Na Sala
E dua ga na sala ki na marau kei na veivakataucokotaki. Ko Jisu Karisito na Sala.
Ko Jisu Karisito, Na Alifa kei na Omeka na iVakatekivu kei na iVakataotioti
“Ena ivakatekivu sa bula ko koya na Vosa, a rau sa tiko kei na Kalou ko koya na Vosa, a sa Kalou ko koya na Vosa… .
Sa tu vei koya na bula; ia na rarama ni tamata na bula.”1
E kaya o Koya: “Koi au na Alifa kei na Omeka, na Karisito na Turaga; io koi au na ivakatekivu kei na ivakataotioti, na iVakabula kei vuravura.”2
E kaya o Koya: “Ko koya ena gunuva na wai kau na solia vua ena sega sara ni viagunu; ia na wai ka’u na solia vua ena tu ena lomana me mata ni wai sa tovure ki na bula tawamudu.”3
E kaya o Koya: “Koi au na madrai ni bula: ko koya sa lako mai vei au, ena sega ni viakana, ia ko koya sa vakabauti au ena sega ni viagunu tale.”4
E kaya o Koya: “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”5
E kaya o Koya: “Oi au na vu ni tucake tale, kei na vu ni bula: ko koya sa vakabauti au, kevaka sa mate, ena bula ga:
“Ia ko koya sa bula ka vakabauti au ena sega sara ni mate.”6
E kaya o Koya: “Oi au na sala, kei na vu ni dina, kei na vu ni bula: sa sega ni torovi Tamaqu walega e dua na tamata, ena vukuqu ga.”7
Ko Jisu Karisito na Sala. O Koya na Rarama kei na Bula, na Madrai kei na Wai, na iVakatekivu kei na iVakataotioti, na Tucake Tale kei na Bula, na iVakabula kei vuravura, na Dina kei na Sala.
E duabulu na sala ki na marau kei na vakataucokotaki. Sa iKoya na Sala. Na veisala kece tale, se sala cava ga, se na mataqali sala cava tale, sa ka lialia.
Sa dulaka tu e dua na tobu ni wai bula. Me da na gunuva ka sega ni viagunu tale, se me da kakua ka da viagunu tikoga ena noda lialia.
Sa ikoya na Madrai ni Bula. Me da kania ka sega ni viakana tale, se me da kakua ka qai viakana tu ga ena noda lialia.
Sa iKoya na Rarama kei vuravura. Me da muri Koya ka matata na noda rai, se me da kakua, ka qai mataboko ka tu ga ena butobuto ena noda lialia.
Sa iKoya na Tucake tale kei na Bula. Sa kaya ko koya: “Na vosa kau vosataka vei kemudou sa vakayalo, ka sa vu ni bula.”8 Me da vuli Vua ka rawata vakalevu sara9 na bula se me da kakua ka mate ga ena noda lialia.
O Koya na iVakabula kei vuravura. Me da ciqoma na veivakalougatataki ni Nona veisorovaki ka yaco me savasava ka savavuka sara, ka kilikili me da taura na Yalona se me kakua ka da qai tu duadua ka dukadukali tu ga ena noda lialia.
Sa iKoya na Sala.
Me Kakua na Kalou Tani
“Keimami vakabauta na Kalou, na Tamada Tawamudu, kei na Luvena ko Jisu Karisito, kei na Yalo Tabu.”10 Na ituvatuva nei Tamana sa taura ka cakacakataka na Luvena me rawa ni tiko kina vata kei keda na Yalo ni Yalo Tabu. Na sala nei Tamana sa ikoya na sala nei Luvena. Sa kaya ko Koya: “Me kakua vei iko na kalou tani koi au duadua ga.”11
Na Kalou duadua ga e rawa ni vakalougatataki koya. Na Kalou duadua ga e rawa ni tokoni keda tiko. O Koya duadua ga e rawa ni vakavuna me tatuki tiko na noda uto ka solia vei keda na icegu, o Koya duadua ga e rawa ni maroroi keda ka taqomaki keda O Koya duadua ga e rawa ni vakaukauwataki keda me da colata rawa kina na icolacola ni bula. O Koya duadua ga e rawa ni solia vei keda na kaukauwa, na kila ka, na sautu kei na reki. O Koya duadua ga e rawa ni vosota na noda ivalavala ca. O Koya duadua ga e rawa ni vakabulai keda. O Koya duadua ga e rawa ni veisautaki keda ka bulia e dua na tamata yalo vakalou. O Koya duadua ga e rawa ni kauti keda lesu ki na Nona iserau. Ena cakava o Koya na veika kece oqori kei na vuqa tale kevaka walega eda dau nanumi Koya ka talairawarawa ki na nona ivakaro. Na cava tale me da na qai cakava? Eda na nanumi Koya ka muria na Nona ivunau. Sa ikoya duadua ga oqori na ka yalomatua eda rawa ni vakayacora.
