Lesu i vale
Sa dua na ka na veika eda rawa ni vakayacora ena nodra bula e vuqa… ena noda ciqoma na veisureti ni iVakabula me da vakani ira Nona sipi.
E dau batabata sara ga na vulaililiwa ena noqu vanua ni vakaitikotiko e Minas, Uruguay. E dau visa buka ena vanua ni buka o Nau, ni dromu na siga me keitou dau raragi toka kina, ka keitou dau soqoni yadudua vata yani, o irau na noqu itubutubu, o iratou na taciqu yalewa kei au, ni oti ga na neitou dui itavi ni veisiga. Au na dau karona tu ga na—veika au vakila ena gauna keitou dau kumuni vata yani kina yadudua vakamatavuvale ena loma ni rumu logaloga vinaka o ya—vakakina ena kena sa dau raragi vinaka tu mai na vanua ni buka.
Ni oti na neirau tauyavutaka kei watiqu na neirau matavuvale, se evei ga keitou tu kina keitou dau soqoni vata kece yani vakawasoma, ena yasa ni vanua ni buka se e vei ga ka keitou dau vakila kina na katakata ena gauna taucoko keitou dau soqo vata yani kina kei iratou na luvei keirau.
Sa dua na ka totoka! E dau vanua vinaka sara, e vale, ena vuvale, e neitou ivakaruru.
Ena veiyabaki sa oti yani keitou a dau vakaitikotiko voli mai ena veivanua duidui, ia mai vei ira kece keitou dau vakila ena loma ni Lotu na mataqali ka vata ga keitou dau vakila mai vei ira na lewenilotu ena veitabanalevu kece sara keitou lewena.
O ira na lewenilotu yadua sa dodonu me ra rawa ni vakila na veika totoka vata vakaoqo, ia me ra rawa ni vakila na veika oqo ena noda sasaga ni veivakabulabulataki kei na itavi ni kaulotu.
Meu wasea mada vei kemuni eso na ka ka yaco tiko mai na so na iteki kei na tikina e Peru ia, meu vakayacora vakakina, au sa na cavuta toka eso na yaca ni matavuvale: matavuvale na Causo, matavuvale na Banda, matavuvale na Vargas kei na so tale. Ena toso tikoga na yaca, ka tiko kina e sivia ni 1,700 na yaca ni lewenilotu era sa lesu mai. Era lewe ni duidui na veitabanalevu, tabana, iteki kei na tikina mai na veivanua e Peru, ka ra a sureti mai vei ira na peresitedi ni iteki, bisopi, iliuliu ni kuoramu kei na veimataisoqosoqo me ra lesu mai i vale. Era vakadonuya na veisureti ka ra vakayacora na veiliutaki ni matabete, na daukaulotu tudei, kei ira na lewenilotu tale eso ka ra colata na itavi ena nodra vukei ira me ra lesu mai ki na Lotu ka lako mai vei Karisito. Eda sa kaya oqo vei ira vakayadua: “Ni bula vinaka, bula vinaka mai vale!”
Na cava e a rawa kina vei ira oqo me ra lesu tale mai vale? Sa ikoya na sasaga ena duavata ni 14 na iteki kei na 4 na tikina ena dua na vanua ni kaulotu ka ra cakacaka vata me dua na yabaki, me rawa kina na nodra lesu mai vale o ira kece oqo ena veivakabulabulataki kei na cakacaka tabu vakalotu ni papitaiso kei na veivakadeitaki.
A vakauqeti na sasaga oqo mai na vosa oqo nei koya na iVakabula: “Ko sa lomani au … Vakatawana na noqu sipi” (Joni 21:16), kei na veivakavulici nei Peresitedi Thomas S. Monson ka a kaya: “Ena veiyabaki, eda sa dau vakarogoya na kerekere vei ira era sa luluqa tu, o ira era vakacudrui, o ira era lomabibi, na ivalavala ca—me ra lesu mai. ‘Lesu mai ka kana magiti ena nona teveli na Turaga ka mai tovolea tale mada na vuanikau kamica ka veivakamamautaki ni veiwasei vata kei ira na Yalododonu.’” (Liaona, Me 2008, 89).
O Alama ena nona sotava na dredre levu ena vuku ni nodra ivalavala ca na tacina, a masu vua na Turaga, ka kaya:
“Oi kemuni na Turaga, mo ni vakalougatataki keitou me keitou gumatua ka kauti ira lesu vei kemuni, ena vuku i Karisito.
“Oi kemuni na Turaga; raica sa ka talei na nodra bula, ka ra sa weka i keimami ga; ia oi kemuni na Turaga; mo ni vakaukauwataki keitou ka vukei keitou. Me keitou vakalesui ira yani na weka i keitou oqo vei kemuni.” (Alama 31:34–35)
A wasea vei au na veika oqo o Peresitedi Angel Alarcón mai na iteki na Puente Piedra e Lima, Perú: “Ena vei-Vakarauwai, mai na 8:30 ena mataka ki na 12 ena sigalevu, keitou dau sikovi ira na lewenilotu luluqa, eso era sega ni lewenilotu, kei ira na saumaki vou mai, o irau na daukaulotu, o bisopi, kei na so tale na iliuliu mai na veimataisoqosoqo.”
Ena tiki ni nona italanoa oqo sa lako mai kina ena noqu vakasama na qaqa ni serenilotu o ya:
“Vakamareqeti ena yaloi iVakatawa
Sai ira na sipi vakamareqeti era lewena;
Eso era sa yali tu yani,
Ena walokai, galili kei na liliwa.
