Kacivaka ko Peresitedi Monson na Veivaletabu Vovou

Sa na levu cake na lewe ni Lotu era rawata na veivakalougatataki ni valetabu ni sa na tara oti na lima na valetabu vovou ka kacivaki ena koniferedi raraba. Sa kacivaka o Peresitedi Thomas S. Monson na ituvatuva me baleta na veivaletabu vovou oqo ena nona vosa idola ni koniferedi ena soqoni ena mataka ni Vakarauwai na ika 4 ni Okotova, 2008.

Na veivaletabu vovou oqo era na tara e Calgary, Alberta, Canada; Córdoba, Argentina; e Kansas City, Missouri, ena iwasewase ni vanua vaka-Amerika; Philadelphia, Pennsylvania, Amerika; kei Roma, e Itali. Era sa voli oti na vanua me ra na tara kina na veivaletabu oqori.

“Sa dua na siga lagilagi vei keda kece me da ivakadinadina bula ni kena kacivaki e lima na valetabu vovou mai vua na noda parofita lomani,” e kaya ko Peresitedi Dieter F. Uchtdorf, na iKarua ni Daunivakasala ena Mataveiliutaki Taumada ena nona vosa ni oti ga na kacikacivaki oqo. “Sa dua na siga totoka vei keda kece.”

Na valetabu mai Calgary, e Alberta, Canada, ena tara ena dua na qele e taukena na Lotu volekata e dua na valenilotu sa tu rawa tu ena vua-i-ra ni koro levu oqo. Oqo sa na ika walu ni valetabu e Canada ka ikatolu ena yasana ko Alberta. Na veivaletabu tale eso e Canada e okati kina na kena e Halifax, Nova Scotia; Edmonton, Alberta; Cardston, Alberta; Regina Saskatchewan; Toronto, Ontario; Montreal, Quebec; kei Vancouver, British Columbia (na valetabu e British Columbia e se tara tiko ena gauna oqo).

Na valetabu e Córdoba, Argentina, ena dabe ena vanua e duri tu kina na valenilotu e Belgrano, volekata na vale ni tabana ni kaulotu. Oqo ena ika 34 ni valetabu e Amerika vaka-Latina ka ikarua e Argentina. Na imatai ni valetabu e Argentina a vakatabui ena 1986 ena koroturaga ko Buenos Aires.

Na tubu tikoga ni Lotu e Amerika sa vakaraitaki ena kacivaki ni ituvatuva me dua na valetabu e Kansas City, ena yasayasa vaka-Missouri, kei Philadelphia, e Pennsylvania. Na valetabu oqori ena vakuri kina na vicasagavulu na valetabu sa tu e Amerika raraba. Na valetabu me ra na qaravi kina ena iwasewase ni vanua e Kansas City ena tara e Clay County, mai Missouri, ena iyalayala ni vanu kei Kansas City ena dua na vanua ka vakatorocaketaki tiko me tara kina na veivale me itikotiko e Shoal Creek. Na valetabu e Philadelphia ena tara e loma ni taoni, tautauvata kei na veivaletabu tale eso ka ra tara ena veikoro vakavalagi me vakataki Manhattan kei Hong Kong.

Ena yaga sara vakalevu vei ira na Yalododonu ena yasayasa vaka-Mediterranean na kena sa kacivaki me dua na valetabu e Roma, mai Itali. Ena tara na valetabu ena tiki ni dua na qele ni Lotu rauta ni 15 na eka (6 na ekatea) volekata na gaunisala mokimokiti ka dodo ena vua-i-cake kei Roma. Na valetabu sa kacivaki oqo ena kena ika 12 e Iurope. Ena vinaka vei ira na lewe ni Lotu ena veimatanitu voleka ena kena lailai na gauna ni lako ka vakakina na lailai ni ilavo e vakayagataki ena veilakoyaki.

Sa 128 na valetabu vakatabui sa vakayagataki tiko ena gauna oqo kei na 17 tale sa kacivaki se sa tara tiko, sa kauta mai kina ki na 145 na levu taucoko ni valetabu, na kena sa kacivaki kei koya sa vakayagataki tiko e vuravura raraba.