Na iTaba Daukaulotu Qaqa Duadua

Elder M. Russell Ballard

Mai na Kuoramu ni Apositolo Le Tinikarua

Keimami sa sureti kemuni na taci keimami mai na Matabete i Eroni, mo ni lako yani ka bulataka na kosipeli, ka mo ni rawa ni vakavakarau vakavinaka mo ni qarava na Turaga.

Ena dua na italanoa titobu ka yaga vakalevu sara mai na iVola i Momani, era a veiyalayalati kina na tamata mai Amoni ni ra na sega tale ni tauri yaragi me ra vakadave dra kina. Ia “ni ra sa raica na levu ni leqa, na rarawa kei na nodra oca … na Nifai ena vukudra, era sa lomani ira sara ka vinakata me ra sa vakaiyaragi tale ka valataka na nodra vanua” (Alama 53:13). Eratou sa qai vakamasuti ira ko Ilamani kei iratou na tacina me ra doka na nodra veiyalayalati vata kei na Turaga.

E sega ni tukuna vei keda na itukutuku ena ivolanikalou se o cei e a tukuna mai e liu ni ra a sega ni cakava o ira na luvedra na veiyalayalati era a vakayacora o ira na nodra qase. Au nanuma ni o ya na vakasama ni dua vei ira na cauravou ka nanuma kina ni na rawa vei koya kei ira nona icaba me ra “taura tale nodra iyaragi, ka [vakatokai] ira tale me ra Nifaiti.

“Era sa ia na veiyalayalati me ra valataka na nodra bula galala na Nifaiti, ka solia na nodra bula me ra taqomaka na nodra vanua” (Alama 53:16–17).

Oqo e dua na itavi dredre sara vei ira na lewe 2,000 na cauravou, ia era sa cauravou qaqa dina. Me vaka na kena itukutuku ena ivolanikalou: “Ia era sa cauravou bulabula kece ka yaloqaqa; io era sa icegu bula ka kaukauwa vinaka tu; me kena ikuri—era sa vakayacora ena yalodina na veika kece sa nuitaki vei ira.

“Raica era sa tamata dina sara ka yalomatua; era sa vakavulici me ra muria tikoga na vunau ni Kalou ka caka dodonu e matana” (Alama 53:20-21).

Na vo ni italanoa e tukuna vei keda na nodra yaloqaqa na itabagone oqo me ra vala kei ira na mataivalu ni Leimani era sa qaseta na ivalu. Me vaka na ka e a tukuna na nodra iliuliu, ko Ilamani, “ni ra … a vala tiko ena kaukauwa ni Kalou; … io era sa rerevaka sara talega na Leimani na kaukauwa ni nodra ravuravu yani, ka ra sa mani soro kina ka soli ira ga me ra kaivesu” (Alama 56:56).

Vakasamataka mada o ya! O ira na itabagone oqo era sega ni kila tu na vala, era sa vakarau tu vakayago ka vakayalo, ka ra kaukauwa sara, ni ra sa vakarerei ira na meca me ra soli ira mai kina! E dina ni ra mavoa kece sara o ira na lewe 2,000 na cauravou itabagone ena gauna ni veiraravui, ia a sega ga ni bau dua e mate (raica Alama 57:25). Au cavuta tale na vosa nei Ilamani: “Ia keimami kila ni sa rawa ga oqo ena kaukauwa ni Kalou; sa dei sara na nodra vakabauti Koya me vaka na ka era vakavulici mai kina—io era sa kila sa Kalou yalododonu, ka ra bula ena nona kaukauwa ko ira kecega sa vakabauti Koya” (Alama 57:26).

Kemuni na taciqu, edaidai eda sa valu tiko ena dua na ivalu ka dredre sara, e sinai ena veika e vakarerevaki cake mai na nodrau ivalu na Nifaiti kei na Leimani. E qaseqase sara na keda meca ka levu na nona ilawaki. Eda veivala tiko kei Lusefa, na vu ni ka lasu kecega, na meca ni veika kece e vinaka, ka dodonu, ka rokovi. E dina ni da sa bula donuya tiko na gauna e a parofisaitaka mai o Paula, “ni ra na daulomani ira walega na tamata, era na dauvinakata na ilavo, era na daubole, era na viavialevu, era na dauvosa vakacaca, era na talaidredre kivei ira na nodra qase, era na sega ni yalosavasava,

“Era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na dau cati ira na tamata vinaka,

“… era na lomana vakalevu na marau a ra na lomani koya na Kalou vakalailai;

“Sa nodra ga na lotu vakarairai ka sega vei ira na kena dina: ia mo lako tani mai vei ira era sa vakaoqo” (2 Timoci 3:2–5).

