O Koya Mo Dou Qai Lako

Sister Silvia H. Allred

Matai ni Daunivakasala ena Mataveiliutaki Raraba ni iSoqosoqo ni Veivukei

Sa rawa meda vakaitavi kece sara ena cakacaka ni kaulotu. Oqo na cakacaka ni Turaga ka na vukei keda kina o Koya me da rawa ni vakayacora.

iVakatakilakila

Silvia H. Allred

A vakavulica vakaoqo na Turaga “kevaka sa sega ni sucu e dua ena wai kei na Yalo Tabu, ena sega ni curu rawa ki na matanitu ni Kalou.”¹ O koya gona, e sa bibi sara na papitaiso, ki na noda vakabulai.

Ni bera nona lako cake ki lomalagi na iVakabula sa tucaketale, a vakaroti iratou na Nona tisaipeli vakaoqo, “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena kei na Yalo Tabu: Vakavulici ira me ra vakabauta na ka kece kau a vosa kina vei kemudou.”²

Ena gauna ni Vakalesuimai, a tokaruataka tale kina o Koya na Nona ivakaro: “Raica drau sa lesi mo drau vunauci ira na tamata me ra veivutuni.”³

Sa ilesilesi ni Lotu ni Turaga me na vunautaka yani na kosipeli ki vuravura taucoko. Sa ikoya oqo na yavu ni cakacaka ni kaulotu, ka sa nodra itavi na daukaulotu me ra “sureti ira na tani me ra lako mai vei Karisito ena nomu vukei ira me ra ciqoma na kosipeli vakalesuimai, ena nodra vakabauti Jisu Karisito kei na Nona Veisorovaki, veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”⁴

Au gadreva meu na vosa mada ka vakadinadinataka na kaukauwa kei na bibi kei na veivakalougatataki ni cakacaka ni kaulotu ena nodra bula era sa saumaki mai, itabatamata mai muri kei ira na daukaulotu kei na sala ni noda rawa ni vakaitavi ena cakacaka ni kaulotu.

Ena gauna au a se yabaki 14 tiko kina, ena dua na mataka vinaka ni vula o Okosita, rau sa tukituki tu ena mata ni neitou katuba o Elder Prina kei Elder Perkins. Rau sa tekivu vakavulica ki na neitou matavuvale na veika dina me baleta na Kalou. Ena veisiko e tarava rau a vakatavulica vei keitou na veika me baleta na masu. Rau a vakatavulica talega vei keitou na Veivakalesuimai kei na yavu ni veivakabulai. Me qai yacova na ikatolu se ikava ni veisiko, sa levu vei keitou era sa sega ni vakarorogo vei rau na daukaulotu, ka keirau sa vo ga kei taciqu yabaki 17 o Dina. Keirau a vakila dina e yaloi keirau na Yalo Tabu kei na veivakadeitaki vakayalo ni sa dina sara na itukutuku o ya.

Keirau a mani laki volia e dua na iVola i Momani ka tekivu wilika sara. Ni qai suka ga na vuli, ena veisiga, keirau veitautaka yani ki vale na laki wilika na ivola oqo. O koya ga ena liu i vale sa na wiliwili sara ka na wawa toka e dua vei keirau me yacova sara na gauna ni vakayakavi, kana ga vakatotolo, ka tomana nona wiliwili me yacova na gauna ni moce. Sa dua na ka na neirau maqusa tiko vakaoqo. Keirau sa tekivu lako sara tiko ki lotu ka keirau sa kerea sara me keirau sa papitaiso. Sa mani vakadonuya sara ga o tamai keirau, ia e rivarivabi tikoga o tinai keirau, ka taura tale e dua na vula me vakauqeti o koya me sainitaka rawa na ivola ni veivakadonui. Ena siga ni neirau papitaiso, a gole yani ki lotu o koya kei ira na taci keirau ena imatai ni gauna. A vakila kina o koya na Yalotabu. Ena gauna a rogoca kina na neirau ivakadinadina, a gole yani o koya vei rau na daukaulotu ka kerea me sa vakavulici tale. Ni oti e vica na macawa, a qai papitaiso o Tinaqu vata kei ira kece na taci keirau. Sa veisau vakadua kina na noqu bula ka sa yaco me kaukauwa tudei ki na noqu bula na kosipeli i Jisu Karisito.

Sa sega ni vakamacalataki rawa na titobu ni vakavinavinaka vua na Turaga kei rau na daukaulotu a tala yani o Koya ki na neitou vuvale. Sa vakavukui au vakakina na Turaga ena kosipeli vakalesuimai kau sa vakila e dua na yalo meu tu yani ka laki wasea na dina oqo kivei ira tale eso. Au a gadreva sara meu daukaulotu.

