Ia Ke Sega
Na veivakatovolei levu ga ni bula oqo o ya, me da sotava na taro “a cava na vuna” ka laiva me lako, ka da vakanuinui tikoga ki na nona yalayala na Turaga “raica ena yaco na ka kecega ena kena gauna.”
Eso na veigauna taleitaki vei au o ya na qaravi ni ilesilesi ena vei mua ni macawa ena koniferedi ni vei iteki niu dau tomani koya yani e dua na peresitedi ni iteki ena veisiko vei ira na lewe ni nona iteki era sotava tu na dredre ni bula ena yaloqaqa kei na vakabauta, vakabibi o ira era vakayalia e dua na luvedra se o ira era sotava na dredre ni qaravi tauvimate se dua na luvedra lokiloki. Au rawa ni kila mai na veika e sotavi na mosi ni yalo ni sega tale ni dua na veivakatovolei e dredre cake mai na nona vakaleqai e dua na isolisoli. E sega talega ni dua na gauna ni veivakatovolei dredre duadua me dede sara me vaka na oca ni veiqaravi vua e dua na gone lokiloki. Oi kemuni kece na itubutubu vakaoqo o ni rawa ni ciqoma me vakataki koya na tama ni gone ka curuma e dua na “yalo galu,” o koya ka vakasalataki mai vua na iVakabula me vakabauta, a sauma ena yaloraramusumusu, “Turaga, au sa vakabauta; vukea na noqu tawa-vakabauta” (raica Marika 9:17, 23–24).
Sa vakakina nikua, au gadreva meu na vosa vei kemuni kece na sotava tiko na dredre ena vakatovolei ni nomuni vakabauta ena bula vakayago oqo—vakabibi vei ira na itubutubu era rarawa voli, era bikai ena icolacola ka ra taroga tiko, “a cava na vuna?”.
Na imatai, yalovinaka mo kila tiko ni yalorarawa e vua ni loloma. E sega ni rawa nida lomana wale tu ga e dua na tamata ka sega ni yalorarawa ni leqa se ni sa mate. Na sala walega ena rawa me levei kina na yalorarawa sa ikoya me da kua ni bulataka na loloma; ka sai koya na loloma e solia mai na titobu kei na taucoko ni ibalebale ni noda bula. Ia na cava erau namaka na itubutubu yalorarawa me rau rawata mai vua na Turaga, me isau ni nodrau gugumatua ena cabomasu, e sega walega ni gadrevi me kau tani na yalorarawa ia ena solia e dua na yalovakacegu kamikamica, se dredre cava ga e sotavi tiko, e sa na karoni tiko na luvedrau ena liga loloma ni veituberi ni Tamada Vakalomalagi.
Kena ikarua, mo kua vakadua ni lomalomaruataka na vinaka ni Kalou, veitalia mada ga ke o sega ni kila se “cava na vuna.” Ia oqo na taro levu era taroga o ira na yalorarawa tu kei ira na bikai tu ena icolacola: A cava na vuna? A cava na vuna e mate kina na luvequ yalewa ni keirau a masulaka vakagumatua me bula ka ni sa ciqoma oti talega na veivakalougatataki ni matabete? A cava na vuna keirau mai kalou ca kina ena leqa oqo ni ra sa marautaka tu e vuqa na caka mana era sotava ni ra a vakabulai o ira na nodra daulomani? Sa dau yaco ga mai na veitaro oqo, e sa kilai vinaka tu. Ia na veitaro oqo e sega ni dau saumi rawa ena bula vakayago oqo. E a tukuna na Turaga, “Sa cecere cake vakakina na noqu ivalavala mai na nomudou ivalavala, kei na noqu vakanananu mai na nomudou vakanananu” (Aisea 55:9). Me vaka “ni sa duavata ga na lomai Tamana kei na lomai Luvena” (Mosaia 15:7), me vakatalega kina oi keda.
Ia e sa dau vaka tu ga kina vei keda na tamata me da dau via kila se cava na vuna. Ni da dau tovolea vakagumatua me da kila na isau ni taro eda dau guilecava kina na vuna eda mai bula vakayago kina, na vu ni noda mai bula eke ena rawa ni tukuni ga vakalekaleka ni gauna eda na sega ni sauma rawa kina na noda veitaro kece. Na bula vakayago e duidui, ka rabailailai wale sara na kena inaki: E vanua ni veivakarautaki kei na tubu, e vanua ni veivakatovolei, na gauna me da lako kina ena vakabauta, na gauna meda mai vakavakarau kina meda sota vata kei na Kalou. (raica, me ivakaraitaki, Eparaama 3:24–25; 2 Nifai 31:15–16, 20; Alama 12:24; 42:4–13). Sai koya na susugi ni yalomalumalumu (raica Alama 32:6–21) kei na talairawarawa (raica Mosaia 3:19) ena rawa kina vei keda meda kila na titobu ni veika ena sotavi ena bula vakayago meda vakarautaki keda kina vakayago ka vakayalo meda ciqoma na veivakauqeti ni Yalo Tabu. Sa vakakina na yalomalumalumu kei na talairawarawa e sa ivakaraitaki ni noda lomasoli me da laiva na taro “a cava na vuna” me kua ni se saumi mada ena gauna oqo, de rairai vinaka cake me da taroga, “a cava me kua kina?” Mai na noda vosota me yacova na ivakataotioti (raica 2 Nifai 31:15–16; Alama 32:15; V&V 121:8) eda na rawata kina na inaki ni bula oqo. Au vakabauta ni veivakatovolei levu ga ni bula oqo oya me da sotava na taro “a cava na vuna” ka laiva me lako, ka da vakanuinui tikoga ki na nona yalayala na Turaga “raica ena yaco na ka kecega ena kena gauna” (V&V 64:32).
