Lave ena Vanua ga o Tu Kina

Peresitedi Dieter F. Uchtdorf

iKarua ni Daunivakasala ena Mataveiliutaki Taumada

Na lewe yadua ni matabete e tu na vanua talei kei na dua na nona cakacaka bibi ena vakayacora rawa ga o koya.

Kemuni na taciqu lomani, au doka vakalevu na noqu mai tu oqo vata kei kemuni ena soqoni oqo ni matabete e vuravura raraba. Au duavata kei kemuni ena vakavinavinaka levu ni da mai tiko oqo kei na noda parofita lomani, o Peresitedi Thomas S. Monson, kei Peresitedi Eyring. Keimami sa vakavinavinakataki kemuni na veitacini ena nomuni yalodina kei na nomuni yaloqaqa tiko. Sa dua dina na gauna talei ka marautaki meu mai tiki talega ni mataveitacini cecere oqo.

Lave ena Vanua Ga o Tu Kina

Ena vica na yabaki sa oti ena neimami valenilotu e Darmstadt, Jamani, era a kerei e vica na matabete me ra tosoya e dua na piano levu mai na valenilotu ki na olo ni vakatasuasua, me laki vakayagataki ena dua na lagasere. E sega ni dua vei ira e kenadau ni toso iyaya, ka sa na sega beka ni rawa me na tosoi na iyaya totoka oqo mai na loma ni valenilotu vakadua sara ki na olo. Era sa nanuma kecega ni na sega ni vinakati walega kina na kaukauwa vakayago ia na lomavata e maqosa. E a levu na vakasama, ia e sega ni dua me bau laveta vakatautauvata toka na piano oqo. Era a tuvanaki ira vakavica na veitacini ena nodra kaukauwa, balavu, kei na nodra yabaki ni bula—e a sega ga ni rawa.

Ena nodra sa baci tu wavokita na piano, ka ra sega ni kila na cava tale me ra cakava, a qai vosa cake mai o Baraca Hanno Luschin, e dua na noqu itokani vinaka. A kaya mai, “Kemudou na taciqu, me da tu veivolekati ka lave ena vanua ga o tu kina.”

Sa rawarawa sara ga. Ia, era qai lave ena vanua ga era dui tu kina, ka talave cake na piano oqo ka laveti yani ki na olo ni vakatasuasua me vaka ga e sa toso tu ga vakataki koya. O ya na isau ni bolebole o ya. E a gadrevi ga me ra tu vata vakavoleka ka lave ena vanua ga era tu kina.

Au dau nanuma voli ga na vakasama rawarawa o ya nei Baraca Luschin kau doka na dina o ya. Ena bogi nikua au gadreva meu vakamacalataka na ivakavuvuli rawarawa o ya, “lave ena vanua ga o tu kina.”

Eso Era Vinakata Me ra Veiliutaki, Eso Era Vinakata Me ra Vunitaki Ira

E dina ga ni rairai rawarawa tu beka, ni da lave ena vanua ga eda tu kina sa ikoya e dua na ivakavuvuli ni kaukauwa. E vuqa vei ira na lewe ni matabete au kila era kila vakavinaka ka bulataka tiko na ivakavuvuli oqo. Era dau maqusa me ra tu yani ka laki cakacaka, se na mataqali cakacaka cava ga o ya. Era vakayacora ena yalodina na nodra ilesilesi ni matabete. Era vakarabailevutaka na nodra veikacivi. Era qarava na Turaga ena nodra qaravi ira na tani. Era tu veivolekati ka lave ena vanua ga era tu kina.

Ia, e tiko eso, era dau raica ni dredre sara ena so na ivakavuvuli oqo. Ia ni yaco vei ira, era vaka me ra sa laki oka tu ena rua na ilawalawa: e dua era saga me ra veiliutaki, se era saga me ra vunitaki ira. Era sa saga me ra veivakararamataki se me ra vakabutotaki ira.

O Ira Era Saga Me ra Veiliutaki

O ira era saga me ra veiliutaki era na rawa ni vakila ni ra rawata me ra gugumatua cake mai na kena era sa kerei me ra cakava tiko ena gauna oqo. Eso era dau vakasamataka, “Kevaka beka ga meu bisopi, au na vakavinakataka cake.” Era vakabauta ni nodra kaukauwa e uasivi cake mai na nodra veikacivi. Ke ra tu beka ena dua na itutu levu ni veiliutaki, era na cakacaka vakaukauwa me vinaka cake na ka. Ia era vakanananu voli ga, “Na veivakauqeti dodonu cava beka me tu vei au ena noqu itutu vakadauveituberi ni matavuvale se daunivakasala ena mataveiliutaki ni kuoramu?”

