Me Duavata na Yaloda
Era na rawata na Yalododonu me ra qarava na ka vata ga e gadreva na Turaga ni ra sa duavata ena buladodonu.
Kemuni na taciqu kei na ganequ lomani, sa ka talei sara vei au meu mai soqoni vata tiko kei kemuni ena mataka ni Sigatabu edaidai. E duidui na veimataqali bula eda sotava. Eda lako mai na veimatanitu e duidui na kena itovo, ki na matanitu ni Kalou. Ka na vakalevutaki cake tikoga na vakasoqoni vata ni parofisai o ya.
Eda sa raica na duidui vaka-tamata ka sa wavoliti keda ena veiyasai vuravura. Ena rawa ni tarai keda na tatawasewase kei na duidui oqori. O ya na vuna sa mai noqu itukutuku tiko kina ni vakanuinui nikua ni sa voleka tiko mai na siga ni duavata. Na Turaga o Jiova ena lesu mai me bula vata kei ira era sa yaco me Nona tamata ka raica ni ra sa duavata, lomavata, ka duavata kei Koya vakakina kei na Tamada Vakalomalagi.
O ni sa na rogoca oti vakawasoma vei au na itukutuku ni duavata oqori. Meu sa na vosa tiko mada ga kina . Au sa rogoca oti mai vei ira na parofita ni Kalou ena noqu bula. Na kerei me da duavata e a iotioti ni itukutuku au a nanuma rawa mai vei Peresitedi David O McKay. Era sa dau kacivaka voli ga na parofita ni Kalou me da duavata. Na gadrevi ni isolisoli oqo me soli vei keda kei na bolebole ni kena tomani tiko ena levu cake tikoga ena veisiga ni mataka, ka da sa nanamaki tiko kina vaka kawa-tamata ki na noda veitikina lagilagi.
Na noqu itukutuku sa ikoya ni da sa vinaka cake tikoga mai. Era sa masulaka tiko na itubutubu na duavata ena nodra dui veivale, ka sa vakavatukana tiko mai na nodra masu. Era sa masu vata tiko na matavuvale ena mataka kei na yakavi. Au a sureti meu masu vata kei na dua na matavuvale ena gauna ni moce ena noqu a vulagi tiko ki nodratou vale. E a kerei me cabora na masu o gone lailai duadua. E a masu me vaka e dua na peteriaki ni masulaki ira kece na lewe ni matavuvale ena yacadra yadua. Au a mani rai meu raica mada na matadra na vo ni gone kei rau na itubutubu. Au raica ni ra a duavata ena vakabauta ka lomavata ena nona masu na gonetagane lailai o ya.
Eso na lewe ni iSoqosoqo ni Veivukei era masumasu ena nodra vakarau laki sikova ena imatai ni gauna e dua na marama yada a mate vakasauri o watina . Era via kila se cava me ra cakava kei na sala era rawa ni ra cakacaka vata kina me vakarautaki na vale me baleti ira na lewe ni matavuvale kei na itokani era na lako tiko mai ki na soqo ni veibulu. Era via kila se vosa ni veivakacegui cava me ra na cavuta ena vuku ni Turaga. Sa qai basika na isau ni nodra masu. Ni ra sa yaco yani ki vale, era sa dui yavala sara na marama me ra vakacavara yadua e dua na itavi. E totolo sara na samaki ni vale ka ra a veivutunitaka eso na marama na nodra sega ni vakaitavitaki ira vakalevu cake. Na veivosa ni veivakacegui ka ra a wasei era a veisotari vinaka sara ga. Era a duavata ena veiqaravi ni Turaga ena duavata ni yalodra.
