“O Loo Soifua o Ia! Ia Viia Lona Suafa e Faavavau!”
O lo tatou malamalama i le Togiola a Iesu Keriso ma le faatuatua i ai o le a maua ai le malosi ma le mana o loo manaomia mo se olaga manuia.
I le taeao o le Eseta, ua atofaina lena aso paia i le lalolagi uma o Kerisiano e faamanatu ai le manumalo o Iesu Keriso i le oti. O Lona toetu na motusia ai le mea na oo mai i lena taimi o avea ma filifili e le motu o le oti. Na Ia tatalaina le ala e mafai ai e fanau taitasi a le Tama Faalelagi e fananau mai i le lalolagi, ona maua le avanoa e toetutu ai mai le oti ina ia toe ola ai.
Ai lava se olioli o lo tatou Tama i le Lagi i lena aso paia, ina ua luluina e Lona Alo usiusitai atoatoa, e agavaa atoatoa, ia filifili o le oti. O le a le faamoemoega e faavavau o le fuafuaga o le fiafia a le Tama pe a na le faatinoina e ala i le Togiola e le iu ma faavavau a Lona Alo usitai ma le mamalu? Pe ana faapea o le oti o le mutaaga lea o le ola ma leai se tasi e toetu, faamata o le a le faamoemoega e faavavau o le Foafoaga o le lalolagi? Oka se taimi ina a viia na i ai lena taeao mo i latou uma na malamalama i lona taua.
O le Eseta o le vaitau paia lena e liliu atu ai loto o Kerisiano faamaoni taitoatasi i le lotofaafetai i lo tatou Faaola pele. O se vaitau e aumaia ai le filemu ma le olioli i tagata uma o ē alolofa ia te Ia, ma e faaalia e ala i le usiusitai i Ana poloaiga. O le Eseta e aumaia ai mafaufauga ia Iesu, o Lana Togiola, Lona Toetu, ma Lona alofa. Ua toetu mai o Ia mai le oti “ma le faamalologa i ona apaau.” (Malaki 4:2; 3 Nifae 25:2) Oi, tatou te matua manaomia uma lava lena faamalologa e mafai e le Togiola ona aumaia. O la’u savali, o le savali o le faamoemoe e faavae i mataupu faavae ua faaolaola mai i aoaoga a le Faiaoga o Faiaoga, o Iesu Keriso.
E mafai e tagata o Le Ekalesia a Iesu Keriso o le Au Paia o Aso e Gata Ai ona malamalama atoatoa i le lautele ma le loloto o le faamalologa ua aumaia e Lana Togiola, aua ua ia te i tatou le atoaga o Lana aoaoga faavae. Ua tatou iloa, o le mea sa Ia faia ma le naunautai ma le ogaoga o puapuaga ma le taulaga, o le a aafia ai i tatou e le gata i lenei olaga ae faapea foi i le faavavau atoa.
O le Eseta lenei, a’o outou manatuaina le Toetu ma le tau na totogiina ma le meaalofa na tuuina mai e ala i le Togiola, mafaufau i mea o loo aoao mai e tusitusiga paia e uiga i na mea paia. O le a faamalosia lau molimau faaletagata lava ia i le moni. E tatau ona sili atu i le na o ni mataupu faavae tou te taulotoina. E tatau ona avea ma sou itutino e avea ma se puipuiga malosi e faasagatau atu ai i le tai fana’e o mea inosia ua pesia ai lo tatou lalolagi.
Na folafola mai e le perofeta o Liae se mea moni maoae ina ua ia ta’ua: “O lea e oo mai ai le togiola talu le Mesia Paia; aua ua tumu o ia i le alofa tunoa ma le upumoni. Faauta, e avae o ia e ia lava e fai ma taulaga ona o agasala, e faaatoatoa ai iuga o le tulafono ia te i latou uma o e o i ai le loto momomo ma le agaga salamo; a e leai se tasi e mafaia ona faaatoatoaina ai iuga o le tulafono” (2 Nifae 2:6–7). Ua faailoa mai i lena mau, e foliga mai i e faamaualuga ma faasausili e lei i ai lava se Togiola na faia.
O loo soifua Iesu Keriso. O Ia o lo tatou Faaola, o lo tatou Togiola. O Ia o se tamalii mamalu, ua toetu. E ia te Ia le mana e momoli mai ai le alofa e mamana naua, e matua lofituina e le gafatia e le malosi o le laulaufaiva o le tagata ola ona faamatalaina atoatoa. Na Ia ofoina atu Lona soifua e motusia ai noataga o le oti. O Lana Togiola ua atoatoa ai le faatinoga o le fuafuaga o le fiafia a Lona Tama i le Lagi.