Raica, sa vaqaqara na iVakatawa Vinaka,
Qarai ira na sipi era yali,
Kauti ira mai ena reki,
Sau levu nodra vakabulai”
(“Dear to the Heart of the Shepherd.”(Serenilotu naba 221)
A ciqoma e dua na qiri ena dua na mataka ni Vakarauwai, o Baraca Vargas, ka vakaitikotiko ena dua na vanua ka dredre sara na kena dau lakovi. O ya o Peresitedi Alarcon, ka qiri tiko mai ena nona talevoni veikauyaki, me vakaraitaka ni sa yaco mai. Kaya sara yani o Baraca Vargas: “Au kurabui dina, sa ka dredre dina na yacova mai na noqu vale.”
E vakaoqo mai na kena isau: “Ia, au sa tu sara ga qo ena nomu katuba, kau gadreva meu vosa vei iko. Keimami gadrevi iko, ka keitou sureti iko mo lako mai ki na neimami soqoni ni Lotu ni mataka.”
Sa qai kaya yani na turaga ka sa sega tiko ni laki lotu yani me vica vata na yabaki: “Au na tiko mai keri.” Ka sa vakatekivu me suka lesu ki vale.
“Ni kau a viakana, ka ni a solia mai vei au na kakana: au a viagunu, ka ni a vagunuvi au: au a vulagi, ka ni a kauti au ki vale:
Luvawale, ka ni a vakasuluni au; au a tauvimate, ka ni a mai raici au; au a tiko e na valeniveivesu, ka ni a lako mai vei au …
“… Ni kemuni a cakava vua e dua sa lailai vei ira na wekaqu oqo, ni a cakava vei au” (Maciu 25:35–36, 40).
Na gauna au vakaitavi tiko kina ena soqoni ni Sigatabu ena vica na macawa sa oti, keirau a sota kei na dua na baraca ka se qai lesu vakadua tale mai lotu ni oti e vica vata na yabaki na nona gole tu yani. A tomani koya tiko mai o watina, ka se sega ni lewe ni Lotu.
Niu taroga se cava sa qai via lesu tale mai kina, a kaya mai, “E rau sureti au mai o Fernando, na noqu itokani, kei na bisopi vinaka oqo, kau gole sara mai. Au a se raica sara na Lotu ena vuqa na yabaki sa oti ka se caudre tikoga e lomaqu e dua na yameyame lailai. Ena sega beka ni kaukauwa, ia e se tikoga kina.”
Au qai tinia yani, “Ia, me vaka ni keimami tacimu, keimami na uvuca vata na yameyame oqori me rawa ni bula tiko.” Ka keirau mai veimokomoko sara yani.
Na kauwai, vakarorogo kei na veikauwaitaki vei ira na tacida sa ivakadinadina vakaitamera ni noda lomani Tamada Vakalomalagi. Ia, eda vakaraitaka na noda lomana na Kalou ni da veiqaravi ka vakakina ni vakanaulu na veiqaravi oqo vei ira, me baleta nodra tiko vinaka na wekada.
A vakavuvulitaka na Tui o Penijamini: “Ia au sa tukuna vei kemuni na veika oqo mo ni yalomatua kina; mo ni kila ko ni sa qaravi Koya tiko na nomuni Kalou ena nomuni qaravi ira tiko na wekamuni” (Mosaia 2:17)
Sa dua na ka na veika eda rawa ni vakayacora ena nodra bula e vuqa na matavuvale era luluqa tu, kei ira era sega ni lewe ni lotu ena noda ciqoma na veisureti ni iVakabula me da vakani ira Nona sipi ka vukea na tamata me ra Lako vei Karisito!
Oqo e vica wale sara vei ira na ka era sa vakayacora tiko e udolu na veitacini: ena nodra vakadonuya tiko na veisureti ni Turaga me ra vakania Nona sipi. Me da dau nanuma tiko ni rau sa vaka na drua ka rau dau veivakasaqarai vakaveisa me rau veitokani kina na Loloma kei na Veiqaravi.
Ia, me da vakadonui ko ikeda vakayadudua sara, me ivakaraitaki totoka ni noda lomana na Tamada Vakalomalagi, na noda vakaitavitaki keda vakalewe ni lotu, oqo na noda vakasaqarai ira era sega ni tiko vata kei keda nikua! Kevaka eda kauta mada ga mai e dua na yalo ki Lotu mai na veiqaravi ena loloma oqo vakakina ke da tovolea me iusutu ni noda bula, sa wacava na reki ena noda vakaikeda taumada, ka vakakina vei ira eda vukei ira me ra lesu vei Karisito!
Sa kaci! Kaci, kaci tiko mai,
Vakamalua vei keda edai:
“O na qarai ira li, noqu era yali mai,
Yali, yani mai na noqu veimaroroi?”
(Serenilotu Naba. 221)
Au vakadinadinataka ni da luvena tagane ka yalewa e dua na Tamada Vakalomalagi ka dau lomani keda ka kilai keda yadua ena dui yacada.
Au wasea na noqu ivakadinadina me baleta na loloma nei Tamada ka noda iVakabula. A lomani keda taumada ka solia na Luvena me rawa kina vei keda, ena Vukuna me da lesu tale ki vale. Au vakaraitaka na noqu lomani Koya, na noqu iVakabula, noqu Turaga ka noqu iVakavuvuli, ka noqu Dauveivueti, ena yacai Jisu Karisito, Emeni.