Ko ni sa na raica na kena ivakadinadina, ni da sa duavata tiko me vakataki au. Na isolisoli ni duavata sa soli tiko mai vei keda ni da sa masu vata ka cakacakataka vata tiko na loma ni Turaga. Ena yaco me na duavata na yaloda. Sa yalataka na veivakalougatataki o ya na Kalou vei ira na Nona Yalododonu yalodina, se mani vakacava sara na veiduidui me baleti ira kei na veika dredre e yaco vakavolivoliti ira tiko. E a masulaki keda tiko kei ira na Nona tisaipeli ena Nona kerea vei Tamana me da duabau.1
Na vuni noda masu ka kerea na veivakalougatataki e tautauvata sara ga kei na vuni Nona solia mai na Tamada Vakalomalagi. Eda sa kila mai na veika eda sotava ni vakacegu ena yaco mai ni da sa duavata. Eda gadreva ni da luvena vakayalo na Tamada Vakalomalagi, na yalovakacegu ka a tu vata kei keda ena noda a tu vata mai kei Koya ena bula taumada. Ena gadreva o Koya me vaka ni lomani keda me na solia vei keda na gagadre cecere ni duavata.
Ena sega ni rawa ni solia yadudua vei keda. Na reki ni duavata e gadreva vakalevu me solia o Koya vei keda e sega ni ka ni le dua. E dodonu me da vasaqara ka rawata vata kei ira na tani. Sa na sega kina meda kurabui ni Kalou e vakauqeti keda me da soqoni vata me rawa ni vakalougatataki keda. E gadreva me da soqoni vakamatavuvale. Sa tauyavutaka kina o Koya na kalasi, tabanalevu, kei na tabana, ka vakaroti keda me da dau soqoni vata vakawasoma. Ena veisoqoni oqori ka sa tuvanaka na Kalou me baleti keda, sa tu sara ga kina na noda kalougata. Eda na rawa ni masu ena vakabauta ka cakacaka vagumatua me da duavata ka na kauta mai na vakacegu ka vaqaqacotaka na noda rawa ni veiqaravi tiko.
Vei iratou na Nifai Letolu e yalataka vei iratou na iVakabula ni ratou na laki duavata kei Koya kevaka me ratou na gumatua ena veiqaravi. A kaya kina, “Ia, dou na vakalougatataki ka dou na tiko ena matanitu i Tamaqu io dou sa vakalougatataki sara me vaka sa vakalougatataki au ko Tamaqu; ia dou na vakataki au, ia koi au, au sa vakataki Tamaqu; ia ko Tamaqu kei au keirau sa duavata.”2
Sa solia vei keda na Turaga na ituvatuva me da kila na ka me da cakava me da ciqoma kina na kalougata kei na reki ni duavata. E tukuna tiko na iVola i Momani e dua na rawa ka. O ya na gauna nei Alama ena Wai ko Momani. Na ka era cakava na tamata ena gauna dredre ka vakadomobula o ya ena tuberi keda ka veivakauqeti.
Na ka kece era vakauqeti me ra vakayacora o Alama kei ira na nona tamata era veidusimaki tiko kina na tamata me ra digitaka me veisautaki na yalodra ena kaukauwa ni veisorovaki i Jisu Karisito. Ko ya walega na gauna e rawa ni solia kina na Kalou na veivakalougatataki ni duavata ni yalo.
Ena Mosaia eda wilika:
“Era sa vakatokai me ra sa lewe ni Lotu ni Kalou se lotu i Karisito, me tekivu mai na gauna ko ya. Ia, ko koya yadua sa papitaisotaki ena kaukauwa kei na lewa ni Kalou, sa wili me lewe ni nona lotu… .
“A sa vakaroti ira me ra kakua ni vakatavuvulitaka e dua na ka tani, na ka ga sa vakatavulica vei ira ko koya, o koya era a tukuna na parofita tabu.
“Ia sa vakaroti ira me ra kakua ni vakatavuvulitaka e dua tale na ka, na veivutuni ga kei na vakabauta na Turaga o Koya sa vakabulai ira na nona tamata.
