua

Kevaka me da na vakaraitaka vakavinaka na noda vakavinavinaka vua na Tamada Vakalomalagi, sa dodonu me da vakayacora vakakina ena yaloda taucoko, noda igu, noda vakasama, kei na noda kaukauwa kecega.

Ena gauna e a kerei iratou kina na lewe ni Vitusagavulu vou kei iratou na mataveiliutaki vou ni Gone Yalewa o Peresitedi Thomas S. Monson me ratou mai dabe ena nodratou idabedabe e cake, au a vakananuma lesu sara ena Epereli 1970, niu a se qai kacivi meu dua na iVukevuke ena Kuoramu ni Le Tinikarua—e a veivakidacalataki sara vei au. Se qai oti toka ga e vica na auwa na kena tukuni vei au. Niu sa sureti mai meu mai dabe ena dua vei ira na idabedabe damudamu o ya ena valecavu makawa, e a tekivu me ratou lagata na matasere na sere “O Divine Redeemer.” Niu vakarogoca toka na sere momona o ya ena kena rogorogo vinaka, au a kerea galugalu vua na iVakabula me ciqomi au ena kequ ituvaki o ya ka guilecava na noqu malumalumu, kei na noqu ivalavala ca (raica Same 25:7). Sa dua na siga taleitaki o ya! E basika vakasauri mai na noqu vakasama na ka oqori ena nona veisureti nikua o Peresitedi Monson.

Sa ka dokai vei au meu mai tiko vakalailai vata kei kemuni kece eke ena yakavi ni kua ka wasea vei kemuni na noqu ivakadinadina kei na veika au vakila me baleta na cakacaka talei oqo.

Au a tukuna vei Elder Neal A. Maxwell niu na lako cake ga mai ka sega niu na vakaititoko. Sa via solia mai vei au o koya na ititoko, au a qai kaya, “Sega, au rawa ni lako ga. Au via vakaraitaka vua na noqu vakabauta niu na rawata.” Niu sa qase cake tiko ka sa toso tiko na veiyabaki, sa ka dokai vei au na gauna oqo ni rawa ni tu na gagadre meu tucake ka wasea na noqu ivakadinadina me baleta na veivakalougatataki ni kosipeli ka sa tara tu na noqu bula ena vuqa na veiyabaki sa sivi. Au sega mada ni kila se o au beka na tamata qase duadua ka tiko ena loma ni vale oqo ena yakavi ni kua, ia oqo au sa yabaki 97. Ni kacivaki ena mataka ni kua ni oqo na i ka 172 ni koniferedi raraba ni veimama ni yabaki ni Lotu, au vakasamataka ni na so beka na gone era na raica ni 172 sa dua na tama ni gauna balavu. Au na taleva lesu vei kemuni na i ka 100 ni yabaki ni Lotu. Oqori na gauna keirau a vakamau kina kei Ruby. Ena yabaki 1930. Oqo na i ka 172 ni yabaki ni Lotu, ka keirau sa vakamau tu me 72 na yabaki. Au tukuna tikoga vei kemuni mo ni nanuma na daunifika na 172; e rawarawa sara.

Au nanuma ena gauna oqo meu vakavinavinaka kina vua na Tamaqu Vakalomalagi me baleta na veivakalougatataki au sa ciqoma ena veiyabaki kece ni noqu bula—niu sucu mai vei rau e rua na itubutubu vinaka ka susugi cake ena dua na vuvale vinaka. Ni keitou veitosoyaki tiko ena vanua oqo ena vuku ni veicakacaka e so, au vakavinavinaka niu veimaliwai tiko kei ira e so na tamata vinaka. O ira na tamata vinaka era dau vakauqeta na nomuni bula ka vukea na kena vakatorocaketaki na nomuni bula vakataki kemuni kei na nomu ni ivakarau ka vukei kemuni talega ena veimaliwai raraba ka bulataka na bula sa kilikili kei kemuni. Era vakavulici kemuni ena veika yaga, ka laveti kemuni ki na veitutu cecere. O koya gona au vakavinavinakataka vua na Tamaqu Vakalomalagi na noqu kalougata. Au vakadinadinataki Koya, niu kila ni sa Tamada ko Koya kei Jisu ni sa Karisito, na Luve ni Kalou Bula, na Dauveibuli, na iVakabula ni kawatamata. Au marautaka na itavi cecere e sa mai vakayacora e na Buli kei na tauyavutaki ni kosipeli e vuravura kei na kena rawa vua na kawatamata, kevaka era vakarorogo, me ra rogoca ka kila, ka me nodra na veivakalougatataki mai lomalagi kevaka era ciqomi ira ka bulataka na bula ka yaco kina me tiki uasivi ni nodra bula na kosipeli.