Ena loma ga ni vica na vula, au a kacivi vata kei taciqu o Dina me keirau sa kaulotu ena neimami vanua e San Salvador. Na veikacivi oqo a rawa kina me keirau tukituki ena veivale yadudua ka wasea yani na itukutuku talei ni kosipeli vakalesuimai i Jisu Karisito ka kauti ira mai e vuqa na tamata ki na wai ni veipapitaisotaki. E tarava sara, na neirau laki kaulotu tudei ena Tabana ni Kaulotu e Central America.

Sa veivakauqeti dina ki na noqu bula na noqu kaulotu. Au sa vulica meu vakararavi vakatabakidua ga vua na Turaga, meu kerea na veidusimaki ni Yalotabu, ka vakila na noqu lomani ira vakabibi na luvena na Kalou. Sa tubu cake tikoga na noqu kila na ivolanikalou kei na noqu kila vakavinaka na vunau. Ka sa vakakina na noqu gadreva meu talairawarawa ka muria sara tiko vakadodonu na ivakaro. Sa vakaqaqacotaki kina na noqu ivakadinadina me baleta na iVakabula kei na Nona Veisorovaki tawa yalani. Na veika au sotava ena kaulotu sa yaco me taucoko sara kina na kequ ituvaki. Sa mai noqu gagadre talei na kaulotu. E sega tale ni dua na ka me vakayavalata vakalevu cake na noqu bula kei na bula ni noqu matavuvale me vakataka na kena oqo.

E vakamacalataka o Elder Jeffrey R. Holland na kaukauwa ni nona kaulotu ki na nona bula ena malanivosa oqo: “Na noqu kaulotu sai iusutu ni noqu bula ni sa mai cava oqo e 47 na yabaki. E a rairai dua beka na siga ena loma ni 47 na yabaki o ya au a sega kina ni vakananuma na noqu a kaulotu; au sega mada ni kila se siga cava beka o ya.”⁵

Ena vica na yabaki sa oti, sa yabaki walu kina na makubuqu o Christian ka sa maqusa sara tiko vakalevu ena vakavakarautaki ni nona papitaiso. A kerei tinana kina keu rawa ni dua vei ira me na vosa ka wasea kina na italanoa ni noqu a curuvou ki na lotu. Ena noqu tarogi koya baleta na cava e vinakata kina meu cakava vakaoya, a sauma mai, “Bu, e ka bibi o ya. O kila tiko beka ni kevaka o a sega ni ciqoma na kosipeli, au na sega ni mai papitaiso rawa? Ena sega mada ga niu mai bula tu vakaoqo.”

Au sega mada ni kila ke ra sa kila tiko beka na daukaulotu na cecere ni kaukauwa ni nodra cakacaka. Ena noqu matavuvale, na veivakalougatataki ni kosipeli sa yacova yani oqo na ikava ni itabatamata. E a sega beka ni kaya o Peresitedi Gordon B. Hinckley ni “gauna eda vakabula kina e dua na goneyalewa eda sa vakabula kina na veitabatamata”?⁶ Au a vakamau ena valetabu ka walu na luvequ. Era sa lewenilotu yalodina taucoko ena Lotu, ka ra sa vakaedaumeni ena valetabu. E ono eratou sa vakamau ka ratou sa vakaluveni. Ena gauna oqo keitou sa lewe 34 tiko. Ka se bera ni koya taucoko qori. Keirau a kaulotu talega na veiwatini, e rua na luvei keirau tagane ka tolu vei iratou na luvei keirau yalewa era a kaulotu talega. Ni vakasokumuni vata keitou sa vukea rawa kina e drau na tamata me ra ciqoma na kosipeli ena vuqa na veivanua. Eso vei ira na curuvou oqori kei na luvedra era sa laki kaulotu talega.

Na cakacaka ni kaulotu sa ikoya na iusutu bibi ni Lotu. E sega tale ni tiko e dua na cakacaka e cecere, se bibi cake. Ena vakalougatataka na nodra bula o ira era na vakaitavi kina. Ena vakalougatataki ira tikoga na itabatamata era muri mai.

Ko na rairai tarogi iko beka: Meu na veivuke beka vakacava ena kaulotu? Ena sala cava beka meu na vakaitavi kina? E tiko e rua na dina bibi mo nanuma tiko ni ko vakaitavi ena cakacaka oqo. iMatai, mo kila vakavinaka tiko ni Kalou e lomani ira na Luvena kece sara ka gadreva o Koya me ra vakabulai. Ena Vunau kei na Veiyalayalati 18:13 eda wilika kina, “Raica sa levu vakaidina na nona marautaki ira era sa veivutuni.” iKarua, na itukutuku kei Karisito kei na Nona kosipeli vakalesuimai sa ikoya na iloloma talei duadua ko na rawa ni solia.

