E Lomani Ira ka dau Vukei Ira Kece na Luvena na Kalou
Eda gadreva na veivuke ni Tamada Vakalomalagi. Na veivurevure bibi ni veivuke oqo e yaco mai na nodra veiqaravi na tamata vei ira na wekadra, ena masu kei na nodra vakanamata vei Karisito.
E dua na dina e taucoko ka taumada ni Veivakalesuimai sa ikoya ni bula na Kalou ka tiko mai na Nona lomalagi, ni o Koya na tamata vakacerecerei ka tiko na “yagona vakalewe kei na sui,”1 ni sa ikoyakoya tikoga e nanoa, nikua, ka tawamudu, o Koya na Kalou sega ni dau veisau,2 na ivurevure ni bula dodonu kei na dina kecega.
O Atama kei Ivi sai rau na imatai ni luvena vakayago ena vuravura oqo. Ena nodrau buli a kaya kina o Koya: “Ia koi Au na Kalou au sa bulia na tamata me itovo vata kei au, io au sa buli koya me itovo vata kei koya na noqu Le Duabau Ga; raica au sa bulia na tagane kei na yalewa.”3
Na dina e laveta cake na matavuvale vakatamata. Na tagane kei na yalewa era sa ibulibuli vakasakiti ka tu vei ira na itovo ni bula vakalou. Ena gauna ni Veibuli, a biuta na Kalou vei Atama kei Ivi na kaukauwa vakalou me rau vakasucuma na gone ena kedrau ivatuka. O koya, eda sa vaka kece kina na Kena ibulibuli.
Eda sa dau sotava kina na malumalumu kei na veika rerevaki. Na tauvimate, na qase, kei na mate era na sega ni levei. Na dredre kei na mosi ni yalo era tiki ni ilakolako ni bula oqo. Na gagadre yadua, na gagano, kei na lomada era sa dau cikevaka me ra vakamarautaki.
Ena vuku ni veika kece oqo kei na so tale, eda gadreva na veivuke ni Tamada Vakalomalagi. E dua na ivurevure bibi ni veivuke oqo e yaco mai ena nodra veiqaravi na tamata vei ira na wekadra.4 Na ivakaro o ya, me da” lomana na kai noda me vakataki keda.”5 Ni da veitacini ka veiganeni, eda sa “veiwekani” kecega, e dina ni da dui tutu ena so na gauna ena veiyawaki ni vanua eda tu kina, na itovo vakavanua, na lotu, se na matatamata. E kaya na Parofita ko Josefa, “Na tamata sa vakasinaiti tu ena loloma ni Kalou, ena sega ni vakacegui koya na nodra vakalougatataki walega na nona matavuvale, ia me tara yani na vuravura taucoko, ka lomana me vakalougatataka na kawatamata kece sara.”6 Sa biuta na Turaga na kena ivakaraitaki, ni “Sa kitaka ga ko koya na ka vinaka vei ira na luve ni tamata; … sa sega ni bureitaka vua e dua sa lako mai vua, io na tamata loaloa kei na tamata vulavula, na bobula kei na itaukei, tagane kei na yalewa; a sa nanumi ira na veimatanitu; era sa tautauvata kecega ena mata ni Kalou.”7
Me da qaravi ira na tani ena nona sala na Turaga, eda segata taumada me da qaravi keda ka solibula me da vukei ira era gadreva tu na veivuke. O ira na dravudravua era cakacakataka na veika era rawata ka segata talega na nodra tiko vinaka na tani.8 Na ivakarau oqo sa tu vata kei keda mai na ivakatekivu.9
Na ituvatuva ni welefea ni Lotu e vakaraitaka na ivalavala vakalou oqo, ka ra muria na lewe ni Lotu yalodina. Na nodra isolisoli e rawa kina na veivuke vei ira na dawai, vukei na luveniyali, kei na ivakaruru vei ira na kune rarawa.
Ena vica na yabaki sa oti, a sikovi Salt Lake City e dua na vakaitutu cecere mai Jaina, ka sarasara ena veivanua e taukena na Lotu, a vosa ena Brigham Young University. Ena noqu vulica na veiparokaramu ni Lotu, e kaya, “Kevaka me vaka kece tu oqo na noda veilomani, ena vanua vinaka cake sara na vuravura.”
