Na Soqoni ni Sakaramede kei na Sakaramede

Elder Dallin H. Oaks

Ena Kuoramu ni iApositolo Le Tinikarua

Na cakacaka vakalotu ni sakaramede sa vakavuna me soqoni tabu ka bibi duadua ena Lotu na soqoni ni sakaramede.

Eda bula ena veigauna ni rarawa me vaka a parofisaitaka o Paula na iApositolo (raica na 2 Timoci 3:1). O ira era segata me ra lakova na sala dodonu ka rabailailai era raica na sala dau veivagolei tani ka veisureti e veiyasana kecega. E rawa ni da vagolei tani, vakalolovirataki, vakayalolailaitaki se vakararawataki. Ena rawa vakacava me tiko vei keda na Yalo ni Turaga me tuberi keda ena noda digidigi ka vakadeitaki keda ena sala?

Ena ivakatakila ni gauna oqo sa solia tu na Turaga na kena isau ena ivakaro oqo:

“Raica sa kilikili sara mo qarauni iko vinaka me kakua ni tauvi iko na duka ni ka vakavuravura, ia mo lako ki na vale ni soqoni ena siga ni Vakacecegu ka qaravi au kina;

“Ia oqo na siga sa vakaroti vei iko mo vakacegu kina mai na nomu cakacaka kecega; ia mo qaravi koya ga sa Cecere Sara” (V&V 59:9–10).

Oqo e dua na ivakaro ka tiko na kena yalayala. Ni da vakaitavi vakadodonu ena veimacawa ena cakacaka vakalotu ni sakaramede sa na kilikili kina kei keda na yalayala ni na “tiko ga kei [keda] na nona Yalotabu” (V&V 20:77). Na Yalotabu sa ikoya na yavu ni noda ivakadinadina. E vakadinadinataka na Tamana kei na Luvena, ena vakalesuya mai ki na noda vakanananu na ka kecega, ka tuberi keda yani ki na dina. Sa ikoya oqo na kabasi ka na tuberi keda voli ena noda sala. Me baleta na isolisoli oqo ni Yalo Tabu, e vakavulica kina o Peresitedi Wilford Woodruff “ni oqo na isolisoli cecere duadua e rawa ni vakatikori vua e dua na tamata” (The Deseret Weekly, 6 ni Epereli, 1889, 451).

I.

Na cakacaka vakalotu ni sakaramede sa vakavuna me soqoni tabu ka bibi duadua ena Lotu na soqoni ni sakaramede. Sa ikoya duadua ga oqo na soqoni ni Siga ni Vakacecegu ka da rawa ni lakova vata vakamatavuvale. Na veika kece sara e vakayacori kina ka ikuri ni sakaramede sa dodonu me na dau tuvai ka vakayacori me vagolea na noda vakanananu ki na veisorovaki kei na ivakavuvuli ni Turaga ko Jisu Karisito.

Na imatai ni noqu vakanananu me baleta na sakaramede e koto ena tauni lailai mai Utah kau a tabaki kina meu dikoni ka vakaitavi kina ena kena votai na sakaramede. Ni vakatautauvatataki kei na vakanananu oqori, sa toro cake sara vakalevu na veisoqoni ni sakaramede au dau tiko kina ena gauna oqo ena veitabana levu duidui e vuqa. Sa dau vakalougatataki, votai, ka ciqomi mai vei ira na lewenilotu ena draki ni vakanomodi kei na vakarokoroko. Na kena liutaki na soqoni, ka okati kina na bisinisi e dau sala vata kaya, e leleka ka dokai, era vakayalo na lewe ni vosa ka bau kina na kena icavucavuti. E veiganiti na ivakatagi, ka vakakina na masu. Oqo na kena ivakatagedegede, ka vakaraitaka na kena sa toro cake sara mai na veika au a sotava ena noqu gauna vakaitabagone.

E tu na kena duidui ena veigauna eso. Au vakila ni so ena itabatamata ka tubu cake tiko oqo kei na so sara tale mada ga na itabaqase era se bera ni kila na duidui ni soqoni oqo kei na bibi ni noda vakarokoroko kei na yalo ni sokalou yadua e koto kina. Na veika au vakauqeti meu vakavuvulitaka eke e vagolei vei ira era se bera tiko ni kila se vakatovotovotaka na ivakavuvuli bibi oqo ka ra sega tiko ni se marautaka na veivakalougatataki vakayalo e yalataki kina ena nodra rawata na Yalona dau veituberi me tiko vata kei ira.

II.

