Vakavulici ni Kosipeli—Na Noda iLesilesi Bibi Duadua
Na gauna eda vulica kina e vica na ivakavuvuli taumada ni veivakavulici kei na vakaraitaki ni kena icakacaka, eda na rawa ni cakava kece sara.
Wale tikoga oqo keirau a nanuma kei Sisita Oswald me keirau vakavulici rau na makubui keirau drua yalewa, yabaki 5, ena lade dali. Na lade dali e dua na qito ni gone ka ra dau ladeva kina na vakaitavi e dua na dali ena gauna e lako mai kina e ruku ni yavadra ka laki ulabaleta sobu mai na uludra. Ni oti eso na ivakasala rawarawa sara, erau a tovolea ruarau yani na goneyalewa, ia erau sega ni rawata ena nodrau tovolea tiko vakavica.
Gauna sara ga keirau sa via soro mai kina, rau tavali sara mai e rua na gone qase cake e yasanivale ka keirau vakadonuya sara nodrau veivuke. Rau a kenadau ruarua sara ga ena lade dali na goneyalewa e yasanivale ka rau vakaraitaka sara vei rau na makubui keirau na kena icakacaka. Ena gauna erau ladeva kina na dali, au raica ni rau lagata tiko e dua na sere na goneyalewa e yasanivale ka vukei rau ena lakovata ni dali ka wiricaki tiko.
Ena gauna ga rau sa kila vinaka mai kina na makubui keirau na ivakavuvuli ni lade dali ni sa mai vakaraitaki oti vei rau, sa rawarawa sara na vo ni lesoni. Ena so ga na vakatovotovo lalai, rau sa voleka sara yani me rau kenadau ena ivakatagedegede ni lade dali.
E dua tale na makubui keirau, yabaki tolu walega, a dabe toka ena rara e mata ni vale ka vakadidike galugalu toka, ena gauna ni vuli lade dali. Ena gauna a tarogi koya kina e dua se na via tovolea me lade dali, a deguvacu, toso mai ki liu, ka mai tu e yasa ni dali. Keirau a kurabuitaka vakalevu sara, ena nona lade me vakataki rau sara ga na ganena ena gauna keirau wiricaka kina na dali. A lade vakadua, vakarua, vakadua tale, ka vakadua tale, ka lagata tale tikoga ena domolevu na sere vata ga era a lagata tiko na gone qase cake.
Ratou a dikeva kece na makubui keirau ni tiko e dua na iwalewale ni ladevi ni dali. Oqo e dua na ka rawarawa sara ka ratou rawata rawa kece ni oti nodratou vulica e vica walega na kena ivakavuvuli rawarawa kei na vakaraitaki ni kena icakacaka. Sa vakakina ena vakavulici ni kosipeli. Na gauna eda vulica kina e vica na ivakavuvuli taumada ni veivakavulici kei na vakaraitaki ni kena icakacaka, eda na rawa ni cakava kece sara.
E dau vakavuqa nona vakadreti keda o Peresitedi Boyd K. Packer ni “oi keda kece—iliuliu, qasenivuli, daukaulotu kei na itubutubu—sa bolei keda tu ena noda bula taucoko na Turaga me da vakatavuvulitaka ka vulica talega na ivunau ni kosipeli me vaka na kedra vakatakilai mai vei keda.”1 Me vaka a vakaraitaki vakarawarawa mai vei Elder L. Tom Perry, “Sa gadrevi ena veilesilesi kece sara ena Lotu e dua na qasenivuli e laulau nona veivakavulici.”2
Me vaka ni lewenilotu vakayadua e qasenivuli ka “sa iusutu ni veika kece eda vakayacora na veivakavulici,”3 sa dua kina na noda itavi vakalou na vulici ni veivakavuvuli taumada ni veivakavulici. E vuqa sara tu na ivakavuvuli ni veivakavulici kei na vuli, ka sa sega ni rauta me da wilika wale tu ga. iMatai, e gadrevi me da kilai ira vinaka na ivakavuvuli taumada oqo, kei na kena ikarua, e gadrevi me vakaraitaki vei keda na iwalewale ni kedra vakayagataki mai vei ira na noda qasenivuli vivinaka. Ena rawa ni vakayacori ena noda vakadikevi ira sara vakavinaka na qasenivuli rawa ka ena noda veitabanalevu kei na veitabana ka vakakina na talevi ni soqoni ni vuli ni veiliutaki e vuravura raraba ena veivakavulici kei na vuli ka rawa ni kune ena Mataveilawa ni Lotu se ena mekasini ni Lotu.4
Era tu ena ivolanikalou na ivakavuvuli taumada ka ra vakayagataki ena vulici kei na vakavulici ni kosipeli. Era veivosakitaki tale tu ga ena ivurevure ni veivakavulici vakasakiti ka dau vakawaleni vakawasoma tu ga ka vakatokai na Veituberi, Me iLutua ni Noda Bula.5
Na gauna eda vakasaqara tiko kina na ivakaraitaki ni qasenivuli donu ka rawa me vakaraitaka na sala ni kena vakavulici na kosipeli, eda sa na toso, ka sega ni drobula rawa mai vei Jisu na kai Nasareci. E a vakatokai koya na nona tisaipeli, “Raponai; e kena ibalebale, iVakavuvuli” se “Qasenivuli.”6 Mai liu, vakakina nikua, o Koya e se Qasenivuli Levu Duadua tikoga.