O Ira Era Saga Me ra Vunitaki Ira

O ira era saga me ra vunitaki ira era rairai vakila ni ra sa rui osooso me ra veiqaravi ena Lotu. Ena gauna sa gadrevi me samaki kina na valenilotu, ena gauna sa gadrevi kina me vukei na nodratou toki na matavuvale na Mendez, ena gauna e kacivi ira kina o bisopi me ra mai veivakavulici ena kalasi, sa tu rawa vei ira na nodra iulubale.

Ena ruasagavulu na yabaki sa oti, a vakaraitaka kina o Peresitedi Ezra Taft Benson na nodra ripote na bisopi kei na peresitedi ni iteki ni so na lewenilotu “era sa sega ni via taura na veikacivi eso baleta ni ra kaya ni ra sa ‘rui osooso sara’ se sa ‘sega sara ga na nodra gauna galala.’ Eso tale, era sa ciqoma na veikacivi, ia era sega ni gadreva me ra cakacakataka na nodra veikacivi.”

E tomana o Peresitedi Benson ena nona kaya: “Sa nuitaki keda yaduadua tiko na Turaga me da vakaitutu ena Nona Lotu me rawa kina ni ra vakalougatataki na tamata mai na noda taledi kei na veivakauqeti.”¹

E duatani toka kina, ni vakavuqa e dau yavu ni rua na itovo ni bula oqo—na sagai ni veiliutaki se na sagai ni vunitaki koya—ena tautauvata toka beka: na kocokoco.

Na Sala e Vinaka Cake

E tiko e dua na sala e vinaka cake, a vakavulica sara ga vei keda na iVakabula: “Ka me nomudou tamata ko koya yadua vei kemudou sa viavia turaga.”²

Ni da saga me da qaravi ira na tani, eda sa sega kina ni vakauqeti ena kocokoco ia ena loloma ga. Oqo na ivakarau ni Nona bula o Jisu Karisito ka sa na ivakarau ni nona bula e dua na lewe ni matabete. E sega ni gadreva na Turaga me ra rokovi na tamata; o Setani a solia vei Koya na veimatanitu kei na ukuuku ni vuravura oqo, ka sega sara ga ni taleitaka e dua na tikina o Jisu.³ Ena Nona bula taucoko, e sa dau rairai wale na iVakabula ka dau cakacaka sara, ka sega ni bau dua na nona gauna vakataki Koya ga; ia e dau lako ga yani vei ira na tauvimate, na rarawa, kei ira na sega tu ni kauwaitaki.

E dina ga ni yaco na veivakararamataki oqo, e dau rawarawa sara ka vakavuqa na noda saga me ra dokai keda na tamata ka sega ni qarava na Turaga ena lomada, vakasama, kei na noda kaukauwa kecega.

Kemuni na veitacini, ni da sa laki tu e mata ni Turaga me da lewai, ena raica mai o Koya na noda ilesilesi ena vuravura se ena loma ni Lotu? Ko na nanuma beka ni noda itutu taumada vakavo ga na noda sa “tagane vakawati,” “tama,” se “lewe ni matabete” ena dua beka na ka levu Vua? Ko na nanuma me na dua beka na ka Vua na noda sa rui osooso se levu ni bose bibi eda laki tiko kina? Ko na nanuma beka na noda rawata rawa na veivosaki ni veisiga me iulubale ni noda sega ni veimaliwai vata kei na watida kei na matavuvale?

E dua tani sara na Nona rai na Turaga mai na veika eda dau raica. Sa dau vinakata o Koya na tamata daucakacaka veidokai, sega ni o koya e cakacaka ga me “dokai” kina.

O ira era sa yalomalua ena bula oqo era na dara na isala vakatui lagilagi ena bula e tarava. E a vakavulica sara ga o Jisu na vunau oqo ni a talanoataka tiko e dua na tamata vutuniyau e vakaisulu lokaloka kei na lineni matailalai ka dau kana magiti ena veisiga, ia o Lasarusa na tamata dravudravua a nona ivotavota walega na meme ni kakana e lutu mai na tepeli ni kana ni tamata vutuniyau. Ena bula e tarava, a laki rairai ena lagilagi o Lasarusa taravi Eparama yani, ka biu o tamata vutuniyau ki eli, ka tacake ena vakararawataki levu.⁴

Na iVakaraitaki nei John Rowe Moyle

Ena yabaki oqo ena vakananumi tiko kina na ika 200 ni yabaki a sucu kina o John Rowe Moyle. E a dua na curuvou ki na Lotu o John ka biuta mai na nona itikotiko e Igiladi ka lako yani ki na Buca o Salt Lake ena dua na ilawalawa ni qiqidreti. A laki tara e dua na nona vale ni nona matavuvale ena dua na buca ena sauka kei Salt Lake City. E dau maqosa ena ceuti vatu o John ka kerei kina ena vuku ni kila ka oqo, me laki cakacaka ena Valetabu e Salt Lake.

