Na iVurevure ni Veidusimaki sa na Duatani ena Gauna Oqo mai na Mekesini ni Koniferedi

Na iVurevure ni Veidusimaki me baleti ira na qasenivuli ni Matabete i Eroni kei na Goneyalewa, ka dau kunei e liu ena itabataba ni koniferedi ni Liaona kei na Ensign, sa na tabaki tani ga ena gauna oqo ka vakau yani vakadodonu ki na veitabanalevu kei na tabana.

“E veivuke na idusidusi ka vaqaqacotaka na ivolavakarau ni Matabete i Eroni kei na Goneyalewa ena kena vakarautaki vei ira na qasenivuli na nodra vosa na iliuliu ni Lotu ena gauna oqo ena iulutaga ni lesoni,” e kaya ko Michael G. Madsen ena Tabacakacaka ni Lewenivuli ena Lotu.

E vakarautaki ena idusidusi na veika me veivuke ki na veilesoni yadua ni dusimaka na italanoa kei na vosa era tukuna na iliuliu ni Lotu kei na veitukutuku tale eso ena mekesini ni Lotu era se qai tabaki ena dua na gauna lekaleka ga oqo. Sa vakuri ena idusidusi vou oqo na taro, vosacavuti, kei na iwalewale ni veivakavulici me ra tomitomi mai kina. E kena inaki na idusidusi vovou oqo me vukea ka vakavinakataka cake na veika sa tu ena ivolavakarau, ka sega ni sosomitaka.

Sa na tabaki tani ga na ivurevure ni veidusimaki me vakadua ena veiyabaki. E wase vakava na idusidusi vou oqo: na taro, ikuri ni ivurevure, na veika sa sotavi, kei na iwalewale ni veivakavulici.

Ena tabaki na idusidusi vou ena 27 na vosa ka vakarautaki kina na lesoni ni Sigatabu ka vakakina na vakatutu eso me baleta na nodra itaviqaravi na itabagone ena loma ni macawa. Era tuvalaki na itaviqaravi oqo me sala vata kei na lesoni ena Sigatabu, e soli kina vei ira na itabagone na gauna me ra vakila ka vakayagataka na veika era sa vakavulici kina. E vuqa na itaviqaravi ena veivuke ena kena vakacavari na veika e gadrevi ena iTavi Vua na Kalou kei na Torocake Yadudua.

“Eda semata na veika era vulica ena Sigatabu ki na dua na itaviqaravi ena dua na bogi ena loma ni macawa me vukea na kena biu na kosipeli ki yalodra,” e kaya ko Baraca Madsen.

Era sa vakayaloqaqataki na veiliutaki ni Cauravou kei na Goneyalewa me ra vakayagataka na idusidusi vou vata kei na nodra iyaya ni veivakavulici. E okati ena idusidusi e 11 na iwalewale bibi ni veivakavulici me vukei ira na qasenivuli ena nodra tuvalaka ka vakavulica na veilesoni yaga.

“Kevaka era muria na qasenivuli na iwalewale eso ni veivakavulici oqo, sa rawa ni ra vakavinakataka cake sara na nodra veivakavulici,” e kaya ko Baraca Madsen.

Na idusidusi vou me baleta na 2009 a sa tu ena Veisitoa ni Lotu ena ika 2 ni Sepiteba, 2008.