Lasa kei na Mamarau
E rawa ni da vakila na mamarau ena noda bula e veisiga mai na veika lalai eda kitaka, ka sa taucoko kina na noda mamarau me vaka na noda rokova na ivakaro ni Kalou dauloloma.
Sa oti yani oqo e rauta ni va na vula, au a ciqoma kina na itavi me’u la’ki veiqaravi e Bogota, Colombia, ka toki yani kina. Ena dua na siga, mai na noqu tovolea tiko me’u kunea na gaunaisala ki na vale ni soqoni ena noqu tabanalevu vou, au a mani kele ena dua na vanua ni gade meu taroga kina na kena ivakamacala.
Sa dua na mataka totoka ni cila tu na siga ka’u raica rawa e vuqa na matavuvale ni ra marautaka tu. Au a tucake tu e kea vakalailai ka saravi ira na gone ena nodra marautaka na nodra qito ena vanua ni gade. E kilai tani sara ga na serau ni matadra, e piqi na baludra mai na siga kei na nodra sasaga me ra cici ka qito vata. Era sa veitokani vata vakavinaka kece sara.
Au rawa ni tukuna ni ra sa veilasamaki vinaka sara. Ena noqu vakadikevi ira toka vakavoleka, au vakadeitaka ni, sivia cake sara mai na gauna ni veilasamaki, o ira na gone tawa cala oqo era marau sara tu ga vakaidina.
E muri, ena noqu sa draiva sobu yani ki valenilotu, e lesu tale na noqu vakanananu ena gauna au a papitaiso kina ena Lotu. E a lako mai vei au e dua na noqu itokani makawa ka taroga se cava sara mada au kunea ni duidui e kea. Au a sauma, “Au sa kunea na mamarau dina.” E a qai sauma lesu mai, “E sega ni dua na ka na mamarau dina—na veigauna marautaki walega.”
Au kila ni noqu itokani e sega ni kila na kedrau duidui na lasa kei na mamarau. Na ka e vakatoka me “veigauna marautaki” na kena dina sa ikoya na veigauna e a kunea kina na lasa. Na ka e a sega ni kila ena gauna o ya sa ikoya na mamarau e sivia cake sara mai na lasa walega. Na lasa sa ikoya e dua walega na gauna ena seyavu yani vakatotolo, ia na mamarau sa ikoya e dua na ka e guiguilecavi dredre.
E lewe vuqa na tamata ena vuravura oqo era lecava na kedrau duidui na lasa kei na mamarau. E vuqa era tovolea me ra kunea na mamarau mai na veilasamaki, ia o rau na lewe rua qo e dudiudi na kedrau ibalebale.
Au vaqara ena ivola ni vakadewa vosa me’u kunea na cava na kedrau ibalebale yadua: Na lasa sa ikoya na qito, marautaka, vakalasalasa, ivurevure ni reki, veivakalasai, ivakarau ni qito, dauqito, vakasosa wasoma ni itavi qaravi vata, veivakacudrui. Na mamarau sa ikoya na vakacegu, reki, rekitaka, veivakacegui.
Au a vakavulici, ni oti ga na noqu curu meu lewena na Lotu, ni sa dua dina na duidui levu ena kedrau maliwa na lasa kei na mamarau. Au a vulica, ni se bera mada ga niu papitaiso ni Turaga e tiko e dua na nona yavu ni veivakabulai vei ira taucoko na luvena (2 Nifai 2, 9). Mai na yavu oqo, ena vakatau mai na ka eda rawata ena vuravaura oqo, eda na qai lesu tale vua na Tamada Vakalomalagi ena nona itikotiko ka bula vata kei Koya me tawa yalani ena dua na itutu ni mamarau tawamudu.
Erau ka vinaka ruarua na lasa kei na mamarau, ia e kilai deivaki ni mamarau sa ikoya e kilikili duadua me vakasaqarai. Na mamarau e rawa ni tiki ni lasa, ia na lasa vakataki koya ena sega ni vakadeitaka vei keda na mamarau dina.
Ena Luke, wase 15, eda kunea na vosa vakatautauvata me baleta na gone cidroi. Ena vosa vakatautauvata oqo, na luvena gonetagane lailai e kerei tamana me solia mai vei koya na nona iwase ni iyau. E kitaka vakakina o tamana, ka sa qai lako yani ki vuravura na gonetagane oqo, vaksaqara na ka e vakadinata me mamarau dina. E sa tekivu me kunea na lasa, ena balavu ga ni gauna e tiko kina vua na ilavo, e bula ena nodra vakavolivoliti koya e vuqa na tamata ka ra vakaraitaka ni ra nona itokani. Ena gauna e sa vakayagataki taucoko kina na nona iyau ena lasa vata kei ira ka dodonu me ra nona itokani, o ira taucoko era sega tale ni qai vinakata me ra veitokani kaya ka sa sega talega ni dua na ilavo me vo vua. Oti, e sa qai sota kaya tu na dredre kei na yalorarawa. E sa tekivu cakacaka sara vua e dua na tamata me dau vakana vuaka, ena vuku ni nona sa viakana tu, e a tovolea me kania na qa ni sila ka ra dau kania na vuaka. E vakasamataki ira na tamata nei tamana, ni dau rauti ira na kedra madrai ka dau vo tale tu, ia o koya e sa sega tu na kakana me kania.