Ia na Turaga ena sega ni laivi keda meda veilecayaki tu se me sega na isau ni taro. Me vaka na nodra vakabulai na tauvimate, a tukuna kina vakamatata o Koya: “Ia ko koya sa vakabauta niu na vakabulai koya, ka sa sega ni lewai me mate, ena bula ga” (V&V 42:48, tomani kena vakabibitaki). Vakawasoma eda dau guilecava na veika e lavaki, “ka sa sega ni lewai me mate” (“se,” e rawa nida kuria, “me tauvimate se lokiloki”). Yalovinaka kua ni yalolailai ke sa cabori na masu ena yalodina ka sa vakayacori na veivakalougatataki ni matabete ka sega ni dua na veisau vua nomu daulomani se mani mate sara. Mo yalovakacegu ni o sa kila ko sa vakayacora na veika e dodonu mo cakava. Na vakabauta vakaoqo, na lolo kei na veivakalougatataki ena sega ni rawa ni tale wale! E dina ni a sega ni bula mai na luvemu mai na veika kece sa vakayacori ena vukuna, e dodonu ga me ra yalovakacegu ka yalodei tiko o ira kece era lomani koya.! Na Turaga—o koya ka vakauqeta na veivakalougatataki kece ka rogoca na cabomasu—e sa kacivi koya ki na nona itikotiko. Na veika kece eda sota kaya ena masu, ena lolo kei na vakabauta ena vinaka cake beka vakalevu ga vei keda ka vakalailai vei koya.
Eda na torova yani vakacava na iTikotiko Vakaturaga nida vakatakekere vakagumatua ena vukuna noda daulomani ka vakotora na ligada e uluna ka vakalougatataki koya ena kaukauwa ni matabete? Eda na cakacakataka rawa vakavinaka vakaevei na noda vakabauta? E a vakamacalataka na Parofita o Josefa Simici na imatai ni ivakavuvuli ni kosipeli na “vakabauta na Turaga ko Jisu Karisito” (iKava ni Yavu ni Vakabauta, tomani kena vakabibitaki). Sa ikoya na ivakamacala ni veivosa oqo- “ni Turaga o Jisu Karisito- o koya eda dau guilecava ena so na gauna. Vakawasoma, eda cabora noda masu se vakayacora na noda veiqaravi ka da mai wawa tu yani ena yalo nanamaki meda raica se na vakayacori beka noda kerekere se sega, me vaka ni ivakadinadina ni bula tiko na Kalou na kena yaco noda kerekere. Oya e sega ni vakabauta! Na vakabauta sai koya na noda vakanuinui vua na Turaga. Ena vosa i Momani, “o ira era sa tudei ena nodra vakabauta ka ra sa ivalavala dodonu tikoga” (Moro. 7:30; vakuri na kena vakabibitaki). O iratou na lewe tolu na turaganilewa ni Iperiu eratou a vakabuta ni na vakabulai ratou na Turaga mai na bukawaqa, “ia ke sega”, eratou sa tukuna vua na tui, “keitou sa bese ni qarava na nomuni kalou” (Taniela 3:18). Sa qai yaco, ni sa lewe va ka sega ni tolu na tamata eratou sa laurai ena loma ni bukawaqa, ia na “kena ikava sa vaka na Luve ni Kalou” (Taniela 3:25).
Sa vakakina vei keda. E dau matau tu ena bula oqo meda tukuna, “me’u raica sara au na qai vakabauta.” Se cava na ibalebale ni ivakavuvuli oqo ena veika e yaco tu e vuravura, eda sega tu ni dau okata ena veika vakayalo, ni da dau gole yani vua na Turaga ena veigauna dredre ni noda vakatovolei. E matata vinaka sara na sala ni Turaga ena dua tani tale na ivakavuvuli, na “vakabauta na raica.” Na vakabauta na Turaga e kena yavu, e sega ni kena itinitini. Eda kila ni bula tiko o Koya; O koya gona, eda vakabauti Koya me na vakalougatataki keda me vaka na nona vuku kei na lomana vakalou. Na noda vakabauta na Turaga me vaka na gonelailai e kilai ena ivolanikalou ni sa vaka na “cabori ni isoro” ni “yalo bibivoro kei na yalo raramusumusu” (V&V 59:8).
