Vei Ira na Tagane Ena Matabete

Peresitedi Gordon B. Hinckley

O kemuni na turaga o ni tokara tu na matabete vakamareqeti oqo, vesuka sara ki yalomu. Mo kilikili kaya tiko ena veigauna kecega kei na veivanua kecega.

Kemuni na taciqu lomani, au vosa yani oqo baleta niu vinakata meu veivuke. Au masuta na Yalo ni Turaga me tuberi au.

E sega tale ni dodonu meu tukuna vei kemuni ni da sa yaco me dua na Lotu vakaitamera ka levu na tikina duidui. E vakaiyanaqa na noda parokaramu ka raraba na vanua eda tara yani. Na noda lotu era sega ni saumi o ira na kena iliuliu. Sa dua na ka uasivi ka talei na veika oqori. Sa dodonu me na vaka tu ga kina. Me kakua sara ni yaco mai na gauna me na saumi na kena cakacaka. Ia eda kila ni sa rui bibi sara na icolacola vakaveiliutaki vei ira na noda bisopi kei na presitedi ni iteki ka vakakina vei ira tale e so. Ena vuku ni ka oqori era sa bose ka tiko kina na Mataveiliutaki kei na Tinikarua, e so na bose oqori era babalavu ka taleitaki, kemami seresereka kina na lotu ka qai biuta vata tale. E neimami inaki me keimami raica kevaka e sa rawa ni kau tani eso na parokaramu. Ia ni keimami dikeva matua, e sega soti ni levu na ka keimami raica ni rawa ni vakalutumi. Ni vakalutumi e dua sa tautauvata ni o sa solia tiko yani e dua na luvemu. Ena sega ni rawa ni o vakayacora vakakina. Ia au gadreva me’u vakadeitaka ni keimami sa kila tiko na icolacola o ni colata tu kei na gauna o ni vakayagataka tiko. Ena soqoni ni matabete oqo au gadreva meu vakaraitaka mada e vica na ka keimami sa veivosakitaka. Au vakabauta ni o ni na raica ni da sa toso tiko, e dina ni na rairai lailai.

Au na vosa vei kemuni me baleta na veika duidui e so.

Keimami sa lewa ni tekivu mai na 1 ni Noveba sa na vakayagataki tiko na ivolatara ni valetabu me rua na yabaki ka sega ni dua. Sa dodonu me na vakalailaitaka oqori na gauna era dau vakayagataka na bisopi kei na peresitedi ni iteki kei ira na nodra daunivakasala ena veivakatarogi ni ivolatara ni valetabu. Io kevaka ena yaco ena dua na gauna ena sega ni kilikili kina me lako ki na valetabu e dua sa tu na nona ivolatara ni valetabu, sa na nona itavi na bisopi se peresitedi ni iteki me taura tani mai vua na nona ivolatara.

Ia na veika eda sa sotava tiko mai sa vakadinadinataki kina ni se qai vica wale sara na veika vakaoqori sa yaco. O koya gona sa na vaqo kina na kena parokaramu. Me tekivu ena imatai ni Noveba, veitalia na tikinisiga e volai ena ivolatara, sa na vakabalavutaki ena dua na yabaki na kena gauna. Sa na qai dau vakavoui na ivolatara ena veiyarua na yabaki mai na dua na yabaki ena gauna oqo. Keimami nuitaka ni na vinaka vei keda oqo. Keimami nuidei ni na vakakina.

E dua tale na ka.

Sa vosa vei kemuni o Elder Ballard me baleti ira na kaulotu. Au gadreva meu duavata ena veika sa vakaraitaka. Au nuitaka ni ra na sotava na noda cauravou kei na goneyalewa, na bolebole sa bolei ira kina. Sa dodonu me da toroya cake na ivakatagedegede ni nodra bula kilikili kei na veika tale eso e gadrevi me baleti ira era na gole yani ki na veiyasai vuravura me ra matataka na Turaga o Jisu Karisito.

Sa tiko ena gauna oqo e dua na itovo tudei vakalotu. Sa dau vakayacori vei ira na daukaulotu tudei na veitalatala. Ena so na tabanalevu sa vakatubu leqa tiko kina na veika oqo. E levu na soqoni ni sakaramede sa vagolei tiko ki na veitalatala kei na veikidavaki vei ira na daukaulotu era vakarau lako yani kei ira era sa lesu mai.

