Vakamau Vakasilesitieli

Elder Russell M. Nelson

Ena Kuoramu ni iApositolo Le Tinikarua

[Na] ivakaro ki na matavuvale ena vukei keda vakalevu cake mai vei ira eso tale na matavuvale, ena noda kila ni na kauta mai vei keda na rawati ni marau, na vakamau vakasilesitieli.

Kemuni na taciqu kei na ganequ lomani, au marautaki kemuni yadudua sara vakalevu. Eda vakila vata kece tiko na levu ni marautaki ni kosipeli i Jisu Karisito. Ena vuravura ka sa vakasinaiti sara tu ga oqo ena veika rarawa eda sa vakavinavinakataka vakalevu dina na “ituvatuva cecere ni marau”¹ ni Kalou. E vakaraitaka na nona ituvatuva ni sa sucu na tamata “me rawata na marau.”² Ena yaco mai na marau ena gauna eda digitaka kina me da bula kilikili kaya na ituvutava tawamudu ni Kalou.

Na bibi ni digidigi sa na rawa me vakaraitaki ena dua na ivakavuvuli rawarawa, kau a vakasamataka ena dua na siga niu a volivoli tiko ena dua na sitoa ni iyaya lailai. Au vakatoka me “ivakarau ni dauveivoli.” Me vaka ni tiki toka ni noda bula e veisiga na volivoli, ena via kilai levu na ivakarau oqo.

Era dau vulica vinaka na dauvolivoli yalomatua na veidigidigi sa tu e matadra ni bera ni ra digidigi. Era dau raica sara ga e liu na vinaka, kei na balavu ni bula ni ivoli era via volia. Era dau vinakata na kena e vinaka duadua. Me kena veibasai, eso na dauvolivoli era vaqara e dua na veivosaki vinaka, eso tale era na volivoli tu ga, ka ra qai dau kila e muri—ena kidacala vakaitamera—ni sega soti ni balavu sara na bula ni nodra digidigi. Ia e ka ni rarawa sara, ni ra tu talega o ira ka ra ivakarau ca ka ra dau butakoca ga na ka era vinakata. Ka da vakatokai ira me ra daubutako (shoplifters).

Na ituvatuva nei dauvolivoli ena rawa ni taurivaki ki na iulutaga ni vakawati. Erau na rawa ni digia e dua na veiwatini dauveilomani e dua na vakawati ena kena ivakatagedegede cecere duadua se dua na kena mataqali ka na sega ni dede. Se rau na sega beka ni digi rau ruarua oqo, ka rau na butako matanalevu tu ga me vakataki ira na “vakawati daubutako” (marital shoplifters).

E veibataki wavokiti vuravura raraba sara tikoga nikua na iulutaga oqo na vakawati, ka sa vanua talega ka tuvalaki tiko kina na veimataqali iwalewale ni bula vakawati. Na vuni noqu via vosa ena iulutaga oqo sa ikoya meu vunautaka kina vaka e dua na iApositolo ni Turaga,³ ni sa ka vakalou na vakawati ni dua na tagane kei na yalewa—sa lumuti mai vua na Kalou.⁴ Au vakadeitaka talega na vakalou ni dua na vakawati e valetabu. Sa ikoya na ivakarau ni vakawati e cecere ka dede duadua ka rawa me solia na noda Dauveibuli vei ira na Luvena.

Na gauna vata e dua kina na ka vakayadua na vakabulai, sa vakamatavuvale na bula vakalou.⁵ O ira ga era sa vakamau e valetabu ka sa vauci na nodra vakawati ena Yalo Tabu ni Yalayala era na tomana tiko na nodra veiwatini ni oti na mate⁶ ka ra na rawata na ivakatagedegede cecere duadua ni lagilagi vakasilesitieli, se bula vakalou. Sa ikoya oqo na vuni kena vakatokai talega me vakamau vakasilesitieli na vakamau e valetabu. Ena loma ni lagilagi vakasilesitieli e tiko kina e tolu na ivakatagedegede. Ena kena rawati o koya e cake sara, sa na dodonu kina vua na tagane vakawati kei koya na watina me rau vauci me tawamudu, ka me rau maroroya talega na nodrau veiyalayalti erau vakayacora e valetabu.⁷

Na gagadre vakaturaga duadua ni yalo ni dua na tamata, sa ikoya e dua na vakamau ka rawa me ulabaleta yani na mate. Na dinati ni vakamau e valetabu, ena rawa ni vakayacora rawa o ya. E vakatara talega me ra na tiko tawamudu vata na matavuvale.

