Elder Spencer V. Jones
mai na Vitusagavulu

Me da lako cake kece. Me da vakacibara na bisopi. Me da lako cake kece ka wasea na noda ivakadinadina.” Oqori na bolebole a vakayacora o Spencer V. Jones ena gauna e se gone kina vei ira na nona itokani dikoni. Oqori talega e dua na ivakatakilakila ni kena sa matua mai na nona ivakadinadina. “Niu wasea tiko na noqu ivakadinadina, ni sa vakarau me cava—na gauna au dau dredrevaki ira tiko kina na tamata ni ra sa luluvu baleta ni se sega sara niu kila—au qai vakila niu sa tagi talega,” e nanuma lesu tale o Elder Jones. “Au sega sara ni guilecava rawa na gauna ko ya, baleta ni gauna erau veivosaki kina e rua na yalo ena yaco e dua na ka talei.”

E a sucu o Elder Jones ka se qai tokoni walega oqo ki na iKarua ni Kuoramu ni Vitusagavulu, mai Safford e Arizona kivei rau o Virgil kei Nellie Baker Jones ena i ka 17 ni Sepiteba 1945. E a tubu cake ni luvena e dua na dauteitei ena tikotiko lailai ni Yalododonu Edaidai e Virden, New Mexico, ka dau vakayacori ga na kena veiitavi qaravi vata e valenilotu. “Keimami dau kacivi ira na tamata kecega e tauni ena nei kei na momo—kevaka sara mada ga eda sega ni veiwekani—ka ra dau veirairaici na tamata kecega me vaka ga ni ra veiwekani.”

Ni oti na veiqaravi ena Tabana ni Dakaulotu ena Vualiku kei Argentina, e a laki vuli o Elder Jones ena Brigham Young University, ka rawata mai kina e dua na koroi ni nodra qaravi na manumanu. Ena dua na danisi ni kalavo na Arizona ka a vakayacori e koronivuli erau a sota kina kei Joyce Elizabeth Mathews. Erau a vakamau ena i ka 3 ni June 1968, ni oti na nodrau tauri ivola, erau sa toki sara ki Gallup, New Mexico. Sa cakacaka oti o Elder Jones ena veibisinisi e so, ka okati kina e dua na kabani ni iyaya ni loma ni vale kei na dua na kabani ni bulumakau. E tolu na luvedrau kei watina ka walu na makubudrau.

E a vakamacalataka o Elder Jones ni ra sa ka ni veivakalougatataki na nona ilesilesi yadua ka sa vakarautaki koya me veiqaravi ena matanitu ni Turaga. Sa vulica e levu sara na ka mai na nona ilesilesi yadua, ni veiqaravi tiko vakaperesitedi ni Cauravou, daunivakasala ni matabisopi, bisopi, qasenivuli ni semineri, peresitedi ni tabana ni daukaulotu, vunivola levu ni wasewase, se Vitusagavulu ni Wasewase. “Era sa idewadewa na ilesilesi yadua ka gauna ni vuli,” e kaya o Elder Jones. “Eda na tubu ena dua na ikalawa ena dua na gauna.”