Au vakamuduo vei ira na tubuqu era a lewena mai na Lotu ena veigauna sa oti, ka ra toki mai na iwasewase e cake kei Niu Ioka me ra sota kei ira na Yalododonu e Nauvoo ka vakaitavi ena Valetabu e Nauvoo kei na ilakolako yani ki na Ra. Au vakavinavinaka vakalevu ena veivakalougatataki kece oqori ena siga oqo, ni’u tukuna yani vei kemuni.

Au na via cavuti Peresitedi Gordon B. Hinckley. E dua na vosa vinaka e a tauca ena mataka ni kua—ka solia kina vei keda e dua na irairai raraba ni veiyabaki sa sivi ka vakauasivi ena veika e a yaco e Nauvoo kei na kena tara tale na valetabu vakaturaga o ya. Na veika kece sara e a vakayacori e kea sa ka ni veivakalougatataki ki vuravura ka vakakina ki na kawatamata.

Au vinakata me kila o Peresitedi Hinckley niu sarava toka mai vakavinaka na iyaloyalo me tekivu mai na gauna e kacivi kina me ikarua ni daunivakasala vei Peresitedi Spencer W. Kimball ka vakakina ena nona sa mai ciqoma na nona itavi ena Mataveiliutaki Taumada. Na nona tubu ka matua cake ka vakauqeti, ka dusimaki ena nona vakayacora na veicakacaka lelevu eda sa mai kena ivakadinadina tu oqo edaidai! E vuqa vei keda eda sa mai vakaitavi vakalalai ena raivotu e a raica mai o koya me baleta na tubu ni Lotu, ena dua na gauna lekaleka oqo, ka okati kina na kena a tara na veivaletabu, ka ni sa 114 era sa vakayagataki tiko ena gauna oqo. Na veika kece oqori era vua ni veidusimaki veivakauqeti nei Peresitedi Gordon B. Hinckley. Me vakalougatataki koya na Turaga ena veika kece sa mai vakayacora me vukea kina na Lotu me tete na kena cakacaka ki na vuravura raraba. Eda vakavinavinaka vakalevu ena veika sa vakayacora, ena itutu sa mai tu kina na Lotu edaidai, ka vakakina ena maqosa ni nona veiliutaki.

Me vaka e volai tu ena ivola nei Luke, ena dua na siga e a curu yani kina na iVakabula ki na dua na koro ka ra tiko kina e 10 na vukavuka. Eda na sega beka ni kila vakavinaka sara o keda se cava na vukavuka ka ni da se qai sucu wale toka ga ena gauna oqo. Na vukavuka e dua na mate vakarerevaki ena gauna e liu. Eratou a lako mai kivua na iVakabula na lewe 10 na vukavuka oqo ka kaya vua, “i Jisu na Turaga, ni lomani keitou mai.” Sa qai kaya ko Koya vei iratou na 10 na vukavuka, “Dou lako ka vakaraitaki kemudou vei ira na bete, ka na qaravi kemudou ko koya”—eratou a vakayacora vakakina. Eratou a lako yani me ratou laki raici ira na nodratou bete, ka ratou sa vakasavasavataki, o iratou kece sara na lewe 10. Ena dua na gauna lekaleka e muri, e a qai lesu tale mai vua na iVakabula e dua walega vei iratou ka mai tekiduru e duruna kei na ligana ka cuva vakatoboicu ena vakavinavinaka vua na Turaga ena nona a vakalougatataki koya ka vakabulai koya mai na mate vakarerevaki ko ya. Sa qai tukuna na iVakabula vua na tamata e dua ko ya: “Era sega li ni lewe tini sa vakasavasavataki? Ia sa evei tale na lewe ciwa?” (Raica Luke 17:11–19.)