E sa lewa me na lesu tale ivale vei tamana me la’ki kerei koya me solia vua e dua na cakacaka me vakataki ira na nona tamata cakacaka saumi. E lesu tale ena nona veivutunitaka na veika kece e a kitaka, ia o tamana, e dua na tamata yalosavasava, e kidavaki koya me vaka e dua na luvena tagane uasivi. E sa qai kila tu ni oqo ga na vanua e tiko kina na mamarau dina, ena bula rawarawa vata kei na nona matavuvale.
O ira kece era vakasaqara na mamarau vuabale, e rawa ni ra kunea ena kosipeli i Jisu Karisito, vakatavulici ena Nona Lotu. Mai na ivakavuvuli i Karisito, eda a vakatavulici ni rawa me da tiki ni veika sa navuci tu ena yavu ni mamarau ka a vakarautaka o Koya me baleti keda taucoko, luvena tagane kei na luvena yalewa. Ena noda rokova na Nona ivakaro, eda vakalougatataki ka da kila na dina ni mamarau. Eda vulica ni mamarau e kune ena cakacakataki ni veika lalai ka vukea na noda tubu vakayalo, ka vakarabailevutaka na veika lalai eda vakayacora ena noda vakabauta kei na noda ivakadinadina ena noda bula ena veisiga, me kena ivakatautauvata.
Eda marau ena noda masu e veimataka kei na veibogi, ena gauna e rawa me da vakila ni Turaga e rogoci keda ka vakarau ena veigauna me vakalougatataki keda, veivosoti ka vukei keda. Eda marau ena noda vakila na veivakauqeti ni Yalo Tabu ena noda bula—me vaka na noda vakila na Yalo Tabu ena gauna me da cakava kina na vakatulewa bibi ena noda bula. Ni oti e dua na siga ni oca kei na wawale ni cakacaka, eda marau ena noda sa lesu ki vale, ki na nodra veiciqomi na noda matavuvale ena nodra vakaraitaka na nodra loloma kei na vakavinavinaka vei keda. Eda marautaka ni da vosa vei ira na luveda, eda rekitaka na noda matavuvale, na noda soqoni vata ena bogi ni lotu vakamatavuvale. Me vakalekalekataki, e rawa ni da vakila na mamarau ena noda bula e veisiga mai na veika lalai eda kitaka, ka sa taucoko kina na noda mamarau me vaka na noda rokova na ivakaro ni Kalou dauloloma ka kauwaitaka na veika e baleti keda.
Na mamarau dina e lako mai ena kena rokovi na ivakaro ni Kalou. Eda a vakatavulici ena 2 Nifai 2:25 ni, “Sa lutu ko Atama me sucu kina na tamata; ia sa sucu na tamata me rawata na marau” se, dua tale na kena ivosavosa, me rawa kina na nodra mamarau.
Au sa vakadinadinataka na mamarau oqo ena nodra bula e vuqa na lewe ni Lotu. Ena vica na macawa sa oti e a soli kina vei au na itavi me’u liutaka e dua na koniferedi ni iteki e Cali, Colombia. Au a sota kaya e dua na cauravou uasivi sara e kea ka lewe ni Lotu, ka rawa me ivakaraitaki vinaka ni ibalebale ni mamarau vakaidina.
Na yacana o Fabián. Na nona matavuvale era lewe ni Lotu ka a vulica na yavu ni mamarau ena nona a se gonetagane lailai. Ena yabaki 1984, ni se qai yabaki tolu, o Fabián kei na nona matavuvale era tiko ena dua na vale volekata e dua na gaunisala levu ka osooso. Na gaunisala o ya e a salatu ni basi ena siti.
Ena dua na siga, ena nona a raica ni dola tu na matamata, e a tovolea o Fabian me takosova na gaunisala e a qai coqai koya na basi. Totoka dina na loloma ni Tamada Vakalomalagi, ni a bula mai na vakacalaka o ya o Fabián. Erau kauti koya na nona itubutubu ki na tolu na valenibula ka vakaraitaki mai kina ni sega ni rawa me ratou qaravi koya. Erau tomana tikoga na nodrau vaqaqara veivuke, ena kena sa qai kune na veiqaravi vakavuniwai e veiganiti, na kena irairai e sega soti ni vinaka. Ni oti e vica vata na veiqaravi lelevu vakavuniwai, era sa qai tukuna na vuniwai ki na matavuvale ni mavoa ni yavana kei na sagana e sa rui tete yani vakalevu ia me rawa kina vua na bula, e sa na musu laivi na yavana imatau.
