Rokova na Matabete ka Vakayagataka Vakavuku
Na ivakaraitaki vinaka duadua ni kena vakayagataki na matabete tabu, o koya na noda iVakabula o Jisu Karisito. A veiqaravi ena loloma, yalololoma, kei na lomasoli.
Kemuni na taciqu lomani, eda sa soqoni vata mai na veiyasai vuravura ena veitokani vinaka ni matabete tabu ni Kalou. Eda sa kalougata dina ni da dua vei ira na lewe vica wale sara na turaga e vuravura ka da nuitaki ena lewa ni veiqaravi ena vuku ni iVakabula me ra vakalougatataki na tani ena kena vakayagataki vakadodonu na Nona matabete.
Au dau vakasamataka, se vica vei keda e bau dau vakanananutaka na kena sa rui bibi dina na taukeni tu ni Matabete i Eroni kei Melikiseteki. Ni da vakasamataka na nodra lewe vica wale na tamata era a bula voli e vuravura ka tu vei ira na matabete kei na nona sa vakaukauwataki ira o Jisu Karisito me ra veiqaravi ena vuku ni Yacana, sa dodonu me da vakavinavinakataka sara vakalevu na matabete sa dui tu oqo vei keda.
Na matabete sa ikoya na dodonu mo veiqaravi ena yaca ni Kalou. Ena gadrevi na kaukauwa o ya ena kena vakataucokotaki na Nona cakacaka e vuravura. Na matabete e tiko vei keda e dua na tiki ni lewa tawamudu ni Kalou sa lesi vei keda. Ni da sa dina ka tudei ena vakabauta, sa na ka e tawamudu na noda lumuti ki na matabete.
Ia, na kena soli walega na dodonu, e sega ni sa soli talega kina na kaukauwa ni itutu. Na iyalayala ni noda rawa ni vakayagataka na kaukauwa ni matabete ena vakatau mai na bula kilikili yadua, vakabauta na Turaga o Jisu Karisito, ka talairawarawa ki na Nona ivakaro. Ena levu cake sara na ka eda na rawa ni cakava ena kena vakayagataki na matabete, ni tokoni mai na dua na yavu ni kila na ivakavuvuli ni kosipeli.
Na ivakaraitaki vinaka duadua ni kena vakayagataki na matabete tabu, o koya na noda iVakabula o Jisu Karisito. A veiqaravi ena loloma, yalololoma, kei na lomasoli. Na Nona bula e ivakaraitaki sega ni vakatauvatani rawa ni yalomalua kei na kaukauwa. Na veivakalougatataki levu duadua ena kena vakayagataki na matabete, sa ikoya na veiqaravi vei ira na tani, ka sega ni nanumi koya ga. Eda na rawa ni yacova na kaukauwa vakaitamera, ni da vakamuria na Nona ivakaraitaki ni matabete yalodina ka talairawarawa. Ni gadrevi vakakina, eda na rawa ni vakayagataka na kaukauwa ni veivakabulai, veivakalougatataki, veivakalomavinakataki, veivakasalataki, ena kena vakamuri ena yalodina na veivakauqeti ni Yalotabu.
Ena loma ni vica na miniti au kerei kemuni mo ni vakasamataka ni daru tiko ena dua na vanua vakadigagalu ka vakatarai kina ena kena draki na veituberi ni Yalo Tabu. Eso vei kemuni era dau vakatarogi ena veigauna eso me baleta na kilikili ni nodra bula, ka so tale ena vuku ni nodra ilesilesi sa dau vakayacori kina vei ira ena veigauna eso. Ena rawa beka ni dua nodaru veivakatarogi yadua ni matabete ena loma ni vica na miniti mai oqo?
Ni da wasea vata tiko na gauna oqo, au kerei kemuni mo ni vakananuma toka na nomuni kilikili kaya na lewa vakalou sa toka oqori vei kemuni. Au na tarogi kemuni talega mo ni vakasamataka se vakacava na nomuni dau vakayagataka na lewa vakamatabete me ra vakalougatataki kina na tani. E sega ni noqu inaki meu vakalelewa, ia meu vakalevutaka na veika vinaka ena dau basika mai ena nomuni dau vakayagataka na matabete.