Me vaka sa tuvanaki tiko ena Vunautaka na Noqu Kosipeli, ni cakacaka ni kaulotu e tuvanaki tiko vaka va: vakasaqarai o ira me ra vakavulici, veivakavulici kei na papitaiso, vakaitokanitaki ka vakavulici na luluqa vakalotu.⁷ Sa rawa vei ira na lewe ni Lotu yadua—gone, itabagone kei ira na qase—me ra veivuke ki na dua se cakacaka taucoko oqo.

Tekivuna ena nomu veimaliwai vakavinaka kei ira na tamata era tiko vakavolivoliti iko ka itokani vinaka. Mo bulataka na itovo e savasava ka dau veivukei. Me ramase mai na loloma, vakacegu kei na reki, ena nomu mata dredredre. Mo bulataka dina tiko na kosipeli.

Mo qai vakayacora vakavinaka sara na nomu sasaga ni kaulotu. Meu vakatututaka mada eso na vakasama. E rawa mo raica ni na mana vei iko eso na kena oqo:

Kevaka era tiko na luvemu e vale, vakarautaki ira me ra na kaulotu.
Vakarautaki iko ki na cakacaka ni kaulotu.
Sureti ira eso na matavuvale kei na itokani me ra mai vakarorogo kivei rau na daukaulotu se me ra tiko ena noda soqoni ni Lotu kei na itaviqaravi.
Lako vata kei rau na daukaulotu ki na nodra veivale na dauvakatataro, se sureti rau na daukaulotu me vakavulici ira na sega ni lewenilotu ena nomu vale.
Sureti ira mai na tamata ki na nomudou lotu vakamatavuvale ena nomudou itikotiko.
Sureti ira na tamata ki na valenivolavola ni tuva kawa, se vukei ira me ra cakava na nodra cakacaka ni tuva kawa.
Solia na yacadra na tamata me ra vakavulici mai vei rau na daukaulotu. O ira na lewenilotu sa ivurevure cecere ka vinaka duadua ni soli yaca ni tamata me ra vakavulici.
Wasea na nomu vakabauta kei na nomu ivakadinadina vei ira na itokani kei na matavuvale sega ni lewenilotu.
Vakasaqara na veigauna donu mo vukei ira kina na tamata.
Mo dau veimaliwai vakavinaka kei ira na dauvakatataro kei ira na curuvou.
Mo gugumatua sara ena vakasaqarai ira era vakasaqara tiko na dina.
Kevaka era kaulotu tiko eso na lewe ni nomu matavuvale se itokani, vola vei ira ni ko lomani ira ka vakayaloqaqataki ira, ka dau masulaki ira.

Ko na kune marau ena vua ni nomu cakacaka vagumatua. Na gagadre cecere ni cakacaka ni kaulotu ena vaqaqacotaka na nomu tabanalevu taucoko se tabana. Ena vakilai ena loma ni Lotu taucoko na mana ni nomu cakacaka.

Ena gauna se qai kalasi rua tiko kina na luvei keirau yalewa o Margie, a sureti nona itokani vinaka duadua ki na soqoni ni Lalai. Sa soli sara me rau yadua na itavi ena gauna ni Lalai ena soqoni ni sakaramede. Ena dua na gauna e liu a sega ni vinakati rau na daukaulotu na tamai nona itokani oqo, ia ena gauna sa kauta yani kina o Margie e nona vale eso na tikidua ni Lotu, a vakarorogo sara na turaga oqo ki na ivakamacala rawarawa nei Margie kei na nona ivakadinadina baleti Josefa Simici kei na iMatai ni Raivotu. E a sega walega ni vakatarai luvena me gole tikoga ki na soqoni ni Lalai a vakadonuya talega me sa tauri lesoni o luvena mai vei rau na daukaulotu ka me papitaiso. Rau a tiko talega vakaveiwatini ena papitaiso o ya.

Sa rawa me da vakaitavi kece sara ena cakacaka ni kaulotu. Oqo na cakacaka ni Turaga ka na vukei keda kina o Koya me da rawa ni vakayacora. Sa gadrevi ki na Nona kosipeli me curuma yani na veimatanitu yadua, ka sa ikeda me da iyaya ni cakacaka ena Ligana me vakalougatataki kina na nodra bula na tamata ena kena wasei vei ira na Nona dina oqo. Eda na vakalougatataki vakalevu sara ni da vakayacora vakakina.

Sa ikeda na luvena e dua na Tamada Vakalomalagi sa dau loloma. Sa tala mai kina na Luvena me mai dolava na salatu me rawa kina ni da laki bula vata kei Koya me tawamudu. Sa noqu ivakadinadina oqo ena yaca i Jisu Karisito, emeni.