Oti o ya e sa qai tekivuna tale o Fabián e duatani na ivakarau ni bula, ni sa yali na ikarua ni yavana. E sa qai tekivuna vakamalua me vulica na nona lewa vinaka na ituvaki ni yagona kei na nona ilakolako ena veivuke ni yavakau. E lako ki vuli ena nodra veivuke na qasenivuli kei ira na itokani. Sa matau mai vua na nodra dau vakalialiai koya e so na tamata, ia e sa vulica me kakua ni kauwaitaka na veiwali era dau cakava vua.
E vinakata me vakaitavi ena itavi qaravi vata vakayago taucoko ka vakayacora vakakina e veigauna. E dina ga ni rui dredre vua na nona wini ka sega ni dau yaco wasoma vua, e dau yaloqaqa ka vakarau tu me vakaitavi ena veigauna taucoko ga.
Ena gauna sara ga qoka o Fabián e veiqaravi tiko me daunivakasala e na mataveiliutaki ni Cauravou ena nona iteki. E lakova na kalasi ni vuli ka vakalotu, ka vakaitavi ena isoqosoqo ni matanitu ni gonevuli. E dau qito basikete polo kei na soka. E dau qito Ping-Pong vata kei ira na nona itokani mai na vuli ka vakalotu. E dau vodo basikeli ka cakava taucoko na veika e rawa ni cakava e dua na cauravou. E cakacaka sega ni saumi ena vakavulici ni vosa Vakavavalagi ena dua na yavu ka kauwaitaki ira na gone dravudravua.
O Fabián e gadreva me qaravi ira na nona itokani kei na Kalou ena nona kaukauwa taucoko. E dau matadredredre ka dau tu vakarau me veivuke vua e dua e gadreva. E sa dua na cauravou dau marau dina o Fabián. Mai na vakaitamera ni nona kaukauwa ka lako tiko mai na nona vakabauta kei na nona yalodina vua na Kalou, e sa ivakaraitaki uasivi o Fabián vei ira na lewenivanua ena nona tauni.
Na nona mamarau ena lako mai na nona segata me bula kilikili ena veisiga, ka me muria na ivakaro ni Kalou. E vakalesuya mai vei au e dua na ivolanikalou e kunei ena Mosaia 2:41; “Ia mo ni dau nanuma tiko, ni ra sa kalougata ka marau ko ira sa muria na vunau ni Kalou. Raica, era sa vakalougatataki ena veika vakayago kei na veika vakayalo; ia kevaka era sa yalodina tiko me yacova na ivakataotioti, era na curu ki lomalagi ka tiko vata kei na Kalou ena marau tawa-mudu. Mo ni nanuma deivaki tiko ni sa dina na veika oqo; io ni sa tukuna na Turaga.”
Ena noda muria na ivakaro ni Kalou, eda na bula marau me tawamudu. Na Turaga e kaya ena Alama 41:10 ni “ko na sega ni kune marau ena nomu ivalavala ca.”
Me vaka ni da sa nona tamata na Kalou ka da lewe ni Nona Lotu, au sureti kemuni mo ni marau vakaidina ka dau vakarorogo ena Nona ivakasala, ena nomuni bulataka na Nona ivakaro, ka muria na vosa ni Nona parofita bula.
Au kila ni dua vei ira na dina ka veivakauqeta vakalevu sara na noda mamarau sa ikoya na noda vakarogoca na nodra ivakasala na veiparofita bula ka ra vakavulici keda ena Lotu oqo.
E dua tiko na noqu ivakadinadina ni bula tiko na Kalou, ni o Jisu sa i Karisito, na noda iVakabula ka Dauveivueti. E a solia na Nona bula vakamareqeti vei keda vakayadua. Au kila ni o Josefa Simici sa ikoya na parofita ni Kalou. Au kila oqo ena yaloqu taucoko. Au kila ni iVola i Momani e vosa ni Kalou, ka na rawa ni liutaki keda ki na veigaunisala ni bula mamarau.
Au kila ni o Peresitedi Gordon B. Hinckley e parofita ni Kalou edaidai ka ni vakavulici keda ena loloma kei na dauvosota me rawa ni da marau ena bula oqo kei na bula sa bera mai.
Na veika oqo era tiki ni noqu ivakadinadina me baleta na dina, ka’u wasea vata tiko kei kemuni na taciqu kei na ganequ, ena yaca i Jisu Karisito, emeni.