Sa savasava tiko li na nomuni vakasama me rawa ni tiko dei kina na Yalo Tabu, se na gadrevi beka me vakasavasavataki vinaka sara? Ko ni dau vakasinaita li na nomuni vakasama ena veika vinaka ka veivakauqeti, se ko ni sa rawai beka ena saravi ni iyaloyalo vakasisila na ivola se na Mataveilawa? Ko ni sa sasaga tiko li vakaukauwa mo ni vakuwai kemuni mai na vakayagataki ni veiwaigaga ka veibasai kei na ka e gadreva na ivakavuvuli ni Vosa ni Vuku, se o ni sa vakatara tiko e so na ka vakatabui oqo mai na veiulubale lokiloki? O ni sa tovolea tiko li mo ni qarauna vinaka na veika me curu ena nomuni vakasama ena rai ni matamuni kei na rogo ni daligamuni me vakadeitaka ni sa vinaka vakaoti ka veivakauqeti?
Kevaka ko ni sa veisere, ko sa solia tiko li vakadodonu na ilavo me baleti ira na gone ko ni a tamadra, e sega ni ilavo walega ni veika vakalawa?
Kevaka o ni sa vakawati, ko ni sa yalodina tiko li vua na watimuni ena nomuni vakasama kei na nomuni bula vakayago? Ko ni sa yalodina tiko li ki na nomuni veiyalayalati ni vakamau ena nomuni sega ni veitalanoataka tale tiko e dua na ka kei na dua tale na marama o ni na sega ni vinakata me rogoca o watimuni? Ko ni sa dau yalololoma li ka dau tokoni watimuni kei ira na luvemuni? Ko ni dau vukei watimuni li ena nomuni cakava eso na cakacaka ni vale? Ko ni dau veiliutaki li ena itaviqaravi ni matavuvale me vaka na wili ivolanikalou, masu ni matavuvale, kei na lotu ni matavuvale, se sa dau veiliutaki tu kina o watimuni ni o ni vakaweleweletaka na nomuni itavi e vale? Ko ni dau tukuna li vua ni o ni lomani koya?
Kevaka me so vei kemuni e logaloga ca ena dua ga na isau ni taro ko ni sauma kina na veitaro oqo ena nomuni vakasama, ni vakadodonutaki kemuni sara ga oqo. Kevaka me tiko na leqa ni bula kilikili, au sa vakauqeti kemuni mai na vu ni yaloqu malumalumu mo ni raica na nomuni bisopi se dua vei iratou na mataveiliutaki ena iteki ena gauna sara ga oqo. Ko ni gadreva na veivuke. Na veika ko ni ora tiko kina oqori era na sega ni seyavu vakataki ira. Kevaka me sega ni qaravi rawa oqo ena ca sara vakalevu. Ena via dredre toka vei kemuni mo ni raici ira na nomuni iliuliu ni matabete, ia au sa vakauqeti kemuni mo ni cakava sara ga oqo, mo ni vinaka kina ka vaka talega kina o ira era lomani kemuni.
Kemuni na taciqu au sa na vosa sara oqo ena kena vakayagataki na matabete me vakalougatataki kina na nodra bula na tani, vakabibi o ira na luvena yalewa na Tamada Vakalomalagi.
Na ivakaro ni matavuvale e tukuna ni tagane kei na yalewa me rau tautauvata. Au vakabauta ni yalewa vakawati taucoko ena loma ni Lotu era na ciqoma vakarawarawa sara ka tokona. Na kena yaco se sega ena vakatau vei tagane. E dua na iwase levu ni tagane era bulataka tiko na ivakavuvuli oqo ni veitokani tautauvata ka sa vinaka sara vei rau ruarua, ka ra kalougata kina na luvedrau. Ia, e dua na iwase levu era sega ni bulataka. Au vakauqeti kemuni o ni lomalomarua tiko ena nomuni duavata kei watimuni, mo drau talairawarawa ena ivakasala mai vua na Turaga ka cakava sara ga oqo. Na duavata ena kauta mai na veivakalougatataki levu duadua ni rau sa dau vakararavitaka vua na Turaga na veika e rau vakatulewataka me baleti rau kei na nodrau matavuvale.
