O Ira Era Vosa

E dua na iTukutuku kivei ira na Gonelalai ena Lotu mai na i ka 172 ni Koniferedi Raraba ni Veimama ni Yabaki, 5–6 ni Okotova 2002

Peresitedi Gordon B. Hinckley: Vakasamataka mada na kena talei.

Oqo na Lotu vakalesui tale mai i Jisu Karisito. Oi keda na matatamata oqo eda Yalododonu Edaidai. Keitou vakadinadinataka ni a dolavi ko lomalagi, ni a tawase rua na ilati, ni a vosa mai na Kalou, ka vakatakilai Koya mai ko Jisu Karisito, ni oti na kena tau mai na lewa vakalou.

E vatu-i-vakadei ni cakacaka oqo ko Jisu Karisito, ka sa tara cake ena “yavu … vaka-iapositolo kei na parofita” (Efeso 2:20).

Peresitedi Thomas S. Monson, iMatai ni Daunivakasala ena Mataveiliutaki Taumada: Mai na veitabatamata ena veitabagauna, e se tautauvata tikoga na itukutuku mai vei Jisu. Kivei Pita kei Adriu ena baravi rairai vinaka ni wasawasa mai Kalili, e a tukuna kina, “Drau muri Au.” Kivei Filipi ena gauna makawa, e rogo kina na kaci, “Muri Au.” … Kivua na Livai, na daukumuni ivakacavacava, e a lako kina na veikacivi, “Muri Au.” Ka vakakina vei kemuni kei au, kevaka walega me da vakarogoca, ena yaco vei keda na kaci vata oya, “Muri Au.”

Peresitedi James E. Faust, iKarua ni Daunivakasala ena Mataveiliutaki Taumada: Au nuitaka tu me da vaka kece na “Idini Lailai a Rawata.” E sega soti ni ka levu sara, e dau vakayagataki tu ga ena veisautaki motoka ni sitimanivanua, ka se bera ni bau cabeta e dua na ulunivanua, ia e sa tu vakarau. E qasoti koya na idini lailai ki na sitimanivanua ca, cabe cake ki na dela ni ulunivanua, qai siro sobu ki yasana kadua ka kaya, “Au kila niu rawata.” Sa dodonu vei keda yadua me da kabata na veiulunivanua eda se bera ni bau kabata vakadua.

Elder David B. Haight mai na Kuoramu ni Apositolo Le Tinikarua: E bula tiko na Kalou. O Koya na noda itokani. Au vakadinadinataka vei kemuni ni o Jisu na Karisito, na Luve ni Kalou bula, kei na Parofita o Josefa Simici e parofita ni Veivakalesui Mai. E noda iliuliu dauveivakauqeti ena Lotu oqo e vuravura raraba edaidai o Peresitedi Hinckley. Me vakalougatataki koya na Turaga ena veika kece e cakava … ena nona liutaka tiko na kena tosoi ki liu na cakacaka.

Elder Neal A. Maxwell mai na Kuoramu ni Apositolo Le Tinikarua: Kemuni na taciqu kei na ganequ, e dina ni da sa mai bula ena dua na gauna ni yavavala, eda na rawa ni tu ena veivanua tabu ka sega ni yavalati (raica na V&V 45:32; 87:8). E dina ni da mai bula ena dua na gauna ni ivalavala kaukauwa, eda na rawa ni kunea na vakacegu ni yalo ka sivita yani na kila ka (raica na Filipai 4:7). E se rawa tiko ga ni yaco na veika e veivakasesei, ia, me vakataki Nifai, e se rawa tikoga ni da kila ni lomani keda tiko na Kalou… .

… E dina ni sega ni rawa ni da vakasamataka taucoko na veika oqori ena gauna oqo. Ia eda sa rawa ni kila, ena gauna oqo, ni kilai keda ka lomani keda vakayadua tiko na Kalou!

Elder Robert D. Hales, mai na Kuoramu ni Apositolo Le Tinikarua: Na talairawarawa ni saumi ikatini e vakaukauwataka na noda vakabauta, ia na vakabauta oqori ena dau tokoni keda ena gauna ni noda vakatovolei, vakararawataki, kei na yaluma ena noda ilakolako ni bula oqo.

Elder Dieter F. Uchtdorf mai na Mataveiliutaki ni Vitusagavulu: E sega ni dua na tukaqu mai vei ira na painia ena loma ni ka 19 ni senitiuri. Ia, me tekivu mai na imatai ni siga ni noqu lewena na Lotu, au sa vakila kina na noqu semati vakavoleka sara kivei ira na painia era a kosova na bucabuca. Era tubuqu vakayalo, me vakatalega vei ira yadua na lewe ni Lotu kece sara, veitalia ga na vanua era dui cavutu mai kina, na nodra ivosavosa, se na nodra itovo vakavanua. Era sa mai tauyavutaka e sega walega ni dua na vanua taqomaki vinaka ena ra, ia e vanua ka sa mai tauyavutaki kina vakayalo na kena tarai cake na matanitu ena veivanua kece sara e vuravura.

Elder Robert K. Dellenbach mai na Vitusagavulu: E kerei keda na Turaga me da biuta vakatikitiki e dua na Sigatabu ena veivula me da lolo kina ena rua na gauna ni kana. Eda sureti me da solia ki na Lotu, na ilavo ka maroroi mai na isau ni rua na gauna ni kana ko ya me vukei ira era gadreva na veivuke.