Baleta Ni a Wilika o Tamaqu na iVola i Momani

Elder Marcos A. Aidukaitis

Ena Vitusagavulu

Au sa sureti ira kece sara era rogoci au nikua me ra wilika na iVola i Momani ka bulataka na yalayala era tiko kina. O ira era na cakava vakakina era na kila ni sa dina na ivola oqo.

iVakatakilakila

Elder Marcos A. Aidukaitis

Ni yadra vinaka, na taciqu kei na ganequ lomani. Au marau vakalevu sara ka doka na noqu mai vosa oqo vei kemuni e nikua. Sa noqu masu vua na Kalou me na dusimaka na noqu vosa ka me na tiko vata kei keda na Nona Yalotabu me rawa kina vei “koya sa vunau kei koya sa vakabauta, erau sa [rawa ni] veikilai yalo; io erau sa [rawa kina ni] veivakavulici ka marau vata” (V&V 50:22).

Sa rawa meu kaya ni ika 2 ni June, 1940, e a dua na siga bibi sara ki na itukutuku ni noqu matavuvale. Ena siga oqo a papitaiso kina o tamaqu ki na Lotu oqo.

A qai vola kina vei tamana, o Elder Jack McDonald, e dua vei rau na daukaulotu ka a papitaisotaki tamaqu ena siga o ya ena nona vosa oqo:

“Ena Sigatabu sa oti a dua dina na siga totoka. Keirau a gole na daukaulotu ki na dua na vanua vagalala e bati ni uciwai, ena sauka ni vanua, e kea oi au [Elder McDonald] kei Elder Jones keirau a vakayacora kina na imatai ni neirau veipapitaisotaki. A sudra yani ki na wai batabata sara o Antony Aidukaitis ka sa lewena kina na Lotu… . A daumaka na veika kece. E ketekete i rabici ko lomalagi, e vakanomodi na sauka ni vanua, ka drokadroka vinaka, ka rui totoka dina ka keirau a vakila kina e dua na veivakauqeti cecere.

“[Ni keitou sa lako tiko] vata kei koya na neitou lewenilotu vou oqo, a kaya o koya ni sega ni vakamacalataka rawa na kena totoka dina vua na siga oqo, ka sa vakila dina ni sa tamata vou… . O ya na imatai ni neirau veipapitaisotaki—ia e sega ni o au se dua tale me na vakacerecerei kina. A saumaki ga vakaikoya.”

Na ka a yaco oqo a veisau kina vakadua na itukutuku ni noqu bula. Au sega mada ni kila ke sa raica beka kina o tamaqu na vuku ni nona cakacaka, ia au lomani koya dina ena veika a vakayacora ena siga o ya. Sa mai mate o koya ena 30 na yabaki sa oti, ia au na dau doka ka vosa vakalougatataka tikoga na yacana.

E dua dina na gone ni Lithuania o tamaqu, ia a sucu ga mai Sikoteladi. A mani toki yani ki Brazil ni se cauravou lailai. Na nona kila na vosa Vakavalagi a vukea na nona saumaki mai, me vaka ga ni rawa ni wilika na iVola i Momani Vakavalagi, ka se bera tu ni vakadewataki rawa ena vosa vaka-Potukali. Na dredre ni veikilai vosa a tarova na nona lewena o tinaqu na Lotu me yacova ni sa oti e vica na yabaki, ia ni sa lewenilotu, e a ivakaraitaki kaukauwa ni yalodina o koya vei ira na tani kei na lomani ni Kalou ena neitou matavuvale. Sa yabaki 92 tiko ena gauna oqo o tinaqu ka tiko oqo nikua. E solia vei au e dua na marau levu niu lomani koya ena cecere ni nona yalodina. Au na doka ka vosa vakalougatataka tikoga na yacana.