Vakararavi ki na veivakauqeti ni Yalotabu ena gauna o ni vakayagataka tiko kina na matabete ena yaca ni Turaga. Yadrava vinaka na ka e rawa mo ni cakava mo ni vakayagataka kina na kaukauwa ni matabete ena nodra bula o ira o ni qaravi ira tiko kei ira o ni lomana. Au vakasamataka tiko vakabibi eso na wekada, me vaka beka e dua na yada ka rawa ni yaga sara vua na nona veivuke e dua na matabete dau veikauwaitaki ka yalololoma. E levu vakaoya era na sega ni kerea na veivuke. Mo ni yadrava tiko na veibolebole o ni rawa ni veivuke ena kena wali ena nona loma ni vale, me vaka na vakacegui ni vakanuinui ena veivakalougatataki vakabete vakauqeti se na gadrevi ni ripea lalai eso.
Me vaka ni o ni bisopi, o ni na kila ka rogoca mai vei ira na marama era lewena tiko na matabose ni tabanalevu. Sa na rawa ni ra kila se o cei na marama e sega tu ni vakalougatataki mai vei ira na matabete ena nodra loma ni vale. Ena dua na veisiko, sa na rawa ki na iSoqosoqo ni Veivukei me kila na leqa ka vakatura na kena iwali ena veivuke cava ga e veiganiti. Na veika ena ulabaleta na itavi ni iSoqosoqo ni Veivukei, sa na rawa ni o ni kaciva na veivuke ni kuoramu ni italatala qase se kuoramu ni bete levu
Ni o ni vakasalataka e dua na veiwatini ena nomuni itutu vaka-bisovi ni rau sotava tiko na bula-dredre vakaveiwatini, ko ni dau vakarogoca vinaka li na itukutuku nei yalewa me vaka na nomuni dau vakarogoci tagane? Ena noqu dau veisiko wavoki e vuravura, au raica ni so na yalewa era sa dau sega ni rogoci vinaka ni vaka me ra dau rogoci vakavinaka na luvena tagane mai vei ira na luvena yalewa na Tamada Vakalomalagi. Na duidui o ya me kakua sara ni yaco.
E dau soli beka vei ira na yalewa sega ni vakawati na veika e ganiti ira ena tabanalevu ni matavuvale? E soli beka li vei ira na galala me ra vakaitavi ka ra dau tokoni li ka taleitaki? Era dau tokoni li mai na matabete?
Na inaki dodonu ni matabete me da dau solisoli, dauveiqaravi, dauveivakatatakicake, dau veivakauqeti—sega ni vakayagataki vakatawadodonu se veivakasaurarataki. Ena so na vanua, era dau biu na turaga me ra vakaliuci ena nodra lewa ga na ka me vakayacori baleta na matavuvale. O ya e sega ni ivalavala ni Turaga. Ena so tale na vanua na yalewa sa vaka me taukeni tu mai vua na tagane, me vaka e dua na nona iyaya vakataki koya. O ya e dua na ka vakaloloma, sega na kena yaga, ka dua na rai cala ni bula vakawati ka vakauqeta voli o Lusefa ni sa dodonu ki na matabete taucoko me vakacala. E yavutaki ena ivakavuvuli cala ni sa vinaka cake mai vua na yalewa na tagane. E sega sara ga ni ka dredre na kena dina. E vakadeitaka na ivolanikalou ni Tamada Vakalomalagi e maroroya toka na nona ibulibuli levu duadua, vinaka duadua, ka cecere duadua, o ya na yalewa, me qai kena itinitini. Ni sa buli oti na veika kece sa qai buli na yalewa. E kea sa qai tukuni kina ni sa oti na veibuli ka sa vinaka.
O ira na watida, tinada, buda, ganeda kei ira na yalewa vakamareqeti ena noda bula, e kaya vakaoqo o Peresitedi Hinckley: “Mai vei ira kece na ibulibuli nei koya sa Cecere Sara, sa sega e dua e talei cake, se veivakauqeti cake mai vua e dua na luvena totoka na Kalou ka lako voli ena ivakarau vinaka kei na nona kila na vuna, o koya ka doka ka rokova na yagona me vaka e dua na ka sa vakatabui ka vakalou, ka sa dau vakabulabulataka na nona vakasama ka dau vakarabailevutaka tikoga na nona kila ka, ka dau vakania na yalona ena veidina tawavakaiyalayala.”1
Ena ituvatuva vakalou era na duidui toka na yalewa mai na tagane ena levu sara na ka. 2 O koya e dauloloma, ka sasaga me kila na ka era vinakata na tiko vakavolivoliti koya. Ia, na yalodauloloma o ya ena rawata vakarawarawa na veika era vakasamataka ni rawa ni ra na cakava, vakabibi vata kei na veivuke ni Turaga. Eso era na yalolailai ni ra raica ni ra sa sega tiko ni rawata na ka e dodonu me ra cakava. Au vakabauta ni veika vakaoqo era sotava tiko eso na yalewa buladodonu, yalodina ka gugumatua ena Lotu.