E rogorogo matau beka oqo kemuni na taciqu? Vei au, na vosa nei Paula e tautauvata sara ga kei na veika eda sarava tiko ena retio yaloyalo ena veibogi kece sara.

Sa ikoya oqo na “veigauna dredre.” Eda valuta tiko na yalodra na tamata. E sega ni dau loloma se dau veivosoti na keda meca. E sa rui totolo sara na nona tauri ira tiko nona kaivesu tawamudu. E sega sara ni bau laurai vua me malumalumu.

Eda vakavinavinaka vakalevu vei ira e vuqa sara na lewe ni Lotu era vakayacora na veika cecere e so ena ivalu ni dina kei na dodonu, meu tukuna vakadodonu sara vei kemuni ni sega ga ni se rauta oqori. Eda se gadreva vakalevu tale na veivuke. Me vakataki ira na Amoni ni ra a rai vei ira na luvedra me ra veivakaukauwataki ena nodra valuti na Leimani, keimami sa rai talega yani vei kemuni na taci keimami lalai mai na Matabete i Eroni. Keimami gadrevi kemuni. Me vakataki ira na 2,000 na lewe ni mataivalu nei Ilamani, ko ni sa luvena tagane vakayalo talega na Kalou, ka na rawa talega ni vakacolati vei kemuni na kaukauwa mo ni tara cake ka taqomaka na Nona matanitu. Keimami gadrevi kemuni mo ni kilikili ka vakayacora na veiyalayalati tabu, me vakataki ira. Keimami gadrevi kemuni mo ni talairawarawa ena yalomuni taucoko, me vakataki ira.

Na ka eda gadreva ena gauna oqo sa ikoya e dua na itaba daukaulotu qaqa ena itukutuku kece ni veigauna ena Lotu. Eda gadrevi ira na daukaulotu bula kilikili, me ra vuli vinaka, ka kaukauwa vakayalo, me vakataki ira na 2,000 na mataivalu nei Ilamani “era sa cauravou bulabula kece ka yaloqaqa; io era sa icegu bula ka kaukauwa vinaka tu” ka ra sa “vakayacora ena yalodina na veika kece sa nuitaki vei ira” (Alama 53:20).

Ni rogoca na veivosa oqo kemuni na taciqu: Yaloqaqa. Yalodei. Kaukauwa. Mamakutu. Dina. Eda sega ni gadreva na cauravou yalo malumalumu, se soli koya ga vakatikina ki na inaki oqo. Keimami sega ni gadreva mo ni mai ivakarawa walega ni ka; keimami gadreva na yalomuni kei na lomamuni taucoko. Keimami gadreva na vakasama, me bulabula, na daukaulotu yalololoma me ra kila na dauvakarorogo ka sauma na vakasolokakana ni Yalo Tabu. Oqo e sega ni gauna ni yalo malumalumu. E sega ni rawa ni keimami talai iko yani ena dua na inaki mo na laki malumalumu tale, se mo qai laki veisau kina, se mo qai laki ciqoma kina nomu ivakadinadina. E sa sega ni kena gauna oqo na veika oqori. Keimami gadreva me sa tu vei iko na “vakabauta, na inuinui, na yalo vinaka kei na loloma, ia na ka kecega sa kitaka, sa vakacaucautaka kina na Kalou” (V&V 4:5).

Me vaka niu sa iApositolo nei Jisu Karisito, au sa kacivi iko mo tekivu sara ga oqo—ena bogi nikua—me taucoko sara vakaoti na nomu bula kilikili. Mo nakita rawa ka solia nomu bula vua na Kalou mai na gauna oqo ka lako yani mo na vakasavasavataka tiko na ligamu, yalomu kei na nomu vakasama ka me kua tale ni takavi duka mai na dua tale na itovo ni ivalavala ca. Nakita rawa mo levea na iyaloyalo vakasisila me vaka ga na nomu sasaga mo levea na veimate rerevaki e so, ni dua talega o koya na mate rerevaki. Nakita mo vakatabuya sara ga vakadua na tavako, na alakaolo, kei na veiwaigaga ka vakatabui vakalawa. Nakita rawa mo yalodina. Nakita mo lewe ni vanua vinaka ka muria na lawa ni vanua ko vakaitikotiko kina. Nakita rawa nikua ka lako yani mo na kua tale ni vakadukadukalitaka vakadua na yagomu se mo tauca e dua na vosa ca ka sega ni veiganiti vua e dua ka taura tu na matabete.