“Sa vakaroti ira talega me ra kakua ni veileti, ia me ra yalovata ka me duabau ga na vakabauta ka duabau ga na papitaiso, io me ra duavata sara ka veilomani.
“A sa vakaroti ira me ra laki vunau. Era sa yaco me ra luve ni Kalou.”3
O ya na vuna e vakaroti ira kina na tamata o Alama me ra vakatavuvulitaka na vakabauta kei na veivutuni. O ya na vuna eratou namaka kina na luvequ ena veilesoni kece ena bogi ni matavuvale, meu na vaqara e dua na sala me vakauqeta e dua me vakadinadinataka na iVakabula kei na inaki ni Nona lako mai. Ena so na gauna eda na cakava sara ga na itubutubu. Na noda veibogi vinaka duadua, eda na dau vaqara na sala ni veivakayaloqaqataki me ra cakava na luveda, ena nodra vakarautaka na lesoni se saumi taro toka. Ni wasei na ivakadinadina me baleta na iVakabula, ena dau vakadinadinataka na Yalotabu. Ena veibogi vaka o ya eda dau vakila na duavata ni yaloda.
Me ikuri ni cakacaka tabu vakalotu, era tu talega na ivakavuvuli eda vakamuria oi keda na tamata ka sa muataki keda tiko ki na duavata.
E dua vei ira na ivakavuvuli oqori o ya na ivakatakila. Na ivakatakila sa sala duadua ga eda na kila kina ka muria vata na loma ni Turaga. E gadrevi kina na rarama mai cake. Na Yalo Tabu ena vakadinadinataka ki lomada kei na lomadra o ira era tiko vakavolivoliti keda, na veika e vinakata o Koya me da vakayacora. Ni da muria tiko na Nona vunau sa rawa kina ni semati vata na lomada me duabau.
Na ikarua ni ivakavuvuli me tuberi keda me da na duavata sa ikoya na yalomalumalumu. Na dokadoka sa meca levu ni duavata. Ko ni sa raica ka vakila na kena caca veiwekani. Ena vica ga na siga sa oti, au a vakaraici rau toka e rua na tamata —vinaka—ni rau sa tekivu veivosaki vakaukauwa. E tekivu ena dua na veitalanoa ni dua na ka e dina, ia e qai yaco me veiqatitaki se o cei vei rau e donu tiko. Sa toso cake sara na rorogo ni domodrau. Vaka me sa wadadamu mai na matadrau. Sa biu na veivosakitaki ni iulutaga ka ra sa veivosaki na tamata me baleti ira ga, ena nodrau dui vakadinadinataka, ni ra sa qarava rawa ka qaqa, ka rawa ni ka dina.
Ko na kidroa sara me vakataki au. Eda sa raica oti na ka vakaloloma e dau yaco ni basika na mataqali duidui vakatani. E daru kilai ira na tamata era biuta na veiwekani ni Yalododonu baleta na dokadoka e veivakamavoataki.
Ka marautaki ni da raica ni ra tiko na dautataro me ra vakamalumutaka na cava ni bera ni qai tekivu laba na cagi. O iko e rawa ni ko dautataro, se o dua ka dau vakavuna na duidui, se o dau vakararai tu ga.
E dua na sala kau sa raica ni caka kina o ya me da tovolea me da kunea na ka eda duavata kina. Me tiko vei keda na vakabauta me rawa ni da dautataro me vaka na luve ni Kalou, ena duidui kece e tiko, kei na veimataqali ivukivuki eda cakava ena tikoga na dina ni ka me vakayacori. Na dautataro levu, na dauveivakaduavatataki, sa ikoya duadua ga ena raica na sala vei ira era duidui me ra raica na dina era wasea. Na dina era na wasea ena ka levu ka bibi cake sara vei ira mai na nodra duidui. Ko na rawa ni vukei iko vakakina o ira na tani na ituvaki kilai o ya, ena nomu raica me qai toso na veiqaravi ni oti na kere veivuke vua na Kalou. Ena qai sauma na nomu masu mo vakadeitaka na veimaliwai vinaka me vaka sa cakava oti o Koya vei au.