E sega tale ni dua ena Lotu e talaci ni goleva e dua na itavi vakaveiqaravi. E sega ni tiko e dua na noda mataqali lotu ni veitalatala me baleta e dua na bisopi kacivi vou, dua na peresitedi ni iteki vou, me baleta e dua na Peresitedi ni iSoqosoqo ni Veivukei, me baleta e dua na Vakaitutu Raraba, se dua tale au rawa ni vakasamataka. A cava me da qai vakayacora kina na veitalatala vei ira na daukaulotu.

Eratou sa vakatulewa kina na Mataveiliutaki Taumada kei na Le Tinikarua, ni oti na nodratou vakasamataka vakabalavu ena masumasu, me sa na vakavoutaki na ivakarau ni veitalatala vei ira na daukaulotu.

Me na soli vua na daukaulotu sa vakarau gole e 15 se 20 na miniti me vosa kina ena soqoni ni sakaramede. Ia era na sega ni sureti me ra vosa o ira na nona itubutubu kei na wekana. E rawa ni rua se sivia na daukaulotu ena dua na soqoni. Ena koto ga e ligana na bisopi na lewa ni soqoni ka na sega ni vakaitavi ena kena tuvai na vuvale. Ena sega ni dua na lagasere vakailawalawa se dua tale na ka vaka o ya.

Keimami kila ni na rarawataki sara vakalevu mai vei ira na matavuvale eso, na veika oqo. Era sa dau vakaitavi ena veigauna e liu na tama kei na tina, tacidra kei na ganedra, kei ira na itokani. Keimami kerea mo ni ciqoma na lewa oqo. Ena veivanua sa vakarautaki oti tu kina e dua na veitalatala vaqo, me sa na caka mada ga. Ia me kakua ni na tuvai tale ena veigauna mai muri na veitalatala vakavanua vaqo. Keimami sa vakadeitaka ena gauna sa vakasamataki kina na veiyasana kece sara, oqo na vakatulewa matau duadua. Ni yalovinaka ni ciqoma kemuni na taciqu lomani. Au vagolea talega na kerekere oqo vei ira na marama, vakabibi vei ira na tina.

Keimami nuitaka talega ni kena dau vakayacori na vale dola raraba ni oti na soqoni ni sakaramede ka a vosa kina na daukaulotu, me sa na kua talega. Era na gadreva beka na lewe ni vuvale me ra soqoni vata. Keimami sega ni kauwaitaka oqo. Ia, keimami kerea ga me kua ni vakayacori e dua na soqo ka ra sureti kina e lewe levu.

Sa dua na gauna talei na kaulotu ka ni kauta mai na kena iloloma vinaka. Ni sa suka yani ki nona vale se tabanalevu e dua na daukaulotu sa na rawa me vosa ena soqoni ni sakaramede.

E dua tale na ka

Me’u vakaraitaka mada vei kemuni e dua na itukutuku lekaleka me baleta na iLavo Vakarautaki ni Vuli ka a tauyavutaki ena dua veimama na yabaki sa oti ena koniferedi ni Epereli. Sa toso tiko na parokaramu oqo ena dua na itosotoso vinaka. Sa tu e dua na umailavo levu ka ra cau mai kina na Yalododonu Edaidai yalodina. Keimami nuitaka ni na levu tale ena qai yaco mai me rawa kina ni da vukei ira e ganita me ra vukei.

Ni kua e rauta e 5,000 na tagane kei na yalewa, e levu ga vei ira era gone, era sa vuli, kevaka me a sega ke ra sa sega beka ni vuli. Vakasamataka mada na kena revurevu na ka oqo. Sa soli vei ira na Yalododonu Edaidai oqo e dua na ikabakaba me ra kaba tani kina mai na ituvaki ni bula dravudravua era a bula tu kina o ira kei ira na tubudra. Sa vakalevutaki sara vakalevu na kaukauwa ni nodra rawa ka. Sa vakavinakataki cake na nodra kaukauwa ni veiliutaki. Era na yaco me ra turaga ka marama vinaka, era na lewe ni Lotu ka tosoya ki liu na kena parokaramu ena kena ivakarau ka sega ni bau vakasamataki vakadua.