Ko Jisu e Veipapitaisotaki ena Yalo Tabu
E tukuna o Joni na Dauveipapitaisotaki ni veipapitaisotaki ena wai o koya, ko Jisu sa lako mai me veipapitaisotaki “ena Yalo Tabu.”12
E sega tale ni dua na ka ena bula oqo e cecere cake na kena yaga mai na isolisoli cecere ni Yalo Tabu. Oqori na ivurevure ni reki, na sautu, na kila ka, na kaukauwa, na loloma, kei na veika kecega e vinaka. Ena Veisorovaki, sa ikoya oqori na kaukauwa e rawa ni da veisautaki kina ka vakaukauwataki kina mai na noda malumalumu. Na matabete, sa ikoya na kaukauwa era vauci vata tawamudu kina na veiwatini kei na matavuvale.13 Sa iKoya na kaukauwa ka vakaraitaki Koya kina na Turaga vei ira era sa vakabauti Koya.14 Na veika vivinaka kece e vakatau ena noda rawata ka maroroya na kaukauwa ni Yalo Tabu ena noda bula. Na veika kece tale ena vakatau kina.
Ena inaki oqori a curuma kina ko Jisu Karisito e dua na were ka vakatokai ko Kecisemani, ka vakadruka kina na ivalavala ca ena vukuda. A taura Vua na noda ivalavala ca. A sotava na itotogi ni noda cala. A sauma na isau ni noda vuli. Au sega ni kila se a cakava vakacava na veika a cakava. Au kila walega ni a cakava ko Koya ia ni a cakava ko Koya, sa rawa kina vei iko kei au me daru vosoti ena nodaru ivalavala ca me rawa ni daru vakalougatataki kina ena Nona kaukauwa. Na veika kece tale ena vakatau kina. Na cava beka me daru cakava? E daru na taura me [noda] na yaca [ni] Luvena, ka dau nanumi koya tikoga ka muria na nona ivunau sa solia vei [kedaru]; me rawa ni dau tiko ga kina kei [kedaru] na nona Yalotabu.15 Na veika kece tale ena vakatau kina.
“E Rawarawa na Noqu iVua ka Mamada na Noqu iColacola”
E dua na vakasama kilai levu ka totoka vakatamata sa ikoya me da bulataka na bula ena noda dui ivakarau ga, cakava ga na nomu ka vakataki iko, lewai iko ga, ka kakua ni laiva me ra tukuna vei iko na tani na veika mo cakava.” Sa kaya na Turaga, “Koi au na sala”16 E kaya o Koya: “Muri au.”17 E kaya o Koya: “A cava na ivalavala sa kilikili kei kemudou? Au sa kaya vakaidina vei kemudou, mo dou vakataki au.”18
Kakua ni nanuma ni o na sega ni rawata. De da na vakacalai ena noda vakabauta ni da na sega sara ni rawa ni muri Koya baleta ni sa rui cecere sivia na ivakatagedegede ni Nona bula ka kena irairai ni da na sega ni yacova rawa. Eda na nanuma beka ni sa rui dredre, rui cecere, sa rui sivia ka da na sega ni rawa ni yacova, ena gauna mada ga oqo. Kakua sara ni vakabauta oqori. Ni cecere duadua na nona ivakatagedegede na Turaga, kakua sara ni nanuma ni ra na rawata ga e lewe vica wale era sa digitaki ka ra rawa ni rawata.
