Na Liga ni Veitaqomaki
Ni da lako mai ena yalomalumalumu kei na veivutuni e taucoko ki na soqoni ni sakaramede ka vakaivotavota ena sakaramede ena bula kilikili, eda na rawa ni vakila na liga [ni veitaqomaki] oqori ena veigauna kece.
Au na vosa ena yakavi nikua me baleta na Veisorovaki nei Jisu Karisito kei na ivakatautauvata ki na kena qaravi na sakaramede mai vei ira na Matabete i Eroni, ka a vakavulica vagumatua ka vakavinaka o Elder Oaks ena mataka nikua. Au na vakayagataka e dua na malanivosa ni ivolanikalou lekaleka ka na vukei au meu raitayaloyalotaka na nona loloma cecere na iVakabula. Na malanivosa oqo na “liga ni veitaqomaki” (raica Alama 34:16).
Maroroi ena Ligana
Eratou a veitaba tiko e dua na matavuvale ena dua na vanua ni sarasara ena Bati ni Grand Canyon ena Vualiku. Eratou rogoca na domo ni kaila, eratou cici yani ka raica e dua na goneyalewa lailai yabaki rua ni lutu ena maliwa ni itautauri ki na dua na suku ni delana rauta ni 35 na fiti (11 na mita) ki ra. E sasaga na gonelailai oqo me kaba lesu mai ki cake, ia ena nona yavavala e qai vakavuna me sisi sobu tale yani me yacova ni sa laki vo ga e 5 na fiti (1.5 na mita) mai na dua na barinisavu ka rauta ni 200 na fiti (61 na mita) na kena yawa i ra.
A raica ko Ian e dua na cauravou yabaki 19 na vanua sa laki tao koto kina, ia ni vakayagataka na veika sa vulica me baleta na kena sotavi na leqa vakasauri vakaoqo, e kila na veika me cakava. Oqo na veika e tukuna: “‘E vakasauri na kena votu mai vei au, ka’u kila na veika meu cakava. Au biuta sobu na noqu itaba ka lakova cake vakalailai na gaunisala me yacova e dua na vanua e sega soti ni baba vakasivia. Au kabata na itautauri, sirova sobu e vica na vatu, ka curuma e dua na veikau lalai ka kunei koya.’ A tauri koya toka e ligana o Ian me dua na auwa me yacova ni ra sa qai viritaka sobu yani na dali na ilawalawa dauveivueti me ra vueti rau (“Save Her!” New Era, Sepi. 2007, 6). Na malanivosa “tauri koya toka e ligana” e dreta na noqu vakasama baleta ni tukuni ena ivolanikalou na liga—na liga ni loloma, na liga ni loloma cecere kei na liga ni veitaqomaki (raica na 2 Nif. 1:15; Mosaia 16:12; Alama 5:33; V&V 6:20; 29:1).
Na malanivosa ni ivolanikalou “ologi ena liga ni veitaqomaki” e tauri mai na itukutuku nei Amuleki vei ira na Soromaiti me baleta na veisorovaki bibi ka cecere. E vakavuvulitaka ni nona isoro na Luve ni Kalou sa rawa kina vua na tamata me vakabauti Karisito ka rawa kina na veivutuni. “Ia sa vakaceguya na gagadre ni lewa dodonu na loloma cecere oqo, ka sa ologi ira ena liga ni veitaqomaki” (Alama 34:16; raica talega tt. 9–15).
Vakavuvulitaka na veika e Sega ni Rairai ena veika e Rairai
Me rawa ni kilai vakavinaka “na liga ni veitaqomaki” sa bibi me kilai tiko ni dau vakayagataka na iVakabula na veika e rairai, me vaka na tikinisiliva, sorenikau, na sipi, ibuli madrai, na ika, kei na veitiki ni yago me vakavuvulitaka kina na ivakavuvuli ni kosipeli.
Na liga e rairai ka da dau vakayagataka me da vakaraitaka kina na noda veikauwaitaki kei na loloma. Niu lesu mai valenivolavola ki vale au sa dau ologi ena ligai watiqu ka rawa ni laurai. Au sa dau sotava na liga ni loloma kei na veitaqomaki ena gauna taucoko ni noqu veiqaravi e Amerika vaka-Latina ena veikidavaki kilai levu, un abrazo se na imoko.