Au na tekivu ena sala e dodonu me ra vakarautaki ira kina na lewe ni Lotu me ra vakaitavi ena cakacaka vakalotu ni sakaramede. Ena dua na Soqoni ni Veituberi vei Ira na Veiliutaki e Vuravura Raraba ena lima na yabaki sa oti, a vakavulici ira kina na veiliutaki ni matabete ena Lotu o Elder Russell M. Nelson ena Kuoramu ni iApositolo Le Tinikarua na ivakarau me tuvalaki ka liutaki kina na soqoni ni sakaramede. “Eda vakananuma na Nona Veisorovaki ena kena sala eda kila ga o keda,” e kaya o Elder Nelson. “Eda kauta mai na yalo sa raramusumusu ka bibivoro ki na noda soqoni ni sakaramede. Oqo na ilutua ni noda vakarokorokotaka tiko na Siga ni Vakacecegu.” (“Na Sokalou ena Soqoni ni Sakaramede” Liaona Okos. 2004, 12)

Eda dabe ni se bera na gauna me tekivu kina na soqoni “Ena gauna vakanomodi oqori ni vakacegu, ena rogolailai na ivakatagi. Oqori e sega ni gauna ni veivosaki se gauna ni vakau itukutuku, e dua na gauna ni masumasu kei na vakanananu ni vakavakarau vakayalo ni vakayagataki ni sakaramede vei ira na iliuliu kei na lewenilotu.” (Liaona Okos. 2004, 13).

Ena nona rairai vei ira na Nifai na iVakabula ni oti na Nona Tucaketale mai na mate, e vakavuvulitaka o Koya vei ira ni dodonu me ra sa muduka na kena dau vakacabori na isoro ka dau vakadavei kina na dra. Ia, “mo dou cabora ga me isoro vei au na yalo sa raramusumusu kei na yalo sa bibivoro” (3 Nifai. 9:20). Na ivakaro o ya, ka tokaruataki ena ivakatakila ni gauna oqo ka dusimaki keda me da dau vakaivotavota ena sakaramede e veimacawa, e tukuna na sala me da vakavakarau kina. Me vaka e vakavuvulitaka o Elder Nelson, “Sa nona itavi na lewe ni Lotu yadua na veivakamamautaki vakayalo ka rawa ni yaco mai ena dua na soqoni ni sakaramede” (Liaona, Okos. 22004, 14).

Ena nona volavola ena iVunau ni Veivakabulai, e vakavuvulitaka kina o Peresitedi Joseph Fielding Smith ni da vakaivotavota ena sakaramede me vaka ni noda itavi ena kena vakananumi na nona mate na iVakabula kei na nona vakararawataki me baleta na kena vueti na vuravura. Na cakacaka vakalotu oqo a vakavotui mai me rawa kina ni da vakavouya na noda veiyalayalati me da qaravi Koya, me da talairawarawa Vua, ka dau nanumi Koya tikoga. E vakuria vakaoqo o Peresitedi Simici: Eda na sega ni maroroya rawa na Yalo ni Turaga kevaka eda sega ni vakamuria na ivakaro oqo” (Doctrines of Salvation, comp. Bruce R. McConkie, 3 vols. [1954–56], 2:34)

III.

Na noda isulusulu sa ivakaraitaki bibi ni noda ivakarau ni rai kei na noda vakavakarau ki na itavi qaravi cava ga eda na vakaitavi kina. Kevaka eda lako ki sisili se taubale e loma ni veikau se qito e baravi, na noda isulu, ka okati kina na noda ivava, ena vakaraitaka na veika oqo. E dodonu me vakakina ena noda isulusulu ni da laki vakaitavi ena cakacaka vakalotu ni sakaramede. E vaka na lako ki na valetabu. Na ivakarau ni noda isulu e vakatakilakilataka na ivakatagedegede ni noda kila ka rokova na cakacaka vakalotu eda na laki vakaitavi kina.

Ena gauna ni soqoni ni sakaramede—ka vakauasivi ena lotu ni sakaramede—sa dodonu me da vakanamata ga ena sokalou ka vakuwai keda mai na veika kece tale eso, vakauasivi ena itovo ka na rawa ni vakacacana na nodra sokalou na kena vo. O koya sara mada ga e lutu yani na nona moce ena sega ni vakasugusugu vei ira na kena vo. Na soqoni ni sakaramede e sega ni gauna ni wili ivola se mekesini. Kemuni na itabagone, oqori e sega ni gauna ni veivakasolokakanataki ena talevoni veikauyaki se vakau itukutuku vei ira ena dua tale na vanua. Ni da vakaivotavota ena sakaramede eda sa cakava e dua na veiyalayalati tabu ni da na dau nanuma tiko ga na iVakabula. Sa dau ka ni rarawa ni da raica na nodra voroka tu eso na tamata na veiyalayalati oqori ena loma sara ga ni soqoni era cakava kina.

