Ia Lē Toe Ulu Mai i Lo’u Agaga Lē Ita Mai ia te Au

Saunia e Elder Jeffrey R. Holland

O Le Korama a Aposetolo e Toasefululua

Tau ina ia fai mo i tatou le olioli o lo tatou faamaoni i le tulaga aupito maualuga ma sili ona lelei i totonu o i tatou a o tatou faatumauina lo tatou alolofa ma a tatou faaipoipoga, o tatou tagata ma o tatou agaga i le mama e pei ona tatau i ai.

Ata

Elder Jeffrey R. Holland

Ina ua ma taunuu talu ai nei ma Tuafafine Holland i se malae vaalele mamao, sa savavali faanatinati mai ni tamaitai lalelei se toatolu na o mai ai foi i lea lava malaga e tasi, ma faafeiloai i ma’ua. Sa latou faailoa mai o i latou o tagata o le Ekalesia, e le o se mea e faateia ai aua e le masani ona natinati mai ni tagata e le auai i la tatou ekalesia ia i ma’ua i malaevaalele. I se talanoaga ma te lei faamoemoeina, sa ma iloa ai a o latou faamatala mai ma loimata, o nei tamaitai uma e toatolu e lei leva ona tatala a latou faaipoipoga, ma o tulaga taitasi, sa le faamaoni o latou taitoalua ia i latou, ma o ia foi tulaga taitasi, na amata ona ola ae fatu o le tete’aga ma le agasala ona ua tosina atu i ponokalafi.

Faatasi ai ma lena folasaga lē manaia o la’u savali i le asō—o se savali e faigata ia te au ona tuuina atu—ua ou lagona ua pei lava au o Iakopo o anamua o le na fai mai, “Ua tigaina au ona ua ao ina ou faaalitino atu … i luma … e toatele … ua agavaivai ma ua mama o latou manatu, ma ua faapelepeleina.”¹ Ae e tatau lava ona tatou lototetele. Atonu o le lagona o se tamā pe o se tamāamatua foi na i totonu ia te au, ae o loimata o na tamaitai talavou na maligi ai o ma’ua loimata ma Sister Holland, ma o fesili na latou fesili mai ai ua ou saga tuufesili ai foi—Aisea lava ua anoanoai ai le amio leaga ua siomia ai i tatou ma aisea foi ua toatele ai tagata ma aiga, e aofia ai ma ni isi o le Ekalesia ua aafia ai, ma ua matuai mailaila leaga ai lava?

Ae ioe, na ou iloa lava se vaega o le tali i la’u fesili. O le tele o aso e osofaia ai i tatou uma e ni ituaiga o feau e saputu mai ia i tatou mai itu eseese. O itu mataga o ata tifaga, televise, ma pisinisi faamusika, ua lopala ai le lalolagi i gagana mataga ma uiga leaga o feusuaiga. O le mea e leaga ai, o le tautua lava lenei e tasi o le komepiuta ma le Initoneti e mafai ona ou faaaogaina e fai ai a’u galuega o talafaasolopito o aiga ma saunia ai na igoa mo galuega o le malumalu, e aunoa ma ni faamama ma le puleaina, e mafai foi e la’u fanau po o fanau a la’u fanau ona maua ai le tele o ata ma manatu mataga lea e mafai ona matuai faataumaoia ai e faavavau o latou mafaufau.

Manatua na fai mai na avā talavou, o le le faamaoni o a latou tane na amata i se tosina atu i ponokalafi, ae o gaoioiga lē mama, ua le na o se faafitauli a se alii ma e le na o tane foi ua agasala ai. O le matautia lea e oo atu i ai i le kiliki o se mausi—e aofia ai mea e tulai mai i se feiloaiga ma se tagata i luga o le initoneti—e le faailogaina se tagata, tane po o le tamaitai, laitiiti pe matua, faaipoipo pe nofo toatasi. Ma ina ia mautinoa e mafai ona mauagofie nei faaosoosoga, ua pisi ai lava le tiapolo e faalautele, pei ona latou ta’ua i le pisinisi, atu le mafai ona faaaoga o telefoni feaveai, taaloga vitio, ma laau MP3.