Au sa solia yani oqo me vaka na ivakadinadina ka rawati ena vakatovolei kaukauwa ni vakabauta ena bula oqo. E a sucu na ikarua ni luevi keirau tagane, o Atama, niu a tu tani tu yani mai na loga ni veiraisi mai Vietnam. E se tu ga oqo vei au na telekaramu marautaki ka tukuni yani kina na nona sucu. E yaloka ni mata karakarawa o Atama, ka gonetagane ulu damu lailai ka vaka me dau qito vakalevu. Ni sa yabaki lima, sa nanamaki tu o Atama me tekivu vuli. E a qai tara na vei itikotiko ena Ceva kei Kalifonia, e dua na matetaka vei ira na gonelalai, ka mani tauvimate kina ko Atama. Dina ni keirau a kauwai vakalevu, ia keirau sega ga ni yalolailai. E sega ni vaka me bibi sara na kena mate. Vakasauri ena dua na mataka sa sega ni qai duri rawa mai na nona idavodavo; e sa lecai yalona tu. Keirau a cicivaki koya ki valenibula, ka laki biu sara ena vanua ni veiqaravi bibi. Era a qaravi koya sara e dua na matailawalawa vuniwai kei na nasi dauveiqaravi. Keirau a sega ni cegu kei tinana ena veisau yadra ena rumu ni vakacegu voleka ga e kea.
Au a qiri sara vua neitou peresitedi ni iteki, ka keirau se veitokani mai ni keirau se gone, ka sa mai noqu itokani dredre oqo ena Vitusagavulu, ko Elder Douglas L. Callister, kau taroga de rawa ni lako mada mai ki valenibula me keirau mai solia vei Atama na veivakalougatataki ni matabete. Ena vica ga na miniti sa yaco yani. Ni keirau sa curu yani ena rumu lailai ka davo galugalu koto kina ko Atama, e wavokita nona idavodavo na veimisini ni valenibula, era sa toso mai vakalailai ki muri ka mai roqoliga tu yani o ira na vuniwai kei na nasi. Ena gauna sa cavuti kina ena vakabauta kei na yalo ni vakatakekere na vosa ni veivakalougatataki ni matabete, e a sobuti au e dua na vakacegu titobu ni Dua tale e sa tiko e kea. Au a namaka ena yalomarau ni kevaka meu na dolava na mataqu au na raica dina na iVakabula ni tucake tu e kea! E sega ni ko au duadua ga vei keimami na tiko ena rumu, au a vakila na Yalo oya. Keitou a qai kila ni oti tale e vica na vula ni dua vei ira na nasi e a tiko e kea ena siga oya a tarai koya vakalevu na veika e yaco ka mani vakasaqarai rau na daukaulotu ka yaco me papitaisotaki sara.
Ia mai na veika kece a vakayacori, a sega ni qai toso cake na bula nei Atama. E sega ni veisau vakalevu na nona bula me vica vata na siga ka keirau a cikevaka tikoga vua na Turaga me vakalesui koya mai kivei keirau. Kena itinitini ena dua na mataka, ni keirau a sega ni moce vinaka mai ena bogi, au a lako duadua sobu yani ena varada ni valenibula ni se lala tu. Au a vosa vua na Turaga ka tukuna vua ni keirau vinakata vakalevu me lesu mai na luvei keirau tagane lailai, ia na ka dina keirau a vinakata me na yaco ga na lomana, ka keirau—na ciqoma—o au kei Pat. Vakalailai ga sa takosova yani ko Atama na katuba ki na bula tawamudu.
Vakaidina, keirau se rarawataka tu ga oqo na neirau gonetagane lailai, e dina ni ra sa mai vakamalumutaka na neirau rarawa o ira na Yalo dauveiqaravi kei na kena sa balavu mai na gauna. Na kena itaba e se toka ga oqo ena yasa ni irara ena neitou rumu ni gade ena maliwa ni kedra itaba na luvei keirau kei na makubui keirau. Ia keirau kila tu kei Pat ni nona mai bula vakayago eke e sa nakita oti mai na Tamada Vakalomalagi dauloloma me na lekaleka ka rawarawa mai vei keda ka ni sa lako sara yani me na laki veitavaki mai ena yalomarau ni da na curuma talega yani na katuba vata oya.
Kosova na wai niu talai iko tu,
O sega ni luvu uciwai ni ca,
Au na tauri iko mo kalougata, …
Mo vakatabui ni bibi na ca.
Katakata mai na nomu salatu,
Vakaruru ena noqu loloma ga.
O na sega ni kama niu sa lewa …
Nomu ca me rusa mo koula talei …
Na yalo e ravi tudei vei Jisu
Sega ni na lutu se dro ki na ca;
Mai eli ke sagai yavalati mai …
Au na sega sara ni biuti koya!
(Serenilotu, naba 6).
Ena yaca i Jisu Karisito, emeni.