Niu vakasamataka na sala meu rawa ni vakavuvulitaka kina vakavinaka na Veisorovaki vei ira na tani, sa yaga sara kina vakalevu na malanivosa “na liga ni veitaqomaki.” Ni da papitaiso ka ciqoma na Yalo Tabu ena veitabaki ni liga, eda ciqoma e rua na cakacaka vakalotu ka vakaveikilaitaki keda ki na liga ni veitaqomaki. Ni da lako mai ena yalomalumalumu kei na veivutuni e taucoko ki na soqoni ni sakaramede ka vakaivotavota ena sakaramede ena bula kilikili, eda na rawa ni vakila na liga [ni veitaqomaki] oqori ena veigauna kece.
Vakatautauvatataka e dua na Soqoni ni Sakaramede ki na Noda Gauna
Na ikau ni Vunau kei na Veiyalayalati wase 110 e kune kina na lewe ni tiki ni ivolanikalou ka voleka sara ki na kena marautaki na liga ni veitaqomaki. Ena dua na siga ni Vakacecegu ena gauna a vakatabui kina na Valetabu e Kirtland, a vakamacalataka kina na Parofita o Josefa Simici ni ratou sa na qarava tiko na sakaramede, o koya vata kei ira eso tale na matabete ki na Lotu.
Ni oti na cakacaka vakalotu tabu oqo, erau a gole yani ko Josefa Simici kei Oliver Cowdery me rau masu ga vakataki rau. Ni oti na masu a rairai mai na iVakabula vei rau na turaga oqo ka kaya, “Raica sa bokoci na nomudou ivalavala ca; ia dou sa savasava e mataqu; raica mo dou laveta cake na ulumudou ka ia na marau” (V&V 110:5).
Na veika a yaco ena Valetabu e Kirtland ena 1836 e sala vata kei na noda gauna ka vakatautauvatataki kei keda. Ena vei-Sigatabu, o ni dau qarava na sakaramede oi kemuni na matabete gone vei ira na Yalododonu, o ira era dau lako mai ki na soqoni ni sakaramede ena masumasu, ka ra gadreva tu na veivakabulai vakayalo, ka ra nanamaki tu, ka vakamamasu me ra rogoca e yalodra kei na nodra vakanananu na veimalanivosa oqo: “Raica sa bokoci na nomudou ivalavala ca; ia dou sa savasava e mataqu; raica mo dou laveta cake na ulumudou ka ia na marau” (V&V 110:5).
Sa vakadinadinataka o Elder Dallin H. Oaks ni tiko e dua na veivakasavasavataki kei na veivakabulai vakayalo ena sakaramede: “Na sakaramede ni vakayakavi ni Turaga e vakavoui kina na veiyalayalati kei na veivakalougatataki ni papitaiso. Eda sa vakaroti me da veivutunitaka na noda ivalavala ca ka lesu vua na Turaga ena yalo sa raramusumusu kei na yalo e bibivoro ka kania na sakaramede. Ni da sa kania na madrai, eda sa vakadinadinataka ni da sa lomasoli me da taura na yacai Jisu Karisito ka dau nanumi Koya ka muria na Nona ivunau. Ni da vakayacora na veiyalayalati oqo, sa na vakavouya kina na Turaga na mana ni noda papitaiso. Eda sa qai vakasavasavataki kina ka me salavata tiko kei keda na Nona Yalotabu” (“iVakadinadina Uasivi i Karisito,” Liaona, Epe.2001, 14).
Nodra iTavi kina na Matabete i Eroni
Me ra vukei na lewenilotu me ra ciqoma na taucoko ni veivakasavasavataki o ya, se na liga ni veitaqomaki, sa dodonu me ra raica o ira e tu vei ira na idola me ra vakadonuya kei ira me ra qarava na sakaramede ni sa muri na idusidusi raraba ena idusidusi ni Lotu me baleta na kena vakarautaki, masulaki, kei na kena votai na sakaramede. Me nanuma tiko na matabete yadua ni vakaitavi tiko ena vukuna na Turaga ka me vakarokoroko ka veidokai. Meu vosa vakararaba, era sa ivakaraitaki na noda itabagone. Ia, ni qaravi na sakaramede, eda dau raica ena veigauna eso ka vakasosataki ena nodra sa kuitaki tiko ki na isulusulu kei na irairai sega ni rakorako.
Kemuni na cauravou, ni bera na nomuni lako ki lotu, ni yalovinaka ka tu tale mada vakadua ena mata ni dua na iloilo ka tarogi iko se sa rakorako na kemu ituvaki kece sara? E vinaka cake, mo sureta e dua o dau lomana, me vaka e dua na itubutubu, me raici iko tale mada, ke dua beka na ka e se bera tiko ni caka, ni kakua ni besetaka na nodra ivakasala.