Au na tukuna vei kemuni e dua na kena ivakaraitaki. Na imatai ni goneyalewa ka a soli vua na dinau sa vakacavara oqo e dua na yabaki ni vuli ka sa kerea tale oqo na ilavo me baleta na iotioti ni yabaki ni nona vuli. E vuli tiko me rawa ni yaco me vuniwai ni bati.

Ni se bera oqo a cakacaka tiko ena dua na vale ni kana ka rawata tiko e $130 ena dua na vula. E namaki tiko ni ena gauna sa oti kina na nona vuli sa na rawata e $650 ena dua na vula—sa tubu vakasauri ena 500 na pasede. Ena dau tubu tiko oqori e veiyabaki.

Sa dua na duidui talei e yaco ni vakayagataki vakavinaka e vica na dola. Ia oqo, ni vakalevutaka na veika e sotava oqo ena 5,000. Sa dua na ka uasivi me da vakasamataka. Era sa vuli tiko na gonevuli me ra dau sere idini, dau ni komupiuta, daunivakasala vakabisinisi, daunimisini ni veiqaravi vakanasi, dauvakavinakataki komupiuta, nasi daucakacaka e valenibula, dauparokaramutaki komupiuta, idinia ni komupiuta, daubulia na irairai ni sulu, daunivika, daunilivaliva, qasenivuli ni vosavakavalagi, dauvavavi, Veiliutaki ni otela, kei na daunidroini, oqori e vica ga.

E sega ni cava rawa na veika e rawa ni rawa, ka sa ka talei ka veivakurabutaki na veika sa yaco tiko.

Na tikina tale au via tukuna o ya na lotu vakavuvale. Keimami leqataka vakalevu de sa seyavu tiko yani ena so na vanua na parokaramu bibi oqo. Kemuni na taciqu e sega tale ni dua na ka e bibi cake mai na nomu matavuvale. O ni kila ya. A tekivutaki na parokaramu oqo ena 1915, 87 na yabaki sa oti, ena nona a vakauqeti ira na Yalododonu Edaidai o Peresitedi Joseph F. Smith me ra vakatikitikitaka e dua na yakavi ena veimacawa me baleta vakatabakidua na matavuvale. Oqori me gauna ni veivakavulici, wili ivolanikalou, vakabulabulataki taledi, veivosakitaki ni veika ni matavuvale. E sega ni gauna ni laki qito se dua tale na veika e tautauvata. Io, kevaka e dau yaco vagauna na itavi qaravi vakavuvale me vakaoqo, ena vinaka oya. Ia mai na totolo ni veika ni bula, sa bibi sara me ra dau dabe vata kei ira na luvedra na tama kei na tina, me ra masu vata, ka dusimaki ira ena sala ni Turaga, dau vakasamataka na leqa e tara na nodra matavuvale, ka laivi ira na gone me ra dau vakaraitaka na nodra dui taledi. Au kila ni parokaramu oqo e basika mai na ivakatakila ni Turaga me baleta na gagadre ena veimatavuvale ena Lotu.

Kevaka a dua na gagadre ena 87 na yabaki sa oti, ni kua sa na levu sara na gagadre oqori.

Na lewa a tau ena bogi ni Moniti oya ena vagolei ki na itavi qaravi vakavuvale oqo. Ena veivanua oqori ka levu sara tu kina na iwiliwili ni lewe ni Lotu, era rokova na parokaramu oqo o ira na vakailesilesi ni koronivuli kei ira na tani ka sega ni vakayacora tale e dua na ka ena yakavi oqori.

Ena gauna oqo e laurai ni vaka e tubucake tiko na levu ni veika tale eso e dau navuci me caka ena yakavi ni Moniti. Keimami sa kerei ira kina na vakailesilesi ni veikoronivuli tale eso me ra vagalalataki keda ena dua ga na yakavi e veimacawa me da tosoya tiko kina na noda ivakarau tudei ka bibi oqo. Eda kerea me ra kakua ni navuca na veika eso ka na taura na nodra gauna na noda gone ena yakavi ni Moniti. Sa dei na yaloi keimami ni ra na raica rawa ni sa ka bibi me soli na gauna ki na matavuvale, me vakadua e veimacawa, me ra tiko vata kina ka me kua na kena veidre. Eda na vakavinavinaka sara vakalevu kevaka era na veitokoni ena tikina oqo. Ka keimami veivakauqeti kina, ena vosa kaukauwa duadua e rawa, me ra vakabibitaka sara na tama kei na tina na gauna vinaka oqo kei na bolebole me ra vakatabuya na bogi ni Moniti me baleta na matavuvale.