E ka lagilagi na lalawa oqo. Na veitaviqaravi kece ni Lotu, torocake, kuoramu kei na kalasi era vakanaulu kece ki na itinitini vaka dua na matavuvale bula vakalou.⁸

Me rawati na lalawa oqo, sa vakalesuya mai na Tamada Vakalomalagi na idola kece vakamatabete ni itabagauna oqo, me rawa kina ni ra vakayacori ena kena lewa dodonu na veicakacaka tabu vakalotu kece ena Nona ituvatuva. O ira na italai vakalomalagi—okati kina o Joni na Dauveipapitaiso,⁹ Pita, Jemesa, kei Joni,¹⁰ Mosese, Ilaisa, kei Ilaija¹¹—era a sa vakaitavi kece ena veivakalesui mai o ya.¹²

Sa roboti vuravura tiko yani na kila me baleta na dina vakatakilai oqo.¹³ Oi keda, me vaka eda parofita kei na iapositolo ni Turaga eda vunautaka talega yani ki vuravura ni “sa uto ni ituvatuva nona na Dauveibuli na matavuvale me baleta na nodra icavacava tawamudu na Luvena.”¹⁴

Eda vunautaka talega ni “oi keda na tamata yadua—na tagane kei na yalewa—eda sa buli me da ucuya na Kalou. Oi keda yadua eda sa luvedrau tagane se yalewa lomani vakayalo na noda itubutubu vakalomalagi, ka sa vakalou na noda bula kei na ilesilesi yadua baleti keda. Sa inaki ni noda bula me dua e tagane se yalewa ena bula taumada, ena bula vakayago e vuravura, me vakarautaki kina ena inaki sa virikotora tu me baleti koya.

“Ena gauna ni bula e liu, era sa kila ka dau qarava na Kalou na luvena tagane kei na yalewa vakayalo me vaka ni Tamadra Tawamudu ka ra duavata kei na Nona inaki ka nakiti kina me ra na mai vakayago ka vuli e vuravura me rawa ni ra tubu yani ki na bula e uasivi sara ka me qai kena ilutua na nodra kila na vakalou ni ilesilesi me vaka na itaukei ni bula tawamudu. Ena vuku ni ituvatuva vakalou ni bula marau nei [Tamada Vakalomalagi] sa na rawa kina me ra ulabaleta yani na tai kadua ni ibulubulu na isema vakamatavuvale. Sa na koto kina na veicakacakatabu vakalotu kei na veiyalayalati ena veivaletabu me rawa kina vei keda vakayadua sara me da na curuma tale na nona iserau na Kalou ka vakakina me vauci vata ka tawamudu na matavuvale.”¹⁵

Na ivakaro ki na matavuvale ena vukei keda vakalevu cake mai vei ira eso tale na matavuvale, ena noda kila ni na kauta mai vei keda na rawati ni marau, na vakamau vakasilesitieli.¹⁶ A buli na vuravuvura oqo ka vakalesui mai na Lotu me rawa ni ra tauyavu na matavuvale, vauci, ka bula tawamudu vakalou.¹⁷

E tukuni ena ivolanikalou “ia na [tamata yadua] sa kilikili me dua ga na watina, a rau sa yaco me le duabau ga, ia sa ikoya oqo na inaki ka buli kina ko vuravura.”¹⁸ A vakadeitaka e dua tale “ia sa [sega] ni tu duadua ga na tagane ka me tu tani na yalewa, se me tu duadua ga na yalewa me tu tani na tagane ena Turaga.”¹⁹ O koya gona, sa sega kina ni dua ga na ivakavuvuli ni bula vakalou ni kosipeli na vakamau, ia, sa dua na ivunau vakalou.

