Me Yacova Ni Da Sota Tale
Me da lewenivanua vinaka ena veimatanitu eda tiko kina ka itokani vinaka ena noda veitikotiko, ena noda dolele yani vei ira na vakabauta tani ka vakakina vei ira na noda.
Kemuni na taciqu kei na ganequ, au kila ni ko ni na duavata kei au ni oqo e dua na koniferedi sa veivakauqeti dina. Eda vakila na sinai kei na vutuniyau ni Yalo ni Turaga ena rua na siga sa oti oqo ni sa yavalati na yaloda ka vaqaqacotaki na noda ivakadinadina ena vuku ni cakacaka vakalou oqo. Au nuidei niu sa gusuda na lewe ni Lotu ena veivanua kecega ena kena vakavoqataki na vakavinavinaka vei ira na turaga kei na marama era sa vosa oti vei keda. Au nanuma na vosa nei Moronai ena iVola i Momani: “Sa dau liutaka na nodra soqoni e dua na iliuliu me vaka sa uqeti koya kina na Yalo Tabu; ia sa tuberi ira na kaukauwa ni Yalo Tabu me ra vunau, veivakasalataki, masumasu, vakatakekere ka lagasere; ia era sa kitaka vakakina.”1
Me da na dau nanuma tu vakabalavu na veika eda sa mai rogoca ena koniferedi raraba oqo. Na itukutuku yadua sa mai cauraki yani ena tabaki ena mekesini e rua na Ensign kei na Liaona ni vula ka tu mai. Au vakauqeti kemuni mo ni vulica ka vakasamataka vakatitobu na kedra ivakavuvuli.
Vei kemuni na Veitacini ko ni sa mai vagalalataki ena koniferedi oqo, keimami tukuna na neimami vakavinavinaka titobu ena vuku ni nomuni veiyabaki e vuqa ni veiqaravi. Sa yaga vakalevu ki na Lotu raraba na veika sega ni wiliki rawa ko ni sa mai cau kina.
Au vakadeitaka vei kemuni ni sa kauwaitaka tiko na Tamada Vakalomalagi na veika dredre eda sotava tu e vuravura nikua. E lomani keda vakayadua ko Koya ka na vakalougatataki keda ena noda segata me da muria na Nona ivakaro ka vakasaqarai Koya ena masu.
O keda e dua na lotu ni vuravura raraba, kemuni na taciqu kei na ganequ. Era kunei e vuravura raraba na noda lewe ni Lotu. Me da lewenivanua vinaka ena veimatanitu eda tiko kina ka itokani vinaka ena noda veitikotiko, ena noda dolele yani vei ira na vakabauta tani, ka vakakina vei ira na noda. Me da tamata dokai ka dina ena veika kece eda cakava.
Era tu e vuravura eso era viakana tu; era tu talega o ira era dravudravua sara vakaca. Ni da cakacaka vata, eda rawa ni vukei ira na kune rarawa ka dodoliga vei ira na dravudravua. Me ikuri ni veiqaravi ko ni dau vakayacora ena nomuni veivukei vakataki kemuni, na nomuni dau cau ki na ilavo ni Lotu, sa rawa kina vei keda me da veivuke ena gauna vata ga e yaco kina na leqa sega ni namaki ena yasai vuravura cava ga. E voleka ni da dau liu ena veigauna kecega ki na vanua ni leqa ka solia na veivuke cava ga eda rawata. Keimami sa vakavinavinaka ena nomuni dau lomasoli.
Era tu na veidredre tale eso ena nodra bula eso. Vakabibi vei ira na itabagone, ka so era sa coko sara koto vakaca ena veika me vaka na waigaga ni veivakamatenitaki, na bula sega ni kilikili, na vakailala kei na veileqa bibi eso e dau sala vata kaya. Me kena ikuri, era tu ko ira era galili, okati kina ko ira na yada kei na dawai, ka ra gadreva tu na veitokani kei na nodra kauwai na tani. Me da dau kauwaitaka na nodra leqa era tu vakavolivoliti keda ka tu vakarau me da dodoka yani na liga ni veivuke kei na yalo ni loloma.
Kemuni na taciqu kei na ganequ, eda sa kalougata dina ni sa tadola dina tu na lomalagi, ni Lotu vakalesui mai i Jisu Karisito sa tu e dela ivuravura nikua, ia na Lotu e yavutaki ena vatu ni ivakatakila. Eda kila ni kena tomani tikoga na ivakatakila sa ikoya na dra bula ni kosipeli i Jisu Karisito.
Me da dui yaco ki na noda veivale ena bula vinaka. Me da bula veimaliwai ena sautu kei na duavata kei na veilomani. Me da segata e veisiga me da muria na nona ivakaraitaki na iVakabula.
Me vakalougatataki kemuni na taciqu kei na ganequ na Kalou. Au vakavinavinakataka na nomuni masu ena vukuqu kei na vukudra kece sara na Vakaitutu Raraba. Sa titobu sara na neimami vakavinavinaka ena vukumuni.
Ena dua na drama nei Christopher Marlowe, The Tragical History of Dr. Faustus, e vakatakarakarataki kina e dua na tamata, o Vuniwai Faustus, ka a lewa me guilecava na Kalou ka muria na sala nei Setani. Ni cava na nona bula ni cakacaka ca, ka vakanamata ki na rarawa ni veigauna vinaka vakawaleni kei na itotogi ka na yaco dina mai, a lele me vakaoqo, “Na [yameyame] ni bukawaqa sa sega ni vakatauvatani vata rawa kei na veivakarusai ni yaluma e suwaka na uto–o ya na cudru waqawaqa ni Kalou.”2
Kemuni na taciqu kei na ganequ, me vaka ni yaluma rerevaki duadua na cudru waqawaqa ni Kalou, na bula tawamudu ena iserau ni Kalou sa noda sasaga talei duadua.
Au masuta kina mai vu ni yaloqu kei na lomaqu taucoko me da na segata tikoga na icovi talei oqo.
Au vakadinadinataka vei kemuni na dina ni cakacaka oqo, ni bula tiko na noda iVakabula ka ni tubera ka dusimaka tiko na Nona Lotu ena dela ivuravura. Au sa vakamoce vei kemuni na taciqu kei na ganequ lomani, me yacova ni da qai sota tale ni oti e ono na vula. Ena yacai Jisu mai Nasareci, na noda iVakabula, na noda Dauveivueti eda qarava, emeni.