Au sa ciqoma e vica vata na veisureti me’u vakaitavi ena soqoni vakaitikotiko ena yakavi ni Moniti. Au dau vakasuka e veigauna na veisureti vakaoqo ka vakaraitaka na noqu marautaka, ia au dau vakamacalataka ni’u sa vakatikitikitaka na bogi ni Moniti me bogi ni lotu vakavuvale. Au nuitaka ni o ni na vakayacora vakakina.

Na tikina e tarava.

Kemuni na taciqu, au gadreva me’u vakauqeta tale na bibi ni noda rawati keda vakataki keda na lewe ni Lotu yadua kei na matavuvale.

E sega ni dua vei keda e kila na gauna ena yaco kina e dua na leqa. Na tauvimate, mavoa, kei na sega ni cakacaka ena rawa ni tarai keda kece.

E tu e dua na noda parokaramu ni welefea ka tu kina na veiyaya me vaka na iyaya ni maroroi kakana sorenikau ena veivanua e so. Sa bibi sara me da vakayacora oqo. Ia na vanua vinaka duadua me biu koto kina vakatikitiki e dua na kakana o ya e vale, vata kei na dua na iwase ni ilavo me maroroi toka. Na parokaramu ni welefea vinaka duadua sa ikoya na noda dui parokaramu ni welefea. E lima se ono na kava witi e vale e uasivi cake mai na dua na kisi ena vanua ni maroroi kakana sorenikau ni welefea.

Au sega ni yalataka tiko ni na dua na leqa sega ni namaki. Au nuitaka ni na sega ni yaco e dua. Ia sa dodonu me da dau vakatulewa matau ena noda bula. O ira kece era taukena tiko e dua na vale era na raica na kena gadrevi me inisuataki me baleta na kama. Eda nuitaka ka masuta me kakua ni yaco e dua na kama. Ia eda dau sauma na inisua me itataqomaki mai na veileqa sega ni namaki vakaoqo, kevaka ena yaco.

Sa dodonu me da vakayacora vakakina me baleta na welefea ni noda matavuvale.

E rawa ni da tekivu ga vakarawarawa. E rawa ni da tekivu ena kakana mada ga ni dua na macawa ka da qai vakuria yani vakamalua me rauta ni dua na vula, ka qai tolu na vula. Au vosataka tiko oqo na kakana ka dau gadrevi e veigauna. Me vaka o ni sa na kila kece tiko, e sega ni dua na ivakasala vou. Ia au leqataka de sa rui levu era nanuma ni sa rui dredre na kumuna na kakana ni dua na gauna balavu ka ra sa mani sega kina ni via sasagataka.

Tekivu mada ga vakalailai, kemuni na taciqu, ka qai tara cake vakamalua ki na dua na ka e vakaibalebale cake. Dau maroroya e veigauna e dua na iwase ni ilavo lailai o na kurabuitaka na kena toso.

Lako tani mai na dinau ka vagalalataki iko mai na ivesu e kauta mai na dinau.

Eda dau rogoca vakalevu me baleta na ikarua ni dinau. Ia oqo sa tukuni vei au ni sa tiko talega na ikatolu ni dinau.

Vakaivakarautaki iko ena vakayagataki ilavo, ena veika me baleta na dinau, ena veika ka dau yaco kina na beqaravu kei na rarawa ka dau salavata mai.

Ia oqo, me kena iotioti ga kemuni na taciqu, au gadreva me’u lesuva ga vakalekaleka e dua na tikina au sa vosa oti kina, ka rau sa vosa kina o Elder Ballard kei Peresitedi Monson ena soqoni oqo. Au kaya tiko na ivakarau ni bulasavasava vei keda na lewe ni Lotu.

Sa rui levu vei keda era rawai tiko ena viritalawalawa ni bula tawasavasava kei na veika gaga e basika mai kina. Kivei kemuni na gonetagane o ni tiko eke ni kua—na cauravou—au vinakata meu tukuna eke ena vosa kaukauwa duadua au rawata, vakayawaka na bula tawasavasava. O ni kila na ka vinaka kei na ka ca. Ena sega ni rawa ni o vakayagataka na lecaika me iulubale ni ivakarau sega ni vinaka.