Na duidui kei Jisu mai vei ira na qasenivuli tale eso ena Nona gauna, o ya, ni o Koya e dau veivavulici “me vaka e dua e tu vua na dodonu.”7 Na dodonu oqo ni veivakavulici ka veivunauci e lako mai vua na Tamada Vakalomalagi, ni a “lumuti Jisu na Kalou … ena Yalo Tabu kei na kaukauwa … ; ni sa tiko vata kaya na Kalou.”8
Ena muri ni ivakarau oqo, a vakavulici o Jisu mai Vua na Tamana Vakalomalagi, me vaka a vola me baleti koya o Joni. A kaya o Jisu, “niu sa sega talega ni kitaka e dua na ka vakai au: ia na ka ga sa vakatavulici au kina ko Tamaqu.”9 “E sega ni rawata vakaikoya ga e dua na ka na Luvena, na ka ga sa raica ni kitaka ko Tamana… . Ni sa lomana na Luvena ko Tamana, a sa vakatakila vua na ka kecega sa kitaka ko koya.”10
Ena loma taucoko ni ivolanikalou eda raici ira kina na veiqasenivuli vivinaka ni kosipeli ka ra veisautaka nodra bula ka vakabula na yalodra o ira era vakavulica. Mai na iVola i Momani, me kena ivakaraitaki, era lako vakarawarawa mai kina o iratou o Nifai,11 Alama,12 kei ira na luvei Mosaia13 tagane. Raica na vakavakarau yadudua eratou vakayacora na luvei Mosaia tagane ena nodratou vakavakarau me vunautaka na kosipeli:
“Io sa kaukauwa sara na nodratou vakabauta na i vakavuvuli dina; eratou sa tamata yalomatua ka dauwilika vagumatua na ivolatabu, me ratou kila kina na vosa ni Kalou.
“Ia e sega ni o koya walega oqori; eratou sa gumatua sara ena masumasu kei na lolo, ka sa tu vei iratou na yalo ni parofisai ka ratou tukuna na veika ena yaco; ia ni ratou sa vunau, eratou sa vunau ena kaukauwa kei na ilesilesi ni Kalou.”14
Sai Moronai e dua tale na qasenivuli qaqa ni kosipeli, ka digitaki me “italai ni Kalou ko koya”15 me vakavulica na Parofita o Josefa Simici. Sa solia vakacaca vei keda o Josefa e dua na ivakamacala ni ka a kaya ka cakava o Moronai ena nona a vakavulici Josefa.16
Na imatai ni gauna a rairai kina vei Josefa Simici o Moronai a dua toka ga kina na cauravou itabagone yabaki 17 o Josefa ka sega soti ni vuli vinaka. A raici koya o Josefa me dua na “gone tagane voli ga … e sega soti ni daukauwaitaki e vuravura,”17 ka yaco me vakatokai koya e dua nona itokani “sega ni vakavulici” kei na “sega ni vuli.”18 Ena liga ni dua na qasenivuli dauvosota ka veikauwaitaki vakataki Moronai—kei ira na vo ni dautukutuku vakalomalagi ka nodra ivakasala vua—na cauravou gone oqo ena yaco me dua na tamata kila ka ena vakatoka na Turaga me “dua na cakacaka vakurabui vakaidina sara”19
Na ivakavuvuli cava so ni vuli kei na veivakavulici eda na rawa ni kunea ena noda dikeva na sala ka vakavulici Josefa Simici kina o Moronai? E tiko e vica na veivakavuvuli bibi e rawa ni da veivosakitaka, ia me vakatabakidua mada ena tolu na yavu ni ivakavuvuli e yaga ena veivakavulici vinaka.