Afai e tuu lo tatou tatuuina o lala o lenei faafitauli ae ia fana tonu lava i le aa o le laau, e le o se mea e faateia ai, lo tatou tau atu o lafilafi solo ai iina le tuinanau. O le tuinanau o se upu e namu leaga ma e mautinoa lava o se autu namu leaga mo a’u e talanoaina, ae e i ai le pogai lelei e mafua ai i nisi o aganuu ona ta’ua o le agasala aupito matautia o “agasala matautia e fitu.”²

Aisea ua avea ai le tuinanau ma se agasala “matautia”? Ia, e faaopoopo atu i le faatamaiaina o o tatou agaga e ala i le tulieseina o le Agaga, ae ou te manatu o se agasala aua na te faaleagaina le sootaga aupito maualuga ma sili ona paia ua tuuina mai e le Atua ia i tatou i le olaga nei—o le alofa o se alii ma se tamaitai i le tasi ma le isi, ma le naunau o le ulugalii e aumai ni fanau i se aiga ua faamoemoe ina ia faavavau. Na fai mai se tagata o le alofa moni, e tatau ona aofia ai le manatu o le tumau mausali. O le alofa moni e tumau. Ae o le tuinanau e fesuisuiai e pei o le vave o le sueina o se itulau o ponokalafi pe tilotilo atu i le savali ane o se isi mea faitino ua faamoemoe mo le faamalieina o lagona malolosi, o le alii po o le tamaitai. O le alofa moni lea tatou te matuai fiafia lava i ai—e pei o au ia Tuafafine Holland; tatou te alagaina mai mea maualuluga. Ae ua faavasegaina le tuinanau o se uunaiga e toetoe ina a le mafai ona tofiofia e nana mai i isi—o le tuai lava ma le pogisa o le taimi o le lelei foi lena, ma se faitotoa e loka mau ne’i iloa mai. O le alofa e vave ai ona tatou aapa atu i le Atua ma isi tagata. Ae o le tuinanau, i le isi itu, e matuai aunoa ma se amioatua, ma e fiafia i le faamalieina o le tagata lava ia. O le alofa e oo mai ma lima agalelei ma se loto matala; o le tuinanau e na o le matelaina lava la te o mai.

Ua na o ni nai pogai nei ua faaleagaina ai le uiga moni o le alofa—a lē o mafaufauga po o se isi foi tagata—e matuai faatafuna lava. E faaumatia ai le mea e toeitiiti a tutusa lona taua ma le faatuatua i le Atua; o le i ai o le faatuatua ia i latou tatou te alolofa i ai. E luluina ai poutu o le faatuatuaina lea e faaalia pe fausia ai le alofa i le—taimi nei—po o le lumanai, ma e umi lava se taimi e toe fausia ai lena faatuatuaga pe a aveesea mai. Afai e faateteleina le leaga o lenei faafitauli, pe patino i se tagata o se aiga pe o se tulaga lautele pei o ni taitai filifilia, taitai o pisinisi, tagata iloga o faasalalauga, ma tagata lauiloa i taaloga, e le umi lava, ae tatou tautauina se faailo i se fale sa fausia e nonofo ai ni tagata amio lelei ma magafagafa, e faapea, “O loo avanoa le fale.”³

Pe tatou te nofo toatasi pe ua faaipoipo, laitiiti pe matua, sei o tatou talanoa mo sina taimi i auala e puipuia ai mai nei faaosoosoga, po o a lava foliga e oo mai ai. Atonu e le mafai ona tatou fofoina vaivaiga uma o le lalolagi i le asō, ae sei o tatou talanoa i ni gaoioiga patino e mafai ona tatou faia.