E sega ni se o koya ga oqori na veika e namaki vei kemuni na taci keimami lalai. Keimami namaka me sa tudei ka kaukauwa tu na nomuni ivakadinadina ena kosipeli I Jisu Karisito ka vakalesui mai. Keimami namaka vei kemuni mo ni cakacaka vakaukauwa. Keimami namaka mo ni vakayacora ka muria na veiyalayalati. Keimami namaka mo ni daukaulotu ka me salavata kei na nomuni ivalavala kei na neimami itukutuku lagilagi.

Oqo era ivakatagedegede cecere sara. Keimami kila na veika oqori, ia keimami na sega ni kere veivosoti yani ena vukudra. Era sa ivakaraitaki ni ivakatagedegede ni bula ni Turaga mo ni na ciqoma kina na Matabete vaka- Melekiseteki, mo ni curu ki na valetabu, mo ni laki veiqaravi vakadaukaulotu, ka mo ni na vakawati ka tama buladodonu. E sega ni dua na ka e vou vei ira, e sega ni dua na ka o ni se sega ni bau rogoca mai liu. Ia ena bogi nikua keimami sa sureti kemuni, na taci keimami lalai mai na Matabete i Eroni, mo ni lako yani, ka bulataka na kosipeli, ka mo ni na rawa ni vakavakarau vakavinaka mo ni qarava na Turaga.

E vuqa vei kemuni e sa vakayacora sara tiko ga na ka oqo, ka keimami sa vakavinavinakataki kemuni ena nomuni bula kilikili kei na gumatua. Vei kemuni o ni se sega ni kitaka oqo, mo ni sa tekivutaka sara ga yani ena bogi nikua ena nomuni vakavakarau. Kevaka o ni vakila ni o ni se malumalumu tiko ena dua na ka au sa tukuna oti mai, nakita rawa mo na vakayacora na veisau ena gadrevi vei iko—tekivu sara oqo. Kevaka o nanuma ni na gadrevi mo veitalanoa vata kei tamamu vakakina kei nomu bisopi me baleta e dua na ivalavala ca o a vakayacora, kua tale ni wawa; cakava sara ga oqo. Erau na vukei iko ena sala mo veisau kina ka na tuberi iko yani ki na vanua mo na laki tiko kina me vaka ni ko sa lewe ni itaba daukaulotu qaqa.

Yalovinaka sara mo ni na kila na veika oqo: e sa tosoi cake na veika e gadrevi vei ira na daukaulotu. Sa sivi yani na gauna me vakusakusataki ga na “veivutuni ka lako” yani ena kaulotu. O ni sa kila tiko na ka au tukuna tiko oqo, se vakaevei kemuni na taciqu lalai? E so na cauravou era dau vakacalai nodra vakasama ni ra nanuma ni rawa ni ra vakayacora tu ga na veika au cavuta toka mai cake ka qai veivutuni ga ni ra sa yabaki 18 veimama me rawa ni ra laki kaulotu ni ra sa yabaki 19. Io e dina ni rawa ni ko veivutuni mai na ivalavala ca, ia ena sega tiko ga ni rawa vei iko mo na laki kaulotu. Ena vinaka cake sara mo na vakasavasavataki iko tikoga ka gumatua ni vakayacora na veika lalai me vaka na:

Tara cake e dua na gauna talei ni masu vua na Tamada Vakalomalagi.
Rokova na Sigatabu ka vakatabuya.
Cakacaka ka maroroya tiko ena baqe e dua na tiki ni kemu isau.
Sauma taucoko vakadodonu na ikatini.
Yalana na gauna o vakayagataka ena qitotaki ni komupiuta ka vakayacora tale e so na itavi bulabula ka yaga cake vakalevu. Na levu ni ka o na rawa ni vakamatea ena qito komupiuta e sega sara ga ni dua na kena yaga ena nomu ivakatagedegede ni dua na daukaulotu vinaka.
Solia vakalevu vua na Turaga na nomu gauna ena nomu vulica na ivolanikalou ka rawata na kilaka ena itukutuku bibi ni Veivakalesui tale mai me tu vei keda me baleti vuravura.

