Na Loloma Cecere: Dua na Matavuvale, Dua na iTikotiko ena Dua na Gauna

Anne C. Pingree

iKarua ni Daunivakasala ena Mataveiliutaki Raraba ni iSoqosoqo ni Veivukei

Ni da marama ni veiyalayalati, … e rawa ni da veisautaka na vuravura me dua na matavuvale kei na dua na itikotiko ena dua na gauna ena vuku ni loloma cecere mai na veicakacaka lalai ka rawarawa ena loloma savasava.

Ena vica na yabaki sa oti keirau a sikova kina kei na watiqu na tokalau kei Berlin, e Jamani. Era kabuwacara tu e veivanua na tikitiki lelevu ni lalaga vakairogoro ka a dau wasei ira tu na lewenivanua ena siti o ya—era maroroi tu me ivakananumi ni sa yaco na qaqa mai na veivakabobulataki. E volai tu vakamatailelevu ena dua vei ira na tiki ni lalaga oqori, ena matanivola veikalayaki ka damudamu na veivosa oqo: “E levu na tamata lalai ena vuqa na veivanua lalai era cakava tiko e vuqa na veika lalai ka rawa ni veisautaka na vuravura.” Kivei au e tukuna vei au na malanivosa oqori e rawa vei keda yadua—me vaka ni da marama ni veiyalayalati—ni da cakava me da vakayacora kina eso na duidui, ena noda kalawa yani ki liu ka dulaka yani na yaloda kei na ligada vua na Turaga ena noda laveti ira ka lomani ira na tani.

E sega soti ni dua na ka kevaka eda se qai curu vou mai se da lewe ni Lotu tu ena noda bula taucoko: sega ni vakawati, vakawati, sa veisere, se dawai, se da vutuniyau, dravudravua, vuli, se sega ni vuli, vakaitikotiko ena siti,— se ena dua na koro lailai ena loma ni veikau. Ni da sa marama ni veiyalayalati, eda sa vakatabui keda tu ki na inaki i Karisito ena noda veiyalayalati ni papitaiso kei na valetabu. E rawa ni da veisautaka na vuravura me dua na matavuvale dua na itikotiko ena dua na gauna mai na veicakacaka lalai ka rawarawa ena loloma savasava.

Na Loloma Cecere, na Nona loloma savasava na iVakabula, “sa i koya na mataqali loloma cecere, vakaturaga, ka kaukauwa duadua”¹ ka da dau “masuta na Tamada ena yalo[da] taucoko”² me da taukena. E vakavulica vei keda o Elder Dallin H. Oaks ni loloma cecere “e sega ni ka e matanataki, ia e ivakarau se ituvaki ni bula, [e rawa ni yaco vua e dua].”³ Na noda isolisoli ni loloma cecere e veisiga era “volai e sega ena iqi, ia mai na Yalo ni Kalou bula ena dela ni teveli ni yaloda.”⁴ Na noda veicakacaka ni loloma cecere oqori ena veisautaki keda, tukuna na noda ivakarau ni bula, ka qai kena ilutua, ni na vakayacori keda me da yalewa ka taukena tu na yaloqaqa kei na yalodina meda na kaya vua na Turaga, “Koi au oqo; mo ni talai au.”

Me noda ivakaraitaki, e vakaraitaka vei keda na iVakabula na ibalebale ni loloma cecere ena Nona ivalavala. E vakaraitaka talega o Jisu na titobu ni Nona lomana kei na nona kawaitaka na Nona matavuvale, ena gauna vata e vunau tiko kina vei ira na lewe vuqa. Ena gauna sara mada ga e sotava tu kina na rarawa levu ena kauveilatai, e nanumi Tinana kei na veika e dau gadreva tu.

“Ia sa tu voleka ki na kauveilatai i Jisu na tinana… .

“Ni sa qai raici rau ko Jisu na tinana, kei na tisaipeli ka tu voleka, ko koya sa lomana ko koya, sa kaya vei tinana, Yalewa raica na luvemu!

“Sa qai kaya vua na tisaipeli, Raica na tinamu! Ia mai na tikinisiga ko ya sa kauti koya na tisaipeli ko ya ki nona vale.”⁵

Au raica ni veilauti sara ni vakaraitaka na ivolanikalou oqo na titobu ni nona yalodina o Joni vei Meri ka “kauti koya ki nona vale.” Au vakabauta ni ivalavala bibi duadua ni loloma cecere era ka lalai ga ka rawarawa, e tawamudu na kena isau, era dau vakayacori ena loma ni noda veivale.”

Ni da mei ira e veisiga ena yalovosota kei na loloma na gonelalai cikecike, itabagone dredre, lewe ni bure yalodredre, watida luluqa ena lotu, se itubutubu qase ka ra sa sega ni rawata e dua na ka, e rawa ni da tarogi keda, “E bibi dina beka na veika au vakayacora tiko? E dua beka na betena se ena yaco beka kina e dua na veisau? Kemuni na taciqu na veika o ni vakayacora tiko me baleta na nomuni dui vuvale e bibi! E bibi dina sara. Eda dau vulica vakawasoma e vale e veisiga ni loloma cecere, na Nona loloma savasava na iVakabula, sa sa sega ni mudu. E vuqa sara na tacida ena iSoqosoqo ni Veivukei era sa vakayacora tiko na veika vinaka lelevu ena nodra qarava tiko na nodra matavuvale. Era sega ni dau vakacaucautaki mai vei vuravura o ira na marama yalodina oqo—era sega talega ni dau vakasaqara—ia “dou lomani ira sara eso, ni ra sa lomalomarua.”⁶

O cei soti na marama oqo ka ra vakayacora tiko na veisau? O ira na tuakada ena iSoqosoqo ni Veivukei taumada e Nauvoo, ena dela ni nodra dravudravua vakaitamera, era dolava na yalodra ka sureta ki na nodra veivale na ibinibini curuvou mai ka ra sa drodro yani ki na siti. Era wasea na kedra kakana, na nodra isulu, ka uasivi cake sara, na nodra wasea na nodra vakabauta ena loloma veivueti ni iVakabula.