Ena gauna duadua oqo ena vakacalai keda kina na veika eda sotava ena bula oqo. Ena bula qo eda vulica kina ni veika cecere duadua ena sasaga vakatamata era dau ka dredre duadua, ka ra na rawata ga e lewe vica. Na cecere ga ni ivakatagedegede na lailai ni tamata ena rawata.
Ia e sega ni vakakina eke, baleta ni sega ni tauatauvata kei na veika kece eda sotava ena bula oqo, oqo e sega ni sasaga vakatamata, ia na cakacaka ni Kalou. E cakacaka ni Kalou ka sa Nona “lagilagi … me tucake tale mai na mate na tamata kecega ka rawata na bula tawamudu.”19 Ena sega tale ni dua na ka me tautauvata kaya. Se vanua cava ga. Ena sega sara.
E sega tale ni dua na isoqosoqo, na ituvatuva, parokaramu se ivakarau e vakabasikata mai na tamata e rawa ni yacova na kaukauwa veivueti ka dau vakavu veisau ni Veisorovaki i Jisu Karisito kei na isolisoli ni Yalo Tabu. Ia, baleta ni sa cecere duadua na nona veisureti na Turaga me da muri Koya, e rawa kina ni rawata na tamata kecega, e sega ni baleta ni da rawata vakataki keda, ia e baleta ni rawata o Koya, ka baleta ni rawa ni vakavuna o Koya na noda rawata. “Keimami vakabauta ni na vakabulai na tamata kecega ena Veisorovaki nei Karisito, [o ira kece sa bula kei ira sa mate] sa rawa me ra na vakabulai ena muri ni lawa kei na cakacakatabu vakalotu ni Kosipeli.”20
E sega ni dredre na nona sala na Turaga. Na bula e dredre, e sega ni kosipeli. “Sa tu na veibasai ni ka kecega”21 e veivanua kecega, me baleta na tamata kecega. E dredre na bula vei keda kecega, ia e rawarawa talega na bula. E rua ga na noda digidigi.22 E rawa ni da muria na Turaga ka vakalougatataki ena Nona kaukauwa ka rawata na sautu, na rarama, na kaukauwa, na kila ka, na yalodei, na loloma, kei na reki se e rawa ni da lako ena dua tale na sala, dua ga na sala e rawa, se sala cava ga, ka lakova duadua—sega kina na Nona veitokoni, sega kina na Nona kaukauwa, sega kina na veidusimaki, ena butobuto, yakusurasura, lomalomarua, na rarawa kei na yaluma. Kau na taroga, na sala cava e rawarawa?
E kaya o Koya: “Dou lako mai vei au, koi kemudou vakayadua ga sa oca ka colata na icolacola bibi ia kau na vakacegui kemudou.
“Vakataqara vei kemudou na noqu ivua, ka vuli vei au … dou na kunea kina na vakacegu ni yalomudou.
“Ni sa rawarawa na noqu ivua ka mamada na noqu icolacola.”23
E sa dredre na bula, ia na bula e rawarawa. Lako ena sala ka kua kua sara ni guce. Kua sara ni guce. Mo toso tikoga. O na sega ni soro ia o na rawata ga.
E dua ga na sala ki na marau kei na veivakataucokotaki. Ko Jisu Karisito na Sala. Na veisala kecega, dua ga na sala e rawa, se sala cava tale sa ka lialia.
Au vakadinadinataki Koya, io o Jisu Karisito, ni o Koya na Luve ni Kalou bula, sa iKoya na Madrai ni Bula, sa iKoya na Dina, sa iKoya na Tucake tale kei na Bula, sa iKoya na iVakabula kei na Rarama kei Vuravura. Sa iKoya na Sala, na Sala duadua ga.
Me da yalomatua ka muri Koya. Ena Yacana tabu, io ko Jisu Karisito, emeni.