E dreta na nona vakasama na lolo kei na soli ni isau ni rua na kana me ra vukei kina na dravudravua. Ni tini na nona veisiko ena Lomanibai ni Welefea, a solia vua na manidia mai kea e dua na waqanivola damudamu lailai—e dua na “taga damudamu.” Mai Jaina, e dua na “taga damudamu” e dau soli me ivakadinadina ni loloma, veivakalougatataki, kei na vakanuinui ni kalougata. “E sega ni levu,” e kaya na vulagi, “ia sa ikoya na ilavo au vakabula ena noqu sega ni katalau ena rua na mataka. Au vinakata meu solia na noqu isolisoli ni lolo ki na parokaramu ni Welefea ni Lotu.”10
Na ituvatuva vaka-welefea ni Lotu e vakauqeta na Kalou. Na kena ivakavuvuli era sa tiki bibi sara ni nodra vakabulai na tamata.11 Oqo na ivakatakilakila ni veiqaravi, na ivakadinadina ki vuravura ni sa vakalesui mai na Lotu i Jisu Karisito. Oqo na veivuke vakalomalagi ena veisala cakacakataki eso. Sa kaya kina o Peresitedi Thomas S. Monson: “Na ivakavuvuli ni welefea … e sega ni veisau. Era na sega ni veisau. Era dina vakatakilai mai.”12
E dua tale na sala me da ciqoma kina na veivuke ni Kalou sa ikoya na masu. Eda sa vakaroti me da masu vua na Kalou, na Tamada, ena yacai Jisu Karisito. Na ivakasala sa ikoya, “Kerekere, ka na soli vei kemudou; vakasaqara, ka dou na kunea; tukituki, ka na dolavi. ”13 Sa dau sauma na Tamada Vakalomalagi na masu ena yalodina.
Me vaka ni parofita ni Turaga, sa veivakasalataki o Peresitedi Monson: “Ena so na gauna na kena irairai sa vaka e sega ni dua na vanua me da na basika rawa kina—e sega ni malawa rawa na mataka me curubasikata na butobuto ni bogi… . Eda nanuma ni da sa guilecavi, mosi na yaloda, ka galili. Kevaka o ni raica ni o ni sa tu ena dua na vanua vakaoqori, au kerei kemuni mo ni goleva na Tamada Vakalomalagi ena vakabauta. Ena laveti kemuni o Koya ka tuberi kemuni. Ena sega ni dau kauta tani mai vei kemuni na nomuni rarawa, ia ena vakacegui kemuni ka tuberi kemuni ena loloma ena cava kaukauwa kecega o ni sotava. ”14
Ena veigauna eso ni leqa, eda dau goleva e dua na ivakarau ni masu ka rawa ga ni ra dau vakayagataka o ira e vakadonui me ra veiqaravi ena vukuna na Kalou. Sa lako voli ko Jisu Karisito ka “vakabulai ira na tauvimate, vakaturi ira tale na mate,”15 ka laveta cake na yalo sa rarawa. Ni sa Vakalesui mai na kosipeli sa lako vata mai kei na kaukauwa ni matabete kei na dodonu me tomani tikoga kina na tiki ni nona cakacaka oqo na Kalou.16
Ni sa tauvimate e dua se vakaleqai vakaca, “dou kacivi ira na qase ni isoqosoqo lewe ni lotu; ia me ra masulaki koya ka walia ena waiwai ena yaca ni Turaga: ia na masu ni vakabauta ena vakabulai koya na tauvimate, ka na vakabulai koya na Turaga.”17 O ira na italatala qase yalodina era sa lesi me ra cakava na veika ena cakava tiko na Turaga kevaka a tiko voli eke.18
Kevaka beka me a dau volai tu na levu ni masu a saumi, ena sega ni vakatawana rawa ko vuravura na kena levu. Mai vei Elder Glenn L Rudd, e dua na Vakaitutu Raraba vaka-Emeritesi ka itokani lomani, e basika kina na ivakadinadina vakamareqeti oqo:
“Au taura e dua na qiri ka tukuni kina vei au ni sa curu bibi tiko e valenibula e dua na lewe ni matavuvale, e dua na goneyalewa yabaki 12 ko Janice na yacana. E vinakata o tinana me soli vua e dua na veivakalougatataki ni matabete.
“Keirau a lako ki valenibula kei Elder Cowley. Keirau qai laki rogoca kina na itukutuku ni nona vakacala ka. A coqai Janice e dua na basi ni koro levu, e qiqica na uluna kei na yagona na taya tabeirua e muri.