O le mea e aupito sili ona taua, amata i lou aluese mai i tagata, tusi ma tulaga o le a faatamaia ai oe. E pei ona silafia e i latou o loo tauivi ma mausa o le inu ava malosi, e matautia tele le malosi o faatosinaga o le latalata atu i le faaosoosoga. E faapena foi i tulaga o amioga mama. E pei o Iosefa i le fale o le avā a Potifara,⁴ ia tamoe ese—tamoe i se mamao e te mafaia e alu ese mai ai po o le a lava le mea ma po o ai foi o faatosinaina oe. Ma faamolemole, a e sola ese mai se vaaiga o faaosoosoga, aua nei toe mafaufau e te toe foi i ai.
Ia iloa o tagata ua noatia e filifili o mea moni ua fai ma vaisu, e masani ona tele atu le fesoasoani latou te manaomia nai lo lana lava fesoasoani, ma e ono aofia ai ma oe. Saili mo lena fesoasoani, ma ia talia. Talanoa i lou epikopo. Mulimuli i lana fautuaga. Talosaga mo se faamanuiaga faaleperisitua. Faaaoga mea ua ofo atu e le Tautua mo Aiga a le Ekalesia, pe saili isi fesoasoani faapolofesa talafeagai. Ia tatalo e le aunoa. Ole atu mo ni agelu e fesoasoani ia te oe.
Faatasi ai ma faamama i komepiuta ma se loka i lagona faananau, ia manatua na o le pau lava le puleaga autu moni o le olaga o le loto pulea. Ia faaaoga le loto pulea e oo lava i mea laiti e faafetauia oe. Afai e le talafeagai se ata o le televise, tape. Afai e mataga se tifaga, savali ese mai ai. Afai ua amata ona faia se fegalegaleaiga e le tatau ona faia, ia tuu loa. O le tele o nei faatosinaga atonu e le leaga, ae e mafai ona faanenefuina ai a tatou faaiuga, faapogisaina ai o tatou faaleagaga, ma taitai atu ai i se mea faatiapolo. Fai mai se alagaupu anamua, o se faigamalaga i ni maila se tele e amataina i se laa e tasi,⁵ o lea ia vaai faalelei ai lau laa.
E pei o gaoi i le po, e mafai e mafaufau lē lelei ona saili se ala e oo mai ai i o tatou mafaufau. Ae e le faapea la tatou te faatagaina i totonu, avatu i ai se iputi ma ni keke, ma ta’u i ai le mea o loo teu ai ipu siliva! (E le tatau lava ona e avatua i ai se ipu.) Ia ato i fafo ia mea leaga! Ia suia mafaufau leaga i vaaiga lelei ma mea fiafia e manatuaina, vaai faalemafaufau i foliga o e alolofa ia te oe ma o le a nutimomomo pe a e faia se mea latou te faanoanoa ai. E silia ma le toatasi se alii ua laveaiina mai le agasala po o le faavalevalea ona o le manatuaina o foliga o lona tina, lana ava, po o lona atalii/afafine o loo faatalitali mai mo ia i le fale. Po o a lava mafaufauga e oo atu ia te oe, ia mautinoa e taliaina i lou loto i le na o le valaauliaina. E pei ona fai mai se tasi o fatusolo anamua, ia faafoe e lou loto ou mafaufauga.⁶
Atiina ae ma ia e i ai i nofoaga e i ai le Agaga o le Alii. Ia mautinoa ia aofia ai i na nofoaga lou lava fale po o le potu e te mautotogi ai, ia pulea le ituaiga faatufugaga, musika, ma tusi faitau e umia iina. Afai ua maua ou faaeega paia, ia e alu soo i le malumalu pe a mafai. Ia manatua o le malumalu e faaauupegaina ai oe “i le mana [o le Atua], … [ma siomia [oe] i [Lona] mamalu … a e leoleoina [oe] e [ana] au agelu.⁷ Ma a e alu ese mai le malumalu, ia e manatua faailoga ma folafolaga e te alu ma oe, ia aua lava nei e tuueseina pe faagaloina.

