Elder Jay E. Jensen
Ena Mataveiliutaki ni Vitusagavulu
Ni oti e vica na siga ena nona walia tiko e dua na leqa ena gauna e veiqaravi tiko kina vakape resitedi ni Tabana ni Kaulotu na Colombia Cali, a nanuma lesu o Elder Jay Edwin Jensen, ka se qai kacivi walega ki na Mataveiliutaki ni Vitusagavulu, na nona cega na nona ivolanikalou ena nona vuka lesu tiko ki na itikotiko ni kaulotu.
A dreta na nona vakasama e dua na laini mai na Vunau kei na Veiyalayalati: “Mo nanuma talega na vosa ni yalayala ka a tukuni vei iko.”
“Ena noda bula taucoko eda na sotava na veika dredre, ia e vaka ni tukuna tikoga vei au na Turaga ni kena yalayala ena dau cecere cake tikoga ena veigauna kece sara,” e kaya ko Elder Jensen.
A tekivu vulica na yalayala ni Turaga o Elder Jensen mai vei rau o Ruel Whiting kei Ethel Otte Jensen, na nona itubutubu. A sucu mai Mapleton, Utah, Amerika, ena 5 ni Feperueri, 1942, e ika 6 o koya vei iratou e lewe 10 na gone ena dua na matavuvale “ka a bulataki ka vakavuvulitaki kina na kosipeli,” e kaya.
Ni oti na nona veiqaravi ena Tabana ni Kaulotu na Spanish American mai na 1961 ki na 1963, a vakamautaki Lona Lee Child ena 1 ni Noveba, 1963, ena Valetabu mai Manti e Utah. Erau nodratou itubutubu e ono na gone. A rawata na nona diqiri ni bejila, masita, kei na doketa mai na Brigham Young University.
Ni oti na nona veivakavulici ena seminari, a cakacaka vakadairekita ni lewenivuli me baleta na seminari kei na inisitute ni lotu, dairekita ni veituberi ena Tabacakacaka ni Kaulotu, ka dairekita ni veika vakaivolanikalou me baleta na Tabacakacaka ni Lewenivuli ena Lotu.
Sa veiqaravi oti o Elder Jensen vaka: bisopi, daunivakasala ena mataveiliutaki ni Provo MTC, lewe ni matabose e cake, iliuliu ni ilawalawa ni bete levu, peresitedi ni Cauravou, qasenivuli ni Matawilivola ni Sigatabu, ka peresitedi ni kaulotu. A kacivi o koya ki na iKarua ni Kuoramu ni Vitusagavulu ena ika 6 ni June, 1922, ka vakakina ena iMatai ni Kuoramu ni Vitusagavulu ena ika 1 ni Epereli, 1995.
Na veika sa vulica mai na nona bula ni veiqaravi e vakavotukana ena veika a sotava o ya ena ivolanikalou ena gauna a peresitedi voli kina ni kaulotu. “Sa gata na vosa ni Kalou,” e kaya ko koya (raica na Alama 31:5). E nuitaka ko koya, me vaka e vakayacora ko Kitione ena iVola i Momani, “ni sa yaga” na nona vosa vua na Tui kei ira na lewe ni Nona matanitu (Mosaia 22:4).