O ira na italai dina nei Jisu Karisito era dau isulusulu ka rairai rakorako, ka ra dau vakatayaloyalotaka tikoga e veigauna na Nona ivakatagedegede ka sega na ivakatagedegede vakavuravura. Ni qaravi vakavinaka ka vakamatailalai ena vakadeitaka ni na tiko kina na Yalo ni Turaga. Na nodra isulu se na kedra irairai o ira era qarava na sakaramede e sega ni dodonu me veivagolei tani vei ira era vaqara tiko vagumatua na veivakalougatataki ni Veisorovaki bibi.
E dua na ulutaga ka kunei ena itukutuku nei Peresitedi Monson me baleti keda na matabete, o ya ni sa dua na madigi me tu vei keda na matabete: “Ia e ilesilesi me qaravi, ka itavi bibi me laveti, ka gauna donu me vakalougatataki kina na nodra bula na tani” (“Na Veivakabauti ni Noda Matabete Tabu,” Liaona, Me 2006, 57). Au vakadinadinataka ni sa yaco talega na ka oqo ena kena qaravi na sakaramede.
Vakila na Liga ni Veitaqomaki
Niu veiqaravi voli vakabisopi, au a vakadinadinataka na veivakalougatataki ni Veisorovaki ena nodra bula na lewe ni Lotu ka ra a vakayacora eso na ivalavala ca bibi. Me vaka niu turaganilewa e Isireli au a vakarorogo ki na nodra vakatutusa ia, kevaka e gadrevi, sa dau tau eso na lewa ena vukudra, me vaka na nodra vakuwai mai na sakaramede me dua na gauna.
A veigadivi tiko e dua na cauravou kei na dua na goneyalewa ena neitou tabanalevu. Erau a vakatara me ulabale na nodrau veidomoni. A lako mai vei au me kere ivakasala kei na veivuke. Ni yavutaki ena veika e mai vakatusai kei na veivakauqeti ni Yalotabu vei au, ena maliwa ni veika tale eso, sa sega ni vakatarai me vakayagataka na sakaramede me dua na gauna. Keirau dau sota ena veigauna eso me vakadeitaki ni sa yaco na veivutuni, ia, ni sa oti e dua na gauna, au sa mani vakadonuya tale vua me sa tekivu vakaivotavota tale ena sakaramede.
Niu dabe toka mai cake e gole vua na mataqu ni sa vakaivotavota ena sakaramede ena bula kilikili. Au a vakadinadinataka na liga ni loloma cecere, na loloma, kei na veitaqomaki ni vakavolivoliti koya ena gauna e ragita kina na yalona ka laveta na nona icolacola na veivakabulai ni Veisorovaki, ka basika kina na veivosoti, na sautu kei na marau sa yalataki tu.
Na Veisorovaki—na Kaukauwa ena dau Tikotiko Ga
Au sa sotava ka vakadinadinataka e dua na dina a vakavuvulitaka o Peresitedi Packer: “Ena so na gauna eda dau nanuma ni Veisorovaki nei Karisito ena qai laki yaga ga ni sa vakarau oti na bula vakayago oqo ena veivueti mai na Lutu, mai na mate vakayalo. E uasivia cake sara. Oqo na kaukauwa ka na dau tikotiko ga me da kaciva ena noda bula ni veisiga. Ni da sa tilomi se vakararawataki se yaluma ena noda sa kilai yaloda se bikai, e rawa ni vakabulai keda o Koya. Ni da sega ni kila vakavinaka sara na kena caka na Veisorovaki i Karisito, eda rawa ni vakila “‘na vakacegu ni Kalou ka ‘uasivia na veika kecega e kilai rawa’” (“The Touch of the Master’s Hand,” Liahona, July 2001, 26).
Au lomana na Tamada Vakalomalagi kei na Luvena o Jisu Karisito. Au laiva vua na noqu vakabauta, na noqu loloma, na noqu dina, kei na noqu soli au vei Rau. Au vakadinadinataka ni Tamada Vakalomalagi na Kalou ka da sa Luvena. Au vakadinadinataka ni a yaco dina na Veisorovaki ka sa tiko na kena kaukauwa ena noda bula. Au vakadinadinataka ni dina na kosipeli vakalesui mai. Na dina eso oqo e kunei ena ivolanikalou tabu, vakabibi ena iVola i Momani. Ena yacai Jisu Karisito, emeni.