Sa Rauta na Veika ko Kila
Me vaka ni da tisaipeli ni Turaga o Jisu Karisito, e tu na noda taqe vakayalo vakaitamera, ni rarama kei na dina ka vakarawarawataki vei keda… . Ena noda veisiga ni dredre, me da digitaka ga na gaunisala ni yalodina.
Au marautaka vata kei kemuni na noda lewe ni Lotu i Jisu Karisito ni Yalododonu Edaidai. Ni wasea ko Peresitedi Monson na itukutuku vakasakiti ni lima na valetabu vovou, au vakasamataka na sala e yaco kina e vuravura raraba, ena veivanua yadudua, ena veisiti lelevu kei na veikoro lalai, eda sa dua ga na matavuvale vakaitamera ni vakabauta. Oi keda kece, eda sa tekivuna na noda ilakolako ki na bula tawamudu. Sa ikoya na ilakolako levu duadua. Me da toso ki liu, ka da kauta vata tiko “na yacai Karisito, me da qarava me yacova na ivakataotioti.”1
Me vaka ni vuqa na veika eda sotava me tautauvata kei na kena edaidai, vakasinaiti ena kaukauwa vakayalo kei na veivakadeitaki, e dau tu talega na veisiga eda vakila kina ni da sega ni taucoko ka sega ni vakavakarau, ena gauna e dau tara kina na yaloda na vakatitiqa kei na lomatarotaro, ena gauna e dau dredre kina me da kunea na ivurevure ni noda vakaukauwataki vakayalo. E tiki ni noda qaqa me vaka ni da tisaipeli i Karisito sa ikoya sara ga na ka eda vakayacora ena gauna era yaco mai kina vei keda na veika vakaoqo.
Rauta ni voleka na 40 na yabaki sa oti ena noqu vakasamataka tiko na bolebole ni dua na kaulotu, au vakila na noqu sega ni taucoko ka sega ni vakavakarau. Au nanuma na noqu masu, “Tamaqu Vakalomalagi, e rawa vakacava meu daukaulotu ni sa rui lailai na ka au kila?” Au vakabauta na Lotu, ia au vakila na noqu kila ka vakayalo e sa rui vakaiyalayala sara ga. Ena noqu masumasu, e yaco mai na noqu kila: “O sega ni kila na veika kecega, ia sa rauta na veika ko kila!” Na veivakadeitaki o ya e solia vei au na veivakauqeti meu sa dua na daukaulotu.
Na noda ilakolako vakayalo sa ikoya na ivakarau ni dua na gauna ni bula. Eda sega ni kila na veika taucoko ena kena itekitekivu se ena ilakolako sara mada ga. Na noda saumaki ki na lotu e lako mai vakaikabakaba, vakaiyatu. Me da tara taumada e dua na yavu ni vakabauta na Turaga, o Jisu Karisito. Me da maroroya na ivakavuvuli kei na cakacaka vakalotu ni veivutuni, papitaiso, kei na ciqomi ni isoliloli ni Yalo Tabu. Me da okata na tomani ni vakaitavi ena masumasu, na yalodina me da talairawarawa, kei na toso tiko ni ivakadinadina ni iVola iMomani. (Na iVola iMomani e kaukauwa ena veivakani vakayalo.)
Me da na qai tudei ka vosota ena noda toso ki liu mai na bula vakavuravura. E vagauna, ena vakaoqo na isau ni taro mai vua na Turaga. “O sega ni kila na veika taucoko, ia sa rauta na veika ko kila”—sa rauta me maroroi kina na ivakaro ka vakayacora na veika e dodonu. Nanuma na vosa i Nifai: “Au sa kila ni sa lomani ira na luvena; ia, au sega ga ni kila na ibalebale ni veika kece au sa raica.”2
Au a sikova e dua na tabana ni kaulotu ena Ceva kei Iurope. Au tadu yani ena siga e sa vakavakarau tiko kina e dua na daukaulotu vou me sa lesu tale ivale ena nona lewa ga vakaikoya . E sa tiko vua na nona tikite me biubiu ena siga ka tarava.