Niu wilika vakavica na italanoa ko ya, sa vakauqeti au sara vakalevu. O ni na vinakata beka mo ni wili vata kei iratou na “lewe ciwa?” Ena vakaevei beka o ya—me da okati vata kei ira era a sega ni lesu tale mai me ra mai vakavinavinakataka vua na iVakabula na Nona vakalougatataki ira? E duabau ga e a lesu tale mai.

E rawarawa sara ena bula oqo me da dau ciqoma na veivakalougatataki, sa dua na ka na kena levu ka voleka ni sega ni wili rawa, ka me yaco na veika ka rawa ni veisautaka na noda bula, vakavinakataka cake na noda bula, ka kauta mai na Yalotabu ki na noda bula. Ia ena so na gauna eda sa dau taura tu ga vakamamada na veika oqo. Sa dodonu me da dau vakavinavinakataka na veivakalougatataki e kauta mai ki na noda bula na kosipeli i Jisu Karisito. Au vinakata mo ni kila ni kevaka me da na vakaraitaka vakavinaka na noda vakavinavinaka vua na Tamada Vakalomalagi, sa dodonu me da na vakayacora vakakina ena yaloda taucoko, noda kaukauwa taucoko, kei na noda nanuma kecega—baleta ni o Koya e solia vei keda na bula kei na icegu. E solia vei keda na gauna me da bula ena kena ivakarau oqo, me da taura na kosipeli, me tu na nodra ivakaraitaki na tamata vinaka vakataki Peresitedi Hinckley ka ni liutaka tiko na Lotu e vuravura raraba kei na veigauna vivinaka vei ira na itabagone me ra na dau cibitaki koya ka vakavinavinaka tiko ni sa dua na nodra iliuliu e vakaraitaki tu ena nona itovo na veika ena rawa ni kauta mai na Yalo i Karisito ki vei keda. Ka sa vakalevutaki, ka vakatorocaketaki, ka vakatetei na vakavinavinaka oqori, e rawa ni vakalougatataka na yaloda kei na noda vakanananu ki na veivanua eda na gadreva me da tomana yani kina na noda cakava na veika eda kerei kina.

E vuqa sara na lewe ni neirau matavuvale era sa dui tu yani ena 20 na vanua duidui e so e Amerika kei Igiladi. Au sa vakatura vei ira kevaka ena rawa me ra tokoni ira na Vakaitutu Raraba—vakabibi vei Peresitedi Hinckley kei rau na nona daunivakasala—kevaka mada ga me ra tucake e yasa ni retio se vanua cava ga, ia me ra na laveta na ligadra ena vakanuinui ka kaya e lomadra, “Au sa veitokoni tiko vei ira na iliuliu ni Lotu.” Au raitayaloyalotaka toka ena gauna eda lave liga tiko kina nikua ni so na gone lalai—o ira era dau lomani koya ka cibitaki koya—ni ra na laveliga mai na veiyasai vuravura. Eda nuitaka ni da na vakavulica vei ira nikua ena Yalo ni Turaga na gagadre me ra vuli, me ra kilaka, me ra bula ka me ra tiki ni kosipeli i Jisu Karisito. Eda nuitaka ni ra na taleitaka na veigauna vivinaka me ra na vakatorocaketaka kina na nodra itovo ka me rawa vei ira me ra na dolele yani ka veivuke ena kena veisautaki ka laveti na yalodra e so tale na tamata.

E bula tiko na Kalou. O Koya na Tamada. Au vakadinadinataka vei kemuni ni o Jisu na Karisito, na Luve ni Kalou bula, kei Josefa Simici e parofita ni Veivakalesui Mai. E noda iliuliu dauveivakauqeti ena Lotu oqo e vuravura raraba edaidai o Peresitedi Hinckley. Me vakalougatataki koya na Turaga ena veika kece e cakava kei na veivakauqeti kei na ivakatakila kei na raivotu ena nona liutaka tiko na kena tosoi ki liu na cakacaka. Au sa laiva vei kemuni na ivakadinadina oqo ena yaca i Jisu Karisito, emeni.