“Keirau curu yani kei Elder Cowley ki na rumu e davo no kina o Janice. E kavoro na vurena, mavoa sara vakaca na tabana, e vica vata na sui e ramusu, ka mavoa vakaca na nona qavokavoka ka na sega ni rawa ni vakavinakataki. Ia, e lomai keirau me keirau qaravi koya ka vakalougatataki koya. Au lumuti koya ena waiwai, ka qai vauca na veilumuti o Elder Cowley. Ena dua na ivalavala kaukauwa ka qaqa a vakalougatataki koya me bula vinaka mai ka taucoko, ka me sega na veisau ena nona bula. E vakalougatataki koya me na bula mai ka sega ni dua na revurevu tudei ni nona mavoa. Sa dua na veivakalougatataki cecere ka vakasakiti dina.”
A tomana o Elder Rudd ena nona kaya: “E sega ni rawa vei Janice me yavalata e dua na tiki ni yagona me rauta ni sivia e dua na vula. E sega vakadua ni malumalumu na neitou vakabauta. Sa cavuti e dua na veivakalougatataki me na bula vinaka tale ka sega ni dua na revurevu tudei ni nona mavoa me yaco vua.”
A tinia o Elder Rudd: “Sa oti e vica vata na yabaki mai na gauna ni veisiko ko ya. Keirau a veitalanoa kei Janice ena dua na gauna lekaleka sa oti. Sa yabaki 70 ena gauna oqo, e tinadratou e 3 na gone, ka budra e le 11. Me yacova mai na gauna oqo e sega vakadua ni bau yacovi koya e dua na revurevu ca ni nona vakacala ka.”19
Na nona, e dua mai vei ira e vuqa na veivakabulai vakaoqo. Ia e sega ni dua e tu me ivakadinadina cecere cake ni sala e vukei ira kina na Luvena na Tamada Vakalomalagi ena masu kei na kena a yaco ena rumu ni valenibula ko ya, vei Janice yabaki 12 kei na rua na italai yalomalumalumu ni Kalou, rauta ni 58 na yabaki sa oti.
Na ituvaki ni nona veivuke na Tamada Vakalomalagi e yaco vei keda mai vua na Luvena, “ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua sa vakabauti koya, me ra rawata ga na bula tawamudu.”20
Sa ka rokovi cecere ka dokai meu wasea na noqu ivakadinadina ni Turaga ko Jisu Karisito. Niu vakayacora vakakina, au nanuma na kena bibi me da dau qarauna na noda vakayagataka na Yacana. Ni vakavuna na noda lomani Koya na nona veivakauqeti, ivakavuvuli, kei na nona veivakabulai, ena vinaka vei keda kevaka eda sega ni dau tukuni Koya me vaka na noda tukuna na noda itokani ena vale kadua.
O koya na ulumatua ni luvena vakayalo na Tamada. Sa vakayacora na veika kece sa lesi tu Vua—io na veika kecega sa vakarokorokotaki Koya ka vakadinadinataki Koya.21 A tukuna vei ira na parofita makawa na veika me ra vola ka vakaraitaka na Lomana vei koya na Nona parofita nikua—ka qai vakataucokotaka na nodra veivosa yadua.22
Ni Luvena na Kalou, a sucu o Koya mai vua na goneyalewa ko Meri, vakadruka na mate, sorovaka na ivalavala ca ni vuravura, ka kauta mai na veivakabulai vei ira na bula kei ira na mate. Me vaka ni noda Turaga sa vakaturi cake tale, a kania ko Koya na ika kei na oni vata kei ira na iApositolo kei ira na lewevuqa era sureti ena iwase ni vuravura ruarua me ra vakila na mavoa e Ligana, yavana kei na sarisarina me rawa kina vei keda kece me da kila ni sa iKoya na Kalou ni Isireli—O Koya na Karisito bula.
Vei keda kece sa tukuna o Koya:
“Koi au na tucake tale, kei na vu ni bula: o koya sa vakabauti au, kevaka sa mate, ena bula ga:
“Ia ko koya sa bula ka vakabauti au ena sega sara ni mate.”23
O Koya ena noda Daunilawa ka Turaganilewa, na Dauveivueti ni vuravura. Ena iKarua ni Nona Lako mai, “ena vakatau ki vei koya na lewa; ena vakatokai na yacana, ko Veivakurabuitaki, na iVakavuvuli, na Kalou Kaukauwa, na Tama ni Gauna Tawamudu, na Tui ni Sautu.”24 Na veika oqo au vakadinadinataka ena yaca tabu duadua i Jisu Karisito, emeni.