Au qoroya na yaloqaqa nei tamaqu me papitaiso rawa ki na Lotu ena gauna a sotava tu kina o koya na veika dredre ena gauna o ya. E a sega ni rawarawa vua. A sega ni papitaiso vata kei koya o watina. A veivakacacani sara vua na kaukauwa ni veitemaki ni gunu kei na kana tavako. E tamata dravudravua. A saqata vakaukauwa o tinana me lewena na Lotu, ka tukuna vua o koya ni kevaka me na papitaiso ena sega tale ni wiliki koya me luvena. Me vaka ni ra se qai 300 wale tikoga na lewenilotu e Brazil, e se bera kina ni tara na Lotu e dua na valenilotu e kea. Au a kurabui dina ena sasaga kei na yaloqaqa nei tamaqu.

E a rawa vakacava vua me vakatulewa vaka o ya ni a sotava tiko e vuqa na veika veivakaleqai? E rawarawa na kena isau: e a baleta ga ni a wilika o tamaqu na iVola i Momani. Ena gauna sa wilika kina, sa kila kina na dina taucoko ni itukutuku ni Veivakalesuimai. Na iVola i Momani sa dua na ivakadinadina ni sa dina Na Lotu i Jisu Karisito ni Yalododonu Edaidai. E vakavulica na Vunautaka na Noqu Kosipeli ni “iVola i Momani, veitomani kei na Yalotabu, sai [koya] na ivurevure kaukauwa ni saumaki” ([2004], 116).

E kaya vakaoqo o Peresitedi Hinckley: “Kivei ira era sa wilika oti [na iVola i Momani] ena masumasu, era vutuniyau se dravudravua, vuli se tawa vuli, ko ni sa qaqaco cake ena kena kaukauwa… .

“… E sega ni vakabekataki, niu sa yalataka oqo vei kemuni ni kevaka mo ni wilika ka masulaka na iVola i Momani, se cava ga na levu ni gauna ko ni sa wilika oti kina ena tadu mai ki yalomuni … na Yalo ni Turaga. Ena yaco mai na inaki qaqa ena salatu ni talairawarawa ki na nona vunau, ka na yaco mai na ivakadinadina e kaukauwa cake ni sa bula dina tiko na Luve ni Kalou” (“The Power of the Book of Mormon,” Ensign, June 1988, 6; raica talega “The Book of Mormon,” Tambuli, Oct.1988,7).

A yaco dina vei tamaqu kei na noqu matavuvale na yalayala oqo. Me vaka ga na veika keitou sa vakavulici kina, keitou sa wilika kina vakamatavuvale na ivolanikalou ena veisiga. Sa vuqa mai na yabaki na neitou vakayacora tiko vakaoqo. Keitou sa wilika oti vakavica e neitou vale na iVola i Momani, ka keitou na tomana tikoga. Me vaka sa yalataki tu, sa tadu mai kina na Yalo ni Turaga ki na uto ni neitou matavuvale, ka keitou vakila e dua na inaki qaqa ena salatu ni talairawarawa ki na Nona vunau kei na dua na ivakadinadina e kaukauwa cake ni sa bula dina tiko na Luve ni Kalou.

Ena gauna ko ni sa kila kina ni sa dina na iVola i Momani, ko ni na kila vakakina ni sa kacivi mai vua na Kalou o Josefa Simici me vakalesuya mai na Lotu i Jisu Karisito ki vuravura. Ko ni sa kila ni a raica o Josefa Simici na Tamana kei na Luvena. Ko ni sa kila ni sa dua ga na vakabauta ka dua ga na veipapitaisotaki e dodonu. Ko ni sa kila ni bula tiko e dua na parofita ni Kalou e vuravura e nikua ka sa tu vua na idola kece ni matabete kei na dodonu me ra veiqaravi kina, me vaka a vakayacora o Pita ena gauna makawa. Ko ni sa kila tiko ni o Jisu Karisito na Luve ni Kalou, na yaca duadua ga ko ni na vakabulai kina. Ko ni sa kila tiko ni sa bula tiko na Kalou na Tamada ka sa lomani keda o Koya. Ko ni sa kila tiko ni sa uasivi sara na Nona yavu ni veivakabulai, ka sa tu vei kemuni na gagadre mo ni vakayacora na cakacakatabu vakalotu, bulataka na ivakaro, ka vosota me yacova na ivakataotioti.