Na ivakavuvuli vata ga o ya ena rawa ni taurivaki ni da sa tara cake tiko na duavata kei ira na veimatatamata mai na veivanua duidui. O ira na luve ni Kalou e levu na nodra duavata mai na nodra duidui. Na duidui talega ena rawa ni kauta mai eso na veigauna vinaka. Ena vukei keda na Kalou me da raica na nodra duidui na so tale ena sega ni vakavuna na ca ni bula ia ena rawa ni vakavuna mai eso na ka. Na Turaga ena vukei iko mo raica na ka ena vakavurea mai ka sega ni tiko vei iko. Ena levu sara na gauna sa vukei au kina na Kalou meu raica na Nona yalovinaka me solia kina vei au e dua e duidui mai vei au me sa ikoya sara ga na veivuke au gadreva tiko. Sai koya qori na sala ni Turaga me vakaikuritaka na Turaga e dua na ka ena gadrevi vakalevu meu qaravi Koya vakavinaka cake.
O ya sa na vakanamata yani ki na dua tale na ivakavuvuli ni duavata. Me da dau vosa vinakataki ira na tani. Na ivakavuvuli o ya ena vakatovolei ka sa vakadinadinataki ena noda bula ena veisiga. O nanuma tiko na gauna cava a se tarogi kina vei iko na ka o nanuma me baleta e dua ena nomu matavuvale se e valenilotu. A yaco vei au ena vakavica ena macawa sa oti. Qo sa tiko na gauna eda dau vakalewai ira kina na tani. Ena so na gauna ena vinakati meda vakayacora e so na vakatulewa vaka o ya. Ia levu ga na gauna sa noda digidigi sara ga. Me vaka na nona tarogi iko e dua se cava na nomu nanuma baleta na bisopi vou.
Ni da sa matua mai ena veivakaduavatataki ena totolo sara na noda nanuma e dua na ivolanikalou ni da rogoca na taro o ya: “O i kemudou na wekaqu, dou sa kila na rarama i Karisito sa vakatakila vei kemudou na sala mo dou digitaka kina na vinaka mai na ca, ia mo dou lewa vinaka na ka mo dou digia, raica na lewa dou na kitaka, dou na lewai kina.”4
Na nomu kila ni ko dau raici ira na tani ena rai e sega soti ni dau vinaka, sa na rawa ni vakavuna mo na dau tukuna eso na ka e vinaka cake me baleti ira. Me ikuri ni ivolanikalou o ya, ko ni na nanuma beka na veika a tukuna o tinamuni—a tukuni talega vei au— “Kevaka e sega ni rawa mo tukuna e dua na ka vinaka baleta e dua na tamata, kakua ga ni vosa”
Oqori ena vukei kemuni mo ni raica na veika vinaka ena cakacaka kei na ivakarau vinaka kece nei bisopi. Na iVakabula, sa nomuni daunilewa yalololoma, ena cakava o Koya me vakalewa tiko na nodaru cakacaka. Na ivolanikalou kei na ka o sa dau rogoca mai vei tinamu ena tuberi iko mo na vakaraica na veika vinaka kece e kitaka o bisopi kei na nona daucakavinaka, me vaka sara ga ena cakava na iVakabula. Au na rawa ni yalataka vei iko na vakacegu kei na marau ni ko cavuta na vosa vinaka e matau baleti ira na tani ena Rarama i Karisito. Ko na duavata sara kei nomu bisopi o ya kei na tamata ka taroga na nomu vakasama, sega ni baleta na bisopi e buladodonu tu se na tamata e tarogi iko ena duavata kei na ka ko a vakaraitaka. Ena yaco baleta ni Turaga ena laiva mo vakila na nona vakavinavinakataka ni ko digitaka mo dro laivi mai na kena kaburaki na sorenikau ni duiyaloyalo.