O koya gona ni ko ni tama se luvena tagane e dua, vakaraitaka na nomuni vakavinavinakataka na veika e dau vakayacora o watimuni se o tinamuni me baleti kemuni. Vakaraitaka wasoma na nomu loloma kei na vakavinavinaka. O ya ena vakacokotaka na bula, ka na vakaibalebale ka taleitaki vei ira e levu sara na luvena yalewa na Tamada Vakalomalagi, ka dau tu yadua sara na nodra rogoca me ra vakavinavinakataki ena veika era dau vakayacora. Ni ko ni tama ni matavuvale, ena gauna o ni kila ni gadreva o watimuni na veivakayaloqaqataki, ni tauri koya e ligamuni ka tukuna vua na rabailevu ni nomuni lomani koya. Me da dau yalololoma ka dau vakavinavinakataka na marama era sa mai vakacokotaka na noda bula.
Dau vakavuqa me sega ni kilai tu na bibi ni dua na ka me yacova ni sa kau tani mai vei keda. Me kena ivakaraitaki, taura mada e dua ka sa sega ni rawa ni vakayagataka na matabete ena vuku ni ivalavala ca. E muri a qai vakalesui vua ena kena vakalesui mai na veicakacaka tabu vakalotu a rawata ni sa taucoko na nona veivutuni. Ni oti na veivakalesui, au a vuki vua na watina ka kaya, “O vinakata beka e dua na veivakalougatataki?” A sauma mai ena nanamaki. Au vuki vua na watina, ka sa na rawa oqo ni vakayagataka na matabete ka kaya, “O na vinakata beka mo solia vei watimu e dua na veivakalougatataki?” E sega na vosa me na vakamacalataki rawa kina na yalo e yaco mai ena veigauna vakakoya kei na ivau ni veilomani, na veivakabauti, kei na vakavinavinaka e basika kina. E sega ni dodonu mo ni vakayalia na nomuni matabete mo ni qai rawa ni marautaka vakavinaka.
Au kila na levu ni yalovakacegu kei na marau e dau yaco mai niu lomana, vakamareqeta, ka doka na watiqu daulomani ena yaloqu taucoko kei na noqu nanuma kecega. Me nomuni tiko na yalovakacegu ena nomuni vakayagataka tiko vakadodonu na matabete vei ira na marama bibi duadua ena nomuni bula.
Niu dua vei ira na 15 na iApositolo ni Turaga ko Jisu Karisito e vuravura au vakaraitaka na noqu nanuma me baleta na matabete ena kena vakamacalataki vakamatatata sara mai na vosa oqo nei Peresitedi Howard W. Hunter: “Ni da ivakadinadina digitaki ni iVakabula, sa soli vei keda na ilesilesi vakaitamera oqo me da liutaka na cicivaki ni nona lotu kei na matanitu me da veiqaravi vei ira na luvena yalewa kei na luvena tagane ena veivanua cava ga era tu kina ena delai vuravura. Ena vuku ni noda ilesilesi me da ivakadinadina, veiliutaki, ka veiqaravi, sa gadrevi vei keda, veitalia ga na noda yabaki, na malumalumu vakayago, na oca kei na yalolailai, eda na cakava na cakacaka sa solia vei keda me da cakava, ki na iotioti ni noda icegu ni bula.”3
Eda na tarogi mai vua na Kalou ena noda dau lomani ira na Luvena marama. O koya, me da dau raici ira ena kena ivakarau ena gadreva o Koya. Au masulaka me da tuberi mai vua na Turaga, me da na vakauqeti, dau yadrava, ka gugumatua ena vakayagataki ni matabete eda taura tu vakabibi vei ira na Luvena yalewa. Ena yacai Jisu Karisito, emeni.