Na faatino e Iesu le faapaleniina o le faamasinoga amiotonu ma le alofa tunoa e faalagolago i lo tatou usiusitai i Lana talalelei. O Ia o le malamalama mo tagata uma. O Ia o le punavai o upumoni uma. Na Ia faataunuuina Ana folafolaga uma. O i latou uma e usiusitai i Ana poloaiga, o le a mauaina faamanuiaga mamalu silisili e le mafaamatalaina.
A aunoa ma le Togiola, e le mafai ona faatinoina atoatoa le fuafuaga o le fiafia a le Tama i le Lagi. O le Togiola tatou te maua uma ai le avanoa e faatoilalo ai taunuuga o mea sese tatou te faia i le olaga. A tatou usitai i se tulafono, ua tatou maua se faamanuiaga. A tatou solia se tulafono e leai se mea o totoe mai le usitai na muamua, e faamalie ai iuga o le faamasinoga mo lena tulafono ua solia. O le Togiola a le Faaola ua mafai ai ona tatou salamo i soo se lē usiusitai, ma sao mai ai i faasalaga semanu e poloaiina ai i tatou e le faamasinoga.
O lo’u ava ma lo’u agaga faafetai mo le Togiola a Lē Paia o Isaraelu, le Alii o le Filemu, ma lo tatou Puluvaga, e faalauteleina pea lava pea a o ou taumafai ia ou malamalama atili i ai. Ua ou iloaina e le mafuatiaina i se mafaufau o se tagata ola, e le mafai foi e se laulaufaiva o se tagata ona faamatalaina atoatoa, le taua atoatoa o mea uma na faia e Iesu Keriso mo fanau a lo tatou Tama Faalelagi e ala i Lana Togiola. Ae peitai, e matua taua lava ona tatou taufai aoaoina mea tatou te mafaia e uiga i ai. O le Togiola o le elemene taua lea o le fuafuaga o le fiafia a lo tatou Tama i le Lagi, ana leai semanu e le mafai ona faatino lena fuafuaga. O lou malamalama i le Togiola ma le malamalamaaga na te aumaia mo lou olaga, o le a matua faateleina ai lou faaaogaina ‘anoa o le silafia uma, aafiaga, ma tomai e te mauaina i lenei olaga.
Ou te talitonu e aoga le taumafai e vaai faalemafaufau i le mea na manaomia ai le Togiola e le Tama ma Lona Alo naunautai. O luitau e tolu na feagai ma le Faaola o:
Muamua, o se lagona tele o le tauaveina o le tiute; aua sa Ia silafia a lē faatinoina i le atoatoa, e leai se tasi o fanau a Lona Tama e mafai ona toe foi atu ia te Ia. Semanu o le a faaaunuua e faavavau mai Lona afioaga, aua o le a leai se auala e salamo ai aua e leai ni tulafono e solia ma ni mea eleelea e mafai ona ulu atu i le afioaga o le Atua. Semanu e le taunuu le fuafuaga a Lona Tama, ma semanu e pulea ma faataumaoia e faavavau fanau agaga taitoatasi e Satani.
Lona lua, i Lona mafaufau ma le loto e mama a’ia’i, sa tatau ona Ia lagonaina e Ia lava ia taunuuga o mea uma e ono fetaiai ma le tagata, e oo lava i agasala e aupito matautia ma inosia.
Lona tolu, e tatau ona Ia onosaia le osofaiga aasa a ‘au a Satani a’o tuleia faaletino ma faalelagona i le mutaaga o lona onosai. Ona o ni mafuaaga tatou te le malamalama atoa i ai, a o i ai i le si’ui o Lona malosi, i le taimi ua aupito moomia ai e le Faaola le fesoasoani, sa tuu atu ai e Lona Tama ia te Ia e tauaveina i Ona lava luga, le tiutetauave mamafatu i Lona Ia lava malosi ma le mana.
Ua ou taumafai e vaai faalemafaufau i le tiga matuitui atonu na oo i lo tatou Tama ina ua alaga atu le Faaola mai le satauro, “Lo’u Atua e, lo’u Atua, se a le mea ua e tuulafoai mai ai ia te au?” (Mataio 27:46, Mareko15:34). Ou te le talitonu na tuulafoaiina e le Tama i le Lagi Lona Alo i luga o le satauro. Ou te talitonu na faaosofia lena alaga, ina ua lagona e le Faaola ua aveesea mai le lagolago sa Ia sapi ai i taimi uma ma Lona Tama. Sa silafia e Lona Tama e manaomia ona faataunuuina atoatoa ma mae’a le Togiola e le Faaola lava Ia e aunoa ma se lagolago mai fafo. E lei tuulafoaiina e le Tama Lona Alo. Na Ia faia ia mafai e Lona Alo e atoatoa, ona manumalo i fua e faavavau o le Togiola.
E leai lava se tasi o i tatou e mafai ona talisapaia atoatoa i le olaga nei, ia taunuuga aoga atoatoa o le Togiola.