Ena rawa vakacava mo nanuma ni na rawa mo cakava na ivalavala tawasavasava ka qai lako yani ki na buturara ni kaulotu ka matataka kina na Turaga o Jisu Karisito? O nanuma beka ni na rawa mo kilikili mo lako ki na Vale ni Turaga, ka vakamau kina me baleta na bula oqo kei na bula tawamudu, kevaka o sa vakaitavi oti ena ivalavala oqori?

Au vakatakerei kemuni, na noqu itokani gone lomani, ni levea na itovo vakaoqori. Ena sega ni rawarawa. Ena gadrevi kina na bula vakaivakarau. Na meca o ni veivala kaya e kaukauwa sara ka ra dau veisureti. Era kaukauwa ni meca vuku sara. O na gadreva na kaukauwa ka rawa mai na masu.

Lako tani mai na iyaloyalo vakasisila ni initaneti. Ena dreti iko sobu ga. Ena rawa ni kauti iko ki na rusa.

Kakua ni gulecava na ka dina ni o taura tu na matabete ni Kalou. Ena gauna e solia kina o Joni na Dauveipapitaisotaki na Matabete i Eroni vei Josefa Simici kei Oliver Cowdery e kaya kina ni matabete oqo e koto kina na “nodra cakacaka na agilosi dauveiqaravi, na vunautaki ni ivakavuvuli ni veivutuni kei na papitaiso ena tabadromuci e wai me bokoci kina na ivalavala ca” (V&V 13).

O gadreva beka na veiqaravi ni agilosi?

Na cakacaka oqori ena salavata mai na kena icocovi ka sega ni vakatauvatani vata rawa kei na dua na ka. Digia mo muria na kosipeli ka na vakalougatataki iko na Kalou ka vakamareqeti iko ka “tubera na ligamu, ka vakayacora na nomu kerekere” (raica V&V 112:10).

Kivei kemuni na turaga uabula au vagolea yani vei kemuni na vakatakekere kei na ivakasala vata oqo. Na ivalavala ca lelevu e dau tekivu mai na ivalavala lalai. Eda veivala vata tiko e veigauna. Sa rui levu na mosi ni yalo, na yalorarawa, na yali ni ka e vakabauti, kei na veisere ena keda maliwa.

Meu wasea tale mada e dua na ka au a vosa sara kina vakabalavu ena dua na gauna sa oti. Au tukuna tiko na ca kei na ivalavala ca vakaloloma ni veivakalolomataki vei ira na gone.

Eda na sega ni rawa ni raica tiko. Eda na sega ni raica. Kevaka e dua e vakalolomataka e dua na gone me na namaka na veivakadodonutaki vakalotu ka vakakina na veilewai vakalawa.

Na nodra vakalolomataki na gone e veivakacudrui vua na Kalou. E vosa o Jisu me baleta na kedra totoka kei na savasava na gone. Ki vei ira e tu vei ira eso na ka e rawa ni vakavuna na nodra vakalolomataki na gone, au kaya ena vosa kaukauwa duadua au rawata mo vakaitovotaki iko. Vakasaqara na veivuke ni se bera ni o vakamavoataka e dua na gone ka kauta mai vei iko na rusa.

O kemuni na turaga o ni tokara tu na matabete vakamareqeti oqo, vesuka sara ki yalomu. Mo kilikili kaya tiko ena veigauna kecega kei na veivanua kecega.

Ke o vakayacora vakakina o na marautaka na “vakacegu ni Kalou, sa uasivia na ka kecega e kilai rawa” (Filipai 4:7).

Me vakalougatataki kemuni na taciqu lomani ena matabete na Kalou, o kemuni na qase kei ira na gone. Kemuni na tama ni ivakaraitaki vei ira na luvemuni. Kemuni na gonetagane ni rai vei ira na tamamuni me baleta na yalomatua kei na veituberi kei na kilaka.

Sa cecere dina na yalayala ni Turaga vei ira era lako ena vakabauta. Au laiva vei kemuni na noqu veivakalougatataki, na noqu iloloma, kei na noqu ivakadinadina. Sa dua na kaukauwa cecere ka talei me baleta na vinaka e tu ena matabete oqo kevaka eda duavata ka toso ki liu. Me vakalougatataki keda na Turaga me da vakayacora vakakina, au masuta ena yaca i Jisu Karisito, emeni.