Au dau rarawa ni gauna e soli kina vua e dua na iVola i Momani ka vakamacalataki vua na itukutuku oqo e se bese tikoga ni wilika. Au rarawataka ni so era vakatara me ra vakauqeti mai vei ira na tani, ka ra sega ni via vakadikeva na ivola, ka ra mani vakawalena tu ga me vaka e dua na ka e sega tu ni yaga, ka sega ni vakaitavi me ra kania na kakana vakayalo e tiko kina. Kivei au, oqo e sega ni vakamacalataki rawa. Sa vaka e dua na cauravou se goneyalewa, sa veitawasei kei tamana dauloloma, sega ni via wilika e dua na ivola mai vua ka sega mada ga ni bau dolava na waqana. O ira era digitaka na itovo oqo era sa vakataki ira na gone era dau vakademeni era sega mada ga ni via kania na kakana bulabula ka totoka e vakarautaka vakavinaka vei ira o tinadra dauloloma.

Na Kalou e vakaraitaka na Nona dina kevaka era na muria na tamata na vakamamasu nei Moronai ena Moronai 10:3–5. Na Vunautaka na Noqu Kosipeli e vakamacalataka vakalekaleka na ivakasala nei Moronai vakaoqo:

iMatai, “wilika na iVola i Momani qai vakasamataka na kena itukutuku me baleti Jisu Karisito.”
iKarua,“masuta na Kalou ena vakabauti Jisu Karisito mo rawata kina e dua na ivakadinadina ni sa dina na iVola i Momani ka sa parofita ni Vakalesui mai o Josefa Simici.”
iKatolu, “masu ena yalodina kei na vakanuinui vinaka, sa kena ibalebale ni ko ni sa nakita mo ni cakacakataka na isau e ciqomi mai vua na Kalou” (111).

Kivei ira era na veiletitaka ni da sega ni rawa ni kila na veika oqo, au sa vakadinadinataka ni da rawata, ni da sa yalomalua sara ka vakayacora na veika sa vakasalataka mai na Kalou kivei keda mai vei ira na Nona parofita ena vuravura oqo. Kevaka me da qai vakatitiqa kina eda sa qai ciqoma na vakasama lasu o ya ni Kalou sa sega ni kila na vanua me kunei kina na dina se sa sega vua na kaukauwa me vakatakila mai vei keda. E sega ni kena ibalebale ni dua sa sega ni cakava na veika sa yalataki tu ena ivola oqo sa na sega sara kina ni ra cakava na tani.

Na cava na vuna au lomana ka doka kina na yacai tamaqu? Baleta ni o tamaqu a wilika ka cakacakataka na yalayala ni iVola i Momani. Na cava na vuna au lomana ka doka kina na yacai tamaqu? Baleta ni a sega ni vukitani mai na isau a ciqoma, ena gauna mada ga a bolei vakalevu kina na nona bula. Na cava na vuna au lomana ka doka kina na yacai tamaqu? Baleta ni a vakalougatataka o koya na noqu bula, ni se bera mada ga niu sucu, ena nona yaloqaqa me vakayacora na veika e vinakata vua na Kalou me cakava.

Au sa sureti ira kece sara era rogoci au nikua me ra wilika na iVola i Momani ka bulataka na yalayala e tiko kina. O ira era na cakava vakakina era na kila ni sa dina na ivola oqo.

Au sa vakadinadinataka ni iVola i Momani sa vosa ni Kalou. Ena vuku ni ka oqo, au sa kila kina ni o Josefa Simici sa parofita ni Kalou. Au kila ni a sega ni vola o koya na iVola i Momani ia a vakadewataka ena kaukauwa ni Kalou. Au sa kila kina ni o Thomas S. Monson sa parofita ni Kalou e vuravura edaidai, sai koya duadua ga e tiko vua na idola taucoko ni matabete kei na dodonu me cakacaka kina. Au kila ni ko Jisu Karisito sa noda iVakabula ka sa bula tiko. Au kila ni bula tiko na Kalou ka sa dau lomani keda. Ena yaca i Jisu Karisito, emeni.