Na ivakatagi ena soqoni ni sakaramede e tiki bibi ni noda sokalou. Sa vakavuvulitaka na ivolanikalou ni nodra sere na yalododonu sa nodra masu vua na Turaga (raica V&V 25:12). Eratou sa kacivaka na Mataveiliutaki Taumada ni “so na ivunau cecere era vunautaki ena kena lagati na sere” (Serenilotu, ix). Sa dua na ka vakasakiti ni ra duavata o ira kece era tiko ena sokalou ni lagasere—vakauasivi ena serenilotu ka na vukei keda ena noda vakavakarau me da vakaivotavota ena sakaramede. Na ivakatagi kece sara ena soqoni ni sakaramede e gadrevi kina na tuvatuvalaki vakamatau, me dau nanumi tikoga ni ivakatagi oqo e baleta na sokalou, ka sega ni ka ni veisisivi.

E vakavuvulitaka o Peresitedi Joseph Fielding Smith: “Oqo e dua na gauna me vakaraitaki kina na kosipeli, na gauna e dodonu me da kacivi kina me da vakatovotovotaka na vakabauta, ka vakananuma na nona veiqaravi na Dauveivueti, ka da vakananuma na ivakavuvuli veivakabulai ni kosipeli, ka sega ni gauna ni veika tale eso. Na veiwali, veidredrevaki, na vakasama sega na betena, e sega ni kedra gauna na soqoni ni sakaramede ni Yalododonu Edaidai. Sa dodonu me da dau soqoni ena yalo masumasu, na yalo malua, ka tu e yaloda na dina” (Doctrines of Salvation, tt. 342).

Ni da vakayacora oqo—ni da duavata ena kena ivakarau bibi ka dodonu me dau sala vata kei na cakacaka tabu ni sakaramede kei na sokalou ni soqoni oqo—sa kilikili kina kei keda na veitokani kei na ivakatakila ni Yalotabu. Sa ikoya oqo na sala ena dusimaki kina na noda bula kei na sautu ena ilakolako.

IV.

Sa taleva lesu tiko na Turaga vakaturi cake mai na mate na bibi ni sakaramede ena nona veisiko ki na vanua ko Amerika ka vakotora kina na cakacaka vakalotu oqo ena kedra maliwa na Nifai yalodina. A vakalougatataka na ivakatakarakara ni sakaramede ka solia vei ira na Nona tisaipeli kei ira na lewevuqa (raica 3 Nifai. 18:1-10), ka vakarota kina:

“Mo dou kitaka na ka oqo vei ira sa veivutuni ka papitaisotaki ena yacaqu; dou na kitaka oqo mo dou vakananuma kina na noqu dra kau sa liviraka ena vukumudou, ka vakadinadinataka kina vei Tamaqu ni dou na dau nanumi au tikoga. Ia kevaka dou sa dau nanumi au tikoga ena tiko ga kei kemudou na noqu Yalo Tabu.

“… Dou sa kalougata kevaka dou sa kitaka tiko na ka oqo, ni dou sa tara cake ena dela ni noqu uluvatu.

“Ia ko koya yadua sa sega ni kitaka vakakina, sa sega ni tara cake ena dela ni noqu uluvatu, sa tara ga ena dela ni nuku, ia ni sa tau mai na uca, ka coka na dobui, ka liwa na cagi ka tabaki ira, era na bale kina” (3 Nifai 18:11-13).

Na sakaramede sa ikoya na cakacaka vakalotu ka sosomitaka na isoro dra kei na vakacacabo kama ena lawa i Mosese, ka sala vata mai kei na nona yalayala na iVakabula: “Ia ko koya yadua sa lako mai vei au ena yalo raramusumusu kei na yalo bibivoro, au na papitaisotaki koya ena bukawaqa kei na Yalo Tabu” (3 Nifai. 9:20).

V.

Oqo au na vosa mada vakatabakidua vei ira na matabete era dau vakaitavi ena sakaramede. Na cakacaka vakalotu oqo me na dau qaravi tikoga ena vakarokoroko kei na veidokai. O kemuni na bete o ni vakacabora na masu ena vukudra na ivavakoso mo ni cavuta vakamalua ka vakamatata na kena vosa, ka vakamacalataki kina na veiyalayalati kei na veivakalougatataki e yalataki kina. Oqo e dua na cakacaka tabu sara.

O kemuni na ivakavuvuli o ni vakarautaka kei kemuni na dikoni o ni vota na ivakatakarakara ni sakaramede o ni qarava talega e dua na cakacaka tabu sara. Au taleitaka na itukutuku nei Peresitedi Thomas S. Monson, ni dua voli na dikoni yabaki 12, a kerei koya e dua na bisopi me kauta na sakaramede vua e dua na turaga tauvimate ka gadreva tu na veivakalougatataki oqo. “E luvuci au na nona vakavinavinaka,” e kaya o Peresitedi Monson. “E tarai au na Yalo ni Turaga. Au tu ena qele tabu” (Inspiring Experiences that Build Faith, [1994] 188). Oi kemuni kece o ni vakaitavi ena cakacaka vakalotu tabu oqo o ni tu “ena qele tabu.”