O le toatele lava o tagata e oo i puapuaga, e iu ina fetagisi ma faapea mai, “O le a ea le mea na ou mafaufau i ai?” Ia, po o le a lava se isi mea na latou mafaufau i ai, latou te lei mafaufau ia Keriso. Ae i le avea ai ma tagata o Lana Ekalesia, tatou te tautino i Aso Sa uma o o tatou olaga e tauave i o tatou luga Lona suafa ma folafola atu e “manatua pea o Ia.”⁸ O lea, ia tatou galulue malosi atili ai e manatua o Ia—ae maise lava na Ia “tauave o tatou tiga, ma tauave o tatou faanoanoa … [ma] na manu’a o ia ona o a tatou solitulafono; … o ona faalavalava foi ua malolo ai tatou,”⁹ E mautinoa lava e tatau ona taialaina ai a tatou amioga i se auala iloga pe a tatou manatuaina o taimi uma lava tatou te solitulafono ai, e le gata ina tatou faaonoono ia i latou tatou te alolofa i ai ae tatou te faatiga foi ia te Ia, o le e alofa faapelepele ia i tatou. Ae afai tatou te agasala, po o le a lava le ogaoga o lena agasala, e mafai ona laveaiina i tatou e lena lava tamalii, o Le o loo tauaveina le igoa e tasi ua foaiina mai i lalo o le lagi e mafai ona faaolaina ai soo se alii po o se tamaitai.¹⁰ A taulimaina a tatou solitulafono ma ua atuatuvale o tatou loto i le tiga moni, talosia ia tatou faataitai uma ia Alema na salamo ma valaau atu i lana alaga o le suia o le olaga: “Iesu e, le Alo o le Atua, ia e alofa mai ia te au.”¹¹

Uso e ma tuafafine, ou te alofa ia te outou. E alolofa Peresitene Thomas S. Monson ma le Usoga ia te outou. Ae o le mea e sili atu ona taua, e alofa lo outou Tama oi le Lagi ia te outou. Sa ou taumafai ou te tautala atu i le asō i le alofa—alofa mao’i, alofa moni, faaaloalo i ai ma lona faaalia sa’o i faapotopotoga lelei ua iloa e tagata; o lona paia i le va o se alii ma se tamaitai ua faaipoipoina ma aiga na foafoaina ona o taunuuga o le alofa. Na ou taumafai e talanoa atu i le faaalia o le alofa faaola, o le faaaliatino o le alofa moni, lea e oo mai ia i tatou e ala i le alofa tunoa o Keriso lava Ia. Sa ou manaomia foi lo’u ta’ua o le tiapolo, o le amioleaga, o le tamā o pepelo uma ma le tuinanau, o lē na te faia mea uma na te mafaia e faaseseina ai le alofa moni, e upuleagaina ai pe faataumaoiina ai le alofa moni po o fea lava ma po o fea foi le taimi la te fetaia’i ai. Ma ua ou ta’ua foi lona manao e faaumatia i tatou i lenei faagasologa pe a fai na te mafaia.

A tatou feagai ma faaosoosoga faapena i o tatou aso, e tatau ona tatou tautino atu, e pei ona sa faia e le taulealea o Nifae i ona foi faaosoosoga: “[O le a] le toe ulu mai lē ita mai ia te au i lo’u agaga.”¹² E mafai ona tatou teena le tiapolo. Afai tatou te matuai mananao lava i ai, e mafai ma o le a a’oa’ia lena fili e le mana faaola o le Alii o Iesu Keriso. Ma le isi, ou te folafola atu ia te outou, e mafai ma o le a toe susulu malosi atu le malamalama o Lana talalelei e faavavau i le mea na tatou popole ai e faapea, ua matuai pogisa ma leai ai se faamoemoega o le olaga. Tau ina ia fai mo i tatou le olioli o lo tatou faamaoni i le tulaga aupito maualuga ma sili ona lelei i totonu o i tatou a o tatou faatumauina lo tatou alofa ma a tatou faaipoipoga, o tatou tagata ma o tatou agaga i le mama e pei ona tatau ona i ai, o la’u tatalo lea i le suafa o Iesu Keriso, amene.