Ni Bula Vinaka Mai Ki na Koniferedi
Sa kilai keda tu vakavinaka na Tamada Vakalomalagi kei na noda dui gagadre. Me da sa vakatawani ena Nona Yalotabu ka votai ena veivosa ni koniferedi oqo.
Kemuni na taciqu kei na ganequ lomani, se qai oti toka ga oqo e ono na vula na noda a sota taumada. Sa levu sara na vakatorocaketaki ni cakacaka ni Turaga ka sega ni vakataotaki.
Sa noqu madigi oqo, vata kei rau na noqu daunivakasala kei ira na Vakaitutu Raraba tale eso, me keimami vakatabuya e tolu tale na valetabu vovou: e Curitiba, mai Brazil; e Panama City, mai Panama; kei Twin Falls, e Idaho—me sa 128 kina na levu ni valetabu e veiqaravi tiko e vuravura.
Ni vo toka e dua na siga me ra vakatabui yadua kina na veivaletabu oqo, e vakayacori na kedra dui veivakamarautaki vakavanua. E Curitiba, mai Brazil, e lewe 4,330 na lewenilotu mai na tikina ni valetabu, kei na nodra lagasere kina e dua na matasere le 1,700, era a vakaitavi ena dua na parokaramu ni lagasere, meke, kei na sara vidio. E a vutucoqa na vale ni sarasara levu ni soka ena soqo oqo. E a liwa toka na cagi, ka vaka me tau mai na uca. Au a qai masu lo vua na Tamada Vakalomalagi me mataloloma mai vei ira era sa mai vakavakarau tu oqo ena veivakamarautaki me kakua ni vakaleqai na nodra isulu kei na itavi ke yaco mai na uca bi se cagi kaukauwa. A rokova na Tamada na masu o ya, me yacova sara ni sa oti taucoko na soqo ena yakavibogi o ya sa qai taubi mai na uca.
Na itukutuku ni Lotu e Brazil a matanataki ena sere kei na meke. E luluvu na yalo ena kena a vakaraitaki mai na kedrau iyaloyalo o Elders James E. Faust kei William Grant Bangerter, ka rau a kaulotu e Curitiba ena 1940. Ni sa vakaraitaki mai ena sikirini levu na kedrau iyaloyalo, era a kaila kece mai na sarasara tiko. Kivei keimami kece, sa qai dua dina na soqo lagilagi.
Ena Siti o Panama, e Panama, ni vo toka e dua na bogi me vakatabui na nodra valetabu, keimami a saravi ira e le 900 na noda itabagone, era a tadu mai Panama taucoko. Era a vakaisulu duiroka ni veivakamarautaki vakavanua ka ra meke ka tukuni itukutuku ni matavuvale, veivakatataki kei na vakabauta. Keimami a qai kila ni a dua na yabaki na nodra vakavakarau tiko mai. Era a tadu mai vakayawa mai na Yanuyanu o San Blas kei na vanua o Changuinola ena tokalau-vualiku kei Panama. Na nodra ilakolako ki na koro turaga na itabagone ni San Blas e taura e tolu na siga e vanua e wai talega. E a totoka ka veivakauqeti dina na soqo.
Na vakavakarau ki na neitou vakatabui valetabu se qai oti toka ga oqo e Twin Falls, mai Idaho, era a tara na lewe ni Lotu e dua na vanua ni idabedabe ena Filer, e Idaho, ka ra buluta na rara ena karasi kei na iukuuku eso, ka oka kina e dua na savu me vakatakarakarataka na Shoshone Falls, e dua na isakisaki ni vanua e rua na maile (3 na kilomita) na kena yawa mai na valetabu vou. Ena yakavi ni veivakamarautaki, era a ucu mai e 3,200 na cauravou kei na goneyalewa ki na buturara ka yalovaka tiko mai na reveni karakarawa kei na vulavula, ka mataliataka na buturara oqo me sa dua na wai drodro vakaitamera. Ena kena iulutaga “Na Wai Bula,” mai na Joni 4:10,14, na soqo oqo a kauti ira vata mai na itabagone ni 14 na iteki ena tikina ni valetabu vou. Era talanoataka ena sere kei na meke, na nodra vakararavi ki na bula vakayalo ena wai bula ni iVakabula kei na nodra vakararavi vakayago ki na savu ni veiulunivanua kei na veiuciwai ena nodra vanua. Vei keimami a tiko rawa ena soqo oqo, keimami a vaqaqacotaki ka vakavukui dina.