Ena dodonu me da vakamuria na ivakavuvuli o ya, ena nona saga tiko na Turaga me vakasoqoni ira vata e levu sara na tamata ka ra sega ni tautauvata kei keda. Na ka ena matata cake mai o ya ni Veisorovaki ena kauta mai vakatautauvata vei keda kece sara na veisau. Eda sa na tisaipeli yalomalua, dauloloma, rawarawa ni veisautaki, ka yalodina ena veika kecega. Eda na bula tiko ena veimatanitu, ia eda sa lako mai ki na loma ni Lotu, ena dua na sala ka sa na veisautaki keda. Eda sa na isolisoli ni Yalotabu me vaka e a raica o Paula na iApositolo:
“Niu sa ikoya eda sa torova rawa kina na Tamada koi keda ruarua ena Yalo e duabau ga.
“O koya oqo dou sa qai sega tiko ni vulagi kina se kai tani dou sa koro vata ga kei ira era sa lotu ka dou sa lewe ni vale ni Kalou.”5
Mai na duavata au sa rawa ni raica vakamatata, ni sa na qai rawa ni vakayacora na Turaga na veika ena raica o vuravura me vaka na cakamana. Era na rawata na Yalododonu me ra qarava na ka vata ga e gadreva na Turaga ni ra sa duavata ena buladodonu.
Na veiperesitedi ni veimatanitu, kovana, kei ira na iliuliu ni veisoqosoqo ni veivukei e vuravura era sa vakacerecerei keda—ka’u a rogoca— ena veimataqali vosa vakaoqo: “Na nomudou Lotu e a imatai me tu eke ena gauna e yaco kina na leqa. Drau vakarau era yaco vata mai kei na veika sara ga era gadreva tu na sa vakaleqai. Era kauta sara mada ga mai na nodra valelaca kei na ka me ra vakayagataka. Era sa mamakutu sara ga ka dau mamarau. E vaka me ra kila na vanua me ra gole kina kei na kena gauna.” E dau voqa talega mai na vosa oqo: “E kila tiko na nomuni lotu na ka mo ni cakava kei na kena icakacaka.”
Au vakavinavinaka vei ira ena noqu kaya ni cakamana e sega ni koto ena ituvatuva ni veika me laki qaravi, ia e davo koto sara ga ena yalodra na tamata. Era yaco mai na Yalododonu ena yaca ni Turaga mera mai solia na veivuke me na solia sara ga o Koya. Era yaco mai ena nodra muria na ivakasala era solia na ilumuti ni Turaga. Me vaka ni sa duavata tu na yalodra sa qai vakalevutaki na nodra kaukauwa.
Sa noqu ivakadinadina vakalou ni duavata eda sa donuya tiko oqo ena tosocake sara. E bula tiko na Tamada na Kalou. E dau rogoca ka sauma mai na noda masu ena yalololoma. E bula tiko na iVakabula o Jisu Karisito sa tucaketale ena lagilagi ka sa dolele tu mai ena loloma veivueti. Oqo na Nona Lotu dina. O Peresitedi Monson e parofita bula ni Kalou. Kevaka me da duavata ena tokoni koya ena vu ni yaloda taucoko, kei na yalodina vua na Kalou, me da vakayacora na veika sa talai keda kina eda na toso vata ena kaukauwa me da lako ki na vanua ena gadreva na Kalou me da lako kina ka bula me vaka taka sara ga e gadreva o Koya.
Au sa vakalougatataki kemuni mo ni taleitaka tiko na duavata ena nomuni dui matavuvale, vakakina ena Lotu. Kau sa laiva talega vei kemuni na yalayala ni Turaga me na nomuni tiko na veika vinaka e gadreva na yalomuni o ya na reki ena duavata. Ena yaca tabu i Jisu Karisito, emeni.