Oi kemuni talega na tama, ko ni sa tiki bibi ni vakavakarau oqo. Keitou kila ni matavuvale e vanua ni veivakauqeti titobu duadua ena sasaga ni nodra vukei na cauravou me ra vakavakarau yani ki na Matabete vaka- Melekiseteki, vakarau ki na vakamau, vakarau me ra tama. Kevaka e kila na luvemu na ivakavuvuli matailalai ni ivakavuvuli me na rawa ni yaco me tama buladodonu, era sa na qai vakarau dina me ra na laki daukaulotu ena gauna taucoko. Ia na kena leqa, e vuqa sara na tama era taura tu ga vakamamada na itavi tawamudu oqo. Era nanuma ni o bisopi kei na semineri, na Wilivola ni Sigatabu, o ira na Qasenivuli ni Cauravou kei ira na iliuliu era toka ena dua na ivakatagedegede vinaka me ra veivakauqeti vei ira na luvedra tagane. E sega ni vaka o ya na kena dina. E dina ni ra na yaga vakabibi sara o ira na iliuliu vakalotu ena nodra vakavakarautaka me ra kaulotu o ira na luvemuni gonetagane, na Lotu ena vaka tu ga me ivurevure vei iko. E sega ni na sosomitaka na veivakauqeti ni nomu veivakavulici, veituberi, ka veivakadodonutaki.

Ena vakakina kevaka eda sa “toroya cake na ivakatagedegede” vei ira na luvemuni me ra lako ena kaulotu, e kena ibalebale ni sa “tosoicake talega na ivakatagedegede” ena vukumu. Kevaka eda namaka mai vei ira e vuqa na ka, e kena ibalebale me na namaki talega e vuqa na ka mai vei iko se mai vei watimu. Nanumi ira na 2,000 na lewe ni mataivalu nei Ilamani era talai rawarawa baleta ni “ra sa vakavulici me ra muria tikoga na vunau ni Kalou ka caka dodonu e matana” (Alama 53:21) ia na ivakavuvuli o ya e vu sara ga mai na nodra loma ni vale.

E so na tama era nanuma ni sega ni tu vei ira na dodonu me ra tarogi ira kina na luvedra ena nodra bulakilikili. Era nanuma tiko ni o ya na itavi duadua ga ni bisopi. Kemuni na tama e sega walega ni tu vei kemuni na dodonu mo ni kila na bula kilikili ni luvemuni, e nomuni itavi sara ga. E nomuni itavi sara ga mo ni kila na cava e cakava tiko na luvemuni me salavata kei na nona vinaka ka tubucake vakayalo. Ena gadrevi mo ni vakamuria vinaka na nodra kauwai kece era wasea vei kemuni. Taroga vei ira eso na taro bibi me baleta nodra bula kilikili, ka mo ni kua ni ciqoma kevaka e levea na isau dodonu ni taro.

E vakavuqa nona dau vakasalataki ira na itabagone o bisopi me ra dau tukuna na leqa era dau sotava vei ira nodra itubutubu. Na ivakasala oqori e dodonu me sa veisau, me ra vakasala na itubutubu vei ira na luvedra me ra laki raici bisopi ena leqa era sotava tiko. E dodonu me ra kauwai sara vakalevu na itubutubu ena veika e tara na nodra bula na luvedra ka me ra na kila e liu na leqa ni bera ni kila o bisopi. E dodonu me ra veivakasalataki tiko vei ira na luvedra ka salavata kei ira vua na bisopi kevaka ena gadrevi me ra na veivutuni dina sara kina. Me vaka ni sa vakalou na nodra lesi me ra turaga ni lewa e Isireli, erau na dikeva na bisopi kei na peresitedi ni iteki na nona bula kilikili ka walia na kauwai e so ena vuku ni Lotu, ia, o kemuni na tama, sa tu na nomuni itavi tawamudu me baleta na nodra tiko vinaka vakayalo na luvemuni. Yalovinaka vakayacora sara ga oqo na nomuni itavi vakadaunivakasala, ka iliuliu ni matabete, mo ni vakavakarautaka na luvemuni tagane me na taura na Matabete vaka-Melikiseteki ka laki veiqaravi vaka daukaulotu.