Ena vei-Moniti e dau biubiu mai vale o John ena rua na kaloko ena mataka ka taubale me ono na auwa me laki tekivu cakacaka. Ena Vakaraubuka e dau oti na nona cakacaka ena lima na kaloko ena yakavi ka taubale lesu ka yaco ki vale ni sa bogi levu sara. E a vaka tiko oqo ena veiyabaki.

Ena dua na siga, ni cakacaka tiko e nodratou vale, a tekea na yavana e dua na bulumakau, ka ramusu sara. Ni a sega tu ni vinaka na veiqaravi vakavuniwai, sa kena iwali ga me sa musu na yavana ramusu o ya. E ratou sa qai tu na nona matavuvale ka vesuki John vata kei na katuba, ka taura mai e dua na ivaro, ka varota laivi na yavana volekata na duruna.

E dina ga ni vakayacori na veimusu voravora, sa tekivu mavo vakavinaka na yavana. E dua na gauna a dabe ena loga, ka tekivu ceuta e dua na yava kau vakaisema me dua kina na vakatakarakara ni yava. Ni taubale ena yava kau oqo e mosi sara ga vua, ia e sega ni yalolailai o John, ka yaloqaqa cake tikoga ka rawata sara me vakacavara rawa na 22 na maile ki na Valetabu e Salt Lake ena veimacawa, me laki tekivu cakacaka tale.

A ceuta e ligana na vosa “Holiness to the Lord” ka se tikoga nikua na ivakatakilakila koula kivei ira era sikova yani na Valetabu e Salt Lake.⁵

A sega ni cakava na ka oqo o John me ra dokai koya kina na tamata. Se me vakasuka mai na nona cakacaka, ka dina ga ni sa dodonu vua me vakayacora vakakina. E kila vinaka tu o koya na veika e vinakata vua na Turaga me cakava.

Ni oti e vica na yabaki, a kacivi o Henry D. Moyle, na makubui John, me lewe ni Kuoramu ni Le Tinikarua ka qai laki veiqaravi ena Mataveiliutaki Taumada ni Lotu. Na veiqaravi nei Peresitedi Moyle ena veitutu oqo e vakaturaga dina, ia na veiqaravi nei tukai John, e dina ga ni a kilai ga vakalailai, sa taleitaka sara na Turaga. Na ivakarau nei John, na itukutuku ni nona solibula, sa mai drotini ni yalodina ka dua na ivakatakilakila ni ilesilesi ki na nona matavuvale kei na Lotu. E kila vinaka tu o John Rowe Moyle na ibalebale ni “lave ena vanua ga o tu kina.”

Na iVakaraitaki ni 2,000 na Sotia nei Ilamani

Na veika me da dokai kina e sega ni dau ivakaraitaki ni sa yaga na noda cakacaka. Eda sega ni kila na yacadra, kena ivakaraitaki, e dua vei ira na 2,000 na cauravou nei Ilamani. Vakayadudua, e sega ni kilai na yacadra. Ia vakailawalawa, ena dau nanumi tu ga na yacadra ni ra dina, yaloqaqa, kei na yalo gu me ra veiqaravi. Era a rawata vakailawalawa na veika era sega ni rawata rawa vakatamata yadua.

Oqo na vuli me noda, na veitacini ena matabete. Ni da tu vata vakaveivolekati ka lave ena vanua ga eda tu kina, ka da kauwai vakalevu me vakalagilagi na matanitu ni Kalou ka sega me baleta na keda irogorogo se marau, e rawa me da na gugumatua cake kina vakalevu.

Na Veikacivi Yadua sa Madigi ni Veiqaravi kei na Tubucake

E sega ni lolovira na veikacivi. Na veikacivi yadua sa madigi ni veiqaravi kei na tubucake. A tauyavutaka na Turaga na Lotu ena sala me rawa kina vei ira na lewenilotu yadua me ra veiqaravi, ka yaco me veimuataki yani me ra tubucake vakayalo. Se cava ga na nomu itutu, au masuti kemuni mo ni raica ni sa ikoya oqori e dua na madigi e sega walega ni nodra vaqaqacotaki ka vakalougatataki kina na tani ia mo ni yaco me vaka na ka e vinakata vei kemuni na Turaga.

