Na Yavutaki ni iVakadinadina
Ni da sa ciqoma na ivakadinadina ni “domo rogo lailai” ena so na gauna ena rawa ni vaqaqacotaki keda cake ena noda ni ivakadinadina, mai na nona rairai mai e dua na agilosi.
Ena vica na yabaki sa oti niu a veiqaravi voli ena Vitusagavulu ni iWasewase mai Brazil, keitou a gade vakamatavuvale ki na koro totoka o Florianopolis. Ena Sigatabu, me vaka na kena ivakarau, keitou lai lotu ki na valenilotu e voleka duadua. Keitou lai kalasi sara ni wilivola ni Sigatabu kei watiqu kei luvei keirau yalewa ka qase duadua ki na vanua e veivosakitaki tiko kina na ivakadinadina yadudua ni kosipeli.
Ena dua na gauna ni lesoni, sa kerei ira na lewe ni kalasi o qasenivuli me ra wasea mada e dua na ka kaukauwa se ka vakayalo era sa sotava oti ena gauna era yavutaka tiko kina na nodra ivakadinadina ni Lotu. Ni ra sa wasea tiko na nodra italanoa eso na marama kei na turaga, au vakananuma lo voli na gauna au a sotava kina eso na ka mai na gauna au a papitaiso kina meu rawa ni bau wasea e dua na ka vei ira, ia, e sega sara ga niu bau nanuma rawa e dua ena gauna ni noqu yavutaka tiko na noqu ivakadinadina.
Niu vakasamataka ka vakarogoca na veika era sa wasea tiko, au qai vakila ni o qasenivuli e gadreva meu vakaitavi talega. O koya e vakarogoci ira tiko na lewenilotu, ka vakaraitaka meu kila ni waraka tiko me rogoca na veika lelevu sa yaco oti vei au. Me vaka ni o au e dua na Vitusagavulu ni iWasewase, sa dodonu me tiko vei au e dua na kena ka bau warumisa toka meu wasea. Au vakila ni sa toso tiko na gauna kei na nona waraki au tiko, au tovolea vagumatua meu kunea e dua me na veiganiti kei na veika lelevu sa sotavi, ia e rarawa sara o qasenivuli niu sega ni rawata meu wasea na ka e gadrevi tiko. Au a gadreva dina meu veivuke, ia e mani sega ni yaco me vaka na gagadre nei qasenivuli.
E vinaka ga ni o ya e Sigatabu ni lolo, kau sa qai taura na gauna meu wasea na noqu ivakadinadina vei ira na ivavakoso vakabibi vua na qasenivuli o ya kei ira na nona lewe ni kalasi ni Wilivola ni Sigatabu. Na ka au wasea e sega soti ni veika lelevu e sotavi, ia e noqu ivakadinadina vakaidina me baleta na dina ni kosipeli vakalesuimai
Ena so na gauna, eda nanuma ni tiko vei keda na ivakadinadina ni Lotu, ena ganita me sotavi e dua na ka levu, se dua na ka me yaco ka na kauta laivi na lomalomarua ni da sa ciqoma na kena isau se e dua na veivakadeitaki.
E vakatavuvulitaka o Peresitedi Boyd K. Packer: “Na domo ni Yalotabu e vakamacalataka na ivolanikalou ni sega ni ‘rogo levu’ sega ni ‘rogo lailai.’ E ‘sega ni domo ni kurukuru, sega … domo ni ue levu.’ Ia, ‘sa domo rogo lailai ga ka malumu me vaka na vakasolokakana, ‘ ka sa na rawa ni, ‘laubasikata ka katakata kina na yalodra. (3 Ni. 11:3; Ila. 5:30; V&V 85:6–7). Nanuma, ni o Ilaija e a tukuna ni domo ni Turaga e sega ni tiko ena cagi, sega ena uneune, sega ena bukawaqa, ia sa ‘domo rogo lailai e vinaka.’ (1 Tui. 19:12).”
Tomana o Peresitedi Boyd K. Packer: “Na Yalotabu ena sega ni vukici keda ena vosa karakara se tuleraki keda vakukauwa. Ia e vakasolokakakana ga. E malumu sara na nona tarai keda ni kevaka me da oga tiko ena so tale na ka eda na sega sara ga ni vakila… .
Vakavica ga ena dau veivakayarayarataki me rawa ni da na vakarorogo kina. Ia ena levu sara na gauna, kevaka me da sega ni yadrava na nona veivakauqeti, ena lako laivi mai vei keda na Yalotabu, me yacova na gauna eda na qai baci vaqaqara ka vakarorogo lesu mai me vaka ga eda dau vakayacora kei na noda ivakaraitaki, vakataki Samuela ena gauna makawa, “Ni vosa mai [Turaga], sa vakarorogo na nomuni tamata.’ (1 Sam. 3:10).” “The Candle of the Lord,” Ensign, Janu. 1983, 53).