Ena itabagauna oqo, e dua vei ira na marama ni veiyalayalati oqo o Sister Knell ena nona vakayacora na veisau. O koya e dua na kena marama dawai yabaki 80 ka dua tiko na luvena tagane yabaki 47, e sucu lokiloki ka malumalumu na nona vakasama. Ena vica na yabaki sa oti e a tekivutaka kina na tacida lomani oqo na cakacaka ka da na nanuma kece beka na tamata ni na sega ni rawa—o ya me vakavulica na luvena o Keith ena wilivola. E nona gagadre levu duadua me vulica na wilivola, ia era sa tukuna oti na vuniwai ni na sega ni rawa ni wilivola o Keith. Ena vakabauta ni yalona kei na nona gagadre me vakalougatataka na bula nei luvena, e a kaya kina na dawai yalomalumalumu oqo vua na luvena, “Au kila ni na vakalougatataki iko na Tamada Vakalomalagi, mo rawa ni wilika na iVola i Momani.”

E a vola na veika oqo o Sisita Knell: “Sa dua na cakacaka dredre vei Keith ka sega sara talega ni rawarawa vei au. Taumada e a yaco e so na veisiga ca, baleta niu sa dau cudru. E kania sara ga na gauna, ni vulici yadua-na-vosa. Au dau dabe e yasana e veimataka. Au dau dusia na veivosa yadua ena dua na penikau me rawa ni dusimaki koya ena nona wiliwili. Ni oti e vitu na yabaki balavu ka dua na vula, sa qai wilika oti o Keith na iVola i Momani.” E kaya kina o tinana: “Au sega ni vakamacalataka rawa na marau e yacovi au ena noqu rogoca ni sa wilika ga vakataki koya e dua na tikina.” E a nona ivakadinadina, “Au kila ni na dau yaco na cakamana ni da vakanuinui vua na Turaga.”⁷

Ena vuravura taucoko e Aferika, Esia, na Pasifika, Vualiku kei na Ceva kei Amerika, kei Iurope, o ira na marama dauloloma, ni ra duavata kei na nodra matavuvale, era na vakayacora talega na duidui ena nodra itikotiko. Ena matanitu lailai o Trinidad, eratou sa dau vukei ira na gone era tiko veivolekati o Sister Ramoutar, e dua na peresitedi ni iSoqosoqo ni Veivukei ni tabana kei iratou na nona matavuvale. Eratou tiko na matavuvale na Ramoutar ena dua na koro ka sa vakaleqai tu ena waigaga ni veivakamatenitaki ka sa curuma tu na nodra dra na itubutubu kei ira na uabula na gunuvi ni alakaolo se ra bisinisitaka tiko na waigaga ni veivakamatenitaki. E vanua rerevaki sara era sa tu kina na isolisoli ni ra sega ni dau kauwaitaki. E vuqa vei ira era sa sega tu ni vuli.

Ena veibogi kece ni Lotulevu, e dau yacova sara na 30 na kedra iwiliwili na gone mai na yabaki 3 ki na 19, era dau dabe ena yasa ni nodratou vale na Ramoutar sa conaki tu ka ra vakaitavi ena dua na ilawalawa ka vakatokai “Na Neimami Vuvale Levu Mamarau.”E dau tiki ni itavi qaravi vata oqo na masu, lagasere, sere lasa ka vakaibalebale Vakarisito, kei na kena wasei na veika vivinaka era vakayacora ena loma ni macawa na gone. Ena so na gauna era dau wasea na vuniwai, ovisa, qasenivuli, se o ira sara ga na neimami daukaulotu eso na lesoni yaga me vaka beka na nona ono na D o Peresitedi Gordon B. Hinckley. Eratou sa vakabulai ira na gone na matavuvale na Ramoutar, mai na nodratou ivalavala lalai ka rawarawa ni loloma cecere. Na nodratou wasea na kosipeli ena “Neimami Vuvale Levu Mamarau,” era sa saumaki talega mai kina ki na Lotu na tani.

Kemuni na taciqu lomani ena iSoqosoqo ni Veivukei, au kila ena vanua cava ga eda tu kina, se na ituvaki ni bula cava ga eda kune kina, ni da marama ni veiyalayalati, ka duavata ena buladodonu, e rawa ni da na veisautaka na matai vuravura. Au vakadinadinataka me vakataki Alama ni “ka lailai ka beci, sa tubu mai kina na ka levu.”⁸ Ena noda veivale, na veika lalai ka rawarawa oqori—na noda ivalavala ni loloma cecere ena veisiga—e vakaraitaka na noda yalodina kina, “Koi au oqo; mo ni talai au.”

Au cavuta kina na noqu ivakadinadina ni ivalavala levu duadua ni loloma cecere ena gauna oqo kei na veigauna tawamudu sa i koya na Veisorovaki i Jisu Karisito. E lomasoli me solia na Nona bula me sorovaka na noqu ivalavala ca kei na nomu. Au vakaraitaka na noqu duavata kei na Nona inaki kei na gagadre me’u qaravi Koya tikoga, ena vanua cava ga e kacivi au kina, ena yaca i Jisu Karisito, emeni.