Niu dau gole ki na veiiteki kei Saioni meu laki vakavouya kina e dua na mataveiliutaki ni iteki, eso na gauna au dau kurabui, ena gauna ni veivakatarogi, e dau tukuna vei au e dua na matabete ni sa kila tiko o koya ni na laki lewena na mataveiliutaki e tarava.

Ena imatai ni gauna au rogoca kina oqo, au sega ni kila na cava meu tukuna.

E taura e dua na gauna me vakatakila kina vei au na Yalo Tabu. Au vakabauta ni sa lewa mai na Turaga na veikacivi ki na tamata yadua. Ena so na gauna e solia vei keda o Koya na veivakauqeti vakayalo me tukuna ni da sa kilikili me da ciqoma na veikacivi eso. Oqo na veivakalougatataki vakayalo, na loloma vinaka mai vua na Kalou.

Ia ena so na gauna eda didivara ki na veika tale eso e tukuna vei keda na Turaga: “E dina ga ko sa kilikili ki na veikacivi oqo,” Ena kaya beka, “oqo e sega ni Noqu veikacivi vei iko. Sa noqu gagadre ga mo lave ena vanua ga o tu kina.” Na Kalou e kila na ka ena vinaka vei keda.

Na iLesilesi Walega o Rawa ni Cakava

Na lewe yadua ni matabete e tu ena dua na vanua talei kei na dua na nona cakacaka bibi ena vakayacora rawa ga o koya.

Eda sa rogoca kece na italanoa kei Peresitedi Monson ni dau sikova ka vakalougatataki ira na qase sara kei na tauvimate, ka dau vukea na nodra leqa ka vakamarautaka, vakaceguya, ka lomani ira. Sa itovo nei Peresitedi Monson me dau marautaka na nodra bula o ira na tamata. Ena sega li ni ka totoka me gole yani o Peresitedi Monson me sikova ka vakaraica na matavuvale yadua ena Lotu?

Ena rawa. Ia, e dina ni sega ni rawa—ka sega ni dodonu vua. E a sega ni tukuna vua na Turaga me vakayacora o ya. Sa kerei keda na Turaga o keda na dauveituberi ni matavuvale, me da lomana ka wanonovi ira tiko na matavuvale sa lesi vei keda. A sega ni kerea na Turaga vei Peresitedi Monson me tuvanaka ka vakayacora na noda lotu vakamatavuvale. E vinakati keda, me vaka ni da tama, me da vakayacora na ka oqo.

Ko ni na nanuma beka era tiko eso tale era vinaka se kila cake vakalevu mai vei iko me ra cakava na nomuni itavi kei na ilesilesi oqori, ia na Turaga sa solia vei kemuni na ilesilesi kece oqo ena dua na inaki. Ena rairai tiko beka o ira na tamata kei na yalo ena rawa mo tara ka vakauqeta. Ka sega tale ni dua ena cakava me vakataki iko.

Sa kerei keda tiko na Tamada Vakalomalagi me da matataki Koya ena cakacaka vakaturaga ni nodra tarai ka vakalougatataki na nodra bula na Luvena. Sa kerei keda me da tudei tikoga ena kaukauwa ni matabete e lomada kei na yaloda ka solia na noda igu e vinaka duadua ki na noda itavi.

Kemuni na veitacini, e dina sara ni kaukauwa e tiko vei kemuni, ena sega ni rawa ka sega ni dodonu mo laveta vakataki iko e dua na piano. Sa vakakina, ni sega ni rawa me dua vei keda me qarava duadua ga na cakacaka ni Turaga. Ia, kevaka me da tu veivolekati ena vanua sa lesi keda kina na Turaga ka laveta ena vanua ga eda tu kina, ena sega sara ni dua na ka me na tarova na kena toso ki liu ka tosocake na cakacaka vakalou oqo.

Kemuni na veitacini, me da kakua ni vaqara rogo ka kakua ni cegu mai na veiqaravi!

Me da nanuma tiko na vuli bibi oqo ni sai keda na dau tauri drotini ni Turaga o Jisu Karisito, tarai cake ena Yalo Tabu ni Turaga, yalodina ka dodonu tiko ki na ivakataotioti, me da yaloqaqa tiko ka solia noda igu taucoko ki na inaki kei Saioni ka kovuti tu ena veiyalayalati me da tu vakaveivolekati vata ka lave ena vanua ga eda tu kina.

Sa noqu masu oqo, kau laiva vei kemuni na noqu veivakalougatataki kei na noqu iloloma ena yacai Jisu Karisito, emeni.