iMatai ni iVakavuvuli : Lomani Ira o Vakavulica ka Kacivi Ira Sara ga ena Yacadra
A kaya o Josefa Simici ni gauna a rairai taumada kina vua na agilosi o Moronai, o Josefa “sa dua na ka na noqu rere, ia sega ni dede sa takali tani na rere oqori”. Na cava a cakava o Moronai ka vakavuna na seavu ni rere oqo? E kaya o Josefa, “a kacivi au.”20 Era sa vakamurimuria tiko e dua na ivakarau vakalomalagi o ira na qasenivuli era lomani ira na nodra gonevuli ka dau kacivi ira ena yacadra.21
Ena dua na soqoni wale tikoga oqo kei Peresitedi Thomas S. Monson, au raica ni a kidavaki keimami yadudua ena yacai keimami. A talanoataki Lucy Gertsch, nona qasenivuli ni Wilivola ni Sigatabu ena nona gauna ni gone, a kaya ni o koya e dua na qasenivuli ka kila tu na yacadra kece sara na gonevuli ena nona kalasi. A kaya vakaoqo me baleti koya o Peresitedi Monson, “A sega sara ni dau guilecava me qiriti ira era dau calata e dua na Sigatabu se era sega ga ni lako mai. Keimami kila ni kauwaitaki keimami kece. E sega sara ni dua vei keimami sa guilecavi koya se na veika a vakavulica.”22
iKarua ni iVakavuvuli: Veivakavulici mai na iVolanikalou
E dua tale na ivakavuvuli ka dau vakayacora o Moronai sa ikoya na nona kila, ka dau veivakavulici mai na ivolanikalou. A kaya vakaoqo o Josefa Simici ena imatai ni nodrau sota kei Moronai e “qai tukuna mai eso na ka a parofisaitaki tu ena Veiyalayalati Vou… . A cavuta tale eso na tiki ni ivolatabu ka vakamacalataka na kedra ibalebale.”23 Mai na veivosanikalou ka cavuta o Moronai, a vulica o Josefa na veika me baleta na nona ilesilesi vakaparofita ena yaco mai ni iVola i Momani kei na vakalesui mai ni kosipeli dina ki vuravura.24
iKatolu ni iVakavuvuli: Gumatuataka na Vakanananutaki ni Dina na Kosipeli
Na ikatolu ni ivakavuvuli ka a vakayacora o Moronai vei Josefa Simici sa ikoya me dau vakananuma na veika sa vakavulici vua. A kaya kina vakaoqo o Josefa, “au sa mai vakananuma tale toka yani … na veika levu ka veivakurabui sa qai mai yaco [vua] oqo.”25 Era na dau via vakamuria na ivakarau nei koya na Karisito sa tucake tale o ira na qasenivuli vinaka, ena kedra maliwa na Nifai ena nona a kerei ira na lewe vuqa me ra lesu ki na nodra “veivale, ka vakasamataka e lomadra na veika au sa tukuna” A vakavulica vei ira me ra rawa ni ra “kila na kena ibalebale.”26
E vakadreta vei keda o Nifai ni noda vakananuma e dua na ka e sega walega ni vakaitavi kina na noda vakasama ia na yaloda talega. A kaya, “Raica au sa taleitaka na veika ni Turaga kau sa dauvakananuma e yaloqu na veika au sa raica ka rogoca.”27 Na kena dau vakanananutaki na ivolanikalou ka vakakina na veika eda sa raica ka rogoca sa dau sureta mai na ivakatakila vakayadudua ki na noda bula.
Au vakadinadinataka ni dua dina na ilesilesi tabu ka vakalou na vakavulici ni kosipeli. Ena gauna o lomani ira kina na nomu gonevuli ka kacivi ira ena yacadra, ena nomu dolava na ivolanikalou ka veivakavulici mai kina, ka vakakina na nomu vakauqeti ira na nomu gonevuli me ra dau vakanananutaka na veidina ni kosipeli vakalesui mai ka vakayagataki ira, sa na qai vakalevulevui kina na nomu sasagataka na vinaka ka na vakalougatataki sara kina vakalevu na nodra bula na nomu gonevuli. Ena siga lagilagi ko ya, era na kaya vei iko na ka vata a tukuni me baleti Jisu na kai Nasareci, “Keitou sa kila ni kemuni sa lako mai vua na Kalou.”28 Ena yaca i Jisu Karisito, emeni.