A kaya na Tamada Vakalomalagi: “Raica oqo na inaki kei na lagilagi ni noqu cakacaka—io me ra tucake tale mai na mate na tamata kecega ka rawata na bula tawamudu.”²⁰ A vakatara na kilai ni ka ruarua oqo na Veisorovaki ni Luvena Daulomani. Ena vuku ni Veisorovaki, na sega ni mate rawa—se tucake tale mai na mate—sa yaco me ka vakaidina vei keda kece sara.²¹ Ena vuku ni Veisorovaki, na bula tawamudu—sa rawa kina na bula tawayalani ena iserau ni Kalou, “na i solisoli uasivi duadua ni Kalou.”²² Me rawati na bula tawamudu, sa na dodonu me da veiyalayalati tawamudu ka tawa vakaiyalayala kei Tamada Vakalomalagi.²³ E kena ibalebale oqo ni vakamau ena valetabu e sega walega ni mai vei rau na veiwatini, e okati talega kina na duavata kei na Kalou.²⁴

E vakatavulica talega vei keda na ivakaro ni matavuvale ni “na tagane kei na yalewa vakawati, me rau dau veilomani ka veikauwaitaki vakaveiwatini.”²⁵ O ira na gone era sucu ena duavata oqori era sa “isolisoli ni Turaga.”²⁶ Na gauna sa vauci kina e valetabu e dau na matavuvale, sa na yaco me ka tawamudu na matavuvale me vaka sa tawamudu vakaikoya na matanitu ni Kalou.²⁷

Eda diva ena vakanuinui na mataqali isolisoli vaqo. Me vakaoqo, au a wilika ena dua na itukutuku ni lolosi ena dua na niusiveva, na vakanuinui ni rau sa lai veisotari kei watina sa mate o la se qai mate ga, ia mai na kena dina, erau a sega ni digitaka na sala ni tawamudu. Ia, erau a digitaka na vakamau ka na yacova ga ni cava na nodrau bula. A solia tu vei rau na Tamada Vakalomalagi na isolisoli cecere o ya, ia erau a vakanadakuya. Ia ena nodrau sega ni vinakata na isolisoli, erau sa sega talega ni vinakati koya sa Solia.²⁸

E vakaraitaka vinaka sara tu ga e dua na iyatuvosa kaukauwa mai na ivolanikalou na duidui ka tiko ena noda diva ena vakanuinui e dua na ka, kei na dina tawamudu me baleta: “Na veiyalayalati, veidinadinati, … veisolisoli, bubului, yalayala kecega … se veika namaki, ka sega ni vakadeitaka na Yalo Tabu sa yalataki tu, mai vei koya, ka sa digitaki, lumuti, ka lesia ena tudei tu me tawamudu… . sa sega na kedra yaga, vinaka, se kaukauwa ena loma se ni oti na tucake tale mai na mate; na veidinadinati kece ka ra sega ni vakayacori vakaoqo era na cava ga ni mate na tamata.”²⁹

Era sa tudei na veidina oqo. Era sureti ira na tamata kece sara na lewe ni Lotu oqo, me ra vulica, ka rawata na bula tawamudu.³⁰ Eda sureti ira na tamata kece sara me ra vakabauta vakalevu sara na Kalou na Tamada Tawamudu ka vakakina na Luvena, o Jisu Karisito, me ra veivutuni me ra ciqoma na Yalo Tabu, me ra rawata na veivakalougatataki ni valetabu me ra vakayacora ka maroroya na veiyalayalati vakalou, ka tudei me yacova na ivakataotioti.

Mai na loloma uasivi, sa rawa vei ira ka a sega na nodra gauna vinaka ni rogoca na kosipeli ena bula oqo me ra vakaivotavota ena ituvatuva cecere ni marau ni Kalou, kei na kedra veivakalougatataki tawamudu. Sa rawa me vakayacori ena veisosomitaki na veicakacakatabu vakalotu ni valetabu me baleti ira.³¹

Ia ena qai vakacava o ira na lewe ni Lotu matua ka ra se sega ni vakamau? E sega ni mai nodra malumalumu oqori, ia era na sotava duadua ga na veika dredre ni bula. Ia, meu vakananuma vei keda kece sara ni, ena nona sala kei na nona gauna ga na Turaga, ena sega ni bureitaki e dua na veivakalougatataki mai vei ira na Nona Yalododonu yalodina.³² Ena lewa ka vakaivotavotataka vakayadudua na tamata na Turaga, me vaka sara ga na gagadre ni lomadra ka vakakina ena nodra cakacaka.³³