O kemuni na cauravou o ni vakaitavi ena cakacaka vakalotu ni sakaramede e dodonu mo ni bula kilikili. Sa kaya na Turaga: “Mo dou savasava koi kemudou sa kauta na iyaya ni Turaga” (V&V 38:42). Na ivakasala ena ivolanikalou me baleta na kena vakayagataki na sakaramede ni sega tu ni kilikili na bula (raica 3 Nifai. 18:29; 1 Korinica 11:29) sa baleti ira sara talega vakaidina era qarava na cakacaka vakalotu oqori. Ni qarava na veivakadodonutaki vei ira na lewe ni Lotu era cakava eso na ivalavala ca bibi, sa rawa vua na bisopi me kauta tani vakawawa tu na galala ni kena vakayagataki na sakaramede. Na dodonu vata oqori e rawa ni vakayagataki me kau tani kina na galala ni kena qaravi na cakacaka vakalotu tabu o ya.

Na veika au sa tukuna taumada me baleta na bibi ni isulu kilikili vei ira era vakaivotavota ena cakacaka vakalotu ni sakaramede sa baleti ira sara talega ka vakabibitaki cake vei ira na cauravou ena Matabete i Eroni ka ra vakaitavi ena dua ga na tiki ni cakacaka vakalotu tabu oqori. Sa dodonu vei ira kece me maqosa na kedra irairai ka rakorako na nodra isulu. E sega ni dodonu me dua na ka ena kedra irairai se na nodra ivalavala me dreta mai vua se vagoleya tani na nona rai e dua mai na sokalou kei na caka-veiyalayalati ka inaki ni soqoni tabu oqo.

E veivakavulici vakabibi ena ulutaga oqo o Elder Jeffrey R. Holland ena koniferedi raraba ni tinikatolu na yabaki sa oti. Me vaka ni ra a se bera ni sucu e vuqa na dikoni ena iotioti ni gauna a cavuti kina eke na vosa oqo, au na tokaruataka tale ena vukudra ka vakakina vei ira na nodra itubutubu kei na qasenivuli: “Me’u vakatura mada, ena veivanua kecega e rawa kina me ra dau vakasote vulavula na dikoni, ivakavuvuli, kei na bete era vakaitavi ena sakaramede. Me baleta na veicakacaka vakalotu tabu ena Lotu eda dau vakayagataka na isulu ni soqoni, ka rawa ni laurai e dua na sote vulavula me ivakananumi malumu ni isulu vulavula o a daramaka ena tobu ni papitaiso ka veivakauqeti ki na sote vulavula sa vakarau mo na daramaka ki na valetabu ka vakakina ki na nomu na laki kaulotu” ( “This Do in Remembrance of Me,” Ensign, Nove. 1995, 68).

Me kena iotioti, ena qaravi walega na sakaramede ni sa vakadonuya o koya e tu vua na idola ni cakacaka vakalotu oqo ni matabete. Oqo na vuna e sega ni dau soli kina na sakaramede mai vale se ena soqoni vakamatavuvale, se ena veivanua sara mada ga era tiko kina na iwiliwili ni matabete e veiganiti kaya. O ira era vakaitavi ena teveli ni sakaramede, vakarautaka na sakaramede, se vota vei ira na ivavakoso sa dodonu me ra lesi mai vua e taura tu se vakayagataka tiko na idola ni cakacaka vakalotu oqo. Au tukuni ira tiko na matabisopi se na mataveiliutaki ni kuoramu ni ivakavuvuli se dikoni. “[Na noqu] vale sa vale ni caka dodonu,” sa kaya na Turaga (V&V 132:8).

E rawa vakacava ni tiko vata kei keda na Yalotabu me dusimaka na noda digidigi me kakua kina ni “tauvi keda na duka ni ka vakavuravura” (V&V 59:9) ka da tiko ga ena sala veitaqomaki ni bula oqo? Eda gadreva me da kilikili kaya kei na kaukauwa veivakasavasavataki ni veisorovaki i Jisu Karisito. Eda vakayacora oqo ena noda talairawarawa ki na Nona ivakaro me da lako yani kina Vua ena yaloraramusumusu kei na yalo bibivoro, ia ena soqoni vakasakiti ni veimacawa o ya, vakaivotavota ena ivakatakarakara ni sakaramede ka cakava na veiyalayalati e na kilikili kina kei keda na yalayala talei ni na dau tiko ga vata kei keda na Nona Yalotabu (raica V&V 20:77). Me da vakayacora tikoga vakakina, sa noqu masu malumalumu, au sa cabora ena yacai Koya sa rawa ena nona veisorovaki na ka kecega, io ko Jisu Karisito, emeni.