Ia me dua mada noqu vosa vei kemuni na bisopi. Au kila ni vuqa sara na cauravou e sega ni ra tiko vata kei na dua na tama buladodonu ena nodra matavuvale. Ke vakaoqo, vakayagataka na ivurevure ni Lotu ka raica ni sa tuberi tiko o koya na Matabete i Eroni oqori mai vei ira na Matabete i Melikiseteki era na rawa ni vakavakarautaki koya ki na nodra itavi bibi. Ia vei kemuni na bisopi kei na peresitedi ni iteki sa tu vei kemuni na itavi mo ni vakaturi ira walega mai na cauravou kei na goneyalewa, o ira ko ni sa kila ni ra sa vakarau tu vakayalo, vakayago, kei na nodra vakasama me ra sotava na dredre ni cakacaka ni kaulotu edaidai. Kemuni na taciqu, ni vakatulewa vakavinaka ka nanuma: ni sega ni o ira kece na cauravou era na gadrevi me ra na laki veiqaravi tani yani mai na nodra itikotiko; e so era na veiqaravi sara vakavinaka ena ruku ni nomuni veiliutaki me ra daukaulotu ni tabanalevu.

Au via cavuta e vica na vosa vei kemuni o ni sa daukaulotu tudei tiko ena gauna oqo. Keimami vakavinavinakataki kemuni ena nomuni lomasoli mo ni veiqaravi. E dua na gauna vinaka vei kemuni na bogi nikua mo ni dikeva sara vakavinaka na nomuni ivakarau mo ni kila kina se o ni sa bulataka dina tiko na vei ivakatagedegede oqo; ia kevaka e sega, ni o ni vakayacora na veisau-na peresitedi ni kaulotu ena veivuke ena kena vakayacori na veisau ka mo ni yaga, ka dauveiqaravi uasivi ni Turaga o Jisu Karisito.

Kena itinitini, vei kemuni na sa kaulotu oti, ni yalovinaka mo ni nanuma tiko ni o ni vakagalalataki ga mai na nomuni veiqaravi ena kaulotu ka sega ni ko ni vagalalataki mai na Lotu. Ko ni a taura e rua na yabaki mo ni mata ni Gone Turaga ko Jisu Karisito. Keimami namaka na kemuni irairai kei na nomuni ivalavala me na vaka e dua na Nona tisaipeli. Mo vaka na irairai ni tisaipeli. Mo ivalavala vaka tisaipeli. Kua ni muria na ivalavala kei na iwalewale vakavuravura. Ko ni uasivi cake sara mai na veika vakaoqori. Kevaka ko ni sa malumalumu, ia mo ni cakava na ka e gadrevi, mo ni vakadeitaka tale na nomuni bula vakayalo. Na lawa me baleta na bula marau kei na rawa ka ni oti na kaulotu e tautauvata ga kei na kena mai na buturara ni kaulotu; masu vakaukauwa, cakacaka vakaukauwa, ka talairawarawa. Gumatua sara mo na kunea nomu itokani mo drau na marautaka vata na bula ka qarava vata na Turaga ka mo drau na susuga vata na itabatamata ka tarava.

Kemuni na taciqu, e matata vinaka sara na noqu vosa ena bogi nikua. Au sa nuitaka ni o ni na vakila na loloma kei na kauwai e lako mai vei iratou na Mataveiliutaki Taumada kei na Kuoramu ni Apositolo Le Tinikarua kei ira na iliuliu tale e so ni Lotu ena neimami kerei kemuni mo ni vakavakarau ena gauna oqo me da duavata ena ciqomi ni veivakalougatataki ni kena vakalesui tale mai na kosipeli vei ira kecega na tamata e vuravura. O ni sa iyau talei vakayadua, ka keimami vinakata mo ni qaqa ka taqomaki ena ivalu vakayalo oqo ena vukudra na luvena na Tamada Vakalomalagi. Me vakalougatataki kemuni na Kalou “mo ni vakayacora ena yalodina na veika kece,” (Alama 53:20) ka me tu na raivotu mo ni kilai kemuni kei na ka e gadreva na Turaga mo ni vakayacora, au masuta ena yaca i Jisu Karisito, emeni.