Ena gauna mada ga oqo, ena rawa ni dau vakavu leqa tiko ena vakawati na lecaika. Na kena dina sa ikoya ni, o ira na veiwatini yadua e taraicake tu mai vei rau e rua na ituvaki vakaleqai. E okati rau e rua na tamata ka rau sega tu ni taucoko. Ena qai rawa ni yaco ga mai vei rau na marau ena nodra sasaga vata vakaukauwa. Me vaka ga na kena rogo mai e dua na mataivakatagi na duavata ni ivakatagi totoka, ena gauna ga era sasaga vata kina vaka dauveivakamarautaki, sa vakakina na ivakatagi totoka ni vakawati, ena kena gadrevi na sasagataki vaka dauveivakamarautaki, na duavata vakaveiwatini. Ena rawati ga na sasaga oqo kevaka, me oi rau vakayadua erau na vakamalumalumutaka na nodrau dui ile ka vakalevutaka na nodrau veilomani sega ni nanumi koya ga vakataki koya.

A kaya o Peresitedi Thomas S. Monson, “Me kunei na marau, ena dodonu me da vakasaqara, ena dua na rai mai taudaku. Se sega vakadua ni dua e vulica na ibalebale ni bula, me yacova ni sa guilecavi koya vakaikoya, ena vuku ni nona qaravi ira na wekana. Na nodra qaravi na tani me tautauvata sara ga kei na noda dui itavi—na kena vakayacori sa dau kauta mai na reki dina.”³⁴

Na marau ena bula vakamau e dau yaco ga mai ena gauna e sa dau raica cake kina e dua me nona itavi bibi duadua na nona tiko vinaka o kena isa. Sa dau yaco e dua na vakamau vakasilesitieli me ka dina, ka kauta mai na marau e levu sara ena bula oqo kei na kena e muri mai na vakayacori ni ka oqo.

E vakatara vei keda na ituvatuva ni marau ni Kalou me noda sara ga na digidigi. Me vaka ga na kena ivakarau vei ira na dauvolivoli, se da na digia beka na vakamau vakasilesitieli se dua ka sega so ni vakakina.³⁵ Eso na digidigi ni vakamau era isau lailai, eso era isau levu sara ka so era buli matau sara ena lawaki mai vua na tevoro. Mo qarauni ira vinaka sara na nona veidigidigi; era dau vakatubura na rarawa!³⁶

Na digidigi uasivi duadua sa ikoya na vakamau vakasilesitieli. Ke a sa vakayacori oti e dua na digidigi ka lailai mai vei koya oqo, sa na vinaka me caka oqo e dua ka na vakavinakataka cake, me vakataka na digidigi uasivi duadua. Sa na gadrevi vakalevu kina na veivutuni³⁷ torocake yadudua tudei.³⁸ Ena yaga sara vakalevu na gumatuataki ni veivakalougatataki era vakayacori vakaoqo.³⁹

Sa na via sega ni vakasamataka rawa na tamata na kilai taucoko ni veivakalougatataki ni vakamau ena valetabu. Na mataqali vakamau vakaoqori ena tomani tiko na kena tubu ena matanitu vakasilesitieli. Eda na vakataucokotaki mai kina.⁴⁰ Me vaka ga na nona sa mai taura o Jisu na taucoko ni lagilagi nei Tamada,⁴¹ me vakakina o keda “mo dou lako mai vei Tamaqu… ka rawata na noqu iukuuku kecega.”⁴²

Sa dua dina na tiki bibi ni vakavakarau ki na bula tawamudu na vakamau vakasilesitieli. E gadrevi kina vua e dua me, vakamautaka na tamata donu, ena vanua donu, ena lewa dodonu, ka muria ena yalodina na veiyalayalati vakalou oqo.⁴³ Ka sa na qai rawa kina vua e dua me vakadeitaka na bula vakalou ena matanitu vakasilesitieli ni Kalou. Au vakadinadinataka oqo ena yaca i Jisu Karisito, emeni.