Keitou a dabe vata ena vale nei peresitedi ni kaulotu. E tukuna vei au na daukaulotu na veibolebole ni nona gauna ni gone, na kena dredre na nona vuli, na veitokiyaki mai na dua na matavuvale ki na dua tale. E kaya ena yalodina na kena dredre vua me vulica e dua na vosa vou ka vakamatautaki koya ki na dua na ivakarau vou vakavanua. E qai tomana, “I Baraca Andersen, au sega mada ga ni kila kevaka e lomani au na Kalou.” Ena nona cavuta oti na veivosa oqori, au vakila ni curuma na yaloqu e dua na vakanananu dina ka kaukauwa, “E kila niu lomani koya. E kila tiko.”
Au laiva me tomana ena vica tale na miniti, oti au qai kaya, “I Elder, au loloma vakalevu ena veika o kaya, ia e dodonu meu vakadodonutaki iko ena dua na ka: o kila tiko ni Kalou e lomani iko. Mo kila tiko o Koya e lomani iko.”
Ena noqu cavuta vua na veivosa oqori, na yalo vata ga ka a vosa kivei au, e vosa vua. E a cuva sobu ka tekivu me tagi. E kere veivosoti. “O dina, Baraca Andersen,” e kaya, “Au kila ni lomani au na Kalou, au kila tiko.” E sega ni kila na veika taucoko ia e kila vakarauta ga. E kila tiko ni lomani koya na Kalou. Na tiki ni kila ka vakayalo sega ni saumi o ya e sa veirauti kei na nona lomatarotaro me sosomitaka na vakabauta. E kunea na kaukauwa me tomana na nona kaulotu.
Kemuni na taciqu kei na ganequ, e tu na noda dui gauna ni kaukauwa vakayalo, na veigauna ni veivakauqeti kei na ivakatakila. E dodonu me da vakatikori ira vakatitobu e vu ni yaloda. Ni da sa vakayacora vakakina, eda sa vakarautaka na maroroi ni veika vakayalo me baleta na veigauna ni dredre vakatamata yadua. E kaya o Jisu: “Vakadeitaka oqo e lomamu, ni o na cakava na veika au na vakatavulica, ka vakarota vei iko.”3
Ena vica na yabaki sa oti, a mate na luvena goneyalewa e dua na noqu itokani ena dua na vakacalaka vakaciriloloma. Era tayana na vakanuinui kei na tadra. E sega ni vosota rawa na nona rarawa o noqu itokani. A tekivu me taroga na veika a vakatavulici kina kei na veika a vakatavuvulitaka ena nona gauna ni kaulotu. E vola mai vei au e dua na ivola na tinai koya na noqu itokani ka taroga kevaka e rawa meu solia vua e dua na veivakalougatataki. Ena noqu sa tabaka na uluna, au nanuma meu tukuna vua e dua na ka au a sega mada ni bau vakasamataka me vakaoqo ena dua na gauna e liu. E yaco mai vei au na veivakauqeti ni: Vakabauta e sega ni dua walega na ka o vakila, ia e dua na vakatulewa. Ena gadrevi ko koya me digitaka na vakabauta.
E sega ni kila na noqu itokani na veika taucoko, ia e kila vakarauta. E digitaka na gaunisala ni vakabauta kei na talairawarawa. E a tekiduru. E vakalesui mai na nona rai vakayalo.
Sa sivi yani e vica na yabaki na kena yaco na veika o ya. Ena dua na gauna lekaleka sa oti au a ciqoma kina e dua na ivola mai vua na luvena gonetagane ka kaulotu tiko ena gauna oqo. E sa sinai ena veivakadeitaki kei na ivakadinadina. Ena noqu wilika na nona ivola totoka oqo, au raica na nona digidigi ena vakabauta e dua na tamanigone ena dua na gauna dredre vakalevu sara ka sa vakalougatataki kina vakatitobu na itabatamata ka tarava.