Na veika lelevu e dau yaco ena sega ni vaqaqacotaka na noda ivakadinadina. E rau ivakaraitaki vinaka ni ka oqo o Leimani kei Lemueli. E dina ga ni a rairai vei rau na agilosi, ni oti ga o ya e rau sa tekivu qaqa tale na ka sa vosa kina na Turaga. E rawa ni ra vakavulica vei keda na ivakavuvuli oqo eso na iliuliu ena gauna oqo. Era a sa vakavulici taumada mai cake, ena itekitekivu ni gauna ni Veivakalesuitale, ia era sega ni dei vinaka me ra vosota me yacova na ivakataotioti. Na veika vakaoqo ena vakaraitaka vei keda, ni da sa ciqoma na ivakadinadina ni “domo rogo lailai” ena so na gauna ena rawa ni vaqaqacotaki keda cake ena noda ivakadinadina mai na nona rairai mai e dua na agilosi.
Niu a se gone tagane lailai ka tubucake tiko mai Porto Alegre, Brazil, ka vulica tiko na lotu mai vei rau e rua na daukaulotu goneyalewa, au nanuma sara na noqu dau vaqara me isau ni noqu masu—e dua na ka levu ka sega tale na kena vakatataro. E sega sara ga ni a yaco. O ya e sega ni kena ibalebale ni sega niu sa tara cake e dua na ivakadei meu sa na lewena na Lotu vakalesuimai.
A vakatavulica vaqo o Alama me baleta na vakatuburi ni dua na ivakadinadina, “Dou yadra mada ka vakasama; dou rogoca na noqu vunau ka vakabauta; ia kevaka dou sa sega ni rawa ni vakabauta, dou rogoca mada ga ka vakasamataka, [kau nanuma ni o ya na ka e baleta na noqu vakatataro] de mani rawa mo dou vakabauta e vica na tikina” (Alama 32:27)
Mai na siga oqori, me vaka e dua na dauvakatataro ni veika baleta na Lotu, ka qai yaco e muri me daukaulotu, qai yaco sara me tama ka iliuliu, na veika kece oqori ni soqoni vata ena yavutaka na ka e sotavi ka vakilai, levu sara e ka lalai tu ga, ka sega ni vakataratutu, “ ni sa sore ni kau vinaka” ( Alama 32:30).
A tomana vakaoqo o Alama me baleta na ivakadinadina: “Ia me da vakatauvatana mada na vunau kei na dua na sore ni kau. Kevaka ko sa tea e lomamu e dua na sore ni kau vinaka, sa na tubu vakaidina ni o sa vakabauta, ka sa vukei iko kina na Yalo ni Turaga,ia ni ko sa vakila ni sa tubu cake mai, ko na kaya, Sa sore ni kau vinaka dina oqo, se sa ivunau vinaka ka dina, raica sa vakamarautaka na yaloqu kau sa taleitaka sara.” (Alama 32:28).
Na ivakadinadina, vei ira eso na tamata, ena yaco mai ena dua ga na ka e sotavi e sega ni namaki. Ia, vei ira eso tale, ena sotavi veitaravi e vica na ka, ena sega beka ni ka lelevu, ia ni ra cokoti vata, vakadinadinataki ena dua na sala sega ni vakabekataki ni veika eda sa vulica ka bulataka tiko e dina.
Nikua, ni sa oti oqo e vica vata na yabaki ni noqu lewena tu Na Lotu i Jisu Karisito ni Yalododonu Edaidai, au sa na sega beka ni nanuma taucoko na veika au sa sotava me yavutaki cake kina na noqu ivakadinadina. Ia, na veika kece oqori era sa laiva tu mai e dua na ivakatakilakila me vukea na noqu vakadinadinataka na Lotu vakalesumai. Nikua, au sa vakadeitaka na dina ni kosipeli i Jisu Karisito.
Au gadreva meu tinia ena noqu vakamacalataka na ivakadinadina oqo, sega walega vua na marama ka a vakavulica tiko na kalasi ni Wilivola ni Sigatabu, ia vei kemuni kece talega. Au kila ni bula tiko na Tamada Vakalomalagi. Au kila ni lomani keda. O keda eda luvena. E dau vakatudaliga ki na noda masu. Au kila ni o Jisu Karisito na noda iVakabula. O Koya a mate, sa tucaketale, ka sa bokoca na noda ivalavala ca. Na NonaVeisorovaki sa vakalougatataki au ena veisiga kece ni noqu bula.
Au vakadinadinataka ni Lotu i Jisu Karisito sa vakalesuimai ena iotioti ni gauna oqo mai vua na Parofita Josefa Simici. O koya a parofita dina ni Kalou. Au kila ni da liutaki tiko nikua mai vua e dua na parofita bula, o Peresitedi Thomas S. Monson. Au kila ni o koya na parofita ni gauna oqo, me vakataki Mosese, Eparaama, kei Aisea ena nodratou gauna.
Na iVola iMomani e vosa ni Kalou vakakina na iVolatabu ka sa dua talega na ivakadinadina ni iVakabula. Au kila ni kaukauwa ni matabete sa vakalesuimai ka sa vakalougatataka tiko na nodra bula e levu sara na Yalododonu ena veiyasai vuravura. Au vakadinadinataka na veika oqo ena yaca i Jisu Karisito, emeni