Oi au e dua au dau tokona na soqo vakaoqo. Era a vakaitavitaki kina na itabagone ena veika era na sega sara ni guilecava rawa. Na nodra sa mai veikilai oqo sa na yaco me balolo tudei ni nodra vakanananu.
Ena vula ka tarava sa na vakatabui vou tale kina na Valetabu e Mexico City Mexico ni oti na kena a vakavinakataki. Ena veivula era tarava era na tara oti kina na veivaletabu tale eso, ka na vakayacori na kedra dola raraba kei na vakatabui.
Ena mataka nikua au marautaka vakalevu meu mai vakaraitaka ni sa na tara tiko e lima tale na valetabu vovou ena kedra veivanua, ena veivula kei na veiyabaki mai oqo, ka ra na tara tiko ena veivanua oqo: mai Calgary, Alberta e Kenada; mai Cordoba e Argentina; mai na vanua vakaitamera e Kansas City; mai Philadelphia e Pennsylvania; vata kei Roma mai Itali.
Kemuni na taciqu kei na ganequ, o ira na noda daukaulotu, era veiqaravi tiko e vuravura taucoko, era sa vakasaqara tikoga na yalo era via rogoca na dina e tiko ena kosipeli i Jisu Karisito. Sa toso tikoga na Lotu; ka vakatekivu mai na gauna a tauyavutaki kina ena 178 na yabaki sa oti.
E a noqu madigi ena ono na vula sa oti meu sotavi ira na iliuliu ni veimatanitu kei ira na vakailesilesi vakamatanitu. O ira keimami a veivosaki era taleitaka na Lotu kei ira na noda lewenilotu, ka ra veitokoni mai ka veivukei. E se vo tikoga, na veivanua e vuravura e yalani tiko kina na noda lako kina ka wasea na kosipeli ena galala. Me vaka a cakava o Peresitedi Spencer W. Kimball ena 32 na yabaki sa oti, au kerea mo ni masulaka na kena dolavi na veivanua oqo, me da wasea yani kina vei ira na marau ni kosipeli. Ni da masu sa dolei kina na kerekere nei Peresitedi Kimball, ka da raica kina na cakamana ni ra sa tadola vakaveitaravi na veivanua era a sogo taumada tu ki na Lotu. Ena yaco tale na veika oqo ni da masu ena vakabauta.
Ia oqo, kemuni na taciqu kei na ganequ, ko ni yaco mai nikua me da na vakasalataki ka vakauqeti. Eso ko ni se qai lewe vou ni Lotu. Keimami kidavaki kemuni. Eso ko ni se sotava tikoga na leqa, kei na bolebole, vata na rarawa, kei na mate. Keimami lomani kemuni ka masulaki kemuni. E levu sara na itukutuku ena wasei tiko yani ena loma ni rua na siga oqo. Au sa vakadeitaka vei kemuni ni o ira na turaga kei na marama era na vosa vei kemuni era sa masulaka oti na veika me ra mai cauraka. Era sa vakauqeti ka vaqaqacotaki ena nodra kerea na veivuke kei na veidusimaki vakalomalagi.
Sa kilai keda tu vakavinaka na Tamada Vakalomalagi kei na noda dui gagadre. Me da sa vakatawani ena Nona Yalotabu ka votai ena veivosa, mai na ika 178 ni Koniferedi Raraba Vakayabaki oqo ni Lotu. Oqo na noqu masu yalodina, kau sa cabora ena yaca i Jisu Karisito, emeni.