Na bolebole, dredre, taro, vakatitiqa—na veika oqo era tiki ni noda bula vakavuravura. Ia eda sega ni tiko duadua. Me vaka ni da tisaipeli ni Turaga o Jisu Karisito, e tu na noda taqe vakayalo vakaitamera, ni rarama kei na dina ka vakarawarawataki vei keda. Na rere kei na vakabauta ena sega ni rawa me rau tiko vata e yaloda ena dua vata na gauna! Ena noda veisiga ni dredre, me da digitaka ga na gaunisala ni yalodina. E kaya o Jisu, “Kakua ni yalolailai, vakadinata ga.”4
Ena veiyabaki eda dau cavuta ka cavuta tale na veikalawa vakayalo bibi oqo. Sa tekivu me da raica ni “ko koya sa kunea na rarama ka tudei tikoga vua na Kalou, ena vakararamataki vakalevu; ia ena tubu cake tikoga na nona rarama me yacova na siga lagilagi ko ya.”5 Era wali na noda taro kei na noda lomatarotaro, se era sa sega ni vakaleqai keda tale. E yaco me rawarawa ka makare sese na noda vakabauta. E yaco me da kila na veika eda sa kila oti tu.
E kaya o Jisu: “Kevaka dou … ka yaco me vaka na gone lailai, dou na sega sara ni curu ki na matanitu vakalomalagi.”6
Sa yabaki vitu ena gauna oqo o Hadley Peay. E a sucu mai o Hadley ena leqa bibi ni didivara ka gadrevi kina na veisele levu vakavuniwai me rawa kina ni bau rogo mada ga vakalailai na daligana. E rau qai muria na nona itubutubu ena veituberi ka sega ni guce me vukea na nona vulica me rawa ni vosa. Eratou sa vakamatautaki iratou o Hadley kei na nona matavuvale me ciqomi ena yalomarau na bolebole ni nona daliga vara.
Ena dua na gauna, ni sa yabaki va o Hadley, e a tucake tu vata kei tinana ena iyatu ni sausaumi ena sitoa ni volivoli. E rai mai dakuna ka raica e dua na gonetagane lailai ni dabe toka ena idabedabe qiqi. E raica ni sega na yavana na gonetagane o ya.
E dina ga ni sa vulica o Hadley me vosa, e dredre vua me vakalailaitaka na rorogo ni domona. Ena rogo levu ni domona, a tarogi tinana se cava e sega kina na yavai koya na gonetagane.
A vakamacalataka vakarawarawa ena vakadirorogo vei Hadley o tinana ni “Tamada Vakalomalagi e buli ira na Luvena taucoko me ra duidui.” “Oi,” e sauma lesu o Hadley.
E vakasauri sara ga, nona vuki o Hadley kivua na gonetagane lailai ka kaya, “O kila beka ni gauna e buli au mai kina na Tamada Vakalomalagi, e sega tu ni rogo na daligaqu? Oqori e yaco kina meu duatani. E buli iko me sega na yavamu ka yaco kina mo duatani. Ena gauna e sa na lako mai kina o Jisu, e sa na rawa me rogo na daligaqu ka sa na rawa na yavamu. Ena vakavinakataka na veika kecega o Jisu.”
“Kevaka dou … ka yaco me vaka na gone lailai, dou na sega sara ni curu ki na matanitu vakalomalagi.”7
E kila vakarauta o Hadley.
O Jisu na Karisito. E sa tucaketale o Koya. O Koya na noda iVakabula ka Dauveivueti. Ena caka vakavinaka na veika taucoko ena Nona sa lesu tale mai. Oqo na Nona cakacaka tabu. Mai vua na Parofita o Josefa Simici, na Nona matabete e a vakalesui tale ena dela ni vuravura kei na Nona parofita edaidai o Peresitedi Thomas S. Monson. Au vakadinadinataka oqo, ena yacai Jisu Karisito, emeni.