O loo i ai se tulaga e matua manaomia mo i tatou taitoatasi ia faamalosia lo tatou malamalama i le taua o le Togiola a Iesu Keriso, ina ia avea ai i tatou ma faavae e le maluelue e fausia ai o tatou olaga. A o faateleina le gaogao o le lalolagi i tulaga faatauaina e faavae ai, ma a o faateleina le lafoaia o le mamalu, mama, ma le tulaga atoatoa ona o le tulimataiga o tuinanau o le lalolagi, o lo tatou malamalama i le Togiola a Iesu Keriso ma le faatuatua i ai o le a maua ai le malosi ma le mana o loo manaomia mo se olaga manuia. O le a aumaia ai foi le mautinoa i taimi o tofotofoga ma le filemu i taimi o le fememea’i.
Ou te faamalosiau atu ma le malosi ia amata sau lava fuafuaga e te suesue ai ina ia e malamalama lelei ai ma talisapaia ia taunuuga lē mafaatusalia, faavavau, lē i’u o le faataunuuina atoatoa e Iesu Keriso o Lona valaauga paia faalelagi, o lo tatou Faaola ma le Togiola. O le mafaufau loloto faaletagata lava ia i mau e o faatasi ma le tatalo mai le loto, o le a faamalosia ai lou malamalama ma le talisapaia o Lana Togiola e le mafaatauina. O se tasi auala mamana e aoao ai ia Iesu Keriso ma Lana Togiola, o le alu pea lava pea i le malumalu.
Ia taitasi i tatou ma faafou lo tatou naunautaiga e aoao atu mataupu faavae moni i totonu o le paia o o tatou malu. A tatou faia lena mea, o le a tatou tuuina atu le avanoa aupito sili mo le fiafia o tagata ua tuuina mai i la tatou tausiga. Faaaoga le Ekalesia o se meafaigaluega amiotonu e faamalosia ai le aiga, ae ia silafia o le avea ai o ni matua, ua ia i tatou le tiutetauave faavae ma le avanoa e taialaina ai e le Alii i le tausiga o fanau agaga ua Ia tuuina mai i la tatou tausiga.
O le taua o le aoaoina o upumoni i le fale e faamuamua. E taua le Ekalesia, ae o le fale e tuu atu ai e matua le malamalama moomia ma le taitaiga i le fanau. Na tautino moni mai lava, o valaauga aupito taua i le olaga nei ma le faavavau o valaauga o se tamā ma se tina. E i ai taimi o le a faamalolo ai i tatou mai isi tofitofiga uma e tuu mai ia i tatou, ae le faamaloloina lava i le avea ai ma se tamā ma se tina.
A e mafaufau loloto, —e le na ona faitau, ae mafaufau ma fefulisa’i i lou mafaufau ia mau, —o le a faamautu e le mana o le Agaga Paia ia upumoni i lou mafaufau ma lou loto, o se faavae mautu i taimi faaletonu nei ua tatou ola ai. I le avea ai ma ni matua, saunia lau fanau mo luitau o le a latou fetaiai. Aoao atu ia i latou upumoni, faamalosiau ia i latou e ola ai ona manuia lea o i latou tusa lava po o le a le matautia o le luluina e le lalolagi.
Ia tonu i lenei Eseta, e avea le Alii o Iesu Keriso ma totonugalemu o lou aiga. Ia mautinoa o faaiuga uma lava e te faia, pe faaleagaga pe faaletino ia taialaina i le mafaufauga “Mata o le a le mea e finagalo le Alii o Iesu Keriso ou te faia?” A avea le Faaola ma totonugalemu o lou aiga, e faatumulia i le filemu ma le toafimalie. E i ai se agaga o le mautinoa toafimalie e sasala i le fale lea e lagonaina e le fanau faapea foi tagata matutua.
O le ala sili e faia ai se suiga tumau mo le lelei, o le avea lea o Iesu Keriso ma ou faataitai ma Ana aoaoga e fai ma ou taiala i le olaga.
Pe afai sa e le usitai i Ana poloaiga ma ua e lagona lou le agavaa, ia e iloa o le ala lea na ofo mai ai e le Alii, o Iesu Keriso Lona soifua. E ala i Lana Togiola na Ia tatalaina ai e faavavau le avanoa e faatoilalo ai na mea sese, ia salamo ai mai filifiliga sese, ma ia manumalo ai i aafiaga le lelei o se olaga e feteenai ma Ana aoaoga.
E alofa le Faaola ia i tatou taitoatasi, ma o le a [Ia] faia ina ia mafai ona faamalieina o tatou manaoga uma, pe a tatou agavaa e ala i le usitai mo o tatou faamanuiaga uma e finagalo o Ia tatou te maua i lenei lalolagi. Ou te alofa ma faamemelo mo Ia. I le avea ai o Sana auauna ua faamaonia, ou te molimau atu ma le paia ma faatasi ai ma le malosi uma o lo’u tagata o loo soifua o Ia, i le suafa o Iesu Keriso, amene.